NAMAGABA 10 - WƖA TENIŊ

Solomoŋ namagaba

¹ Namagaba-la Solomoŋ sɩ maga: Bii wʋjɩnna yie leŋ ʋ nyɩmma tʋɔŋ tɔrɛ nɛ, ama bii yaara-na yie leŋ ʋ naaŋ tʋɔŋ chei nɛ.

² Dɩ ŋ nɛ to bɔŋ bɔŋ a dʋa, kɩalɩŋ bɩ yuŋ kala kɛnɛ. Ama tʋɔpʋla jaŋ lɩɩsɩŋ sʋʋŋ lɛ.

³ La Tɩɩna bɩ leŋe tʋɔpʋl tɩɩna chʋchʋa losuŋ, ama ʋ bɩ leŋe nɩbɔmʋŋ nɩna kɩalɩŋ ʋ sɩɩ hɩɛnʋ.

⁴ Yarɩwɩɩŋ nɛ kɛŋ nyaaŋ kʋkɔ, ama dɩ ŋ yaraa lɩɩŋ nɛ hɛyɛ, ŋ jaŋ dʋa.

⁵ Bii wʋjɩnna yie hɛ sɩɩfɩɛsɩŋ nɛ dɩ baga kɩaa ŋaanɩŋ nɛ yie, ama bii na-kala baga kɩaa ŋaanɩŋ sɩ yie ka ʋ pɩŋ, ŋaa hɩɩsɛ hɛɛrʋ nɛ.

⁶ Wɩa yie pɛ tʋɔpʋl tɩŋŋaa lɛ nɛ woruŋ, ama nɩbɔŋŋɔɔ-na yie kɛŋ wʋbɔmɔ-la ba sɩɩ chɛ dɩ ba ŋaa nɩaa lɛ a faa nɛ, ba bɩ bʋl.

⁷ Nɩaa jaŋ liliisi tʋɔpʋl tɩŋŋaa wɩaa, ama nɩbɔŋŋɔɔ-na yɩrɩŋ jaŋ lɛl.

⁸ Wʋjɩnna yie sɛɩ dagɩŋ nɛ, ama nɩyaara sɩ cho wɩaa bʋlʋŋ yie tel nɛ.

⁹ Wɩɩkala bɩ jaŋ walɩmɛ wʋtɩtɩɩ tɩɩna, ama nɩɩ-la wʋŋaalaa sɩ golibo bʋbʋɔŋ jaŋ lɩɩ.

¹⁰ Nɩɩ-la sɩ bɩ wʋtɩtɩɩ ka bʋl nɩɩ hɛ wɩaa, nɩyaarɩ nii-to tɩɩna nɛ yie chei ʋ tɩtɩa.

¹¹ Tʋɔpʋl tɩŋŋaa wʋbʋlaa nagɛ lɩɩ-bulo sɩɩ pɩ nɩaa mɩɩsɩŋ nɛ, ama nɩbɔŋŋɔɔ-na yie kɛŋ wʋbɔmɔ-la ba sɩɩ chɛ dɩ ba ŋaa nɩaa lɛ a faa nɛ, ba bɩ baa bʋl.

¹² Dɩ ŋ nɛ bɛrɛ nʋʋ, ŋ dɩ tɩɩna jaŋ yuyuo bʋa na-kala, ama dɩ ŋ nɛ cho nʋʋ, ŋ jaŋ bee kieli wɩalɩŋ kala ʋ sɩ ŋaa cheyiŋ.

¹³ Dɩ wʋjɩnna nɛ bʋl wɩaa, ŋ yie jɩŋ dɩ ʋ kɛŋ wʋjɩmɩŋ nɛ, ama nɩyaara-na maga dɩ ʋ laa daaŋ nɛ.

¹⁴ Wʋjɩnnaa yie tʋɔlɛ wʋjɩmɩŋ nɛ, ama nɩyaara-na niiŋ wʋbʋlaa nɛ yie ŋaa ʋ tel.

¹⁵ Kɩaa tɩɩna teeŋ, dʋa nagɛ taŋ ba sɩ saa kɛrɛ golli nɛ, ama nyaaŋ nɩɩ kpʋ summoo.

¹⁶ Tʋɔpʋl tɩŋŋaa time yie leŋ ba kɛŋ mɩɩsɩŋ nɛ, ama nɩbɔŋŋɔɔ-na time nɛ dɩ ba dɔgɩsɛba.

¹⁷ Nɩɩ-la kala sɩ sɛɩ dagɩŋ jaŋ kɛŋ mɩɩsɩŋ, ama nɩɩ-la na-kala sɩ vɩa dɩ ʋ leŋ ba kɛnʋ tʋra kɩɩ wombiiŋ lɛ, jaŋ yeŋŋi.

¹⁸ Nʋʋkala sɩ bɛrɛ nɩaa aŋ kaa fɩfaa ŋaa wʋnyɩɛrʋ nɛ. Nʋʋ na-kala sɩ gɔllɔɔ bɛ zɛmbɛ ŋaa nɩyaarɩ nɛ.

¹⁹ Wʋbʋl kɩŋkɛŋ tɩɩna yie bʋl wɩalɩŋ sɩ bɩ maga dɩ ʋ bʋl nɛ, ama nɩɩ-la sɩ jɩŋ ʋ niiŋ kɛnɩŋ ŋaa wʋjɩnnʋ nɛ.

²⁰ Tʋɔpʋl tɩɩna wʋbʋlaa nagɛ hɔpʋla nɛ, ama nɩbɔmʋŋ tʋɔbɩɩnaa-na bɩ bʋbʋɔ kɛnɛ.

²¹ Tʋɔpʋl tɩɩna wʋbʋlaa yie pɛ nɩ-daŋ lɛ nɛ, ama nɩyaara yaarɩŋ nɩɩ kpʋʋ.

²² Dɩ La Tɩɩna nɛ pɛ nʋʋ lɛ dɩ ʋ dʋa, ʋ bɩ hɛɛŋ joŋo daŋ dʋa-la lɛ.

²³ Nɩyaarɩŋ tʋɔŋ yie tɔrɛ wʋbɔŋŋɔɔ ŋaanɩŋ lɛ nɛ, ama nɩɩ-la sɩ jɩŋ wɩaa sɩaa tʋɔŋ yie tɔrɛ wʋjɩmɩŋ lɛ nɛ.

²⁴ Wɩɩ-la nɩbɔmʋŋ sɩ chaasa fɩfá nɛ jaŋ ŋaa ʋ lɛ, ama tʋɔpʋl tɩɩna-na jaŋ na wɩɩ-la ʋ sɩɩ chɛ.

²⁵ Dɩ duoŋ pel-duoŋ nɛ duu bal, ʋ jaŋ joŋ nɩbɔmʋŋ viiri, ama tʋɔpʋl tɩɩna-na jaŋ chɩŋ kpaŋkpaŋ a kaa mʋ wuu.

²⁶ Dɩ ŋ nɛ tɩŋ yarɩwɩɩ tɩɩna, ʋ hɛyɛ a nagɛ batu-luobiiŋ sɩ hɛyɛ ŋɩɩ nɛ, koo nyʋɔsʋŋ sɩ yie jʋʋ ŋ sɩaa ʋ nagɛ ŋɩɩ.

²⁷ Dɩ ŋ nɩɩ fá La Tɩɩna, ʋ yie joŋ jɩsɩŋ pɛ ŋ mɩɩsɩŋ lɛ nɛ ʋ duomi, ama nɩbɔmʋŋ-na mɩɩsɩŋ yie keri nɛ kui.

²⁸ Tʋɔpʋl tɩɩna yɩɛlaa dɩdɛrɩŋ kala yie ŋaa tʋɔtɔrʋŋ nɛ, ama nɩbɔmʋŋ-na yɩɛlaa kala yie ŋaa pɛɩ nɛ.

²⁹ La Tɩɩna yie chu tɔ nɩalɩŋ sɩɩ to ʋ wombiiŋ nɛ, aŋ chichei nɩalɩŋ sɩɩ ŋaa wʋbɔŋŋɔɔ.

³⁰ Nʋʋkala bɩ jaŋ wuo yigi tʋɔpʋl tɩɩna lo, ama nɩbɔmʋŋ-na bɩ jaŋ dieni tinteeŋ lɛ.

³¹ Tʋɔpʋl tɩɩna yie bʋl wɩaa arɩ wʋjɩmɩŋ nɛ, ama ba jaŋ tɔ wʋnyɩɛra-na niiŋ.

³² Tʋɔpʋl tɩɩna niiŋ jɩŋ wɩɩ-la sɩ maga dɩ ʋ bʋl nɛ, ama nɩbɔmʋŋ-na yie bʋl wɩalɩŋ sɩ bɩ maga nɛ.