Matiu 24 - WƖA TENIŊ

Yesu bʋl Wɩa dɩɩ-balɩŋ ŋmoo lonuŋ wɩaa

¹ Ŋɩɩ nɛ Yesu sii lɩɩ Wɩa dɩɩ-balɩŋ lɛ a mʋmʋ. Ʋ harɩ-tooroo kɔ a bʋla pʋ dɩ ʋ bee na Wɩa dɩɩ-bal-la arɩ ʋ dɩɩsɩŋ kala sɩ zɔmɔ ŋɩɩ.

² Ŋɩɩ nɛ Yesu sɩ, “Ma bee na ʋ sɩ zɔmɔ ŋɩɩ, ama, mɩ bʋlaa pɩma, ba jaŋ ŋmoo dɩa-la kala lo. Ba bɩ jaŋ leŋ dɩ tie-bii-bala ma ka daŋ ʋ dɔŋɔ lɛ.”

Ba jaŋ dɔgɩsɛ nɩalɩŋ sɩ laa Yesu wɩaa dii

³ Ŋɩɩ nɛ Yesu mʋ hɔŋ Olif peel-la nyuŋ. Ʋ harɩ-tooroo lʋara kɔ ʋ teeŋ a bɩra pɩɛsʋ, “Bʋa bɛɛ lɛ nɛ wɩaa deemba jaŋ ŋaa? Wʋbɛɛ ba nɛ la jaŋ na a jɩŋ bʋa-la lɛ ŋ sɩ jaŋ kɔ, arɩ bʋa-la lɛ dʋnɩa sɩ jaŋ dɛrɛ?”

⁴ Ŋɩɩ nɛ Yesu bʋla pɩba, “Má kɛŋ ma tɩtɩa woruŋ dɩ nʋʋkala sí ma nyɩsʋ.

⁵ Nɩaa jaŋ yʋgɛ a kɔ a joŋ ba yɩrɩŋ hɛ arɩ ba nɛ ŋaa Kirisito, a nyɩsɛ nɩaa yʋgɛ.

⁶ Ma jaŋ nɩɩ arɩ laalɩŋ hɛ daha a hɛ dɩ-bolii. Dɩ ma nɛ kʋ nɩɩ ŋɩɩ, má sɩ́ leŋe dɩ ma bɔyɛ joŋ. Wɩaa deemba kala jaŋ ŋaa bal, ama dʋnɩa dɩdɛrɩŋ ha dee ŋɩɩ.

⁷ Tinteeŋ nɩaa jaŋ sii a mʋ a yuo tinteeŋ dɔŋɔ nɩaa. Taŋ kuoro arɩ ʋ nɩaa jaŋ sii gire mʋ yuo kuoro dɔŋɔ arɩ ʋ nɩaa. Losuŋ ma jaŋ jʋʋ. Tinteeŋ jaŋ zigili leree yʋgɛ.

⁸ Hɛɛŋ dɩ-suomuŋ nɛ ŋ-la.

⁹ Ba jaŋ kɛsɛma a jomma hɛ nɩaa nɩsɩŋ lɛ dɩ ba dɔgɩsɛma aŋ kpʋ ma dɔnsʋŋ. Tinteyee nɩaa kala jaŋ bɛrɛma a tɩŋ mɩ wɩaa.

¹⁰ Bʋa-la lɛ nɩaa jaŋ yʋgɛ a joŋ ba Wɩa laa diiniŋ ta, ba jaŋ joŋ dɔŋɔ yɩyallɛ, a bɛrɛ dɔŋɔ ma.

¹¹ Nɩalɩŋ sɩ nyɩɛ wɩaa arɩ ba ŋaa Wɩa wʋlaabʋllaa jaŋ yʋgɛ a kɔ a nyɩsɛ nɩaa yʋgɛ.

¹² Wʋbɔŋŋɔɔ jaŋ pʋrɩgɛ. A tɩŋ ŋɩɩ wɩaa, nɩaa fa sɩ cho nɩaa ŋɩɩ, ba chono-la jaŋ dɛrɛ.

¹³ Ama nɩɩ-la kala sɩ nyalɩma a mʋ dɛrɛ, Wɩa jaŋ laaʋ ta.

¹⁴ Ba jaŋ laa sɩpaaŋ bʋl Wɩa wʋzɔmɔ-la a tɩgɛ Wɩa kuorii-la lɛ lee-na kala dɩ dʋnɩa nʋʋkala nɩɩ, ka dɩ dʋnɩa dɩdɛrɩŋ-na yi.

Yesu bʋl wɩaa a tɩgɛ kʋlɔrʋ-la sɩ jaŋ hɛ nɩmɛ

¹⁵ Ma jaŋ na kʋ-la sɩ kɛŋ disiniŋ aa chei leriŋ, kʋ-la wɩaa Wɩa wʋlaabʋlla Danɩɛl fa sɩ bʋla. Ba jaŋ joŋ kʋ-la bil Wɩa dɩa lɛ, lee-la sɩ bɩ disiniŋ kɛnɛ (lee-la nɩɩ-la sɩ kɛŋ disiniŋ sɩ bɩ maga dɩ ʋ mʋ). Ma nɩalɩŋ sɩ karɩmɛ wɩaa deemba, ma jaŋ jɩŋ ba bʋbʋɔŋ.

¹⁶ Dɩ ma nɛ na ŋɩɩ, má leŋ dɩ nɩalɩŋ sɩ hɛ Judiya lɛ fá jɩl peelee nyuŋ a faa.

¹⁷ Dɩ nʋʋ nɛ hɛ ʋ lusuŋ nyuŋ a nɩɩ wɩaa deemba, ʋ sɩ kʋ tuu a chɩchɛ dɩ ʋ paa ʋ kɩaa dɩa lɛ.

¹⁸ Dɩ nʋʋkala nɛ hɛ ʋ baga lɛ a nɩɩ wɩaa deemba, dɩ ʋ sɩ́ mɩɩra mʋ dɩa a chɩchɛ dɩ ʋ paa ʋ gɛnnɩŋ.

¹⁹ Hapuugoo arɩ nɩalɩŋ sɩ nɔgɛ biiriŋ, oi, ba jaŋ na hɛɛŋ woruŋ.

²⁰ Má sʋl Wɩa dɩ wɩɩŋ deeŋ sɩ́ waarɩŋ bʋa koo chɛ-wiesi-la chɛɛŋ ŋaa.

²¹ Wɩa sɩ ŋaa dʋnɩa a kuu lɩɩ jɩnɩŋ, nʋʋkala ha bɩ hɛɛ-doho deeŋ na a nagɛ ŋɩɩ, ba bɩra bɩ jaŋ na hɛɛŋ ŋɩɩ a kaa mʋ wuu.

²² Dɩ Wɩa nɛ bɩ tapʋlɩa-la kere ta, nɩbala ma bɩ jaŋ ka. Ama nɩalɩŋ Wɩa sɩ lɩɩsa dɩ baa tou, ba wɩaa nɛ tɩɩ ʋ jaŋ keri tapʋlɩa-la ta.

²³ Dɩ nʋʋkala nɛ bʋla pɩŋ dɩ ŋ beŋ daha a na Kirisito-la, koo dɩ ŋ beŋ nɩmɛ a naʋ, sɩ́ ʋ laa dii.

²⁴ Nɩaa dɔnsʋŋ jaŋ sii fugo bʋl dɩ ba nɛ ŋaa Kirisito, nɩɩ-la Wɩa sɩ lɩɩsa. Dɔnsʋŋ ma jaŋ sii fugo bʋl ba ŋaa Wɩa wʋlaabʋllaa nɛ. Ba jaŋ ŋaa wʋmagɩlaa arɩ wʋkpuŋkperisiŋ kala a chɩchɛ dɩ ba nyɩsɛ nɩalɩŋ Wɩa sɩ lɩɩsa dɩ baa toba, dɩ ba nɛ wuolo.

²⁵ Wɩaa deemba kala mɩ laa sɩpaaŋ bʋlaa pɩma nɛ, ka dɩ bʋa-la-na yi.

²⁶ Má bee na, dɩ nɩaa nɛ bʋla pɩma arɩ nɩɩ-la Wɩa sɩ lɩɩsa nɛ hɛ tintee-hɩlɩŋ tʋɔŋ, má sɩ́ nɩmɛ mʋ, koo dɩ ba nɛ bʋla pɩma arɩ ʋ nɛ faa daha, má sɩ́ laa dii,

²⁷ bɛɛ wɩaa bʋa-la lɛ mɩ-na Nuhuobiine Bie sɩ jaŋ mɩɩra kɔ, ʋ jaŋ nagɛ duonuŋ sɩ lɩgɩsa pʋlʋmʋŋ chaanɛ wɩa-nyuŋ ŋɩɩ a lɩɩ wɩɩpɔsʋŋ a tuu wɩɩjʋʋlʋŋ.

²⁸ Lee-la kala kʋpʋa sɩ pɩna, duunuŋ ma yie hihilimi nɩmɛ nɛ.”

Nuhuobiine Bie kɔɔnʋŋ wɩaa

²⁹ Ŋɩɩ nɛ Yesu bɩra bʋla pɩba, “Tapʋlɩa-la hɛɛŋ deeŋ sɩ jaŋ dɛrɛ, ʋ bɩra bɩ jaŋ dieni dɩ taŋ nɛ pʋla ma, leriŋ jaŋ biri, chɛnɛ ma bɩra bɩ jaŋ pɔsɛ. Chɛnwʋlaa jaŋ lɩɩ wɩa-nyuŋ kʋ tuu titel. Ba jaŋ kiri wɩa-nyuŋ kɩalɩŋ kala sɩ kɛŋ doluŋ dɩ ba lɩɩ ba leree.

³⁰ Ŋɩɩ nɛ ma jaŋ na mɩ-na Nuhuobiine Bie magɩlɩŋ wɩa-nyuŋ. Dɩ dʋnɩa nɩaa nɛ naʋ, ba kala jaŋ yel. Ŋɩɩ lɛ nɛ ma jaŋ na mɩ-na Nuhuobiine Bie, dɩ mɩ to duoŋ-bɩlɩmbaanaa tʋɔŋ kʋʋ tuu. Mɩ jaŋ kɛŋ doluŋ yʋgɛ a chaanɛ.

³¹ Ŋɩɩ nɛ ba jaŋ ŋmʋʋ nyil-balɩŋ, a tɩŋ Wɩa tɩndaaraa dɩ ba mʋ dʋnɩa sɛmɛ-na kala a kɛŋ nɩalɩŋ kala Wɩa sɩ lɩɩsa ba tutou a hilimi.

Yesu bʋl sɔjaamɩŋ wɩaa

³² Ma gʋnnɛ wɩɩŋ deeŋ a lɩɩ sɔjaamɩŋ lɛ. Dɩ ma nɛ na sɔjaamɩŋ kʋʋ tɔsɛ, ma jɩma arɩ lɩmbaŋa yie nɛ.

³³ Namaga deeŋ dagɛma wʋjɩmɩŋ nɛ. Dɩ ma na wɩaa deemba kala dɩ baa ŋaa, ma jɩŋ dɩ mɩ-na Nuhuobiine Bie kɔɔnʋŋ kpaga nɛ.

³⁴ Wʋtɩtɩɩ nɛ mɩ bʋlaa pɩma, ma lɛɛlɛ nɩaa deemba sɩ hɛ ma mɩɩsɩŋ lɛ bɩ jaŋ sʋʋ, ka wɩaa deemba ŋaa.

³⁵ Wɩa nyuŋ arɩ tinteeŋ kala jaŋ lɛl, ama wɩalɩŋ mɩ sɩ bʋla bɩ jaŋ lɛl.

Yesu bʋla dɩ ʋ jaŋ kɔ bʋa-la lɛ la sɩ bɩ ʋ yɩɛla

³⁶ Ama nʋʋkala bɩ jaŋ jɩŋ chɛɛ-la koo bʋa-la lɛ wɩaa deemba sɩ jaŋ ŋaa. Wɩa tɩndaaraa sɩ hɛ Wɩa-jaŋ koo mɩ-na Nuhuobiine Bie ma paala bɩ jaŋ jɩŋ, see mɩ Nyɩmma dʋndʋŋa.

³⁷ Bʋa-la lɛ mɩ-na Nuhuobiine Bie sɩ jaŋ mɩɩra kɔ, ʋ jaŋ nagɛ bʋa-la lɛ Nowa fa sɩ hɛ ʋ mɩɩsɩŋ lɛ.

³⁸ Ka dɩ duonuŋ-na nɩɩ a su dʋnɩa, nɩaa faa dii kɩaa nɛ a nyʋnyʋa kɩaa ma, baalaa arɩ haalaa ma jɩjaa dɔŋɔ a mʋ yi tapʋlɩɩ-la Nowa fa sɩ jʋʋ lɩɩŋ daboro-la tʋɔŋ.

³⁹ Ba fa bɩ jɩŋ wɩɩ-la kala sɩɩ ŋaa see bʋa-la lɛ lɩɩ-la sɩ kʋ pɛllɛ paa ba kala, ba sʋʋ. Ŋɩɩ tɩtɩa nɛ jaŋ ŋaa bʋa-la lɛ mɩ-na Nuhuobiine Bie sɩ jaŋ kɔ.

⁴⁰ Bʋa-la lɛ baalaa balɩa jaŋ pɩpɛrɛ baga lɛ. Wɩa jaŋ joŋ dɔŋɔ aŋ leŋ dɔŋɔ ta.

⁴¹ Haalaa balɩa ma jaŋ nʋnɔŋ munuŋ nɔmʋŋ lɛ. Wɩa jaŋ joŋ dɔŋɔ aŋ leŋ dɔŋɔ ta.

⁴² Má saa kɛŋ ma tɩtɩa woruŋ, bɛɛ wɩaa ma bɩ jɩŋ tapʋlɩɩ-la ma Tɩɩna sɩ jaŋ kɔ.

⁴³ Dɩ nʋʋ nɛ fa jɩŋ bʋa-la lɛ gaara sɩ jaŋ kʋ gaa ʋ kɩaa ʋ dɩa lɛ, ʋ fa jaŋ hɔnɔ pɔ ʋ dɩa. Ʋ fa bɩ jaŋ pɩŋ doŋ. Ʋ jaŋ wei a pɔ dɩ gaarʋ-la sɩ́ kʋ jʋʋ a gaa ʋ kɩaa.

⁴⁴ Má ma saa ŋaa siri bʋa na-kala, bɛɛ wɩaa mɩ-na Nuhuobiine Bie jaŋ kɔ bʋa-la lɛ ma sɩ bɩ yɩɛla.”

Nɩɩ-la sɩ ŋaa tɩntɩnnɩ-tɩtɩɩ arɩ nɩɩ-la sɩ bɩ tɩntɩnnɩ-tɩtɩɩ ŋaa

⁴⁵ Ŋɩɩ nɛ La Tɩɩna Yesu mɩɩra pɩɛsɛba, “Kʋbɛɛ nɛ saa ŋaa tɩntɩnnɩ-tɩtɩɩ-la sɩ jɩŋ wɩaa? Ʋ nɛ nɩɩ-la ʋ kʋhɩaŋ sɩ yie lɩɩsɛ dɩ ʋ bibeŋ ʋ dɩa, aŋ pɛ pɩpɩ ʋ tɩntɩnnɩ-dɔsʋŋ ma kʋdiilee bʋa-la lɛ sɩ maga.

⁴⁶ Dɩ tɩntɩnnʋ-la nɛ ŋaa wɩalɩŋ ʋ kʋhɩaŋ sɩ dagʋ dɩ ʋ ŋaa, ʋ tʋɔŋ jaŋ tɔrɛ bʋa-la lɛ ʋ kʋhɩaŋ-la sɩ jaŋ mɩɩra kɔ.

⁴⁷ Wʋtɩtɩɩ, mɩ bʋlaa pɩma, ʋ kʋhɩaŋ-la jaŋ joŋ ʋ kɩaa kala hɛ tɩntɩnna deeŋ nɩsɩŋ lɛ dɩ ʋ bibeŋ.

⁴⁸ Ama dɩ tɩntɩnnʋ-la nɛ ŋaa nɩbɔŋ a bʋla pɩ ʋ tɩtɩa arɩ ʋ kʋhɩaŋ-la jaŋ dieni

⁴⁹ aŋ suomo ŋmuŋmoo ʋ tɩntɩnnɩ-dɔsʋ-la, aŋ faasa didii kʋdiilee aŋ nyʋa sɩnɩŋ bubugi,

⁵⁰ dɩ ʋ nɛ ŋaa ŋɩɩ, ʋ bɩ siri ŋaa gbɛrɛ ʋ kʋhɩaŋ-la. Ʋ kʋhɩaŋ-la jaŋ kɔ tapʋlɩɩ-la ʋ sɩ bɩ yɩɛla.

⁵¹ Ʋ jaŋ dɔgɩsʋ woruŋ aŋ kɛnʋ kaa mʋ hɛ lee-la kanfugi tɩmma-la sɩ hɛ. Lee-la nɛ nɩaa jaŋ yel aŋ chɩchaŋ ba nyɩlaa.”