NAMAGABA 1 - WƖA TENIŊ

Teniŋ deeŋ wʋnyuŋ

¹ Namagaba-la Iziral kuoro Solomoŋ sɩ maga, ʋ nyɩmma nɛ fa kuoro Devit.

² Namaga deemba jaŋ wuo dagɩŋ dɩ ŋ kɛŋ wʋjɩmɩŋ, a jɩŋ ŋ tɩtɩa kɛnɩŋ a pɛ jɩŋ wʋduoruŋ ma bʋbʋɔŋ.

³ Ba jaŋ wuo dagɩŋ dɩ ŋ jɩŋ ŋ tɩtɩa kɛnɩŋ woruŋ, a kɛŋ tʋɔpʋla, a bɩɩnɛ wɩaa yi aŋ ŋɩŋaaba ba bʋa lɛ arɩ wʋtɩtɩɩ.

⁴ Ba jaŋ wuo dagɛ nɩalɩŋ sɩ bɩ wɩaa jɩŋ woruŋ dɩ ba kɛŋ wʋjɩmɩŋ, a pɛ bapʋɔsaa arɩ hatoloo lɛ dɩ ba kɛŋ wʋjɩmɩŋ a bɩɩnɛ wɩaa woruŋ aŋ ŋɩŋaa.

⁵ Namaga deemba ha jaŋ wuo paala dagɛ nɩalɩŋ ma sɩ jɩŋ wɩaa, dɩ ba wʋjɩmɩŋ pʋŋa pɛ. Ba jaŋ dagɛ nɩalɩŋ sɩ jɩŋ wɩaa bʋbʋɔŋ dɩ ba ma wasa jɩma pɛ.

⁶ Ba jaŋ wuo jɩŋ namagaba bʋbʋɔŋ arɩ wɩalɩŋ dɔnsʋŋ wʋjɩnnaa sɩɩ bʋl.

⁷ Dɩ ŋ nɩɩ to La Tɩɩna niiŋ a zizilu, wʋjɩmɩŋ dɩ-suomuŋ nɛ ŋɩɩ. Ama nɩyaaraa bɩ wʋjɩmɩŋ cho a bɩ sɛɩ dɩ ba dagɛba.

Kɛŋ ŋ tɩtɩa arɩ nɩbɔŋŋɔɔ harɩŋ tonuŋ

⁸ Mɩ bii, jegile nɩɩ wɩalɩŋ ŋ nyɩmma sɩɩ dagɩŋ. Pʋpɔ ŋ sɩ ŋ naaŋ niiŋ vɩa.

⁹ Wɩalɩŋ ba sɩ jaŋ dagɩŋ jaŋ leŋ dɩ ŋ mɛlɛ zɔŋ a nagɛ ŋ sɩ jaŋ joŋ nyu-bɛlɛ a bɛ ŋ tɩtɩa koo ŋ sɩ jaŋ joŋ banzɔlɔ hɛ dɩ ʋ leŋ dɩ ŋ zɔŋ ŋɩɩ.

¹⁰ Mɩ bii, dɩ wʋbɔŋ ŋaaraa nɩɩ nyɩsɩŋ, sɩ́ jegile nɩɩ.

¹¹ Ba nɛ sɩ, “Kʋ to la harɩŋ dɩ la mʋ faa a gbɛrɛ a kpʋ nʋʋ sɩ bɩ wɩɩ cheye ta pɛɩ.

¹² Má leŋ la paaba liŋ kʋweyee, a nagɛ sʋʋŋ bʋa, dɩ ba ŋaa nɩa sɩ hɛ sʋʋnʋŋ bʋa tʋɔŋ.

¹³ Dɩ la nɛ ŋaa ŋɩɩ, la jaŋ paa nɩaa kʋyuŋŋoo yʋgɛ a su la dɩɩsɩŋ.

¹⁴ Dɩ ŋ nɛ pɛ la lɛ, ŋ ma jaŋ laa ŋ kpaalɩŋ.”

¹⁵ Mɩ bii, sɩ́ nɩdosunuŋ deemba harɩŋ to, sɩ́ wombie-la ba sɩ joŋo to.

¹⁶ Ba cho wʋbɔŋŋɔɔ ŋaanɩŋ nɛ woruŋ, a paala bɩ diene aŋ kpʋkpʋ nɩaa.

¹⁷ Dɩ diibie nɩɩ beniŋ ka dɩ ŋ chɩchɛ ŋ bɛrɛ kɛnʋ, wʋpɛɩ nɛ ŋ ŋɩŋaa ŋɩɩ.

¹⁸ Nɩdosunuŋ deemba faa a gbɛrɛ dɩ ba kpʋ ba tɩtɩa nɛ, ba tɩtɩa mɩɩsɩŋ nɛ ba jaŋ lɩɩsɛ.

¹⁹ Nʋʋkala sɩ dii doluŋ nɩaa lɛ a dʋa, dol-la ʋ sɩ die nɛ jaŋ kpʋʋ.

Chagɩlɩna-la sɩ mʋ tɩgɛ nɩalɩŋ sɩ vɩa wʋjɩmɩŋ lɛ

²⁰ Má jegili, wʋjɩmɩŋ nagɛ haal nɛ aa yɩrɛ nɩaa wombiee lɛ. Ʋʋ heeli nɛ lee-la taŋ nɩaa sɩɩ hilimu.

²¹ Ʋ yie hɛ wombie-la sɩ kɛŋ goŋ lɛ aa kpɩa taŋ-la boi-baalaa lɛ aa bʋl,

²² “Nɩyaaraa, ɛɛ nɛ maa chɛ dɩ ma yaara diene magɛ? Ɛɛ nɛ maa chɛ dɩ ma sieri wʋjɩmɩŋ lɛ a diene magɛ? Ɛɛ nɛ maa chɛ dɩ ma bɛrɛ wʋjɩmɩŋ a diene magɛ?

²³ Dɩ ma nɛ fa jegile nɩɩ ŋɩɩ mɩ sɩ kpʋrɩsɛ ma dɩgɩlaa, mɩ fa jaŋ suri mɩ tʋɔŋ pɩma, a leŋ dɩ ma jɩŋ mɩ tʋɔbɩɩnaa.

²⁴ Ama mɩ sɩ yɩrɛma ma vɩa wɩaa, mɩ kɛŋ mɩ nɩsɩŋ yɩa, ka ma kʋŋkala bɩ kɛnɛ.

²⁵ Ma sɩ vɩa wɩalɩŋ mɩ sɩ dagɛma, a bɩ ŋɩɩ mɩ sɩ kpʋrɩsɛ ma dɩgɩlaa ma sɛyɛ,

²⁶ dɩ wʋlɔrʋnʋŋ nɛ jʋʋma, mɩ jaŋ mɔmma. Dɩ wʋbɔŋ nɛ puuma, mɩ jaŋ sieri ma lɛ.

²⁷ Dɩ wʋbɔŋ nɛ puuma a nagɛ duoŋ-pel-duoŋ koo dɩ wʋlɔrʋnʋŋ nɛ jʋʋma a nagɛ pel-vinvilimiŋ, koo dɩ hɛɛŋ arɩ tʋɔ-cheeŋ nɛ jʋʋma,

²⁸ ŋɩɩ lɛ nɛ ma jaŋ yɩra chɩchɛmɛ dɩ mɩ pɛ ma lɛ, ama mɩ bɩ jaŋ sɛɩ. Ma jaŋ beŋ lee-kala a chɩchɛmɛ, ama ma bɩ jaŋ namɛ.

²⁹ A tɩŋ ma sɩ bɛrɛ wʋjɩmɩŋ wɩaa, a bɩ La Tɩɩna ka fá,

³⁰ a bɩ mɩ dagɩŋ ka sɛɩ, arɩ ŋɩɩ mɩ sɩɩ kpʋrɩsɛ ma dɩgɩlaa,

³¹ ma jaŋ na hɛɛŋ a tɩŋ ma mɛlɛ-la wɩaa, dɩ wɩalɩŋ ma sɩ ŋaa mɩɩra nyʋa ma nyuŋ lɛ.

³² Yaarɩŋ nɛ yie kpʋ nɩyaaraa, chʋʋlʋŋ nɛ yie kpʋ nɩɩ-la sɩ vɩa dɩ ʋ gʋnnɛ wʋjɩmɩŋ.

³³ Ama nʋʋ na-kala sɩ jegilee nɩɩ mɩ teeŋ yie hɔŋ nɛ sɔm. Ʋ bɩ wʋbɔŋ kala sɩ jaŋ kʋ ŋaa ʋ lɛ ka fá.”