Biblia Todo Logo
Bìoball air-loidhne

- Sanasan -

NAMAGABA 12 - WƖA TENIŊ

1 Nɩɩ-la kala sɩ cho dɩ ba kɛnʋ tʋraa kɩɩ, ʋ cho wʋjɩmɩŋ nɛ, ama nɩɩ-la sɩ bɩ sɛɩ dɩ ba kɛnʋ bil wombiiŋ lɛ, ŋaa nɩyaarɩ nɛ.

2 La Tɩɩna yie cho nɩɩ-la kala wɩaa sɩ zɔmɔ nɛ, ama ʋ yie chei nɩalɩŋ sɩɩ bɩɩnɛ wʋbɔŋŋɔɔ ŋaanɩŋ nɛ.

3 Wʋbɔŋ ŋaarʋ kala bɩ jaŋ wuo chɩŋ kpaŋ kpaŋ, ama ŋ bɩ tʋɔpʋl tɩɩna-na wuo yigee lo.

4 Dɩ haala mɛlɛ nɛ zɔmɔ, ʋ yie nagɛ kuoru nyunchuulo nɛ ʋ bala chu. Ama haal-la sɩ hɛ ʋ bala hɩɩsɩŋ yie nagɛ nyanyalɩɩ-bɔŋ nɛ ʋ bala lɛ.

5 Wɩalɩŋ tʋɔpʋl tɩŋŋaa sɩ bɩɩnɛ dɩ ba ŋaa, ŋaa wʋzɔmɔ nɛ. Ama nɩbɔŋŋɔɔ wʋdagaa kala ŋaa wʋnyɩɛrɩŋ nɛ.

6 Nɩbɔmʋŋ wʋbʋlaa nagɛ bɛrɛ nɛ, ama tʋɔpʋl tɩŋŋaa wʋbʋlaa-na yie laaba ta nɛ.

7 Dɩ ba nɛ yuo dii nɩbɔŋŋɔɔ, ba yie lɛl nɛ, ama tʋɔpʋl tɩŋŋaa-na dɩa yie chɩŋ nɛ kpaŋ kpaŋ.

8 Dɩ nʋʋ nɛ kɛŋ wʋjɩmɩŋ, nɩaa jaŋ bɛsɛ ʋ lɛ. Ama dɩ nʋʋ nɛ yaara, nɩaa sɩaa bɩ ʋ ka su.

9 Dɩ ŋ nɛ bɩ nʋʋ ŋaa aŋ kɛŋ tɩntɩnna nɛ kpɩa ŋ sɩ fugo ŋaa nʋʋ aŋ kɛŋ losuŋ.

10 Tʋɔpʋl tɩŋŋaa yie bibeŋ ba pʋsʋŋ nyuŋ woruŋ nɛ, ama nɩbɔŋŋɔɔ-na woruŋ ŋaanɩŋ ŋaa tʋɔhɛɛŋ nɛ.

11 Nɩɩ-la kala sɩ faasa tɩŋ ʋ baga lɛ yie na kʋdiilee yʋgɛ nɛ, ama nɩyaara nɛ yie kɛŋ ʋ doluŋ ŋɩŋaa wʋpɛɩba.

12 Nɩbɔmʋŋ wɩɩŋ nɛ dɩ ʋ laa kɩaa ʋ nɩbɔŋ dɔŋɔ teeŋ, ama tʋɔpʋl tɩŋŋaa wɩaa yie wasɛ nɛ.

13 Nɩbɔmʋŋ wʋbɔŋ wʋbʋlʋŋ nɛ kɛnʋ, ama tʋɔpʋl tɩɩna-na yie fá lɩɩ wʋjʋʋlaa lɛ nɛ.

14 Ŋ niiŋ wʋbʋlaa lɛ nɛ ŋ jaŋ to na wʋzɔŋŋɔɔ, ŋɩɩ tɩtɩa nɛ dɩ ŋ nɛ tɩma, ŋ jaŋ laa time.

15 Nɩyaarɩŋ bɩɩna wɩalɩŋ ʋ sɩɩ ŋaa, ba ŋaa ba bʋa lɛ nɛ, ama wʋjɩnna na yie jegile nɩɩ chagɩlɩŋ nɛ.

16 Nɩyaarɩŋ yie guu leŋ nɩaa jɩŋ arɩ ʋ baanɩŋ sie nɛ, ama wʋjɩnna-na yie tɔrɛ ʋ niiŋ nɛ, dɩ ba nɛ tʋʋsʋ ma.

17 Wʋtɩtɩɩ wʋpɛ-naara yie bʋl wʋtɩtɩɩ nɛ sarɩya dɩ-diiliŋ, ama wʋnyɩɛrɛ wʋpɛ-naara-na yie nyɩɛ wɩaa nɛ.

18 Wʋbʋl-tɔɔnʋŋ jʋʋ nɩaa lɛ a nagɛ ba sɩ joŋ sɩaa tɔ nɩa nɛ, ama wʋjɩnna wʋbʋlaa yie leŋ nɩa tʋɔŋ fɩɛla pɩŋ nɛ.

19 Nɩɩ-la sɩ kɛŋ wʋtɩtɩɩ bɩ dɩdɛrɩ kɛnɛ, ama nɩɩ-la sɩɩ nyɩɛ wɩaa-na bɩ jaŋ dieni aŋ lɛl.

20 Nɩalɩŋ sɩ bɩɩna dɩ ba ŋaa wʋbɔŋŋɔɔ ka nyɩsɛ nɩaa nɛ, ama nɩalɩŋ sɩ leŋe nɩaa kɛŋ nii-bala a hɔŋ, ba tʋɔŋ jaŋ tɔrɛ.

21 Wʋbɔmʋŋ bɩ tʋɔpʋl tɩɩna ka jʋʋ, ama ba yie jʋʋ nɩbɔmʋŋ-na nɛ a mʋ kieli.

22 La Tɩɩna bɛrɛ wʋnyɩɛraa nɛ woruŋ, ama ʋ cho nɩalɩŋ sɩ kɛŋ wʋtɩtɩɩ.

23 Wʋjɩnna bɩ ʋ wʋjɩmɩŋ ŋɩɩ ka dagɛ, ama nɩyaarɩŋ-na yie bʋl wɩaa kɩŋkɛŋ nɛ a leŋ nʋʋkala jɩŋ arɩ ʋ yaara nɛ.

24 Nɩɩ-la yaraa lɩɩŋ sɩ hɛyɛ nɛ jaŋ laa nɩaa sɩpaaŋ, ama yarɩ-wɩɩ tɩɩna jaŋ tɩŋ yoŋ tɩntɩŋŋaa.

25 Tʋɔbɩɩnaa kɩŋkɛŋ yie nyagɛ ʋ tɩɩna bil nɛ. Ama wʋbʋl sɩŋŋaa nɩɩ nyagɛ nɩa bɔyɛ.

26 Tʋɔpʋl tɩɩna yie fɩɛlɛ ʋ sɩaa nɛ a dii nandɔŋɔ koo tanlɔŋɔ. Ama nɩbɔmʋŋ-na yie yeŋŋi nɛ.

27 Yarɩ-wɩɩ tɩɩna bɩ ʋ wʋchɛɛlɩŋ ka na, ama dɩ ŋ yaraa lɩɩŋ nɛ hɛyɛ, ŋ jaŋ dʋa.

28 Mɩɩsɩŋ dʋndʋŋa nɛ hɛ tʋɔpʋla wombiiŋ lɛ, sʋʋŋ tuo nɩmɛ.

©Ghana Institute of Linguistics Literacy and Bible Translation 1984, 2014

Wycliffe Bible Translators, Inc.
Lean sinn:



Sanasan