Matiu 18 - WƖA TENIŊ

Yesu dagɛ nɩɩ-la sɩ yʋga Wɩa kuorii-la tʋɔŋ

¹ Yesu sɩ bʋl ŋɩɩ a pɩ Pɩɩta dɛrɛ, ʋ harɩ-tooroo kɔ ʋ teeŋ a pɩɛsʋ, “La tʋɔŋ kʋbɛɛ nɛ kɩɩ la kala Wɩa kuorii-la tʋɔŋ?”

² Ŋɩɩ nɛ Yesu yɩrɛ bii-bie kʋbala a kɩɩ ba tʋtʋɔbaanɩŋ

³ aŋ bʋla pɩba, “Wʋtɩtɩɩ nɛ mɩ bʋlaa pɩma, see dɩ ma kɛŋ ma tɩtɩa muuri a nagɛ hambiisiŋ, dɩ ŋɩɩ dee, ma bɩ jaŋ wuo jʋʋ Wɩa kuorii-la tʋɔŋ.

⁴ Nɩɩ-la sɩ kɛŋ ʋ tɩtɩa muuri a nagɛ hambie, ʋ nɛ kɩɩ ʋ dɔnsʋŋ tɩŋŋaa Wɩa kuorii-la tʋɔŋ.

⁵ Dɩ nʋʋ nɛ kɛŋ bii-bie deeŋ yiri woruŋ a tɩŋ mɩ wɩaa, mɩ nɛ ʋ kɛŋ woruŋ ŋɩɩ.

Yesu bʋl wɩaa a tɩgɛ nɩalɩŋ sɩ jaŋ leŋ dɩ nɩaa ŋaa wʋbɔmʋŋ

⁶ Nɩɩ-la kala sɩ na hambiisi-la sɩɩ tomi dɔŋɔ a nyɩsʋ dɩ ʋ ŋaa wʋbɔmʋŋ, dɩ ba nɛ joŋ nɔmʋŋ a vɔɔ laalɛ ʋ baŋŋaa lɛ a joŋu yuo hɛ mʋgʋ-balɩŋ tʋɔŋ dɩ ʋ nyʋa lɩɩŋ a sʋʋ, ŋɩɩ nɛ kpɩa ʋ sɩ weye.

⁷ Wɩɩŋ puu nɩalɩŋ sɩ jaŋ leŋ dɩ ba dɔnsʋŋ tɩŋŋaa ŋaa wʋbɔŋŋɔɔ. Ʋ maga dɩ wɩalɩŋ ŋaa nɛ. Ama wɩɩŋ puu nɩɩ-la lɛ wɩalɩŋ sɩ to kɔ.

⁸ Dɩ ŋ nɩsɩŋ koo ŋ naaŋ nɩɩ chɛ dɩ ʋ kɛnɩŋ hɛ wʋbɔmʋŋ lɛ, kere ta. Ŋ sɩ jʋʋ Wɩa kuorii-la tʋɔŋ arɩ naakuuŋ koo nakuuŋ, ʋ nɛ kpɩa ŋ sɩ jaŋ kɛŋ napilimee koo naapilimee aŋ jʋʋ Wɩa nyiniŋ.

⁹ Dɩ ŋ sɩɩŋ nɩɩ chɛ dɩ ʋ kɛnɩŋ hɛ wʋbɔmʋŋ lɛ, lɩɩsa ta. Ŋ sɩ jaŋ jʋʋ Wɩa kuorii-la tʋɔŋ arɩ sɩɩ-togo, ʋ nɛ kpɩa ba sɩ joŋuŋ yuo hɛ Wɩa nyiniŋ lɛ arɩ sɩɩ-pilimee.”

Yesu magɛ namaga a mʋ tɩgɛ pie-lɛlɩŋ lɛ

¹⁰ Ŋɩɩ nɛ Yesu bɩra sɩ, “Má fɩɛlɛ ma sɩaa a sɩ́ bee gʋʋnɛ hambiisiŋ deemba kʋŋkala. Mɩ bʋlaa pɩma, Wɩa ta ʋ tɩndaaraa nɛ dɩ ba bibemba. Ba hɛ Wɩa-jaŋ bʋa na-kala lɛ, mɩ Nyɩmma sɩ hɛ lee-la. [

¹¹ Mɩ-na Nuhuobiine Bie kɔ dɩ mɩ chɛ a laa nɩalɩŋ sɩ lɛlɛ nɛ a ta.]”

¹² Ŋɩɩ nɛ Yesu magɛ namaga a bʋl, “Nʋʋ nɛ fa hɛ nɩmɛ a kɛŋ piesee zɔlɔ, ŋɩɩ nɛ ba tʋɔŋ dɔŋɔ lɛl.” Yesu pɩɛsɛ, “Ɛɛ nɛ ma bɩɩnɛ arɩ ʋ jaŋ ŋaa? Ʋ bɩ jaŋ leŋ piesee mahɩŋ banɛsɛ arɩ fii arɩ nibi-la a ta peelee nyuŋ aŋ lɩɩ gɔllɔ chɩchɛ pie-lɛlɩɩ-laa?

¹³ Dɩ ʋ nɛ naʋ, mɩ jaŋ bʋla pɩma arɩ ʋ tʋɔŋ jaŋ tɔrɛ ʋ pie-bala-la nyuŋ a kɩɩ piesee mahɩŋ banɛsɛ arɩ fii arɩ nibi-la sɩ bɩ lɛlɛ.

¹⁴ Ŋɩɩ tɩtɩa nɛ saa mɩ Nyɩmma sɩ hɛ Wɩa-jaŋ bɩ chɛ dɩ hambiisiŋ deemba kʋŋ lɛl.”

Yesu dagɛ ŋɩɩ la sɩ jaŋ ŋaa dɩ la naambie nɛ ŋaa wɩɩ a chei la lɛ

¹⁵ Ŋɩɩ nɛ Yesu sɩ, “Dɩ ŋ naambie nɛ ŋaa wɩɩ cheyiŋ, mʋ a bʋl wɩɩ-la ʋ sɩ ŋaa cheyiŋ pʋ, ama ŋaa ŋɩɩ ŋ dɩ ʋ dʋndʋŋa balɩa pɛgɛ. Dɩ ʋ nɛ jegile nɩɩ wɩɩ-la ŋ sɩɩ bʋl, ŋ dɩ ŋ naambie bɩra sɩma nɛ.

¹⁶ Ama dɩ ʋ nɛ bɩ jegile nɩɩ ŋ teeŋ, kɛŋ nʋʋ dɔŋ koo nɩaa balɩa pɛ ŋ tɩtɩa lɛ dɩ ma bɩra mʋ ʋ teeŋ a bʋl wɩɩ-la ʋ sɩ ŋaa chei a wasɛ. Nɩaa balɩa koo batori nɛ maga ba pɛ na wɩɩ ka dɩ ʋ-na chɩŋ.

¹⁷ Ama dɩ ʋ nɛ vɩa dɩ ʋ jegile nɩɩ ma teeŋ, ŋ-na bʋl wɩɩ-la pɩ nɩalɩŋ kala sɩ laa Yesu wɩaa dii aa hilimi. Dɩ ʋ nɛ vɩa dɩ ʋ jegile nɩɩ ba ma teeŋ, dɔgɩsʋ arɩ ŋ bɩ ʋ jɩŋ a nagɛ nɩɩ-la sɩ bɩ Wɩa jɩŋ koo a nagɛ lampoo laara sɩ bɩ wʋtɩtɩɩ kɛnɛ.

Ŋ sɩ vɩa wɩɩ-la arɩ ŋ sɩ sɛɩ wɩɩ-la

¹⁸ Wʋtɩtɩɩ nɛ, mɩ bʋlaa pɩma arɩ wɩɩ-la ma sɩ vɩa dʋnɩa lɛ, ba jaŋ vɩaʋ Wɩa-jaŋ ma. Wɩɩ-la ma ma sɩ sɛyɛ dʋnɩa lɛ, ba jaŋ sɛyʋ Wɩa-jaŋ ma.

¹⁹ Mɩ jaŋ bɩra bʋla pɩma arɩ ma nɩaa balɩa nɛ kɛŋ nii-bala a chʋɔlɛ Wɩa a chɩchɛ kʋŋ mɩ Nyɩmma sɩ hɛ Wɩa-jaŋ teeŋ, ʋ jaŋ joŋo pɩma.

²⁰ Lee-la nɩaa balɩa koo batori sɩ hilime mɩ yɩrɩŋ lɛ, mɩ jaŋ hɛ ba teeŋ.”

Tɩntɩnnʋ-la sɩ bɩ chɩmɩŋ joŋo chɛ ʋ dɔŋɔ tɩɩna

²¹ Ŋɩɩ nɛ Pɩɩta kɔ Yesu teeŋ a pɩɛsʋ, “Mɩ Tɩɩna, dɩ mɩ naambie nɛ ŋaa wɩɩ a chei mɩ lɛ, naansɩɩŋ bʋŋmɛɛ nɛ maga mɩ joŋo chɛʋ? Mɩ joŋo chɛʋ naansɩɩŋ bʋlɩpɛ koo?”

²² Ŋɩɩ nɛ Yesu bɩra bʋl, “Aɩ, naansɩɩŋ bʋlɩpɛ dʋndʋŋa dee. Joŋo chɛʋ naansɩɩŋ mahɩŋ batori arɩ fii leree balɩpɛ.”

²³ Ŋɩɩ nɛ Yesu magɛ namaga a kɛŋ Wɩa kuorii-la a kaa mɩmagɩsɛ kuoro arɩ ʋ tɩntɩnnaa a bʋl, “Kuoru kʋbala nɛ sie a chɩchɛ dɩ ʋ pɩɛsɛ ʋ tɩntɩnnaa ʋ chɩŋŋaa.

²⁴ Ʋ sɩ suomo dɩ ʋ pɩɛsɛ, ba kɛŋ ʋ tɩntɩnnaa dɔŋɔ kɔ ʋ teeŋ. Ʋ dii ʋ chɩmɩŋ siidi bʋɩ bʋɩ nɛ.

²⁵ Ʋ bɩ chɩŋ-la wuo tiŋ. Ŋɩɩ nɛ ʋ kʋhɩaŋ-la bʋl dɩ ba kɛŋ ʋ dɩ ʋ haala arɩ ʋ biiriŋ arɩ kɩalɩŋ kala ʋ sɩ kɛnɛ a kaa mʋ yallɛ a tiŋ chɩŋ-la.

²⁶ Ŋɩɩ nɛ tɩntɩnnʋ-la tuu kpirimi ʋ naadʋsʋŋ nyuŋ a sʋlʋ, ‘Mɩ kʋhɩaŋ, dii kenyiri. Mɩ jaŋ tiŋ chɩŋ-la kala.’

²⁷ Ʋ kʋhɩaŋ-la fá ʋ nisusuŋ woruŋ a joŋ chɩŋ-la chɛʋ aŋ leŋ ʋ mʋ.

²⁸ Ŋɩɩ nɛ chɩŋ tɩɩna-la kuoru-la sɩ joŋ chɩŋ-la chɛ, lɩɩ a ma na ʋ tɩntɩnnɩ dɔŋɔ tɩɩna sɩ dii ʋ chɩmɩŋ siidi baŋmɛnɛ. Ʋ kɛŋ ʋ gɛrɩŋ baŋŋaa lɛ a bʋl dɩ ʋ tiŋ ʋ chɩmɩŋ.

²⁹ Ʋ tɩntɩnnɩ-dɔŋ-la ma tuu kpirimi ʋ naadʋsʋŋ nyuŋ a sʋlʋ a bʋl, ‘Dii kenyiri, mɩ jaŋ timiŋ.’

³⁰ Ʋ vɩa aŋ kɛnʋ mʋ tɔ dɩa, aŋ bʋl see dɩ ʋ tiŋ chɩŋ-la.

³¹ Ʋ tɩntɩnnɩ-dɔsʋŋ sɩ na wɩɩ-la ʋ sɩ ŋaa, ba tʋɔŋ kala faasa chei. Ba mʋ bʋla pɩ ba kʋhɩaŋ wɩɩ-la kala sɩ ŋaa.

³² Ŋɩɩ nɛ kuoru-la yɩrʋ a pɩɛsʋ, ‘Ŋ-na tɩntɩnna deeŋ, ŋ ŋaa nɩbɔŋ nɛ. Ŋ sɩ sʋlmɛ, mɩ joŋ chɩŋ-la kala ŋ sɩ die a chɛŋ nɛ.

³³ Bɛɛ nɛ saa tɩɩ ŋ-na bɩ wuo fá ŋ dɔŋɔ tɩɩna-la nenige arɩ mɩ sɩ fá ŋ nenige ŋɩɩ?’

³⁴ Kuoru-la na baanɩŋ woruŋ ʋ nyuŋ a ŋaa ba kɛnʋ tɔ dɩa see dɩ ʋ tiŋ chɩŋ-la kala.”

³⁵ Ŋɩɩ nɛ Yesu sɩ, “Dɩ ma nɛ bɩ sɛɩ dɩ ma joŋ ma dɔnsʋŋ tɩŋŋaa wʋbɔŋŋɔɔ chɛba arɩ ma tʋɔŋ kala, mɩ Nyɩmma Wɩa sɩ hɛ Wɩa-jaŋ lɛ ma jaŋ dɔgɩsɛma ŋɩɩ.”