Matiu 21 - WƖA TENIŊ

Yesu jʋʋ Jerusalɛm

¹ Ŋɩɩ nɛ Yesu arɩ ʋ harɩ-tooroo sii mʋ Jerusalɛm. Ba kʋ yi Bɛtɩfagɩ sɩ hɛ peel kʋbala ba sɩɩ yɩrɛ Olif leriŋ. Ŋɩɩ nɛ Yesu lɩɩsɛ ʋ harɩ-tooroo balɩa a timba

² a bʋla pɩba, “Má mʋ taŋ-la sɩ hɛ ma sɩpaaŋ. Dɩ ma nɛ mʋa, ma jaŋ na kakumo arɩ ʋ bie dɩ ba vɔbɔ a kɩɩ. Má puri a kaa kʋ pɩmɛ.

³ Dɩ nʋʋkala nɛ pɩɛsɛma, má bʋla pʋ arɩ ma Tɩɩna nɩɩ chɛ. Ʋ jaŋ leŋ dɩ ma kaa kɔ lɩma.”

⁴ Wɩɩŋ deeŋ ŋaa dɩ wɩɩ-la Wɩa wʋlaabʋlla sɩ bʋla kʋ ŋaa wʋtɩtɩɩ nɛ.

⁵ Ʋ fa sɩ, “Má bʋla pɩ Zaayɔŋ nɩaa dɩ ba bee na, dɩ ba kuoro nɩɩ kɔ ba teeŋ. Ʋ kɛŋ ʋ tɩtɩa muuri nɛ a jɩl kakumo a sagɛ kaku-pɔrʋŋ nyuŋ.”

⁶ Ŋɩɩ nɛ Yesu harɩ-tooro-la mʋ a ŋaa wɩɩ-la Yesu sɩ bʋla pɩba dɩ ba ŋaa.

⁷ Ba kɛŋ kakumo-la arɩ ʋ bie kaa kɔ a joŋ ba gɛnnɩŋ daŋ kakumo-la arɩ ʋ bie nyuŋ, Yesu jɩl.

⁸ Nɩ-daŋ-la jesiŋ joŋ ba gɛnnɩŋ a jɛrɛ wombiiŋ lɛ, ka dɔnsʋŋ ma keri pɩpaarɩŋ a ma kaa jɛrɛ wombiiŋ lɛ.

⁹ Nɩ-daŋ-la sɩ laa Yesu sɩpaaŋ arɩ nɩalɩŋ sɩɩ to ʋ harɩŋ suomo ŋɩŋaa goŋ a bʋl, “Tabarɩkala Devit nihii! Wɩa jaŋ pɛ nɩɩ-la sɩɩ kɔ La Tɩɩna doluŋ lɛ. Má leŋ dɩ la dɛnnɛ Wɩa.”

¹⁰ Yesu sɩ mʋʋ jʋʋ Jerusalɛm, taŋ-la kala zigili. Ŋɩɩ nɛ nɩaa pɩɛsɛ, “Kʋbɛɛ nɛ ŋ-la?”

¹¹ Nɩ-daŋ-la bʋl, “Yesu sɩ lɩɩ Nazarɛt sɩ hɛ Galilii tinteeŋ lɛ nɛ Wɩa wʋlaabʋllʋ-la.”

Yesu jʋʋ Wɩa dɩa

¹² Ŋɩɩ nɛ Yesu jʋʋ Wɩa dɩɩ-balɩŋ. Nɩaa dɔnsʋŋ fa hɛ nɩmɛ a yɩyallɛ kɩaa, dɔnsʋŋ ma yʋyɔɔ kɩaa. Yesu kiri ba kala ta ba lɩɩ. Nɩaa dɔnsʋŋ ma fa hɛ nɩmɛ a yɩyɛrɛ moribiee, dɔnsʋŋ ma yɩyallɛ kokosuŋ, ʋ ŋmoo ba teebʋlba lo.

¹³ Ŋɩɩ nɛ Yesu bʋla pɩba, “Ba ŋmʋnsa Wɩa teniŋ tʋɔŋ arɩ Wɩa sɩ ʋ dɩa jaŋ ŋaa lee-la nɩaa sɩ jaŋ chʋchʋɔlʋ, aŋ ka ma-na mɩɩra kaa bɩrɩmɛ gaarɩ-dɩa.”

¹⁴ Ŋɩɩ nɛ nyʋlɩmaa arɩ gbɛrɩgɛɛ kɔ Yesu teeŋ Wɩa dɩɩ-balɩŋ lɛ. Ʋ vaarɛba.

¹⁵ Ama Wɩɩsʋllɩ sɩpaalaaraa kʋhɩasɩŋ arɩ Wɩa teniŋ kerichiba sɩ na wʋmagɩla-la ʋ sɩɩ ŋaa a bɩra na hambiisiŋ sɩɩ ŋaa goŋ ŋɩɩ Wɩa dɩɩ-balɩŋ lɛ, ba na baanɩŋ. Hambiisi-la faa bʋl, “Tabarɩkala Devit nihii.”

¹⁶ Ŋɩɩ nɛ Wɩɩsʋllɩ sɩpaalaaraa arɩ Wɩa teniŋ kerichiba pɩɛsɛ Yesu, “Ŋ nɩɩ wɩalɩŋ ba sɩɩ bʋl nɛɛ?” Yesu bʋl, “Mɩ nɩa nɛ.” Ŋɩɩ nɛ Yesu ma pɩɛsɛba, “Ma bɩ Wɩa teniŋ karɩmaa? Ba ŋmʋnsa Wɩa teniŋ tʋɔŋ a bʋl, ‘Wɩa jaŋ leŋ dɩ bii-mulluŋ dɩdɛnnɛ Wɩa.’ ”

¹⁷ Ŋɩɩ nɛ Yesu lemba aŋ lɩɩ tabal-la lɛ a mʋ Bɛtanɩ a chʋa nɩmɛ.

Yesu kalɩba hɛ tutogo lɛ

¹⁸ Taŋ sɩ pʋla, Yesu mɩɩra mʋ Jerusalɛm. Ʋ sɩɩ mʋ, losuŋ kɛnʋ wombiiŋ lɛ.

¹⁹ Ʋ na tutogo dɩ ʋ chɩŋ ʋ sɩpaaŋ wombiiŋ niiŋ. Ʋ mʋ yi tutogo-la bʋbʋɔŋ a wʋla beŋ dɩ nɛnɛɛ tuo, see pɩpaarɩŋ. Ŋɩɩ nɛ ʋ bʋl tɩa-la lɛ, “A lɩɩ jɩnɩŋ a kaa mʋmʋ, ŋ bɩra bɩ jaŋ nɛŋ.” Tɩa-la guu sʋʋ.

²⁰ Ʋ harɩ-tooroo sɩ na wɩɩŋ deeŋ, ʋ ŋaaba wʋkpuŋkpere. Ba pɩpɩɛsɛ dɔŋɔ, “Ɛɛ nɛ tɩa-la guu sʋʋ lɩma ŋɩɩ?”

²¹ Ŋɩɩ nɛ Yesu bʋla pɩba, “Wʋtɩtɩɩ nɛ mɩ bʋlaa pɩma, dɩ ma nɛ laa dii a bɩ tʋɔŋ balɩa kɛnɛ, ma ma jaŋ wuo ŋaa wɩɩ-la sɩ ŋaa tutogo-la lɛ. Ŋ-la ma dʋndʋŋa dee, ama ma jaŋ wuo paala bʋl peeliŋ deeŋ lɛ dɩ ʋ sii a mʋ tel mʋgʋ-balɩŋ tʋɔŋ, dɩ ŋɩɩ sɛnɛ ŋaa.

²² Dɩ ma nɛ laa Wɩa dii, kʋŋ na-kala ma sɩ chʋɔlɛ Wɩa a sʋsʋl, ma jaŋ naʋ.”

Nɩaa pɩɛsɛ Yesu ʋ doluŋ wɩaa

²³ Ba sɩ mʋ Jerusalɛm, Yesu mʋ jʋʋ Wɩa dɩɩ-balɩŋ. Ʋ sɩ jʋʋ Wɩa dɩa-la ŋɩɩ a dɩdagɛ nɩaa, Wɩɩsʋllɩ sɩpaalaaraa kʋhɩasɩŋ arɩ Juu tɩŋŋaa kʋhɩasɩŋ, ba kala sii kɔ ʋ teeŋ a pɩɛsʋ, “Dol bɛɛ nɛ ŋ kɛŋ a ŋɩŋaa wɩaa deemba? Kʋbɛɛ nɛ pɩŋ doluŋ ŋ kaa ŋɩŋaa ŋɩɩ?”

²⁴ Ŋɩɩ nɛ Yesu bʋla pɩba, “Mɩ ma jaŋ pɩɛsɛma wʋbala. Dɩ ma nɛ dagɛmɛ ʋ bʋbʋɔŋ, mɩ ma jaŋ dagɛma dol-la mɩ sɩ kɛnɛ bʋbʋɔŋ.”

²⁵ Ŋɩɩ nɛ ʋ pɩɛsɛba, “Kʋbɛɛ nɛ pɩ Jɔɔŋ doluŋ ʋ fufo nɩaa Wɩɩchʋɔlɛ lɩɩŋ, Wɩa nɛ pʋ koo nuhuobiine nɛ pʋ? Má dagɛmɛ.” Ba suomo kɛŋ wɩɩ-la lɩlɛrɛ dɔŋɔ lɛ aa bʋl, “Wʋbɛɛ nɛ laa chɛ dɩ la bʋl? Dɩ la nɛ bʋla pʋ arɩ Wɩa teeŋ nɛ ʋ lɩɩ, ʋ jaŋ pɩɛsɛla, ‘Bɛɛ nɛ saa tɩɩ ma bɩ wɩalɩŋ ʋ sɩ bʋla laa dii?’

²⁶ Dɩ la nɛ saa sɩ ʋ lɩɩ nuhuobiine teeŋ nɛ, fawʋllʋŋ jaŋ kɛnla a tɩŋ nɩ-daŋ-la sɩ chɩŋ nɩmɛ wɩaa. Nɩaa bʋla arɩ Jɔɔŋ fa sɛnɛ ŋaa Wɩa wʋlaabʋllʋ nɛ.”

²⁷ Ŋɩɩ nɛ ba bʋla pɩ Yesu, “La bɩ jɩŋ.” Yesu ma bʋla pɩba, “Tɔɔ, mɩ ma bɩ jaŋ dagɛma dol-la mɩ sɩ kɛnɛ bʋbʋɔŋ.”

²⁸ Ŋɩɩ nɛ Yesu magɛ namaga a pɩ Wɩɩsʋllɩ sɩpaalaaraa kʋhɩasɩŋ arɩ Juu tɩŋŋaa, “Baal kʋbala nɛ hɛ nɩmɛ a kɛŋ hambolibiisiŋ balɩa. Ʋ sii mʋ ʋ bii-hɩaŋ teeŋ a bʋla pʋ, ‘Mɩ bii, mʋ baga jɩnɩŋ a tɩŋ.’

²⁹ Ŋɩɩ nɛ bile bʋl, ‘Mɩ bɩ jaŋ mʋ baga jɩnɩŋ.’ Ʋ ŋɩɩ harɩŋ lɛ, ʋ bɩrɩmɛ ʋ tʋɔbɩɩnaa aŋ sii mʋ baga-la. Ŋɩɩ nɛ ba nyɩmma bɩra mʋ a bʋl ʋ bii-bie-la ma lɛ arɩ ʋ mʋ baga. Ŋɩɩ nɛ bile bʋl dɩ ʋ jaŋ mʋ aŋ vɩa.

^30-31 Hambiisiŋ deemba balɩa tʋɔŋ, kʋbɛɛ nɛ to ba nyɩmma niiŋ lɛ? Bɛɛ nɛ ma bɩɩnɛ?” Ba bʋla pʋ dɩ ʋ bii-hɩaŋ-la nɛ. Ŋɩɩ nɛ Yesu bʋla pɩba, “Wʋtɩtɩɩ, mɩ bʋlaa pɩma arɩ lampoo laaraa arɩ jagumuloba jaŋ laa sɩpaaŋ ma lɛ a jʋʋ Wɩa kuorii-la.

³² Bɛɛ wɩaa Jɔɔŋ Wɩa lɩɩ-fooru-la kɔ a dagɛma wombii-tɩtɩɩ-la nɛ ma sɩ jaŋ to, aŋ ka ma bɩ ʋ wɩaa laa dii, ama lampoo laaraa arɩ jagumuloba laa ʋ wɩaa dii nɛ. Ma paala na ba sɩ laa ʋ wɩaa dii ŋɩɩ nɛ, aŋ ka ma ha bɩ bɩrɩma dɩ ma laa ʋ wɩaa dii.”

Yesu magɛ namaga a tɩgɛ nɩalɩŋ sɩɩ tɩŋ tɩntɩŋŋaa baga lɛ

³³ Ŋɩɩ nɛ Yesu bɩra magɛ namaga dɔŋɔ a bʋl, “Baal kʋbala nɛ bil baga a chɔnsɛ girep tɩɩsɩŋ. Ʋ saa kɛrɛ golli baga-la, a lu bʋa baga-la lɛ dɩ ba chagɛ girep nɛnɛ-la lɩɩŋ hɩhɛ, aŋ saa dɩɩ-leŋiŋ a hɔnɔ pɔ. Ŋɩɩ nɛ ʋ paa nɩaa a hɛ ʋ baga-la tʋɔŋ dɩ ba tɩtɩŋ, aŋ mʋ taŋ dɔŋ.

³⁴ Girep nɛnɛ-la bɩɩnɩŋ sɩ yie, ʋ tɩŋ ʋ dɩa tɩntɩnnaa dɩ ba mʋ tɩntɩnna-la teeŋ a laa tɩɩnɛnɛ-la kaa kɔ. Ba mʋ.

³⁵ Ba kɛŋ dɔŋɔ a ŋmobu, a kpʋ dɔŋɔ, a yagɛ dɔŋɔ arɩ tabɩaa a kpʋʋ.

³⁶ Ŋɩɩ nɛ ʋ tɩŋ nɩaa dɔnsʋŋ a wasa kɩɩ bumbuŋ-la. Ba ŋaa ŋɩɩ tɩtɩa nɩalɩŋ ma lɛ.

³⁷ Ŋɩɩ harɩŋ lɛ nɛ ʋ tɩŋ ʋ bie. Ʋ bɩɩna dɩ ʋ bie nɛ mʋa, ba jaŋ zilu. Ʋ ma bɩra mʋ.

³⁸ Tɩntɩnna-la sɩ na bile, ba bʋla pɩ dɔŋɔ, ‘Dɩ baga-la tɩɩna nɛ sʋba, bie deeŋ nɛ jaŋ dii ʋ kɩaa. Má kɔ dɩ la kpʋʋ. Dɩ la nɛ kpʋʋ, la nɛ jaŋ mɩɩra tɩɩ ʋ kɩalɩŋ.’

³⁹ Ba kɛŋ bile a joŋu yuo ta baga-la harɩŋ a kpʋʋ.”

⁴⁰ Ŋɩɩ nɛ Yesu pɩɛsɛba, “Dɩ baga-la tɩɩna nɛ kɔ, ɛɛ nɛ ʋ jaŋ ŋaa baga tɩntɩnna-la lɛ?”

⁴¹ Ŋɩɩ nɛ ba bʋla pʋ, “Ʋ jaŋ kɔ a kpʋ nɩbɔmɔ-la aŋ joŋ baga-la a pɩ nɩtanɩa. Dɩ girep nɛnɛ-la bɩɩnɩŋ nɛ yie, ba jaŋ kɛŋ ʋ nɛnɛ-la kaa mʋ pʋ.”

⁴² Ŋɩɩ nɛ Yesu pɩɛsɛ nɩalɩŋ sɩ nɩɩ namaga-la, “Ma bɩ Wɩa teŋ-la karɩma a mʋ yi lee-la ba sɩ bʋl ŋ-la: ‘Tie-bii-la dɩɩ-saaraa sɩ vɩa, ʋ nɛ mɩɩra kʋ ŋaa tie-bii-duoŋ ba sɩ joŋo bil dɩa gentine. La Tɩɩna Wɩa tɩntɩŋŋaa nɛ ŋɩɩ. Ʋ ŋaala wʋkpuŋkpere nɛ.’ ”

⁴³ Ŋɩɩ nɛ Yesu bʋla pɩ nɩalɩŋ a bʋl, “Wɩa jaŋ kɛŋ ʋ kuorii-la laa ma teeŋ, a joŋo pɩ nɩalɩŋ sɩ jaŋ to Wɩa niiŋ woruŋ a ŋɩŋaa wɩalɩŋ sɩ jaŋ dagɛ arɩ ba bɩrɩma lɩɩ ba wʋbɔŋŋɔɔ lɛ nɛ.

⁴⁴ Nɩɩ-la sɩ tel tie-bii-la nyuŋ, ʋ tɩɩna jaŋ yɛrɛ muno muno. Dɩ tie-bii-la ma nɛ tel nʋʋkala nyuŋ, ʋ jaŋ bʋrɩgɛ tɩɩna.”

⁴⁵ Wɩɩsʋllɩ sɩpaalaaraa kʋhɩasɩŋ arɩ Farisii tɩŋŋaa nɩɩ Yesu sɩ magɛ namaga-la a jɩŋ arɩ ba wɩaa nɛ ʋ bʋbʋl ŋɩɩ.

⁴⁶ Ŋɩɩ nɛ ba wʋwalɩmɛ dɩ ba kɛnʋ kaa mʋ tɔ dɩa. Ama ba faa fá nɩ-daŋ-la sɩ hɛ nɩmɛ, bɛɛ wɩaa nɩ-daŋ-la joŋ Yesu arɩ ʋ ŋaa Wɩa wʋlaabʋllʋ nɛ.