Matiu 2 - WƖA TENIŊ

Wʋjɩnnaa mʋ na Yesu

^1-2 Ba lʋl Yesu Bɛtɩlɛhɛm lɛ nɛ. Tabie-la fa hɛ Judiya tinteeŋ lɛ nɛ. Bʋa deeŋ lɛ baal kʋbala baa yɩrɛ Hɛrɔd nɛ fa ŋaa tintee-la kuoro. Ba sɩ lʋl Yesu, wʋjɩnnaa lɩɩ taŋ-bʋbʋɔŋ a kɔ Jerusalɛm a pɩɛsɛ, “Juu tɩŋŋaa kuoru-la ba sɩ lʋla hɛ nɩɩ nɛ? La na ʋ chɛnwʋlʋŋ taŋ-bʋbʋɔŋ nɛ a kɔ dɩ la chʋɔlʋ.”

³ Kuoro Hɛrɔd fa sɩ nɩɩ wɩɩŋ deeŋ, wɩɩ-la walɩmɛ ʋ dɩ Jerusalɛm nɩaa kala kɩŋkɛŋ kɩŋkɛŋ.

⁴ Ŋɩɩ nɛ ʋ yɩrɛ Wɩɩsʋllɩ sɩpaalaaraa kʋhɩasɩŋ arɩ Wɩa teniŋ kerichiba ba kʋ hilimi. Ʋ pɩɛsɛba, “Nɩɩ nɛ ba jaŋ lʋl Kirisito, nɩɩ-la Wɩa sɩ lɩɩsa?”

⁵ Ŋɩɩ nɛ ba bʋla pʋ, “Ba jaŋ lʋlʋ Bɛtɩlɛhɛm lɛ, Judiya tinteeŋ. Ŋ-la nɛ Wɩa wʋlaabʋllaa fa ŋmʋnsɛ:

⁶ Wɩa sɩ, ‘Bɛtɩlɛhɛm ŋaa tabie nɛ Judiya tinteeŋ lɛ. Ama Judiya tinteeŋ kala lɛ, Bɛtɩlɛhɛm nɩaa nɛ ŋaa nɩbalaa, bɛɛ wɩaa ba tʋɔŋ nɛ Iziral tɩŋŋaa sɩpaalaara jaŋ lɩɩ, nɩɩ-la sɩ jaŋ beŋ mɩ nɩaa, Iziral tɩŋŋaa.’ ”

⁷ Ŋɩɩ nɛ Hɛrɔd lʋara yɩrɛ wʋjɩnna-la sɩ lɩɩ taŋ-bʋbʋɔŋ mʋ pɩɛsɛba dɩ ba dagʋ bʋa-la tɩtɩa lɛ chɛnwʋl-la sɩ lɩa. Ba daga pʋ.

⁸ Ŋɩɩ nɛ Hɛrɔd taba dɩ ba mʋ Bɛtɩlɛhɛm, aŋ bʋla pɩba, “Má mʋ chɛ bile arɩ sɩɩfɩɛsɩŋ. Dɩ ma nɛ naʋ, má leŋ dɩ mɩ ma jɩŋ ŋɩɩ niiŋ lɛ, a ma mʋ chʋɔlʋ.”

⁹ Ba sɩ nɩɩ ŋɩɩ, ba lɩɩ joŋ wombiiŋ a mʋmʋ. Chɛnwʋl-la ba fa sɩ na taŋ-bʋbʋɔŋ bɩra laa ba sɩpaaŋ.

¹⁰ Ba bɩra sɩ na chɛnwʋl-la, ba tʋɔŋ kala tɔrɛ, ba jʋjʋɔsɛ.

¹¹ Ba sɩ mʋ yi lee-la bii-mulo-la sɩ hɛ, chɛnwʋl-la chɩŋ dɩa-la nyuŋ. Ba mʋ jʋʋ dɩa-la a na bii-mulo-la arɩ Mɛɛrɩ, ʋ naaŋ. Ba tuu kpirimi ʋ sɩpaaŋ a chʋɔlʋ. Ŋɩɩ nɛ ba puri ba chʋgʋsʋŋ a lɩɩsɛ kɩaa pʋ: Sɛlɩmɛ, tɩɩ-kel-zɔŋ baa yɩrɛ fɩraŋkɩsɛŋ arɩ tɩɩ-kel-zɔŋ dɔŋɔ baa yɩrɛ mɛɛ.

¹² Ŋɩɩ nɛ Wɩa kpʋrɩsɛ ba dɩgɩlaa duosoo tʋɔŋ arɩ ba sɩ́ mɩɩra mʋ Hɛrɔd teeŋ. Ŋɩɩ nɛ ba sii a to wombii-wogo a mɩɩra mʋ ba jaŋ.

Josɛf arɩ Mɛɛrɩ fá mʋ Ijipiti tinteeŋ

¹³ Wʋjɩnna-la sɩ mʋa, Josɛf pɩŋ doŋ a duosi a na Wɩa tɩndaara dɩ ʋ kɔ ʋ teeŋ a bʋla pʋ, “Sii a joŋ bii-mulo-la arɩ ʋ naaŋ a fá mʋ Ijipiti tinteeŋ a hɛ nɩmɛ see dɩ mɩ bɩra bʋla pɩŋ dɩ ŋ lɩɩ nɩmɛ, bɛɛ wɩaa Hɛrɔd ka chɛ dɩ ʋ kpʋ bii-mulo-la nɛ.”

¹⁴ Ŋɩɩ nɛ ʋ sii a joŋ bii-mulo-la arɩ ʋ naaŋ a mʋ Ijipiti tinteeŋ tɩtaŋɩŋ. Ʋ hɛ nɩmɛ nɛ deeŋ deeŋ Hɛrɔd kʋ sʋʋ.

¹⁵ Wɩɩŋ deeŋ ŋaa dɩ wɩɩ-la Wɩa fa sɩ to ʋ wʋlaabʋllaa lɛ bʋl kʋ ŋaa wʋtɩtɩɩ nɛ. Ʋ fa bʋla arɩ ʋ jaŋ yɩrɛ ʋ nanʋala dɩ ʋ lɩɩ Ijipiti tinteeŋ kɔ.

Ba kpʋ hambolibiisiŋ Bɛtɩlɛhɛm lɛ

¹⁶ Hɛrɔd sɩ na arɩ wʋjɩnna-la nyɩsʋ nɛ, ʋ faasa na baanɩŋ. Wʋjɩnna-la fa sɩ dagʋ bʋa-la lɛ ba sɩ lʋl Yesu ŋɩɩ, ŋɩɩ nɛ ʋ ta ʋ laalɩyuoroo dɩ ba mʋ Bɛtɩlɛhɛm tabiisi-la kala sɩ gollu chu a kpʋ hambolibiisi-la kala ha sɩ bɩ jɩsɩŋ balɩa kiele.

¹⁷ A tɩŋ ŋ-la wɩaa wɩɩ-la Wɩa wʋlaabʋlla Jɛrɩmaaya fa sɩ bʋla kʋ ŋaa wʋtɩtɩɩ nɛ.

¹⁸ Ʋ fa sɩ: “Nʋʋ nɩɩ yel Rama lɛ. Nɩɩ-la faasa yiyel nɛ. Rakɛl ka yel ʋ biiriŋ wɩaa nɛ. Ʋʋ yel nɛ a bɩ sɛɩ dɩ ba nyagɛ ʋ bɔyɛ, bɛɛ wɩaa ʋ biiriŋ kala sʋba nɛ.”

Josɛf arɩ Mɛɛrɩ mɩɩra mʋ Nazarɛt

¹⁹ Ŋɩɩ nɛ Hɛrɔd kʋ sʋʋ. Ʋ sɩ sʋba ŋɩɩ, Josɛf bɩra duosi Ijipiti tinteeŋ lɛ, a na Wɩa tɩndaara dɩ ʋ kɔ ʋ teeŋ a bʋla pʋ,

²⁰ “Sii a kɛŋ bii-mulo-la arɩ ʋ naaŋ a mɩɩra mʋ Iziral tinteeŋ. Nɩalɩŋ fa sɩɩ chɛ dɩ ba kpʋ bii-mulo-la, ba sʋba nɛ.”

²¹ Ŋɩɩ nɛ ʋ sii kɛŋ bile arɩ ʋ naaŋ a kaa mʋ Iziral tinteeŋ.

²² Ama Josɛf sɩ nɩa arɩ Hɛrɔd sʋba, ka ʋ nanʋala Akɩlɩas laa ʋ nyuŋ dii kuoruŋ Judiya tinteeŋ lɛ, fawʋllʋŋ fa kɛnʋ arɩ ʋ sɩ jaŋ hɔŋ nɩmɛ. Ŋɩɩ nɛ Wɩa bɩra bʋla pʋ duosoo tʋɔŋ dɩ ʋ mʋ hɔŋ Galilii tinteeŋ lɛ.

²³ Ʋ sɩ mʋ Galilii tinteeŋ, ʋ mʋ hɔŋ taŋ kʋbala lɛ baa yɩrɛ Nazarɛt. Ʋ ŋaa ŋɩɩ dɩ wɩalɩŋ Wɩa wʋlaabʋllaa fa sɩ bʋla kʋ ŋaa wʋtɩtɩɩ nɛ. Ba fa bʋla: “Ba jaŋ kɛnʋ yɩrɛ Nazarɛt tɩɩna.”