NAMAGABA 2 - WƖA TENIŊ

Wʋzɔmɔ-la ŋ sɩ jaŋ na dɩ ŋ nɛ kɛŋ wʋjɩmɩŋ

¹ Mɩ bii, dɩ ŋ nɛ sɛɩ mɩ wɩaa, a joŋ mɩ wʋdagaa hɛ ŋ tʋɔŋ lɛ,

² a jegilee nɩɩ wʋjɩmɩŋ, a suri ŋ tʋɔŋ a chɩchɛ dɩ ŋ jɩŋ wɩaa bʋbʋɔŋ,

³ dɩ ŋ nɛ sɛnɛ yele chɩchɛ dɩ ŋ jɩŋ wɩaa sɩaa, a faasa yele chɩchɛ dɩ ŋ jɩŋ wɩaa bʋbʋɔŋ,

⁴ dɩ ŋ nɛ bee chɩchɛ wɩaa deemba a nagɛ ŋ sɩɩ chɛ hɔpʋla ŋɩɩ, a gbille chɩchɛba a nagɛ dʋa sɩ faa,

⁵ ŋɩɩ lɛ nɛ ŋ jaŋ jɩŋ La Tɩɩna ziliŋ bʋbʋɔŋ, aŋ pɛ gʋnnɛ wɩaa a mʋ tɩgɛ Wɩa lɛ.

⁶ La Tɩɩna nɩɩ pa wʋjɩmɩŋ. Ʋ niiŋ lɛ nɛ ŋ yie to a kɛŋ wʋjɩmɩŋ a pɛ jɩŋ wɩaa bʋbʋɔŋ.

⁷ Ʋ leŋe tʋɔpʋl tɩŋŋaa wɩaa vɩvɛŋ woruŋ nɛ. Ʋ nɩɩ pɔ nɩalɩŋ sɩ kɛŋ wʋtɩtɩɩ aa tou.

⁸ Ʋ nɛ chu tɔ nɩalɩŋ sɩ kɛŋ wʋtɩtɩɩ a pɔ ʋ nɩalɩŋ sɩ kɛŋ wʋtɩtɩɩ wombiee.

⁹ Dɩ ŋ nɛ jegili mɩ teeŋ, ŋ jaŋ jɩŋ wɩalɩŋ sɩ ŋaa wʋtɩtɩɩba, arɩ wombii-la kala sɩ zɔmɔ.

¹⁰ Ŋ jaŋ jɩŋ wɩaa, dɩ wʋjɩmɩɩ-la leŋ dɩ ŋ kɛŋ tʋɔtɔrʋŋ.

¹¹ Ŋ tʋɔbɩɩnaa jaŋ pɔŋ woruŋ, wʋjɩmɩŋ jaŋ pɔŋ.

¹² Wʋjɩmɩŋ jaŋ lɩɩsɩŋ wʋbɔŋŋɔɔ ŋaanɩŋ lɛ, a lɩɩsɩŋ wʋnyɩɛraa ma nɩsɩŋ lɛ,

¹³ nɩalɩŋ sɩ vɩa tʋɔpʋl wombiiŋ aŋ mɩɩra hɛ birimiŋ tʋɔŋ a ŋɩŋaa wʋbɔŋŋɔɔ,

¹⁴ nɩalɩŋ sɩ yie ŋaa wʋbɔŋŋɔɔ ka ba tʋɔŋ tɔrɛ a jʋjʋɔsɛ wʋbɔŋŋɔɔ ŋaanɩŋ lɛ,

¹⁵ nɩalɩŋ wombiee sɩ bɩ tʋʋla, a bɩ wʋtɩtɩɩ kala kɛnɛ.

¹⁶ Wʋjɩmɩŋ jaŋ lɩɩsɩŋ halɩɩla nɩsɩŋ lɛ, a lɩɩsɩŋ hachɔrʋmʋŋ sɩɩ chɛ ʋ nyɩsa kɛnɩŋ,

¹⁷ haal-la sɩ vɩa ʋ hatol bala, a yʋ nii-la ʋ sɩ hɛ Wɩa sɩpaaŋ.

¹⁸ Dɩ ŋ nɛ mʋ ʋ dɩa, ʋ naga ŋ sɩɩ mʋ lee sʋʋŋ sɩ hɛ nɛ, a bɩra nagɛ ŋ sɩɩ mʋ lɛlɛɛ-jaŋ.

¹⁹ Nʋʋkala sɩ mʋ ʋ teeŋ bɩ jaŋ mɩɩrɛ, ʋ bɩra bɩ jaŋ kɛŋ mɩɩsɩŋ.

²⁰ Ŋɩɩ wɩaa, to wombii-la nɩzɔŋŋɔɔ sɩɩ to, to tʋɔpʋl tɩŋŋaa wombiiŋ.

²¹ Nɩalɩŋ sɩɩ ŋaa wɩaa ba bʋa lɛ jaŋ hɛ tinteeŋ lɛ, nɩalɩŋ sɩ bɩ wʋcheeli kɛnɛ ma jaŋ ka ʋ lɛ.

²² Ama ba jaŋ keri nɩbɔŋŋɔɔ ta tinteeŋ lɛ, nɩalɩŋ sɩ bɩ wʋtɩtɩɩ kɛnɛ jaŋ lɛl tintee-la lɛ.