Matiu 23 - WƖA TENIŊ

Yesu bʋl wɩaa a tɩgɛ Wɩa teniŋ kerichiba arɩ Farisii tɩŋŋaa lɛ

¹ Ŋɩɩ nɛ Yesu bʋla pɩ nɩ-daŋ-la arɩ ʋ harɩ-tooroo,

² “Wɩa teniŋ kerichiba arɩ Farisii tɩŋŋaa nɛ ŋaa nɩalɩŋ sɩɩ dagɛ wɩalɩŋ Mosis fa sɩ bile dɩ nɩaa tuto.

³ Ŋɩɩ wɩaa ma maga dɩ ma to wɩalɩŋ kala ba sɩ bʋla pɩma dɩ ma ŋaa, ama ma sɩ́ ba wʋŋaalaa chesu, bɛɛ wɩaa ba tɩtɩa bɩ wɩalɩŋ ba sɩɩ dagʋ ka to.

⁴ Ba yie vɔɔ chʋgʋ-yuŋŋoo nɛ a kaa chʋŋ nɩaa, ama ba tɩtɩa bɩ chɛ dɩ ba pɛ ba lɛ a laa chʋga-la.

⁵ Ba yie ŋaa wɩɩkala dɩ nɩaa naba nɛ. Ba yie ŋmʋnsɛ Wɩa niiŋ wɩaa a hɛ teŋ-jalaa lɛ a kaa vʋvɔɔ ba gɛnnɩŋ nɩsaa lɛ arɩ ba nyunchuuluŋ lɛ aŋ leŋ ba gɛnnɩŋ jʋɔsaa ma duomi duomi.

⁶ Dɩ nɩaa nɛ yɩrɛba dɩ ba kʋ dii kɩaa, ba cho dɩ ba hɔŋ nɩbalaa dɩ-hɔnɔɔ. Ba nɛ jʋʋ Wɩɩchʋɔlɛ dɩɩsɩŋ maa, ba cho dɩ ba hɔŋ nɩbalaa dɩ-hɔnɔɔ.

⁷ Ba yie chɩchɛ dɩ nɩaa chʋchʋɔlɛba aŋ zizilba nɩaa tʋɔŋ aŋ yɩyɩrɛba kerichiba.

⁸ Ama ma-na sɩ́ leŋe dɩ nɩaa kɛmma kaa yɩrɛ kerichiba. Ma kala ŋaa naambiiri nɛ. Ma kala kerichi ŋaa kʋbala nɛ.

⁹ Ʋ saa bɩ maga dɩ ma yɩrɛ nʋʋkala ma nyɩmma dʋnɩa deeŋ lɛ, bɛɛ wɩaa ma Nyɩmma ŋaa kʋbala nɛ a hɛ Wɩa-jaŋ.

¹⁰ Ma bɩra sɩ́ nʋʋkala yɩrɛ Ma Kʋhɩaŋ, bɛɛ wɩaa Ma Kʋhɩaŋ nɛ ŋaa Kirisito, nɩɩ-la Wɩa sɩ lɩɩsa.

¹¹ Ʋ maga dɩ ma tʋɔŋ kʋhɩaŋ nɛ bɩrɩmɛ hambie a tɩŋ tɩntɩŋŋaa pɩpɩma.

¹² Nɩɩ-la kala sɩɩ bigisi ʋ tɩtɩa lɛ, Wɩa jaŋ kɛnʋ muuri, ka nɩɩ-la ma sɩ kɛŋ ʋ tɩtɩa muuri, Wɩa jaŋ ŋaa dɩ ʋ yʋgɛ.

¹³ Ma Wɩa teniŋ kerichiba arɩ ma Farisii tɩŋŋaa, ma kanfugi tɩmma-la, ma jaŋ na hɛɛŋ. Ma kɛŋ Wɩa kuorii-la dɩa-boro yagɛ nɛ dɩ nɩaa sɩ́ jʋʋ, bɛɛ wɩaa ma tɩtɩa bɩ chɛ dɩ ma jʋʋ, aŋ bɩra pɔ dɩ nɩalɩŋ sɩɩ walɩmɛ dɩ ba jʋʋ, dɩ ba ma sɩ́ jʋʋ. [

¹⁴ Ma Wɩa teniŋ kerichiba arɩ ma Farisii tɩŋŋaa, ma kanfugi tɩmma-la, ma jaŋ na hɛɛŋ. Ma yie kɛŋ yo-haalaa kɩaa laa didii a yie fugo chʋɔlɛ Wɩa didieni. Bʋa-la lɛ Wɩa sɩ jaŋ dii ma sarɩya, ma nɛ jaŋ na hɛɛŋ a kɩɩ nʋʋkala.]

¹⁵ Ma Wɩa teniŋ kerichiba arɩ ma Farisii tɩŋŋaa, ma kanfugi tɩmma-la, ma jaŋ na hɛɛŋ. Ma yie sii a duori lɩɩŋ koo a vɛŋ a mʋ tinteyee dɔnsʋŋ a bʋl Wɩa wɩaa nɩmɛ. Dɩ nɩbala nɛ laa dii, ma yie leŋ ʋ wasa bɔŋ a magɛ dɩ ʋ jʋʋ Wɩa nyiniŋ arɩ ma sɩ jaŋ jʋʋ ŋɩɩ.

¹⁶ Ma nyʋlʋŋ sɩpaalaaraa, ma jaŋ na hɛɛŋ. Ma yie bʋl, ‘Dɩ nʋʋ nɛ ŋmɩɛsɛ Wɩa dɩa, ʋ bɩ ŋmɩaŋ ŋaa, ama dɩ ʋ nɛ ŋmɩɛsɛ sɛlɩmɛ kɩalɩŋ sɩ hɛ Wɩa dɩa tʋɔŋ, ʋ chaasa ŋmɩɛsɛ ŋmɩaŋ nɛ.’

¹⁷ Ma nyʋlʋŋ-tɔɔnɩ! Sɛlɩmɛ kɩalɩŋ sɩ hɛ Wɩa dɩa-la tʋɔŋ arɩ dɩa-la sɩ ŋaa sɛlɩmɛ-la bɩ disiniŋ kɛnɛ, kɩaa deemba balɩa tʋɔŋ kʋbɛɛ nɛ yʋga?

¹⁸ Ma bɩra bʋla dɩ nʋʋ nɛ ŋmɩɛsɛ koru-la lɛ ba sɩ kpʋ pʋsʋŋ pɩpɩ Wɩa, ʋ bɩ chaasa ŋmɩɛsɛ ŋmɩaŋ, ama dɩ ʋ nɛ ŋmɩɛsɛ kʋ-la ba sɩ yie joŋo daŋ koru-la nyuŋ a pɩ Wɩa, ʋ chaasa ŋmɩɛsɛ ŋmɩaŋ nɛ.

¹⁹ Ma nyʋlɩmaa, kʋ-la ba sɩ yie joŋo daŋ koru-la nyuŋ arɩ koru-la sɩ ŋaa kʋ-la bɩ disiniŋ kɛnɛ, kɩaa deemba balɩa tʋɔŋ kʋbɛɛ nɛ yʋga?

²⁰ Ŋɩɩ wɩaa dɩ nʋʋ nɛ ŋmɩɛsɛ koru-la lɛ ba sɩ yie kpʋ pʋsʋŋ pɩpɩ Wɩa, ʋ yie ŋmɩɛsɛ ba dɩ kʋ-la kala ba sɩ yie joŋo daŋ ʋ nyuŋ a pɩ Wɩa nɛ.

²¹ Dɩ nʋʋ nɛ bɩra ŋmɩɛsɛ Wɩa dɩa, ʋ ŋmɩɛsɛ Wɩa dɩa-la arɩ Wɩa kala nɛ, bɛɛ wɩaa Wɩa hɛ dɩa-la lɛ nɛ.

²² Dɩ nʋʋ nɛ bɩra ŋmɩɛsɛ Wɩa-jaŋ, ʋ ŋmɩɛsɛ Wɩa kuoru kpasa-la arɩ nɩɩ-la sɩ hɔŋ ʋ lɛ ma nɛ.

²³ Wɩɩŋ puu ma Wɩa teniŋ kerichiba arɩ ma Farisii tɩŋŋaa, ma kanfugi tɩmma-la. Dɩ ma nɛ jaa pɩpaarɩ-la ma sɩ yie joŋo hɛ kʋdiilee lɛ ba sʋɔra sɩŋ, ma yie kɛmba kala kaa kpaa leree fii fii a joŋ ba kʋŋkala leriŋ dɔŋɔ a pɩ Wɩa aŋ vɩa dɩ ma to sɩɩfɩaŋ wɩalɩŋ Mosis fa sɩ bile pɩma dɩ ma tuto. Ba nɛ ŋ-la: Má to wʋtɩtɩɩ wombiiŋ a fá nɩaa nenige a laa Wɩa dii. Ʋ maga dɩ ma kpaa ma kɩalɩŋ leree fii fii nɛ a joŋ kʋbala pɩ Wɩa, ama ʋ bɩ maga dɩ ma vɩa wʋtɩtɩɩ wombiiŋ.

²⁴ Ma nyʋlʋŋ sɩpaalaaraa! Ma yie chuori ma sɩnɩŋ a lɩɩsɛ nanchʋɔsʋŋ kala ta aŋ bɩ kɩaa sɩ yʋga a nagɛ bʋntaŋŋa na aŋ liliŋ.

²⁵ Wɩɩŋ puu ma Wɩa teniŋ kerichiba arɩ ma Farisii tɩŋŋaa, ma kanfugi tɩmma-la. Ma yie tiisi ma nyʋnyʋalʋsʋŋ arɩ ma gbansɩŋ harɩŋ woruŋ dɩ ba zɔŋ aŋ bɩ ba tʋɔŋ ka tiisi, ka ba tʋɔŋ kala birisi. Ma nagɛ nyʋnyʋalʋsʋŋ arɩ gbansɩŋ deemba nɛ. Ma yaraa nɛ zɔmɔ, ama ma tʋɔŋ lɛ maa to ma tʋɔtɔrʋŋ lɛ nɛ a gɩgaa nɩaa kɩaa.

²⁶ Ma nyʋlʋŋ Farisii tɩŋŋaa, má laa sɩpaaŋ tiisi ma nyʋnyʋalʋsʋŋ tʋɔŋ aŋ-na tiisi harɩŋ ma dɩ ʋ zɔŋ.

²⁷ Ma Wɩa teniŋ kerichiba arɩ ma Farisii tɩŋŋaa, ma kanfugi tɩmma-la, ma jaŋ na hɛɛŋ. Ma nagɛ vaamaa ba sɩ kɛŋ tʋɔrʋŋ bʋgɛ nɛ. Ba harɩŋ zɔŋ, aŋ ka ba tʋɔŋ kala su arɩ haŋgbelee arɩ nɩsʋʋnʋŋ.

²⁸ Ŋɩɩ tɩtɩa nɛ ma ma nagɛ nɩaa teeŋ. Dɩ ba nɛ nama, ba yie bɩɩnɛ ma ŋaa tʋɔpʋl tɩmma nɛ, ka ma tʋɔŋ su arɩ wʋbɔŋŋɔɔ arɩ kanfugi wʋŋaalaa.

Yesu bʋl nɩbɔŋŋɔɔ dɔgʋsʋŋ wɩaa

²⁹ Ma Wɩa teniŋ kerichiba arɩ ma Farisii tɩŋŋaa, ma kanfugi tɩmma-la, ma jaŋ na hɛɛŋ. Ma saa Wɩa wʋlaabʋlla-la ma naabalɩmaba sɩ kpʋa vaama nɛ, aŋ wasɛ tʋɔpʋl tɩŋŋaa ma vaamaa.

³⁰ Ma sɩ, ‘Dɩ la nɛ fa hɛ nɩmɛ bʋa-la lɛ la naabalɩmaba fa sɩ hɛ ba mɩɩsɩŋ lɛ, la fa bɩ jaŋ ŋaa ŋɩɩ ba sɩ ŋaa a kpʋ Wɩa wʋlaabʋllaa.’

³¹ Ama ma sɩ yɩrɛba ma naabalɩmaba ŋɩɩ, ma sɛnɛ sɛɩ arɩ ma ŋaa nɩalɩŋ sɩ kpʋ Wɩa wʋlaabʋlla-la doho nɩaa nɛ.

³² Má saa mʋ a dɛrɛ wɩalɩŋ ma naabalɩmaba fa sɩ suomo.

³³ Ma nɩbɔŋŋɔɔ arɩ ma nɩbɔŋŋɔɔ biiriŋ, ma bɩɩna arɩ ma jaŋ wuo fá kagɛ Wɩa nyiŋ-la lɛɛ? Aɩ.

³⁴ Ŋɩɩ wɩaa, mɩ jaŋ bɩra tɩŋ Wɩa wʋlaabʋllaa arɩ wʋjɩnnaa arɩ kerichiba. Ma jaŋ kpʋ ba dɔnsʋŋ aŋ kɛŋ dɔnsʋŋ kpaasa mɛrɛ daagɛsɛ nyuŋ, a vɩɩrɛ dɔnsʋŋ ma ma Wɩɩchʋɔlɛ dɩɩsɩŋ lɛ, a to naasɩŋ dɔgɩsɛ dɔnsʋŋ ma tasɩŋ dɔnsʋŋ lɛ.

³⁵ Wɩa jaŋ dɔgɩsɛ jɩnɩŋ nɩaa a tɩŋ ba sɩ kpʋ nɩaa, a chɩŋ bʋa-la lɛ ba sɩ kpʋ nɩalɩŋ sɩ bɩ wɩɩ cheye, a suomi Ebil lɛ a kaa kɔ bʋa-la lɛ ba sɩ kpʋ Bɛrɛkɩa nanʋala Zɛkarɩya. Ba kpʋʋ Wɩa dɩa tʋɔŋ a kpagɛ koru-la nyuŋ ba sɩ yie nyɩgɛ pʋsʋŋ pɩpɩ Wɩa nɛ. Ba cheeriŋ jaŋ nyʋa ba nyuŋ lɛ.

³⁶ Wʋtɩtɩɩ nɛ mɩ bʋlaa pɩma, dɔgʋsʋnɔ-la Wɩa sɩ jaŋ dɔgɩsɛ nɩkpʋʋraa deemba, ʋ jaŋ joŋo dɔgɩsɛ jɩnɩŋ nɩaa.

Yesu bʋl wɩaa a tɩgɛ Jerusalɛm nɩaa lɛ

³⁷ Ma Jerusalɛm nɩaa, ma kpʋ Wɩa wʋlaabʋllaa nɛ, a joŋ tabɩaa yagɛ tɩndaara-la Wɩa sɩ tɩma dɩ ba kɔ ma teeŋ. Naansɩɩŋ yʋga nɛ mɩ fa cho dɩ mɩ chu tɔ ma nɩaa kala arɩ jimiŋ sɩ yie chu tɔ ʋ biiriŋ ŋɩɩ, ka ma bɩ sɛyɛ.

³⁸ Bee na, ma Wɩa dɩɩ-balɩŋ jaŋ pɩŋ jikpeeŋ.

³⁹ Ma bɩra bɩ jaŋ namɛ see bʋa-la lɛ ma sɩ jaŋ chʋɔlɛmɛ a bʋl, ‘Wɩa jaŋ pɛ nɩɩ-la sɩɩ kɔ La Tɩɩna Wɩa yɩrɩŋ lɛ.’ ”