MƖKA 1 - WƖA TENIŊ

¹ La TƖƖNA bʋl wɩaa pɩ Mɩka sɩ lɩɩ taŋ-la ba sɩɩ yɩrɛ Mɔrɛsɛf, bʋa-la lɛ nɩaa deemba sɩ dii Juda tinteeŋ kuoruŋ: Jotam, Ahas arɩ Hezikaaya. Mɩka fa na wɩaa arɩ duosoo tʋɔŋ nɛ a mʋ tɩgɛ Samarɩa arɩ Jerusalɛm lɛ. Ʋ sɩ,

² Tinteyee nɩaa kala, má jegile nɩɩ. Dʋnɩa arɩ kɩalɩŋ kala sɩ hɛ ʋ lɛ, má nɩɩ woruŋ. La TƖƖNA Wɩɩjarɩbakɔ na ma wʋbɔŋŋɔɔ nɛ, ʋ jaŋ chɩŋ kporoo a bʋlba. La TƖƖNA hɛ ʋ dɩɩ-balɩŋ sɩ bɩ disiniŋ kɛnɛ lɛ nɛ.

Wɩa jaŋ dii Samarɩa arɩ Jerusalɛm nɩaa sarɩya

³ Má bee na, La TƖƖNA lɩɩ ʋ dɩjʋʋlʋŋ a kʋkɔ nɛ, ʋ kʋʋ tuu nɛ dɩ ʋ vɛŋ peelee nyuŋ.

⁴ Peelee jaŋ yʋɔlɛ ʋ naasɩŋ bʋbʋɔŋ, a nagɛ keliŋ sɩ kpagɛ nyiniŋ a ŋmɩɛrɛ. Fuo-naasɩŋ ma jaŋ pɩsɛ dɔŋɔ lɛ a nagɛ lɩɩŋ sɩ pɛllɛ lɩɩ dundolo nyuŋ tutuu.

⁵ Wɩaa deemba kala jaŋ ŋaa a tɩŋ Jekɔb doho nɩaa, Iziral tɩŋŋaa sɩ vɩa Wɩa aŋ ŋaa wʋbɔŋŋɔɔ. Kʋbɛɛ nɛ ba jaŋ dɔŋ a tɩŋ ba wʋbɔmɔ-la wɩaa? Samarɩa sɩ ŋaa ba tabalɩŋ dee? Nɩɩ nɛ Juda nɩaa vʋɩ-kpaarɛ leree hɛ? Jerusalɛm sɩ ŋaa ba tabalɩŋ lɛ dee?

⁶ Ŋɩɩ wɩaa La TƖƖNA sɩ, “Mɩ jaŋ leŋ dɩ Samarɩa pɩŋ jikpeeŋ a ŋaa pʋlʋŋ-jaala, lee ba sɩ jaŋ bil girep tɩɩsɩŋ baga. Mɩ jaŋ paa ʋ tabɩa-la sɩ tele daŋ dɔŋɔ tuu fuonaaŋ aŋ ka dɩ ʋ gentine nyɩɩsɛ.

⁷ Mɩ jaŋ ŋmoo tɔmɔ-la kala ʋ sɩ cho yɛrɛ muno muno, aŋ nyɩgɛ kɩalɩŋ kala ba sɩ joŋo dii zile a bil vene dɩa lɛ. Mɩ jaŋ chei Samarɩa tɔŋŋɔɔ kala. Ba kpaarɛ vʋɩyaa nɛ a ŋaa wʋlɩɩlɩŋ a na kɩaa. Ba dʋndɔŋŋɔɔ ma jaŋ paa kɩalɩŋ kaa mʋ tiŋ nɩalɩŋ sɩ kpaarɛ vʋɩyaa aa ŋaa wʋlɩɩlɩŋ.”

Mɩka yele a ŋmoo niiŋ

⁸ Mɩ-na Mɩka jaŋ tɩŋ wɩɩŋ deeŋ wɩaa a yel a ŋmoo niiŋ, mɩ jaŋ kɛŋ naabirimee arɩ yarɩ-biree a gɔllɛ. Mɩ jaŋ gɔllɔ yel a nagɛ jolo, a huuni a nagɛ hajaaŋkuŋkuŋ,

⁹ bɛɛ wɩaa Samarɩa naawɩɩlɩŋ bɩ jaŋ wuo fɩɛlɛ, Juda ma jaŋ na hɛɛŋ ŋɩɩ tɩtɩa. Wɩɩ-la yi Jerusalɛm ma tɩtɩa boi-baalɩŋ nɛ a kiele jʋʋ lee-la mɩ nɩaa sɩ hɛ.

¹⁰ Má sɩ́ wɩɩŋ deeŋ bʋl taŋ-la ba sɩɩ yɩrɛ Gaf lɛ, ba ŋaa la dʋndɔmɔ nɛ. Má paala sɩ́ yel dɩ ba nama. Taŋ-la ba sɩɩ yɩrɛ Bɛf Ɔfɩra lɛ, má bilimi kʋŋkɔlʋŋ lɛ a dagɛ arɩ ma tʋɔŋ cheye nɛ.

¹¹ Má nɩalɩŋ sɩ hɛ Safɩya lɛ, má kɛŋ hɩɩsɩŋ arɩ yarɩ-biree mʋ yoŋ-baga. Nɩalɩŋ sɩ hɛ taŋ-la ba sɩɩ yɩrɛ Zaanaŋ lɛ, má sɩ́ dɩ-jalɩŋ lɩɩ. Bɛf Ɛzɛl tɩŋŋaa ka yel nɛ, lee tuo ma sɩ jaŋ yuori.

¹² Ma nɩalɩŋ sɩ hɛ taŋ-la ba sɩɩ yɩrɛ Marɔf lɛ, hɛɛŋ jʋʋma nɛ. Maa chɛ nʋʋ nɛ dɩ ʋ lɩɩsɛma hɛɛ-la lɛ. La TƖƖNA nɛ joŋ wʋlɔrʋnʋŋ hɛ ma lɛ, wɩalɩŋ paala kpagɛ Jerusalɛm ma boi-baalɩŋ nɛ.

¹³ Ma nɩalɩŋ ma sɩ hɛ taŋ-la ba sɩɩ yɩrɛ Lakɩs lɛ, má paa laalɩŋ janɩŋ torukoba hɛ janɩŋ. Ma nɛ suomo ŋaa wʋbɔŋŋɔɔ Jerusalɛm nɩaa na, bɛɛ wɩaa ma wʋbɔmɔ-la nɛ Iziral tɩŋŋaa chesi ŋɩɩ.

¹⁴ Ŋɩɩ wɩaa Juda tɩmma, má sal taŋ-la ba sɩɩ yɩrɛ Mɔrɛsɛf Gaf a lɩɩ pa. Taŋ-la ba sɩɩ yɩrɛ Akɩzɩb ka nyɩsɛ Iziral kuoroo nɛ.

¹⁵ Mɩ jaŋ kɛŋ yuo-diiru kʋ hɛ nɩalɩŋ sɩ hɛ taŋ-la ba sɩɩ yɩrɛ Marɛsa lɛ. Iziral tɩŋŋaa sɩpaalaaraa jaŋ mʋ faa Adulam bʋ-bʋa lɛ.

¹⁶ Juda tɩmma, má fʋŋ nyu-kpelliŋ aŋ yel ma bii-chooloo lɛ. Má kɛŋ nyu-kpelliŋ a nagɛ duuŋ, bɛɛ wɩaa ba jaŋ kɛsɛ ma biiriŋ mʋ yoŋ-baga.