MƖKA 4 - WƖA TENIŊ

La TƖƖNA Peeliŋ

¹ Tapʋlaa dɩdɛrɩŋ, La TƖƖNA peel-la nyuŋ Wɩa dɩɩ-balɩŋ sɩ chɩna nɛ jaŋ kɩɩ peelee kala. Ʋ nɛ jaŋ sii je kɩɩ dundolo kala, dɩ tinteyee gire mʋ ʋ leriŋ.

² Tintee daŋ nɩaa jaŋ kɔ a bʋl, “Má kɔ dɩ la jɩl La TƖƖNA peel-la nyuŋ a mʋ Jekɔb Wɩa dɩa. La TƖƖNA jaŋ dagɛla ʋ wombiee, dɩ la tuto. Wɩa jaŋ dagɛla ʋ wombii-la ʋ sɩ bile dɩ la tuto a lɩɩ Zaayɔŋ lɛ. La TƖƖNA niiŋ wɩaa jaŋ lɩɩ Jerusalɛm nɛ.”

³ Ʋ jaŋ laa tintee daŋ nɩaa wɩaa jɩma pɩba, a kɛŋ tintee-duoruŋ sɩ hɛ dɩ-boloo arɩ dɩ-kpagɩsɩŋ nɩaa kʋ hɛ dɔŋɔ dɩ ba ŋaa sɩma. Ba jaŋ kɛŋ ba tokobiee a libi pirisiŋ, aŋ kɛŋ ba tiŋŋee ma a libi sɩɩ-kɔrʋsʋŋ. Tintee kala bɩra bɩ jaŋ joŋ tokobiiŋ a je ʋ dɔŋɔ lɛ, koo a bɩra gʋnnɛ laalɩŋ yuonuŋ.

⁴ Nʋʋkala jaŋ hɔŋ ʋ girep tɩa bʋbʋɔŋ a hɔŋ ʋ tutogo bʋbʋɔŋ arɩ yarɩfɩɛlaa. Nʋʋkala bɩ jaŋ ŋaa dɩ fawʋllʋŋ kɛmba, bɛɛ wɩaa La TƖƖNA doluŋ kala Tɩɩna nɛ bʋla.

⁵ Tinteyee nɩaa kala kɛŋ ba vesiŋ yɩrɩŋ nɛ vɩvɛŋ. La-na jaŋ kɛŋ La TƖƖNA Wɩa yɩrɩŋ nɛ vɛŋ a kaa mʋ wuu.

Wɩalɩŋ Wɩa sɩ bɩɩna dɩ ʋ ŋaa

⁶ La TƖƖNA sɩ, “Dɩ tapʋlɩɩ-la nɛ yie, mɩ jaŋ kɛŋ gbɛrɩgɛɛ kʋ hɛ dɔŋɔ a kɛŋ nɩalɩŋ ba sɩ kaa mʋ yoŋ-baga arɩ nɩalɩŋ mɩ sɩ leŋe ba nɩna hɛɛŋ kʋ hilimi.

⁷ Mɩ jaŋ leŋ dɩ gbɛrɩgɛ-la kʋkaanaa arɩ nɩalɩŋ ba sɩ kire ta ŋaa tintee-duo, dɩ mɩ-na ma TƖƖNA bemba Zaayɔŋ peel-la nyuŋ a chɩŋ tapʋlɩɩ-la a kaa mʋ wuu.

⁸ Ŋ-na Jerusalɛm nagɛ dɩɩ-leŋii nɛ mɩ sagɛ ʋ nyuŋ aa beŋ mɩ piesee, a ŋaa Zaayɔŋ nɩaa dɩ-duoŋ. Mɩ jaŋ leŋ dɩ ŋ bɩra kɛŋ ŋ faafaa dol-la. Ma-na Jerusalɛm nɩaa nɛ jaŋ didii kuoruŋ.

⁹ Bɛɛ nɛ tɩɩ ma faasaa ŋmoo niiŋ, ma bɩ kuoro kɛnɛɛ? Nɩɩ-la sɩɩ dagɛma lɛlɛ nɛ, ka ma nɩna hɛɛŋ a nagɛ haala sɩɩ chɛ dɩ ʋ lʋl ʋ luoru wʋwɩɩ?

¹⁰ Zaayɔŋ nɩaa, maa na hɛɛŋ a nagɛ haala sɩɩ chɛ dɩ ʋ lʋl ʋ luoruŋ wʋwɩɩ ŋɩɩ nɛ. Ʋ lɛɛlɛ maga dɩ ma lɩɩ tabal-la lɛ nɛ a mʋ ŋmoo buguŋ pɔkɔŋ nyuŋ. Ma jaŋ mʋ Babɩlɔŋ, nɩmɛ nɛ mɩ jaŋ laama ta. Mɩ-na ma TƖƖNA jaŋ laama ta ma dʋndɔŋŋɔɔ nɩsɩŋ lɛ.

¹¹ Bʋa deeŋ lɛ tinteyee yʋga nɛ, a kʋ hɛ dɔŋɔ lɛ dɩ ba yuoma. Ba sɩ, ‘Má leŋ dɩ la cheyu, má leŋ dɩ la na dɩ Zaayɔŋ pɩŋ jikpeeŋ.’

¹² Ama ba bɩ mɩ-na ma TƖƖNA tʋɔbɩɩnaa jɩŋ, ba bɩ wɩalɩŋ mɩ sɩɩ bɩɩnʋ dɩ mɩ ŋaa bʋbʋɔŋ jɩŋ. Mɩ kɛmba kʋ hɛ dɔŋɔ lɛ a nagɛ mɩɩ-jagɩsɩŋ ba sɩ kaa hɛ dɔŋɔ taha lɛ nɛ.

¹³ Zaayɔŋ nɩaa, má sii ŋmoo mɩɩ-jagɩsɩ-la, bɛɛ wɩaa mɩ jaŋ leŋ dɩ ma kɛŋ doluŋ a nagɛ hɔɔŋ. Mɩ jaŋ leŋ dɩ ma naachɩgɩsɩŋ nagɛ kɔlɩɩŋ dɩ ma kaa nʋɔsɛ tintee daŋ nɩaa bʋrɩgɛ. Ma jaŋ laa kɩalɩŋ kala ba sɩ gɩrɩma laa a kaa kʋ pɩ mɩ-na ma TƖƖNA, a joŋ ba dʋa kala pɩ mɩ-na ma TƖƖNA sɩ tɩɩ dʋnɩa kala.”