NAMAGABA 19 - WƖA TENIŊ1 Nʋʋ sɩ ŋaa nyaabʋ aŋ bɩ wʋcheeli kala kɛnɛ, ʋ nɛ kpɩa nʋʋ sɩ ŋaa nɩyaarɩ aŋ nyɩnyɩɛ wɩaa. 2 Nʋʋ sɩɩ chel dɩ ʋ ŋaa wɩɩ, aŋ bɩ wʋjɩmɩŋ kɛnɛ, ŋɩɩ bɩ zɔŋ. Nʋʋ sɩ pese ŋɩŋaa wɩaa ka perigi nɛ. 3 Nuhuobiine yaarɩŋ nɛ yie cheyu, aŋ ka ʋ mɩɩra joŋ cheeriŋ pɩ La Tɩɩna. 4 Kɩaa tɩɩna nandɔnsʋŋ yie yʋgɛ nɛ, ama summo-na nandɔŋɔ yie vɩaʋ nɛ. 5 Ba bɩ jaŋ leŋ wʋnyɩɛrɩ wʋpɛ-naara pɛɩ. Nɩɩ-la kala sɩɩ nyɩɛ wɩaa bɩ jaŋ fori. 6 Nʋʋkala yie chɩchɛ dɩ nɩbalɩŋ cho ʋ wɩaa nɛ. Zile tɩɩna ŋaa nʋʋkala nandɔŋ nɛ. 7 Summo naambiiriŋ ma tɩtɩa paala bɩ ʋ cho, a saa bibeŋ ʋ nandɔnsʋŋ, ba yie vɩaʋ nɛ. Ʋ yie kire to ba harɩŋ a sʋsʋl, ama ʋ bɩ baa na. 8 Nɩɩ-la kala sɩ kɛŋ wʋjɩmɩŋ, ʋ cho ʋ tɩtɩa nɛ. Nɩɩ-la sɩɩ chɛ dɩ ʋ jɩŋ wɩaa sɩaa jaŋ dʋa. 9 Ba bɩ jaŋ leŋ wʋnyɩɛrɩ wʋpɛ-naara pɛɩ. Nɩɩ-la kala sɩɩ nyɩɛ wɩaa jaŋ lɛl. 10 Nɩyaarɩŋ bɩ maga dɩ ʋ hɔŋ sɩma leriŋ, a saa bibeŋ yomo sɩ jaŋ kɛŋ doluŋ sɩpaalaaraa nyuŋ. 11 Nuhuobiine wʋjɩmɩŋ nɛ yie leŋ ʋ kɛŋ kenyiri. Ʋ wɩɩŋ nɛ dɩ ʋ ŋmoo tɔ nɩaa wʋcheelee a laa yɩrɩŋ. 12 Kuoro baanɩŋ nɛ sie, ʋ yie nagɛ naachigiŋ sɩɩ huosu nɛ. Ama dɩ ʋ tʋɔŋ nɛ tɔrɔ nɩa nyuŋ, ʋ yie nagɛ nyalɩŋ sɩ nyala hɛ yaŋ lɛ nɛ. 13 Bii-yaarɩŋ yie leŋ ʋ nyɩmma tel nɛ. Ha-yuo hɛɛrɛ nagɛ duonuŋ sɩɩ pʋʋsʋ a bɩ huo nɛ. 14 Bie yie dii ʋ nyɩmma dɩa arɩ ʋ dʋa nɛ, ama La Tɩɩna nɛ yie joŋ ha-tɛŋɛ pɩ nɩa. 15 Yarɩwɩɩ tɩɩna yie pɩŋ doŋ nɛ a yuo naaŋ bʋa na-kala. Losuŋ jaŋ kpʋ nʋʋ yaraa sɩ bɩ digi. 16 Nɩɩ-la kala sɩɩ to Wɩa wɩalɩŋ ba sɩ ŋmʋnsa bil dɩ ba tuto pɔ ʋ mɩɩsɩŋ nɛ, ama nɩɩ-la kala sɩ vɩaba jaŋ sʋʋ. 17 Nɩɩ-la kala sɩ joŋ kɩaa dii zile summo lɛ, ʋ joŋo chɩŋ La Tɩɩna nɛ. Ʋ jaŋ timu. 18 Tʋrɛ ŋ bie ʋ hambiriŋ bʋa-la lɛ ŋɩɩ sɩ maga, dɩ ŋɩɩ deeŋ ŋ jaŋ dɔgʋsʋ. 19 Baaŋ kɩŋkɛŋ tɩɩna yie jʋʋ wɩaa aa ŋmoo chɩmɩŋ bʋa na-kala lɛ. Dɩ ŋ nɛ lɩɩsʋ wɩɩ lɛ jɩnɩŋ, chie ŋ jaŋ bɩra lɩɩsʋ dɔŋɔ lɛ. 20 Jegilee nɩɩ chagɩlɩŋ, a sɛɩ dɩ ba dagɩŋ, ŋ jaŋ kʋ jɩŋ wɩaa. 21 Nuhuobiine yie bɩɩnɛ wʋdaŋ nɛ dɩ ʋ ŋaa, ama wɩɩ-la La Tɩɩna sɩɩ chɛ nɛ jaŋ chɩŋ. 22 Nuhuobiiŋ kala ka chɛ dɩ nɩaa kɛŋ chono-la sɩ bɩ dɛrɛ nɛ ʋ teeŋ. Summo nɛ kpɩa wʋnyɩɛra. 23 Dɩ ŋ nɩɩ fá La Tɩɩna, ŋɩɩ nɛ ŋ jaŋ kɛŋ mɩɩsɩŋ. Nɩɩ-la kala sɩɩ fáʋ jaŋ hɔnɔ ta jɩa, wʋbɔŋ kala bɩ jaŋ jʋʋ-ʋ. 24 Yarɩwɩɩ tɩɩna yie joŋ ʋ nɩsɩŋ nʋrɛ kʋdiilee lɛ nɛ, ʋ paala bɩ wuo kaa jɩl ʋ niiŋ. 25 Ŋmoo babii-balɩŋ dɩ nɩɩ-la sɩ bɩ wɩaa jɩŋ woruŋ gʋnnɛ wʋjɩmɩŋ. Chagɩlɛ nɩɩ-la sɩ jɩŋ wɩaa sɩaa, ʋ jaŋ bɩra gʋnnɛ wʋjɩmɩŋ pɛ. 26 Bile kala sɩ kɛŋ ʋ nyɩmma gbigbesi a kiri ʋ naaŋ ta, ʋ ŋaa bii sɩɩ hɛ ʋ nɩaa hɩɩsɩŋ nɛ. 27 Mɩ bii, dɩ ŋ nɛ vɩa dɩ ŋ jegilee nɩɩ dagɩŋ, ŋ jaŋ yeŋŋi wʋjɩmɩŋ lɛ. 28 Wʋnyɩɛrɩ wʋpɛ naara, yie nyɩɛ wɩaa aa sieri wʋtɩtɩɩ tɩŋŋaa lɛ nɛ. Nɩbɔmʋŋ cho wʋbɔmʋŋ a nagɛ kʋdii-sɩŋŋaa nɛ. 29 Ba gbɛrɛ nɛ dɩ ba dɔgɩsɛ nɩalɩŋ sɩɩ sieri nɩaa lɛ, nɩyaaraa jaŋ laa daaŋ. |
©Ghana Institute of Linguistics Literacy and Bible Translation 1984, 2014
Wycliffe Bible Translators, Inc.