MƖKA 3 - WƖA TENIŊ

Mɩka kpɩa Iziral sɩpaalaaraa arɩ Wɩa wʋlaabʋllaa lɛ

¹ Ŋɩɩ nɛ mɩ-na Mɩka bʋl, “Iziral tɩŋŋaa sɩpaalaaraa, má jegili mɩ teeŋ, ma nɩalɩŋ sɩɩ beŋ Iziral tɩŋŋaa. Ʋ maga dɩ ma nɛ jɩŋ wɩalɩŋ sɩ maga dɩ nɩaa ŋɩŋaa,

² ama ma bɛrɛ wʋzɔŋŋɔɔ nɛ aŋ cho wʋbɔŋŋɔɔ. Ma fɩsɛ mɩ nɩaa puruŋ nɛ aŋ ka ba nampɩlɩŋ arɩ ba haŋgbelee.

³ Ma chaŋ mɩ nɩaa nɛ, a fɩsɛ ba puruŋ a yɛrɛ ba haŋgbelee muno muno. Ma keriba a nagɛ ba sɩ yie keri nammɩa ŋɩɩ nɛ a chɔ.

⁴ Bʋa kʋbala jaŋ yi dɩ ma ŋmoo niiŋ a pɩ ma TƖƖNA, ama ʋ jaŋ fʋʋla yagɛma. Bʋa-la lɛ ʋ jaŋ kɛŋ ʋ tɩtɩa faama, bɛɛ wɩaa wʋbɔŋ nɛ ma ŋaa.”

⁵ Wɩɩ-la La TƖƖNA sɩ bʋla nɛ ŋ-la: “Ma nɩalɩŋ sɩ sɩ ma ŋaa mɩ wʋlaabʋllaa nɛ aa nyɩsɛ mɩ nɩaa. Dɩ ba nɛ pɩma kʋdiilee, ma yie bʋl, ‘Wɩa jaŋ leŋ dɩ ma hɔŋ arɩ fɩɛlɩŋ.’ Dɩ ba nɛ bɩ ma kʋŋ pa, ma bʋl arɩ laalɩŋ jaŋ kʋ jʋʋba.

⁶ Ŋɩɩ wɩaa ma nɩalɩŋ sɩ sɩ ma ŋaa mɩ wʋlaabʋllaa nɛ, ma wɩa jaŋ jʋʋ, dɩ ma taŋ biri. Tɩtaŋɩŋ ma bɩ jaŋ na wɩɩkala arɩ duosoo tʋɔŋ, leriŋ jaŋ biri, ka mɩ bɩ jaŋ joŋ wɩɩkala dagɛma.

⁷ Hɩɩsɩŋ jaŋ dii mɩ sɩɩ-naaraa, nɩalɩŋ ma sɩ pɩɛsɛmɛ nɩna wɩaa jaŋ dii hɩɩsɩŋ. Ba kala jaŋ gʋrɛ nyuŋ a dagɛ arɩ ba dii hɩɩsɩŋ nɛ, bɛɛ wɩaa mɩ-na Wɩa bɩ jaŋ bʋl wɩɩ ba teeŋ.”

⁸ Ama mɩ-na Mɩka, La TƖƖNA joŋ ʋ Dɩma hɛ mɩ lɛ nɛ mɩ kɛŋ doluŋ, a jɩŋ wɩalɩŋ sɩ maga dɩ nɩaa ŋaa a kɛŋ bɔɩ-duoŋ dɩ mɩ dagɛ Iziral tɩŋŋaa wʋbɔŋŋɔɔ pɩba.

⁹ Iziral tɩŋŋaa sɩpaalaaraa, má nɩɩ wɩɩŋ deeŋ, ma nɩalɩŋ sɩɩ beŋ Iziral tɩŋŋaa, ma bɛrɛ wʋtɩtɩɩ nɛ a kɛŋ wɩalɩŋ kala sɩ tʋʋla a golibi.

¹⁰ Ma kpʋ nɩaa nɛ a saa Zaayɔŋ a ŋaa wʋbɔŋŋɔɔ ma, a saa Jerusalɛm.

¹¹ Ma sɩpaalaara-la yie laa kpalaa nɛ aŋ dii sarɩya, ma Wɩɩsʋllɩ sɩpaalaaraa yie dagɛ nɩaa Wɩa wombiiŋ aa chɛ time. Ma nɩalɩŋ sɩ sɩ ma ŋaa Wɩa wʋlaabʋllaa yie bʋl wɩalɩŋ ma sɩ na aa laa moribiee. Ka ma ha yie bʋl dɩ ma yelli La TƖƖNA nɛ. Ma yie bʋl, “La TƖƖNA hɛ la teeŋ nɛ, wʋlɔrʋ kala bɩ jaŋ jʋʋla.”

¹² A tɩŋ ma wɩaa, ba jaŋ pɛrɛ Zaayɔŋ a nagɛ baga. Jerusalɛm jaŋ pɩŋ jikpeeŋ a nagɛ pupuluŋ. Wɩa dɩɩ-bal-la sɩ chɩŋ dundolo-la nyuŋ jaŋ lugi a nagɛ duuŋ.