Matiu 15 - WƖA TENIŊ

Yesu bʋl wɩaa a tɩgɛ nɩaa naabalɩmaba wombiiŋ lɛ

¹ Ŋɩɩ nɛ Farisii tɩŋŋaa dɔnsʋŋ arɩ Wɩa teniŋ kerichiba lɩɩ Jerusalɛm a kɔ Yesu teeŋ a pɩɛsʋ,

² “Bɛɛ nɛ tɩɩ ŋ harɩ-tooroo chichei la naabalɩmaba kɩsɩnɩŋ lɛ? Bɛɛ nɛ tɩɩ ba bɩ ba nɩsaa ka sɔŋ ŋɩɩ la naabalɩmaba sɩ dagɛla aŋ didii kʋdiilee?”

³ Ŋɩɩ nɛ Yesu ma pɩɛsɛba, “Bɛɛ nɛ tɩɩ ma yie vɩa Wɩa wombiiŋ aŋ tuto ma naabalɩmaba wombiiŋ?

⁴ Wɩa sɩ ma fɩfá ma nyɩmmaba arɩ ma naamba, a bɩra bʋl dɩ nʋʋ nɛ bʋl wʋbɔŋ a tɩgɛ ʋ nyɩmma arɩ ʋ naaŋ lɛ, dɩ ba kpʋ tɩɩna.

⁵ Ama ma-na daga arɩ nʋʋ nɛ kɛŋ kʋŋ a magɛ dɩ ʋ joŋo pɛ ʋ nyɩmma koo ʋ naaŋ lɛ, tɩɩna mʋ a bʋla pɩba dɩ ʋ jaŋ joŋ kʋ-la pɩ Wɩa.

⁶ Ʋ sɩ ŋaa ŋɩɩ, ʋ bɩra bɩ maga dɩ ʋ pɛ ʋ nyɩmma arɩ ʋ naaŋ lɛ. A tɩŋ ŋɩɩ wɩaa, ma vɩa Wɩa niiŋ wɩaa nɛ aŋ to ma naabalɩmaba wombiiŋ.

⁷ Ma ŋaa kanfugi tɩmma nɛ. Azaaya kɩaa sɩma nɛ wɩalɩŋ ʋ sɩ bʋla a tɩgɛ ma lɛ. Azaaya fa ŋaa Wɩa wʋlaabʋllʋ nɛ.

⁸ Ʋ fa sɩ: ‘Nɩaa deemba kɛŋ niiŋ nɛ zizilmi, ka ba tʋɔŋ lɩɩmɛ.

⁹ Ba yie chʋɔlɛmɛ pɛɩ nɛ aa dagɛ nuhuobiine wɛnɩŋ aŋ bʋl mɩ nɛ bʋla. Nuhuobiine wɛnɩŋ nɛ baa to aŋ vɩa Wɩa niiŋ wɩaa.’ ”

Kɩalɩŋ sɩ yie ŋaa nuhuobiine kɛŋ disiniŋ

¹⁰ Ŋɩɩ nɛ Yesu yɩrɛ nɩaa ba kɔ. Ʋ bʋla pɩba, “Má jegile nɩɩ woruŋ.

¹¹ Ʋ bɩ naga kʋ-la sɩ yie to nuhuobiine niiŋ tuu nɛ yie ŋaa ʋ kɛŋ disiniŋ, ama kʋ-la sɩ yie to ʋ niiŋ lɩɩ nɛ kɛŋ disiniŋ.”

¹² Ŋɩɩ nɛ Yesu harɩ-tooroo kɔ ʋ teeŋ a bʋla pʋ, “Ŋ jɩma arɩ ŋ chei Farisii tɩmma-la tʋɔŋ nɛ ŋ sɩ bʋl ŋɩɩ?”

¹³ Ŋɩɩ nɛ ʋ bʋla pɩba, “Tɩa-la kala mɩ Nyɩmma sɩ hɛ Wɩa-jaŋ sɩ yie bɩ chɔnsɔ, ba jaŋ kaa churo ta.

¹⁴ Má sɩ́ leŋe dɩ ba wɩaa walɩmɛma, ba ŋaa nyʋlɩma nɛ a laa nyʋlɩmaa sɩpaaŋ. Dɩ nyʋlɩma nɛ saa kɛŋ ʋ nyʋlʋŋ dɔŋɔ daaŋ lɛ, ba kala balɩa jaŋ tuu buotuoŋ.”

¹⁵ Ŋɩɩ nɛ Pɩɩta bʋl, “Dagɛla namaga-la bʋbʋɔŋ.”

¹⁶ Ŋɩɩ nɛ Yesu bʋl, “Ma ma ha bɩ wʋjɩmɩŋ kɛnɛɛ?

¹⁷ Ma bɩ wɩɩŋ deeŋ bʋbʋɔŋ jɩŋ? Kʋŋ na-kala sɩ jʋʋ nuhuobiine niiŋ, ʋ yie tuu ʋ luoruŋ nɛ a bɩra to ʋ yaraa lɩɩ.

¹⁸ Ama wɩalɩŋ sɩ yie to ŋ niiŋ lɩɩ, ba yie lɩɩ ŋ tʋɔŋ lɛ nɛ. Wɩaa deemba nɛ yie ŋaa nɩaa kɛŋ disiniŋ.

¹⁹ Ŋ tʋɔŋ lɛ nɛ ŋ yie bɩɩnɛ wʋbɔŋŋɔɔ ŋaanɩŋ a mʋ kpʋ nɩaa, a mʋ chɛ nɩaa haalaa, a ŋaa bachɔrʋŋ arɩ hachɔrʋŋ wʋŋaalaa, aa gaa, a nyɩɛ wɩaa aa tɩgɛ nɩaa lɛ, a chichei nɩaa yɩrɩŋ.

²⁰ Wɩaa deemba nɛ yie ŋaa nɩaa kɛŋ disiniŋ. Ama dɩ nʋʋ nɛ dii kɩaa aŋ bɩ ʋ nɩsɩŋ sɔmɔ arɩ ma naabalɩmaba sɩ dagɛ ŋɩɩ, ŋɩɩ bɩ jaŋ wuo ŋaa dɩ tɩɩna kɛŋ disiniŋ.”

Yesu vaarɛ Kɛnaŋ tɩɩna

²¹ Ŋɩɩ nɛ Yesu sii lee-la a mʋ Taaya arɩ Sɩdɔŋ tinteeŋ.

²² Dɩ haal kʋbala sɩ hɛ lee-la kɔ ʋ teeŋ. Ʋ fa ŋaa Kɛnaŋ tɩɩna nɛ. Ʋ sɩ kɔ ʋ teeŋ, ŋɩɩ nɛ ʋ bʋl, “Mɩ Tɩɩna Devit Bii, fá mɩ nenige. Jɩŋ-bɔŋŋɔɔ nɛ kɛŋ mɩ tolo. Ʋ nɩna hɛɛŋ woruŋ.”

²³ Ama Yesu bɩ wɩɩkala bʋla ʋ teeŋ. Ŋɩɩ nɛ ʋ harɩ-tooroo kɔ ʋ teeŋ a bʋla pʋ dɩ ʋ leŋ dɩ haal-la viiri, dɩ ʋ to ba harɩŋ a ŋɩŋaa goŋ nɛ.

²⁴ Ŋɩɩ nɛ Yesu bʋla pɩ haal-la, “Wɩa tɩmmɛ dɩ mɩ kʋ chɛ kɛsɛ piese-la sɩ lɛlɛ nɛ, Iziral tɩŋŋaa dʋndʋŋ nɛ ŋɩɩ.”

²⁵ Ŋɩɩ nɛ haal-la kʋ tel ʋ naasɩŋ lɛ aŋ bʋl, “Mɩ Tɩɩna, pɛ mɩ lɛ.”

²⁶ Yesu bʋla pʋ, “Dɩ ŋ nɛ kɛŋ hambiisiŋ, ŋ bɩ jaŋ joŋ ba kʋdiilee a yuo pɩ vasɩŋ.”

²⁷ Ŋɩɩ nɛ haal-la bʋl, “Mɩ Tɩɩna, ʋ ŋaa wʋtɩtɩɩ nɛ, ama vasɩ-la tɩŋŋaa sɩɩ dii kɩalɩŋ, kɩalɩŋ sɩ tel tinteeŋ nɛ ba ma yie paa didii.”

²⁸ Ŋɩɩ nɛ Yesu bʋla pʋ, “Ŋ ŋaa haal sɩ laa Wɩa dii kɩŋkɛŋ nɛ. Wɩɩ-la ŋ sɩɩ chɛ, mɩ jaŋ ŋaa pɩŋ.” Bʋa-la tɩtɩa lɛ ʋ tolo-la duori.

Yesu vaarɛ nɩaa yʋgɛ

²⁹ Ŋɩɩ nɛ Yesu bɩra sii lee-la a to Galilii mʋga-la dɩɩrɩŋ mʋ. Ʋ jɩl peeliŋ nyuŋ a hɔŋ nɩmɛ.

³⁰ Ŋɩɩ nɛ nɩ-daŋ kɔ ʋ teeŋ a kɛŋ gbɛrɩgɛɛ arɩ nyʋlɩmaa arɩ taŋŋaa arɩ nyanyal tɩŋŋaa dɔnsʋŋ a kaa kʋ bil Yesu naasɩŋ lɛ. Ʋ vaarɛba.

³¹ Nɩ-daŋ-la sɩ na taŋŋaa dɩ baa bʋl wɩaa arɩ gbɛrɩgɛɛ sɩɩ vɛŋ, arɩ nyʋlɩmaa sɩaa sɩ suro, ʋ ŋaaba wʋkpuŋkpere. Ba dɩdɛnnɛ Iziral tɩŋŋaa Wɩa.

Yesu pɩ nɩaa bʋɩ banɛsɛ kʋdiilee

³² Ŋɩɩ nɛ Yesu yɩrɛ ʋ harɩ-tooroo a bʋla pɩba, “Mɩ sɩ beŋ nɩaa deemba, nenige kɛmmɛ nɛ. Ba hɛ mɩ teeŋ tapʋlaa batori nɛ ŋ-la aŋ bɩ kʋdiilee kɛnɛ dɩ ba dii. Mɩ bɩ chɛ dɩ ba viiri dɩ ba nɛ bɩ kʋŋkala die. Dɩ mɩ nɛ ŋaa ŋɩɩ, ba jaŋ wuo mʋ yiegi wombiiŋ lɛ.”

³³ Ŋɩɩ nɛ ʋ harɩ-tooroo pɩɛsʋ, “Nɩɩ nɛ la jaŋ na kʋdiilee dɩ nɩ-daŋ deeŋ kala dii gɩrɩŋ deeŋ tʋɔŋ?”

³⁴ Ʋ pɩɛsɛba, “Boroboro baŋmɛɛ nɛ hɛ nɩmɛ?” Ba sɩ, “Kɩaa balɩpɛ nɛ arɩ chenfil-biisiŋ ma mʋa.”

³⁵ Ŋɩɩ nɛ ʋ ŋaa nɩalɩŋ tuu hɔŋ tinteeŋ.

³⁶ Ka ʋ joŋ boroboroba-la balɩpɛ arɩ chenfile-la a lɔllɛ Wɩa aŋ kaa chɔgɛ chɔgɛ a pɩ ʋ harɩ-tooroo dɩ ba laa kpaa nɩ-daŋ-la. Ba laa kpaaba.

³⁷ Nʋʋkala dii a vɔgɛ. Ka ba paa kʋkaaŋ-biisiŋ a su sinsiŋ balɩpɛ.

³⁸ Nɩalɩŋ fa sɩ dii kɩalɩŋ, ba yi baalaa bʋɩ banɛsɛ, haalaa arɩ hambiisiŋ bɩ pɛ.

³⁹ Ŋɩɩ nɛ ʋ ta nɩ-daŋ-la aŋ mʋ jʋʋ lɩɩŋ daboro a mʋ Magadaŋ tinteeŋ.