NAHUM 1 - WƖA TENIŊ

¹ Wɩalɩŋ Nahum, Ɛlɩkɔs tɩɩna-la fa sɩ na arɩ duosoo tʋɔŋ a mʋ tɩgɛ tabal-la ba sɩɩ yɩrɛ Nɩnɩvɛ lɛ teniŋ nɛ ŋ-la.

Wɩa na baanɩŋ Nɩnɩvɛ nɩaa nyuŋ

² La TƖƖNA Wɩa ŋaa Wɩa sɩ bɩ hadɔrʋŋ ka chɛ nɛ. Dɩ ŋ nɛ bɩ ʋ sɛyɛ, ʋ jaŋ dɔgʋsʋŋ. La TƖƖNA baanɩŋ nɛ sie, ʋ yie ŋaa wɩaa tiŋ ʋ dʋndɔŋŋɔɔ nɛ dɩ ba nɛ ŋaa wɩɩ cheyu.

³ La TƖƖNA baanɩŋ bɩ lɩma lɩma ka sii, ama ʋ kɛŋ doluŋ nɛ woruŋ. Ʋ bɩ jaŋ leŋ nɩalɩŋ sɩ ŋaa wɩaa chei pɛɩ, ʋ jaŋ dɔgɩsɛba. Ʋ wombiiŋ hɛ pel-vinvilimiŋ arɩ duoŋ-peliŋ tʋɔŋ nɛ, ʋ naasɩŋ bʋmbʋgʋŋ nɛ duoŋ-bɩlɩmbaanaa.

⁴ Dɩ ʋ nɛ kpɩa mʋgʋ-balɩŋ lɛ, ʋ yie hʋ nɛ, ʋ yie leŋ fuonuŋ kala hɩl. Basaŋ tinteeŋ arɩ Kamɛl peeliŋ tɩɩsɩŋ arɩ yaŋ kala hɩl, Lɛbanɔŋ tinteeŋ tɩɩfɩɩlaa kala yuori.

⁵ Ʋ sɩpaaŋ, peelee yie jigisi nɛ, dundolluŋ ma yʋɔlɛ. Tinteeŋ yie zigili, dʋnɩa nɩaa chichel ʋ sɩpaaŋ.

⁶ Kʋbɛɛ nɛ jaŋ wuo chɩŋ ʋ sɩpaaŋ dɩ ʋ baanɩŋ nɛ sie? Kʋbɛɛ nɛ jaŋ wuo waa, dɩ ʋ baanɩŋ nɛ hoso? Ʋ baanɩŋ yie pusi a nagɛ nyiniŋ nɛ, bʋsʋŋ yɩyɛrɛ ʋ sɩpaaŋ.

⁷ La TƖƖNA wɩaa zɔmɔ, ʋ nɛ nɩaa yie mʋ yuori dɩ wɩaa nɛ jʋʋba. Ʋʋ beŋ nɩalɩŋ kala sɩ laaʋ dii nyuŋ nɛ,

⁸ ama ʋ jaŋ leŋ dɩ lɩɩ-balɩŋ pɛllɛ paa Nɩnɩvɛ tabal-la nɩaa kala. Ʋ jaŋ kire kpʋ ʋ dʋndɔŋŋɔɔ.

⁹ Bɛɛ nɛ tɩɩ ma kɛŋ tʋɔbɩɩŋ bɔŋŋɔɔ a mʋ tɩgɛ La TƖƖNA lɛ? Ʋ jaŋ cheima. Ʋ dʋndɔŋŋɔɔ bɩ jaŋ wuo sii chɩŋ ʋ lɛ bʋlɩa.

¹⁰ A nagɛ nyiniŋ sɩ joŋ sɔsʋŋ sɩ vɔɔ kɛŋ dɔŋɔ arɩ ya-hɩlɩŋ dii ŋɩɩ, ŋɩɩ tɩtɩa nɛ nyiniŋ jaŋ dii Nɩnɩvɛ nɩaa sɩɩ begilu ba wʋŋaalaa lɛ a nagɛ sɩ-nyʋaraa.

¹¹ Ma Nɩnɩvɛ tɩŋŋaa tʋɔŋ nɛ nʋʋ lɩɩ a bɩɩnɛ wʋbɔŋŋɔɔ a mʋ tɩgɛ La TƖƖNA lɛ, aŋ dɩdagɛ nɩaa wʋbɔŋŋɔɔ.

¹² Wɩɩ-la La TƖƖNA sɩ bʋla pɩ ʋ nɩaa, Juda doho nɩaa nɛ ŋ-la: “Asiiria tɩŋŋaa kɛŋ harɩchɩnnaa nɛ a yʋgɛ, ama mɩ jaŋ keriba ta dɩ ba lɛl. Mɩ fa ŋaa wɩaa jʋʋ ma Juda doho lɛ nɛ, ama mɩ bɩra bɩ jaŋ ŋaa ŋɩɩ.

¹³ Mɩ jaŋ leŋ dɩ Asiiria tɩŋŋaa bɩra sɩ́ dol kala kɛŋ ma nyuŋ. Mɩ jaŋ kɛrɛ chɔrʋmɔ-la sɩ vɔɔma.”

¹⁴ Nɩnɩvɛ nɩaa, La TƖƖNA bʋl wɩɩ nɛ a tɩgɛ ma lɛ, ʋ sɩ, “Ma bɩ jaŋ kɛŋ doho nʋʋ dɩ ʋ chɩŋ ma yɩrɩŋ lɛ. Mɩ jaŋ chei ma vʋɩya-la ma sɩ kɛŋ daaŋ saa arɩ kɩalɩŋ ma sɩ libe ba hɛ ma vesiŋ dɩɩsɩŋ lɛ. Mɩ jaŋ lu ma bʋa bil, bɛɛ wɩaa ma bɩ bʋbʋɔ kɛnɛ.”

¹⁵ Ma beŋ peelee nyusuŋ na, nʋʋ nɛ kɛŋ wʋzɔŋŋɔɔ kʋkɔ. Ʋ heelee bʋl arɩ ba yuo dii Asiiria tɩŋŋaa nɛ. Juda tɩmma, má gbieli ma gbielee, aŋ lɩɩsɛ niiri-la ma sɩ ta. Nɩbɔmɔ-la bɩra bɩ jaŋ kʋ tɔ ma tinteeŋ, Wɩa jaŋ chei ba kala.