MƖKA 6 - WƖA TENIŊ

Wɩɩ-la La TƖƖNA sɩ kɛnɛ arɩ Iziral tɩŋŋaa

¹ Ma jegile nɩɩ wɩɩ-la La TƖƖNA sɩ bʋla: “Má sii chɩŋ a bʋl ma wɩɩŋ peelee sɩpaaŋ. Má leŋ dɩ dundolluŋ nɩɩ wɩɩ-la ma sɩ kɛnɛ dɩ ma bʋl.

² Peelee, má jegile nɩɩ wɩɩ-la La TƖƖNA sɩ kɛnɛ arɩ Iziral tɩŋŋaa. Tinteeŋ gentine sɩ hɛ nɩmɛ deeŋ deeŋ, ŋ má jegile nɩɩ. La TƖƖNA kɛŋ wɩɩ nɛ arɩ ʋ nɩaa. Ʋ dɩ Iziral tɩŋŋaa kɛŋ wɩɩ nɛ.”

³ La TƖƖNA sɩ, “Mɩ nɩaa, wʋbɛɛ nɛ mɩ ŋaa ma lɛ? Wʋbɛɛba nɛ mɩ joŋo daŋ ma lɛ? Má bʋla pɩmɛ.

⁴ Mɩ nɛ kɛmma kʋ lɩɩ Ijipiti tinteeŋ lɛ, a laama ta ma fa sɩ ŋaa yosu lɛ. Mɩ-na nɛ tɩŋ Mosis, Arɔŋ arɩ Mɩrɩam ba laa ma sɩpaaŋ.

⁵ Mɩ nɩaa, má liise yi wɩɩ-la Mʋab kuoro ba sɩɩ yɩrɛ Balak fa sɩ bɩɩna dɩ ʋ ŋaa ma lɛ arɩ ŋɩɩ Balam nanʋala ba sɩɩ yɩrɛ Bioo ma fa sɩ bʋla pʋ. Má liise yi ma sɩ vɛnɛ lɩɩ Sɩtɩm a mʋ Gɩlɩgal a wuo jɩŋ tʋɔpʋl wɩalɩŋ mɩ-na ma TƖƖNA sɩ ŋaa.”

⁶ Bɛɛ kʋŋ nɛ mɩ jaŋ kaa kɔ La TƖƖNA sɩpaaŋ a kpirime joŋo pɩ Wɩa sɩ kɩɩ kʋŋkala? Mɩ kɛŋ kʋnyɩgaa Wɩɩsʋlʋŋ nɛ-biisiŋ sɩ yi jɩna kɔ ʋ sɩpaaŋ?

⁷ La TƖƖNA tʋɔŋ jaŋ tɔrɛ pie-belliŋ bʋɩba nyuŋ koo nʋʋŋ sɩ su fuonuŋ bʋɩ fiiba a pɩpɛllɛ nyuŋ? Mɩ joŋ mɩ hambolibii bumbuŋ, mɩ tɩtɩa bii-lʋlʋŋ a ŋaa Wɩɩsʋlʋŋ pʋ a tɩŋ mɩ wʋbɔŋŋɔɔ wɩaa?

⁸ Aɩ, Wɩa dagɛla wɩɩ-la sɩ zɔmɔ nɛ. Wʋbɛɛ nɛ La TƖƖNA chɩchɛ dɩ la ŋaa? Ʋʋ chɛ dɩ la kɛŋ wʋtɩtɩɩ a ŋɩŋaa wɩaa, a cho nɩaa, a muuri la tɩtɩa a tuto ʋ wombiiŋ.

Iziral tɩŋŋaa cheeriŋ arɩ ba dɔgʋsʋŋ

⁹ Ʋ ŋaa wʋjɩmɩɩ nɛ dɩ ŋ nɩɩ fá La TƖƖNA. Má jegile nɩɩ, ma nɩalɩŋ sɩɩ hilimi tabal-la lɛ, má jegile nɩɩ ŋɩɩ La TƖƖNA sɩ jaŋ dɔgɩsɛma.

¹⁰ Ʋ sɩ, “Mɩ bɩ jaŋ yʋ nɩbɔŋŋɔɔ wɩaa, ma nɩalɩŋ sɩ gɩrɩma dʋa kɩaa su ma dɩɩsɩŋ, a kɛŋ gbaŋa-la sɩ bɩ yie kaa magɩsɛ kɩaa. Wɩɩŋ deeŋ ŋaa wɩɩ mɩ sɩ bɛrɛ nɛ.

¹¹ Mɩ bɩ jaŋ joŋo chɛ ma nɩalɩŋ sɩ bɩ kɩaa woruŋ ka magɩsɛ, a kɛŋ bɔtɔ-balaa koo kʋbiisiŋ a gʋgʋrɛ nɩaa.

¹² Ma kɩaa tɩŋŋaa ŋaa yuo-hɛɛrɛ nɛ, a ŋaa wʋnyɩɛra ma. Ma wɩɩŋ nɛ dɩ ma nyɩnyɩsɛ nɩaa.

¹³ Ŋɩɩ wɩaa, mɩ suomo dɩ mɩ cheima nɛ, mɩɩ cheima a tɩŋ ma wʋbɔŋŋɔɔ wɩaa nɛ.

¹⁴ Ma jaŋ dii aŋ bɩ vɔgɛ, ma luobiee jaŋ wuoli. Ma jaŋ tʋɔlɛ kɩaa aŋ chɛ ka, mɩ jaŋ leŋ dɩ ba yuo diima aŋ paa kɩalɩŋ ma sɩ tʋɔla viiri.

¹⁵ Ma jaŋ duu kɩaa aŋ bɩ jaŋ ŋaa kɩalɩŋ, ma jaŋ tugi nʋʋŋ aŋ bɩ nʋʋ-la jaŋ tɩsɛ. Ma jaŋ chagɛ girep nɛnɛɛ sɩnɩŋ aŋ bɩ jaŋ nyʋa,

¹⁶ bɛɛ wɩaa ma to kuoro Omiri naabʋɔsʋŋ nɛ, a ŋaa wɩalɩŋ kala kuoro Ahab dɩa nɩaa sɩ ŋaa. Ma to ba naabarɩŋ wʋŋaalaa nɛ. Ŋɩɩ wɩaa mɩ jaŋ cheima, a leŋ dɩ nɩaa kɛmma ŋmoo gbɛɛŋ. Tinteyee nɩaa jaŋ mɔmma.”