NAMAGABA 21 - WƖA TENIŊ1 Kuoro tʋɔbɩɩnaa kala hɛ La Tɩɩna nɩsɩŋ lɛ nɛ. Ʋ yie kɛnʋ dagɛ wombii-la kala ʋ sɩ cho dɩ ʋ to, a nagɛ lɩɩŋ sɩɩ to lɩɩ-libe ŋɩɩ. 2 Nuhuobiine yie bɩɩnɛ arɩ ʋ ŋaa wɩɩkala ʋ bʋa lɛ nɛ, ama La Tɩɩna yie kɛŋ nʋʋkala tʋɔbɩɩnaa jeŋise na nɛ. 3 Dɩ nʋʋ nɩɩ ŋaa wɩaa ba bʋa lɛ a kɛŋ wʋtɩtɩɩ, ŋɩɩ nɩɩ tɔrɛ La Tɩɩna tʋɔŋ a kɩɩ nʋʋ sɩ kpʋ pʋsʋŋ a ŋaa Wɩɩsʋlʋŋ pʋ. 4 Nɩbɔmʋŋ wɩɩŋ kala nɛ ŋaa sɩɩ-duoŋ arɩ babii-ballɩŋ, ŋɩɩ saa ŋaa wʋbɔŋ nɛ. 5 Dɩ ŋ bɩɩnɛ woruŋ aŋ tɩŋ arɩ sɩɩfɩɛsɩŋ, ŋ jaŋ na ʋ nyʋʋrʋŋ yʋgɛ. Ama nɩɩ-la-na sɩ pesee ŋaa wɩaa, ʋ dɩ sunnuŋ nɛ. 6 Dɩ ŋ nɛ gɩrɩma a dʋa kɩaa, ba nagɛ nyʋɔsʋŋ nɛ, aŋ bɩra ŋaa bɛrɛ́ ma sɩ jaŋ leŋ dɩ ŋ sʋʋ. 7 Nɩbɔŋŋɔɔ tɛrɩsɩŋ nɛ jaŋ gʋra cheiba, bɛɛ wɩaa ba vɩa dɩ ba ŋaa wɩaa ba bʋa lɛ nɛ. 8 Nɩalɩŋ sɩɩ chei wɩaa wʋŋaalaa kala golibo nɛ, ama nɩalɩŋ sɩ bɩ wɩaa ka chei wʋŋaalaa kala tʋʋla nɛ. 9 Dɩ ŋ nɛ yaara chʋchʋa lusuŋ nyuŋ, ʋ nɛ kpɩa ŋ dɩ haala sɩ cho yuosuŋ sɩ pɛ dɩa. 10 Nɩbɔmʋŋ hɩɛnɛ wʋbɔmʋŋ ŋaanɩŋ nɛ, ʋ paala bɩ nɩɩ-la ma sɩ jʋʋ kpɩkpagʋ nenige ka fá. 11 Dɩ ba nɛ dɔgɩsɛ babii-balɩŋ, nɩɩ-la sɩ bɩ wɩaa jɩŋ woruŋ yie gʋnnɛ wʋjɩmɩŋ nɛ. Dɩ ba nɛ dagɛ wʋjɩnna, ʋ yie gʋnnɛ wʋjɩmɩŋ pɛ nɛ. 12 Wɩa ŋaa tʋɔpʋl Tɩɩna nɛ, ʋʋ beŋ wɩɩkala sɩ hɛ nɩbɔmʋŋ dɩa lɛ nɛ. Ʋ jaŋ cheyu dɩ ʋ pɩŋ jikpeeŋ. 13 Dɩ nʋʋ nɛ vɩa dɩ ʋ nɩɩ summo yele, ʋ ma jaŋ yel, ka nʋʋkala bɩ jaŋ jegili ʋ teeŋ. 14 Dɩ ŋ nɛ joŋ kʋŋ a lʋara ŋaa zile pɩ nʋʋ sɩ na baanɩŋ ŋ nyuŋ, ʋ baanɩŋ jaŋ wuo fɩɛlɛ. Dɩ ŋ nɛ lʋara kpal nʋʋ ma, ʋ baanɩŋ jaŋ fɩɛlɛ. 15 Dɩ wʋtɩtɩɩ nɛ chɩna, tʋɔpʋl tɩŋŋaa tʋɔŋ yie tɔrɛ nɛ, ama fawʋllʋŋ yie faasa jʋʋ wʋbɔŋ ŋaaraa-na nɛ. 16 Nɩɩ-la kala sɩ yeŋŋi wombii-la ʋ sɩ jaŋ to jɩŋ wɩaa sɩaa lɛ, ʋ pɛ nɩsʋʋnʋŋ tʋɔŋ nɛ. 17 Nɩɩ-la kala sɩ cho sɩma kɩŋkɛŋ nɛ jaŋ nyaabɛ. Nɩɩ-la kala sɩ cho sɩnɩŋ arɩ nii-sɩŋ kɩaa kɩŋkɛŋ bɩ jaŋ kɛŋ kʋŋ. 18 Nɩbɔmʋŋ nɛ jaŋ laa tʋɔpʋl tɩɩna nyuŋ a na hɛɛŋ, dɩ nɩɩ-la ma sɩ bɩ wʋtɩtɩɩ kɛnɛ laa nɩɩ-la wɩaa sɩ tʋʋla nyuŋ a na hɛɛŋ. 19 Ŋ sɩ hɛ tintee-hɩlɩŋ lɛ, ʋ nɛ kpɩa ŋ dɩ haala sɩ cho yuosuŋ a kɛŋ baanɩŋ sɩ pɛ dɩa. 20 Wʋjɩnna yie tʋɔlɛ tʋɔtɔrɛ kʋdiilee arɩ nʋʋŋ nɛ ʋ dɩa lɛ. Ama nɩyaara-na yie joŋ kʋŋkala ʋ sɩ kɛnɛ dii nɛ. 21 Nɩɩ-la kala sɩ kire to tʋɔpʋla arɩ chonuŋ harɩŋ kɛŋ mɩɩsɩŋ nɛ, a kɛŋ dʋa, nɩaa ma zizilu. 22 Wʋjɩnna nɛ yie yuo nɩduoruŋ taŋ, a yigi ba dɩ-duoru-la ba sɩ joŋ ba yɩɛlaa hɛ a lo. 23 Nɩɩ-la sɩ jɩŋ ʋ niiŋ kɛnɩŋ, kɛŋ ʋ tɩtɩa nɛ dɩ ʋ sɩ́ wɩaa jʋʋ. 24 Babii-balɩŋ arɩ dagɛ-ŋ-tɩtɩɩ tɩɩna, ba kɛnʋ yɩyɩrɛ ‘Sɩɩ-duo tɩɩna nɛ’. Ʋ bigisi ʋ tɩtɩa lɛ kikieli lɛ. 25 Kɩalɩŋ yaarɩ-wɩɩ tɩɩna sɩɩ hɩɛnʋ nɛ jaŋ kpʋʋ, bɛɛ wɩaa ʋ bɩ chɛ dɩ ʋ tɩŋ. 26 Bʋa na-kala ʋ yie chɩchɛ dɩ ʋ kɛŋ kɩaa yʋgɛ nɛ. Ama tʋɔpʋl tɩɩna-na kɛŋ zile kɩŋkɛŋ nɛ a joŋ kɩaa pɩpɩ nɩaa. 27 La Tɩɩna bɛrɛ nɩbɔmʋŋ Wɩɩsʋlʋŋ kɩaa nɛ, a saa bibeŋ dɩ ʋ kɛŋ kɩalɩŋ kɔ arɩ tʋɔbɩɩŋ bɔmʋŋ. 28 Wʋnyɩɛrɩ wʋpɛ naara jaŋ lɛl. Nɩɩ-la ma kala sɩ jegile nɩɩ ʋ teeŋ, ba jaŋ cheyu a kaa mʋ wuu. 29 Nɩbɔmʋŋ yie fugisi arɩ ʋ jɩŋ wɩɩkala nɛ, ama tʋɔpʋl tɩɩna-na yie bɩɩnɛ wɩaa nɛ aŋ-na ŋaa. 30 Ŋ cho ŋ kɛŋ wʋjɩmɩŋ koo ŋ jɩŋ wɩaa sɩaa koo a bɩbɩɩnɛ wɩaa woruŋ ɛɛ kala, ŋɩɩ bɩ jaŋ wuo leŋ dɩ ŋ chɩŋ La Tɩɩna sɩpaaŋ. 31 Ŋ jaŋ wuo kɛŋ jaaba a ŋaa siri gbɛrɛ dɩ ŋ yuo laalɩŋ, ama La Tɩɩna dʋndʋŋ nɛ jaŋ wuo leŋ dɩ ŋ yuo laal-la a dii. |
©Ghana Institute of Linguistics Literacy and Bible Translation 1984, 2014
Wycliffe Bible Translators, Inc.