MƖKA 2 - WƖA TENIŊ

Nuhuobiine tʋɔbɩɩnaa arɩ Wɩa tʋɔbɩɩnaa

¹ Wɩɩŋ puu nɩalɩŋ sɩɩ vʋʋrɛ nɩbɔŋ wɩaa, nɩalɩŋ sɩ yie pɩna bɩɩnɛ wʋbɔŋŋɔɔ a sii folo kɛmba tɩŋ, a tɩŋ ba sɩ kɛŋ doluŋ dɩ ba ŋaa wɩalɩŋ.

² Ba nɩɩ chɛ nɩaa bagɩsɩŋ, ba yie kaa laa nɛ. Ba nɩɩ chɛ dɩɩsɩŋ ma, ba kaa laa. Ba yie gɩrɩmɛ dɩa tɩɩna a laa ʋ dɩa, a kɛŋ ba dɔnsʋŋ tɩŋŋaa kɩaa lɩlaa.

³ Ŋɩɩ wɩaa, La TƖƖNA sɩ, “Mɩɩ bɩɩnɛ mɩ ŋaa wʋlɔrʋŋ nɛ ma nɩaa deemba lɛ, ma bɩ jaŋ wuo laa ma tɩtɩa. Ma bɩra bɩ jaŋ wuo ŋaa wɩaa a dagɛ ma tɩtɩa, bɛɛ wɩaa bʋa-la lɛ wɩaa jaŋ jʋʋma.

⁴ Tapʋlɩɩ-la nɩaa jaŋ sieri ma lɛ, ba jaŋ yɩɩ nisusu yɩɩlɩŋ deeŋ a sieri ma lɛ, ‘La wɩaa chaasa chei nɛ, ba kɛŋ mɩ nɩaa kɩaa kpaa nɛ. La TƖƖNA kaa laa mɩ teeŋ nɛ, a joŋ la bagɩsɩŋ a pɩ nɩalɩŋ sɩ yuo diila.’ ”

⁵ Ŋɩɩ wɩaa ma bɩ jaŋ kɛŋ lee La TƖƖNA nɩaa tʋɔŋ, dɩ ba nɛ tɔnsɔ a kɛŋ tintee-la kpɩkpaa.

Nɩalɩŋ sɩ nyɩɛ wɩaa arɩ ba ŋaa Wɩa wʋlaabʋllaa nɛ

⁶ Ba nɩalɩŋ sɩ sɩ ba ŋaa Wɩa wʋlaabʋllaa nɛ bʋla pɩmɛ, “Sɩ́ Wɩa wɩaa bʋla pɩla. Sɩ́ Wɩa wɩaa bʋla tɩgɛ wɩaa deemba lɛ, Wɩa bɩ jaŋ leŋ dɩ la dii hɩɩsɩŋ.

⁷ Ʋ bɩ maga dɩ ŋ bʋla pɩ Jekɔb doho nɩaa arɩ La TƖƖNA na baanɩŋ nɛ ba nyuŋ. Ʋʋ ŋaa wʋyiriba-la nɛɛ? Ʋ niiŋ wɩaa bɩ wʋzɔmɔ nɛ ŋaa a pɩ nɩalɩŋ sɩɩ ŋaa wɩaa ba bʋa lɛɛ?”

⁸ Ŋɩɩ nɛ La TƖƖNA bʋl, “Tapʋlaa deemba, mɩ nɩaa ma sii chɩŋ mɩ lɛ nɛ a nagɛ ba ŋaa mɩ dʋndɔmɔ. Ba wuri nɩaa gɛnnɩŋ nɛ, nɩalɩŋ sɩ ta jɩa a kʋʋ bal, nɩalɩŋ sɩ nagɛ laalɩyuoroo sɩ mʋ laalɩŋ aŋ mɩɩra kʋkɔ.

⁹ Ba kiri mɩ nɩaa haalaa ba lɩɩ dɩɩsɩ-la ba sɩ cho lɛ nɛ. Ba kɛŋ wʋzɔmɔ-la kala mɩ fa sɩ jaŋ joŋo pɩ ba biiriŋ laa nɛ, a kaa mʋ wuu.

¹⁰ Má sii viiri, daha tuo ma dɩ-wiesii. Ma wʋŋaalaa leŋe ʋ kɛŋ disiniŋ nɛ, ʋ cheye nɛ, nʋʋ bɩra bɩ jaŋ wuo wasʋ.

¹¹ Dɩ wʋnyɩɛrʋ nɛ fa kʋ nyɩsɛma a bʋl, ‘Mɩ jaŋ bʋl wɩaa Wɩa doluŋ lɛ arɩ girep nɛnɛɛ sɩnɩŋ arɩ sɩ-duoruŋ jaŋ pʋrɩgɛ,’ wʋlaabʋlla deeŋ doho nɛ ma nɩaa deemba chɩchɛ.”

La TƖƖNA hɛ niiŋ arɩ ʋ jaŋ laa Iziral tɩŋŋaa ta

¹² La TƖƖNA bɩra sɩ, “Mɩ sɛnɛ jaŋ kɛŋ ma Jekɔb doho nɩaa kala kʋ hɛ dɔŋɔ, mɩ sɛnɛ jaŋ kɛŋ Iziral nɩkaanaa kʋ hɛ dɔŋɔ lɛ. Mɩ jaŋ kɛmba kʋ hɛ dɔŋɔ a nagɛ piesee sɩ hɛ pie-dɩa lɛ. Ba jaŋ nagɛ pie-laalɩŋ sɩ hɛ yaŋ dɩ-diiliŋ. Nɩaa jaŋ bɩra su tintee-la.

¹³ Mɩ nɛ jaŋ suri wombiiŋ, a laa ba sɩpaaŋ, a kɛmba lɩɩ yoŋ-baga lɛ. Mɩ-na ma TƖƖNA sɩ ŋaa ba kuoro nɛ jaŋ laa sɩpaaŋ.”