MƖKA 7 - WƖA TENIŊ

Iziral tɩŋŋaa hɛɛŋ

¹ Mɩ tʋɔŋ kala nɛ cheye. Mɩ nagɛ nʋʋ ba sɩ tɔrɛ girep nɛnɛɛ tafaaŋ, ka mɩ mʋ kukuuni tɩɩnɛnɛɛ baga-la lɛ nɛ. Girep nɛŋ kala tuo dɩ mɩ dii, tutogi-nambɩl-folluŋ ma mɩ sɩɩ hɩɛnʋ kʋŋkala tuo.

² Nɩalɩŋ sɩɩ fá Wɩa tintee-la lɛ lɛlɛ nɛ, nʋʋkala tuo a ŋɩŋaa wɩaa ba bʋa lɛ. Nʋʋkala hu a gbɩgbɛrɛ nɩaa nɛ dɩ ʋ kpʋ. Nʋʋkala ka bagɩlɛ ʋ naambie nɛ.

³ Nʋʋkala kaasɛ wʋbɔŋŋɔɔ ŋaanɩŋ lɛ nɛ, sɩpaalaaraa chɩchɛ kʋmɔlɩɩba. Sarɩya diiree lɩlaa kpalaa, nɩalɩŋ dɩchɩnɩŋ sɩ yuŋŋie ŋɩŋaa wɩalɩŋ ba sɩ cho, ba kala vʋʋra hɩhɛ dɔŋɔ.

⁴ Ba tʋɔŋ kʋ-la sɩ kpɩa nagɛ sɔgɩrɩgalɩa nɛ ba tʋɔpʋl tɩɩna wɩɩŋ bɔmɔ kɩɩ sɔ-gbuŋgbeŋe sɔsʋŋ. Nɩalɩŋ sɩɩ pɔma sɩ bʋl tapʋlɩɩ-la wɩaa yie nɛ, tapʋlɩɩ-la Wɩa sɩ jaŋ dɔgɩsɛma. Bʋa deeŋ lɛ nɛ ma wɩaa jaŋ vʋgʋmɛ.

⁵ Ŋ dɩ nɩɩ-la sɩ jʋʋ kpɩkpagɛ dɔŋɔ, sɩ́ ʋ laa dii, a sɩ́ ŋ yɩɛlaa joŋo hɛ ŋ nandɔŋɔ lɛ. Nɩɩ-la ma ŋ sɩ paala guoro pɩŋ, jɩŋ ŋ niiŋ kɛnɩŋ ʋ teeŋ,

⁶ bɛɛ wɩaa hambolibiisiŋ sɩɩŋ bɩ ba nyɩmmaba ka su. Hantolibiisiŋ ma kɛŋ ba naamba yuyuo yuosuŋ, bii-haalaa kɛŋ ba bala naamba yuyuo yuosuŋ. Nuhuobiine dʋndɔŋŋɔɔ nɛ ŋaa ʋ tɩtɩa dɩa nɩaa.

⁷ Ama mɩ-na, mɩɩ beŋ La TƖƖNA lɛ nɛ a yɩyɩɛlʋ. Mɩ gbɛrɛ Wɩa nɛ, mɩ Laataara, mɩ Wɩa jaŋ jegile nɩɩ mɩ teeŋ.

Iziral tɩŋŋaa jaŋ sii

⁸ Mɩ dʋndɔmɔ, sɩ́ mɩ nyuŋ jʋɔsʋ, mɩ tele ma nɛ, ama mɩ jaŋ sii. Mɩ hɔŋ birimiŋ tʋɔŋ nɛ, ama La TƖƖNA nɛ jaŋ ŋaa mɩ pʋlʋmʋŋ.

⁹ Mɩ ŋaa wʋbɔŋŋɔɔ nɛ La TƖƖNA lɛ, ŋɩɩ wɩaa mɩ jaŋ nyalɩmɛ baaŋ-la ʋ sɩ na mɩ nyuŋ, a kaa mʋ yi bʋa-la lɛ ʋ sɩ jaŋ laa mɩ wɩɩŋ jɩma pɩmɛ a leŋ dɩ mɩ laa kʋsɩŋŋaa. Ʋ jaŋ kɛmmɛ kʋ lɩɩ pʋlʋmʋŋ, dɩ mɩ na ŋɩɩ ʋ sɩ laamɛ ta.

¹⁰ Mɩ dʋndɔmɔ jaŋ na wɩɩ-la dɩ hɩɩsɩŋ kɛnʋ. Nɩɩ-la sɩ pɩɛsɛmɛ, “Nɩɩ nɛ ŋ TƖƖNA Wɩa hɛ?” Mɩ sɩɩŋ jaŋ na ʋ teliŋ, dɩ ba nʋɔsʋ a nagɛ vʋchɔɔŋ sɩ hɛ womporuŋ lɛ.

¹¹ Jerusalɛm nɩaa, tapʋlɩɩ-la ma sɩ jaŋ bɩra paa ma kɛrɩsɩŋ saa ka kɔ nɛ, tapʋlɩɩ-la nɛ ma jaŋ kɛŋ ma tinteeŋ bʋa jalla pɛ.

¹² Tapʋlɩɩ-la nɩaa jaŋ lɩɩ Asiiria arɩ Ijipiti tinteeŋ a kɔ ma teeŋ. Nɩaa jaŋ paala kɔ ma teeŋ a chɩŋ Ijipiti tinteeŋ lɛ a kaa mʋ yi Yufireti fuo-la, a bɩra chɩŋ mʋgʋ-balɩŋ dɔŋɔ lɛ a kaa mʋ dɔŋɔ, a chɩŋ peeliŋ dɔŋɔ lɛ a kaa mʋ dɔŋɔ.

¹³ Dʋnɩa sɛmɛ-la sɩ ka jaŋ pɩŋ hoi a tɩŋ wʋbɔmɔ-la nɩalɩŋ sɩ hɛ ʋ lɛ sɩɩ ŋaa wɩaa.

Mɩka chʋɔlɛ Wɩa a dɛnnʋ

¹⁴ La TƖƖNA, beŋ ŋ nɩaa nyuŋ a nagɛ pie-daara sɩɩ beŋ ʋ piesee nyuŋ ŋɩɩ. Ba ŋaa ŋ nɩaa nɛ ŋ sɩ lɩɩsa a hɛ duuŋ tʋɔŋ, ya-fɩɛlɩŋ golliba. Leŋ dɩ ba mʋ dii ya-fɩɛl-la sɩ hɛ Basaŋ arɩ Gɩlɩad tinteeŋ lɛ a nagɛ ba sɩɩ ŋaa ŋɩɩ faafaa-la.

¹⁵ Ŋɩɩ nɛ La TƖƖNA bʋl, “Mɩ jaŋ ŋaa wʋmagɩlaa dagɛma a nagɛ bʋa-la mɩ fa sɩ kɛmma kʋ lɩɩ Ijipiti tinteeŋ lɛ.”

¹⁶ Tinteyee nɩaa jaŋ na wɩalɩŋ dɩ hɩɩsɩŋ kɛmba, arɩ ba sɩ kɛŋ doluŋ ma kala. Ba niiŋ jaŋ maa, ka dɩ ba dɩgɩlaa ma taŋ.

¹⁷ Ba jaŋ mʋsɛ hagɩla a nagɛ dɩmɩŋ, a nagɛ kɩalɩŋ sɩ kɛŋ bɔyɛ tuuri tinteeŋ. Ba jaŋ lɩɩ ba dɩjʋʋlaa lɛ a chichel. Ba jaŋ mɩɩra kɔ a fɩfá La TƖƖNA Wɩa, aŋ fɩfá ma ma.

¹⁸ Wɩa, nʋʋkala tuo a nagɩŋ, ŋ nɛ nɩɩ-la sɩ joŋ ŋ nɩalɩŋ sɩ ka a bɩ sʋba wʋcheelee arɩ ba wʋbɔŋŋɔɔ a chɛba. Ŋ bɩ baanɩŋ na didieni, ŋ cho nɩaa nenige fanɩŋ nɛ.

¹⁹ Ŋ jaŋ bɩra fá la nenige, ŋ jaŋ nʋɔsa tɔ la wʋcheelee aŋ joŋ la wʋbɔŋŋɔɔ kala yuo hɛ mʋgʋ-balɩŋ dɩ-luŋuŋ lɛ.

²⁰ Ŋ jaŋ kɛŋ wʋtɩtɩɩ Jekɔb teeŋ, a fá Abɩraham doho nɩaa nenige, a nagɛ ŋ sɩ hɛ niiŋ pɩ la naabalɩmaba ŋɩɩ faafaa kala.