Matiu 27 - WƖA TENIŊ

Ba kɛŋ Yesu mʋ Paalɩt teeŋ

¹ Taŋ sɩ pʋla chʋchʋɔŋ, Wɩɩsʋllɩ sɩpaalaaraa kʋhɩasɩŋ kala arɩ taŋ-la kʋhɩasɩŋ vʋʋrɛ dɩ ba kpʋ Yesu.

² Ba kɛnʋ vɔɔ a kaa mʋ Paalɩt teeŋ. Ʋ nɛ fa hɔŋ Rom kuoru-balɩŋ nyuŋ Judiya tinteeŋ lɛ.

Judas sʋba

³ Judas zɛmbɛ tɩɩna-la sɩ nɩa dɩ baa chɛ dɩ ba kpʋ Yesu nɛ, ʋ tʋɔŋ chei arɩ ʋ sɩ yallɛ Yesu ŋɩɩ. Ʋ mɩɩra kɛŋ warɩpʋla mara arɩ fii-la a kaa mʋ Wɩɩsʋllɩ sɩpaalaaraa kʋhɩasɩŋ arɩ taŋ-la kʋhɩasɩŋ teeŋ a bʋl,

⁴ “Mɩ ŋaa wʋbɔŋ nɛ. Mɩ joŋ nɩɩ-la sɩ bɩ wɩɩ cheye yallɛ nɛ dɩ ba kpʋʋ.” Ŋɩɩ nɛ nɩalɩŋ bʋl, “La sɩpaa kala tuo, ŋ wɩɩ nɛ.”

⁵ Ŋɩɩ nɛ Judas joŋ moribie-la a yuo ta Wɩa dɩɩ-bal-la tinteeŋ aŋ lɩɩ a mʋ yuo ŋmɛnɩŋ.

⁶ Wɩɩsʋllɩ sɩpaalaaraa kʋhɩasɩŋ paa moribie-la aŋ bʋl, “Chalɩŋ moribiee nɛ ŋ-la. Ʋʋ kɩsɛ nɛ dɩ la jomba hɛ Wɩa dɩɩ-balɩŋ moribiee lɛ.”

⁷ Ŋɩɩ nɛ ba vʋʋrɛ a joŋ moribie-la yɔɔ tinteeŋ pupo-mɛɛrɛ teeŋ. Nɩmɛ nɛ ba huhugi nʋhʋɔraa.

⁸ Ŋɩɩ nɛ tɩɩ ba kɛŋ lee-la yɩyɩrɛ chalɩŋ tinteeŋ arɩ jɩnɩŋ kala.

⁹ Ba sɩ ŋaa ŋɩɩ, wɩalɩŋ Wɩa wʋlaabʋlla Jɛrɩmaaya fa sɩ bʋla kʋ ŋaa wʋtɩtɩɩ. Ʋ fa sɩ, “Iziral doho nɩaa sɛyɛ arɩ ʋ yalɩŋ jaŋ ŋaa warɩpʋla mara arɩ fii.

¹⁰ Ba joŋ moribie-la ba sɩ mɩɩra laa a yɔɔ tinteeŋ pupo-mɛɛrɛ teeŋ. Mɩ Tɩɩna Wɩa nɛ fa dagɛmɛ ŋɩɩ.”

Paalɩt pɩɛsɛ Yesu wɩaa

¹¹ Yesu sɩ chɩŋ nɩɩ-la sɩ hɔŋ kuoru-balɩŋ nyuŋ sɩpaaŋ Judiya tinteeŋ lɛ, kuoru-la pɩɛsʋ, “Ŋ nɛ ŋaa Juu tɩŋŋaa kuoro koo?” Ŋɩɩ nɛ Yesu bʋla pʋ, “Oo, mɩ nɛ.”

¹² Ama Wɩɩsʋllɩ sɩpaalaaraa kʋhɩasɩŋ arɩ taŋ-la kʋhɩasɩŋ sɩ joŋ cheeriŋ pʋ ŋɩɩ, ʋ bɩ wɩɩ bʋla.

¹³ Ŋɩɩ nɛ Paalɩt pɩɛsʋ, “Ŋ bɩ wɩaa deemba kala nɩa ba sɩ bʋla a tɩgɛ ŋ lɛɛ?”

¹⁴ Ama Yesu bɩ ʋ niiŋ suro, ʋ bɩ wʋbala ma bʋla. Wɩɩ-la kperi Paalɩt woruŋ.

Ba sɩ dɩ ba kpʋ Yesu

¹⁵ Dɩ dɩɩsɩŋ kiele bal gbiele nɛ yie-na kala, Paalɩt fa yie leŋ ba lɩɩsɛ nɩalɩŋ ba sɩ kaa tɔ dɩa dɔŋɔ nɛ, nɩɩ-la nɩaa sɩ cho.

¹⁶ Bʋa-la lɛ dɩ ba kɛŋ baal kʋbala baa yɩrɛ Barabas a tɔ dɩa, ʋ fa ŋaa wʋcheeru nɛ nʋʋkala jɩŋ ʋ lɛ.

¹⁷ Nɩ-daŋ-la sɩ hilime, Paalɩt pɩɛsɛba, “Kʋbɛɛ nɛ ma cho dɩ mɩ lɩɩsa ta pɩma? Barabas koo Kirisito, nɩɩ-la Wɩa sɩ lɩɩsaa?”

¹⁸ Paalɩt fa jɩma arɩ Juu tɩŋŋaa kʋhɩasɩŋ yaraa faa bieru nɛ, ŋɩɩ nɛ tɩɩ ba kɛŋ Yesu kaa kɔ ʋ teeŋ.

¹⁹ Paalɩt fa sɩ hɔŋ sarɩya dɩ-diiliŋ ŋɩɩ, ʋ haala tɩŋ ba bʋla pʋ, “Sɩ́ baala deeŋ wɩɩkala ŋaa. Ʋ ŋaa tʋɔpʋl tɩɩna nɛ. Dɩamɩŋ tɩtaŋɩŋ mɩ duosi duosi bɔŋ nɛ a tɩgɛ ʋ lɛ.”

²⁰ Ŋɩɩ nɛ Wɩɩsʋllɩ sɩpaalaaraa kʋhɩasɩŋ arɩ Juu tɩŋŋaa kʋhɩasɩ-la nyɩsɛ nɩ-daŋ-la hɛ dɩ ba bʋl dɩ Paalɩt lɩɩsɛ Barabas ta aŋ ka dɩ ba kpʋ Yesu.

²¹ Ŋɩɩ nɛ Paalɩt pɩɛsɛ nɩ-daŋ-la a bʋl, “Nɩaa deemba balɩamɩŋ tʋɔŋ, kʋbɛɛ nɛ maa chɛ dɩ mɩ lɩɩsa pɩma?” Ŋɩɩ nɛ ba bʋl, “Barabas.”

²² Ŋɩɩ nɛ Paalɩt pɩɛsɛ nɩalɩŋ, “Aŋ ka Yesu ba sɩɩ yɩrɛ Kirisito, bɛɛ nɛ ma sɩ mɩ ŋaa ʋ lɛ?” Ba kala bʋl, “Leŋ dɩ ba kpaasʋ mɛrɛ daagɛsɛ nyuŋ.”

²³ Ŋɩɩ nɛ Paalɩt pɩɛsɛba, “Wʋbɔŋ bɛɛ nɛ ʋ ŋaa?” Ba kpɩa a kɩɩ bumbuŋ-la a bʋl, “Leŋ dɩ ba kpaasʋ daagɛsɛ nyuŋ.”

²⁴ Ŋɩɩ nɛ Paalɩt na arɩ goŋ-la yʋga kɩŋkɛŋ, arɩ yuosuŋ jaŋ jʋʋ. Ŋɩɩ wɩaa ʋ bɩ wɩɩkala wuo ŋaa. Dɩ lɩɩŋ chɩŋ ʋ sɛmɛ, ʋ ŋaa a sɔŋ ʋ nɩsaa nɩalɩŋ sɩpaaŋ aŋ bʋl, “Mɩ nɩsɩŋ tuo baala deeŋ sʋʋŋ lɛ. Ʋ hɛ ma teeŋ.”

²⁵ Ŋɩɩ nɛ nɩ-daŋ-la kala bʋl, “Dɩ la nɛ cheye wɩɩŋ deeŋ lɛ, leŋ dɩ Wɩa dɔgɩsɛ la arɩ la biiriŋ a tɩŋ la sɩ kpʋʋ.”

²⁶ Ŋɩɩ nɛ Paalɩt lɩɩsɛ Barabas ta a pɩba aŋ ŋaa ba vɩɩrɛ Yesu aŋ joŋu pɩba dɩ ba kaa mʋ kpaasa mɛrɛ daagɛsɛ nyuŋ.

Laalɩyuoroo mɔŋ Yesu lɛ

²⁷ Ŋɩɩ nɛ Paalɩt laalɩyuoroo dɔnsʋŋ kɛŋ Yesu kaa jʋʋ Paalɩt kaala tʋɔŋ. Laalɩyuoro-la kʋkaanaa kala ma kʋ pɛ ba lɛ a hilimi.

²⁸ Ba wuri Yesu gɛnnɩŋ kala aŋ joŋ gɛrɩ-fɩaŋ duduoŋ laalʋ

²⁹ a chɛ sɔsʋŋ a kaa sʋa nyunchuulo a nagɛ kuoru nyunchuulo a joŋo chuu a joŋ dantɩga hɛ ʋ nadiiŋ lɛ aŋ tuu kpirimi ʋ sɩpaaŋ a mɔŋ ʋ lɛ a bʋl, “Juu tɩŋŋaa kuoro, laa chʋɔlʋŋ.”

³⁰ Ba tʋ nantʋɔrʋŋ a hɛ ʋ lɛ aŋ laa daa-la a ŋmoo ʋ nyuŋ lɛ.

³¹ Ba sɩ mɔŋ ʋ lɛ dɛrɛ, ba wuri gɛrɩ-fɩaŋ duduoŋ-la aŋ paa ʋ tɩtɩa gɛnnɩŋ a laalʋ aŋ kɛnʋ kaa mʋ dɩ ba kpaasʋ mɛrɛ daagɛsɛ nyuŋ.

Ba kpaasɛ Yesu daagɛsɛ nyuŋ

³² Ba sɩ kɛnʋ kaa mʋmʋ dɩ ba kpaasʋ daagɛsɛ nyuŋ ŋɩɩ, ba cheŋ baal kʋbala baa yɩrɛ Saamɔŋ, ʋ taŋ yɩrɩŋ nɛ Siriini. Laalɩyuoro-la fʋgʋ ʋ laa Yesu daagɛsɛ-la a baasɛ.

³³ Ŋɩɩ nɛ ba kʋ yi lee kʋbala baa yɩrɛ Gɔlɩgɔta. Yɩrɩ-la bʋbʋɔŋ nɛ nyu-kuŋkogulo.

³⁴ Ba sɩ yi nɩmɛ, ba joŋ sɩnɩŋ a guoli kʋhaarɩŋ lɛ a pɩ Yesu dɩ ʋ nyʋa. Ʋ sɩ lenne dɩ ʋ hɛyɛ, ʋ vɩa.

³⁵ Ŋɩɩ nɛ ba kpaasʋ mɛrɛ daagɛsɛ nyuŋ aŋ tɔnsɛ ʋ gɛnnɩŋ wɩaa, dɩ ba paa kpaa dɔŋɔ a jɩŋ gɛrɩ bɛɛ nɛ nʋʋkala jaŋ laa.

³⁶ Ba hɔŋ nɩmɛ a bibenu.

³⁷ Ba sɩ sɩ Yesu ŋaa wɩalɩŋ chei, ba ŋmʋnsa hɛ daagɛsɛ-la lɛ a bʋl, “JUU TƖŊŊAA KUORO YESU NƐ Ŋ-LA.”

³⁸ Ŋɩɩ nɛ ba kpaasɛ gaaraa balɩa ma a mɛrɛ daagɛsɛ lɛ a pɛ Yesu lɛ. Dɔŋɔ hɛ ʋ nadiiŋ, dɔŋɔ ma hɛ ʋ nagʋa.

³⁹ Ba sɩ kpaasʋ mɛrɛ daagɛsɛ-la nyuŋ ŋɩɩ, nɩalɩŋ sɩ to nɩmɛ bɩbal, ba tʋtʋʋsʋ aŋ kɛŋ ba nyuŋ chuchugisi

⁴⁰ a bʋl, “Oi, ŋ nɛ ŋaa nɩɩ-la sɩ sɩ ŋ jaŋ ŋmoo la Wɩa dɩɩ-balɩŋ lo aŋ bɩra wuo saaʋ tapʋlaa batori pɛgɛ. Ŋ sɩ ŋaa Wɩa Bie, lɩɩ daagɛsɛ-la nyuŋ a laa ŋ tɩtɩa ta.”

⁴¹ Wɩɩsʋllɩ sɩpaalaaraa kʋhɩasɩ-la arɩ Wɩa teniŋ kerichiba arɩ taŋ-la kʋhɩasɩŋ ma sisieri Yesu lɛ a bʋla pɩpɩ dɔŋɔ,

⁴² “Ʋ wuo nɩaa laa tɩta nɛ aŋ bɩ ʋ tɩtɩa wuo laa ta. Ʋ sɩ sɩ ʋ nɛ ŋaa Kirisito, Juu tɩŋŋaa kuoro, leŋ dɩ ʋ lɩɩ daagɛsɛ-la nyuŋ kʋ tuu dɩ la na a laa ʋ wɩaa dii.

⁴³ Ʋ laa Wɩa dii nɛ a bʋl dɩ ʋ ŋaa Wɩa Bie nɛ. Tɔɔ, má leŋ dɩ la na dɩ Wɩa nɛ jaŋ laaʋ ta lɛɛlɛ.”

⁴⁴ Gaara-la balɩa ma ba sɩ kpaasa a pɛ Yesu lɛ, ba ma tʋʋsʋ ŋɩɩ tɩtɩa.

Yesu sʋba

⁴⁵ Wɩa kʋ magɛ nyu-gbaŋa, leriŋ kala biri lim a mʋ yi dɩdaanɩŋ kerifi batori.

⁴⁶ Kerifi batori-la lɛ Yesu faasa yɩrɛ, “Eloi, Eloi, lama sabakɩtanɩ.” Ʋ bʋbʋɔŋ nɛ: “Mɩ Tɩɩna Wɩa, bɛɛ nɛ tɩɩ ŋ vɩamɛ ta?”

⁴⁷ Dɩ nɩaa dɔnsʋŋ chɩŋ nɩmɛ a jegile nɩɩ wɩalɩŋ ʋ sɩ bʋla. Ŋɩɩ nɛ ba bʋla pɩ dɔŋɔ, “Ɩlaaja nɛ baal-la yɩyɩrɛ ŋɩɩ.”

⁴⁸ Nɩalɩŋ dɔŋɔ fa sɩ chɩŋ nɩmɛ fá mʋ joŋ suosuo a kaa mʋ yuu sɩnɩŋ sɩ nyala a joŋo tuu sekeliŋ lɛ a kaa mʋ hɛ ʋ niiŋ lɛ dɩ ʋ nyʋa.

⁴⁹ Ŋɩɩ nɛ nɩalɩŋ dɔnsʋŋ fa sɩ hɛ nɩmɛ bʋl, “Má leŋ la gbɛrɛ a na arɩ Ɩlaaja jaŋ kʋ soru daagɛsɛ-la nyuŋ koo.”

⁵⁰ Ŋɩɩ nɛ Yesu faasa yel aŋ wiesi ʋ wiesi katɩɩ.

⁵¹ Patɩɩsaŋ nɛ fa hɛ Wɩa dɩɩ-balɩŋ tʋɔŋ, ba kaa kɛrɛ. Ʋ kɩɛsɛ balɩa a chɩŋ nyu-gbaŋa a kʋ tuu. Ŋɩɩ nɛ tinteeŋ zigili, bʋsʋŋ ma yɛrɛ.

⁵² Vaamaa ma suri suri, nɩalɩŋ sɩ laa Wɩa dii aŋ sʋʋ fa yʋga a sii sʋʋŋ lɛ a lɩɩ vaama-la lɛ.

⁵³ Yesu sɩ sii sʋʋŋ lɛ harɩŋ, ba mʋ Jerusalɛm. Nɩaa yʋga a naba lee-la.

⁵⁴ Laalɩyuoroo zɔlɔ kʋhɩaŋ arɩ laalɩyuoro-la fa sɩ chɩŋ nɩmɛ a bibeŋ Yesu a na tinteeŋ sɩ zigili ŋɩɩ arɩ wɩalɩŋ kala sɩ ŋaa, fawʋllʋŋ kɛmba. Ŋɩɩ nɛ ba bʋl, “Wʋtɩtɩɩ, baala deeŋ sɛnɛ ŋaa Wɩa Bii nɛ.”

⁵⁵ Haalaa yʋga a ma fa chɩŋ dɩ-bolii a bibeŋ. Haala-la fa to Yesu harɩŋ nɛ a lɩɩ Galilii tinteeŋ a pɩpɛ ʋ lɛ.

⁵⁶ Ba tʋɔŋ nɩalɩŋ dɔnsʋŋ nɛ Mɛɛrɩ Magɩdalɩŋ arɩ Mɛɛrɩ dɔŋɔ. Ʋ fa ŋaa Jeems arɩ Josɛf naaŋ nɛ a pɛ Zebidi haala lɛ.

Ba hugi Yesu

⁵⁷ Dɩdaanɩŋ sɩ yie, baal kʋbala sɩ lɩɩ taŋ kʋbala baa yɩrɛ Arɩmatɩya kɔ. Ʋ fa ŋaa kɩaa tɩɩna nɛ. Ʋ yɩrɩŋ nɛ fa Josɛf. Ʋ ma fa ŋaa Yesu harɩ-tooro-la dɔŋɔ nɛ.

⁵⁸ Ʋ mʋ Paalɩt teeŋ a sʋl Yesu kʋsʋʋŋ. Ŋɩɩ nɛ Paalɩt bʋl dɩ ba joŋo pʋ.

⁵⁹ Ŋɩɩ nɛ Josɛf laa a kɛŋ gɛrɩpɛ-pʋl-falɩŋ a bɛʋ

⁶⁰ a joŋu hugi ʋ tɩtɩa bʋa falɩŋ lɛ ʋ fa sɩ lɔsɔ bʋŋ nyuŋ. Ʋ bilimi tabɩɩ-balɩŋ kaa kʋ tɔ bʋa-la niiŋ aŋ viiri.

⁶¹ Ka Mɛɛrɩ Magɩdalɩŋ arɩ Mɛɛrɩ dɔŋɔ-la hɔŋ a chaasɛ bʋa-la leriŋ.

Laalɩyuoroo pɔ vaaŋ-la

⁶² Ʋ taŋ sɩ pʋla, chɛ-wiesii-la chɛɛŋ, Wɩɩsʋllɩ sɩpaalaaraa kʋhɩasɩŋ arɩ Farisii tɩmma-la mʋ Paalɩt teeŋ a bʋla pʋ,

⁶³ “Kʋhɩaŋ, la liisi wɩɩ nɛ. Bʋa-la lɛ wʋnyɩɛrʋ-la sɩ hɛ ʋ mɩɩsɩŋ lɛ, ʋ fa bʋla arɩ ʋ nɛ sʋba, ʋ jaŋ sii sʋʋŋ lɛ tapʋlaa batori chɛɛŋ.

⁶⁴ Ŋɩɩ wɩaa leŋ dɩ nɩaa mʋ a pɔ ʋ vaaŋ-la woruŋ dɩ tapʋlaa batori-la yi, dɩ ʋ harɩ-tooroo sɩ́ wuo mʋ a gaa kuusi aŋ bʋla pɩ nɩaa arɩ ʋ sii sʋʋŋ lɛ nɛ. Dɩ ba nɛ ŋaa wɩɩŋ deeŋ, ʋ nɛ jaŋ paala kɩɩ wɩalɩŋ kala ʋ sɩ nyɩa.”

⁶⁵ Ŋɩɩ nɛ Paalɩt bʋla pɩba dɩ ba kɛŋ laalɩyuoroo mʋ dɩ ba pɔ vaaŋ-la woruŋ.

⁶⁶ Ŋɩɩ nɛ ba laalɩyuoro-la mʋ a fere tɔ tabɩɩ-la ba sɩ kaa tɔ bʋa-la niiŋ aŋ leŋ nɩaa pɔ lee-la.