Matiu 13 - WƖA TENIŊ

Yesu magɛ namaga a tɩgɛ baala sɩ duu kɩaa lɛ

¹ Tapʋlɩɩ-la tɩtɩa Yesu lɩɩ dɩa-la lɛ ʋ dɩ ʋ harɩ-tooroo fa sɩ hɔnɔ, a sii mʋ mʋgʋ-balɩŋ niiŋ a hɔŋ nɩmɛ dɩ ʋ dagɛ nɩaa.

² Nɩaa yʋgɛ a kʋ gollu chu. Ŋɩɩ nɛ ʋ sii mʋ jʋʋ lɩɩŋ daboro tʋɔŋ a hɔŋ lɩɩŋ tʋɔŋ, ka nɩ-daŋ-la chɩŋ mʋga niiŋ.

³ Ŋɩɩ nɛ ʋ magɛ namagaba a dagɛba wɩaa yʋgɛ. Ʋ namagaba-la dɔŋɔ nɛ ŋ-la: Yesu sɩ: “Baal kʋbala nɛ sie a kɛŋ ʋ kʋdoho kaa lɩɩ dɩ ʋ mɩsɛ.

⁴ Ʋ sɩɩ mɩsɛ ŋɩɩ, kʋdoho-la dɔnsʋŋ tel wombiiŋ tʋɔŋ. Diibiisiŋ kʋ tʋɔsa dii.

⁵ Dɔnsʋŋ ma tel kpagɩnyɩlɩŋ nyuŋ. Hagɩla sɩ bɩ yʋgɛ ŋɩɩ, ka ba guu nyʋ,

⁶ ba naapoloo bɩ tinteeŋ jʋa. Ŋɩɩ nɛ wɩa pɔsɛ a ŋmooba, ba sʋʋ, bɛɛ wɩaa ba naapoloo bɩ tinteeŋ jʋa.

⁷ Kʋdoho-la dɔnsʋŋ ma tel sɔsʋŋ tʋɔŋ a nyʋ, sɔsʋ-la waa a nyaga kpʋ, ba bɩ wasa.

⁸ Kʋdoho-la dɔnsʋŋ ma tel tintee-zɔmʋŋ lɛ a nyʋ a waa a wasɛ woruŋ. Dɔnsʋŋ hɛ biee zɔlɔ zɔlɔ, dɔnsʋŋ ma mahɩŋ batori batori, dɔnsʋŋ ma mara arɩ fii fii.”

⁹ Yesu sɩ magɛ namaga-la dɛrɛ, ŋɩɩ nɛ ʋ bʋl, “Dɩgɩlaa tɩŋŋaa, má wuoli ma dɩgɩlaa a nɩɩ wɩaa deemba.”

Yesu dagɛ ʋ harɩ-tooroo wɩɩ-la sɩ tɩɩ ʋ yie mɩmagɛ namagaba

¹⁰ Ŋɩɩ nɛ Yesu harɩ-tooroo kɔ ʋ teeŋ a pɩɛsʋ, “Bɛɛ nɛ tɩɩ ŋ yie kɛŋ namagaba a dɩdagɛ nɩaa?”

¹¹ Ŋɩɩ nɛ Yesu bʋla pɩba, “Ma nɩaa deemba nɛ Wɩa dagɛ ʋ kuorii-la wɩaa sɩ faa bʋbʋɔŋ pɩpa, ama nɩ-daŋ kala dee.

¹² Nɩɩ-la kala sɩ to Wɩa niiŋ wɩaa, Wɩa jaŋ faasa pɛ ʋ lɛ woruŋ. Nɩɩ-la ma sɩ bɩ Wɩa niiŋ wɩaa ka to, Wɩa bɩ jaŋ pɛ ʋ lɛ. Ʋ sɩ pɛ ʋ lɛ mʋa-la ma, ʋ jaŋ laa ʋ kʋa.

¹³ Wɩɩ-la sɩ tɩɩ mɩ yie mɩmagɛ namagaba nɛ ŋ-la: Ba yie nyilimi nyilimi nɛ aŋ bɩ kʋŋkala wuo na, a jijegili wɩaa aŋ bɩ wɩɩkala ka nɩɩ, a bɩ wɩalɩŋ bʋbʋɔŋ ma wuo jɩŋ.

¹⁴ Wɩa sɩ to ʋ wʋlaabʋlla Azaaya lɛ a bʋl wɩalɩŋ, ba wɩaa nɛ ʋ bʋl ŋɩɩ, ba kʋ ŋaa wʋtɩtɩɩ nɛ. Ʋ fa sɩ, ‘Nɩaa deemba jaŋ jegili jegili wɩaa aŋ bɩ wɩɩkala bʋbʋɔŋ wuo jɩŋ, ba jaŋ nyilimi nyilimi aŋ bɩ kʋŋkala wuo na,

¹⁵ bɛɛ wɩaa ba bɩ wʋjɩmɩŋ kɛnɛ Wɩa teeŋ, ba vɩa Wɩa niiŋ wɩaa nɛ. Ba tɔ ba dɩgɩlaa ma nɛ dɩ ba sɩ́ wɩɩkala nɩɩ, a kɛŋ ba sɩaa ma tɔ dɩ ba sɩ́ kʋŋkala na. Dɩ ŋɩɩ dee, ba fa jaŋ nɩna, ba dɩgɩlaa ma fa jaŋ nɩnɩɩ. Ba fa jaŋ jɩŋ wɩaa bʋbʋɔŋ a bɩrɩma kɔ mɩ teeŋ dɩ mɩ vaarɛba.’

¹⁶ Ma-na nyuŋ sɩma nɛ ma sɩaa sɩɩ na, ma dɩgɩlaa ma nɩnɩɩ.

¹⁷ Mɩ bʋlaa pɩma arɩ Wɩa wʋlaabʋllaa, arɩ nɩalɩŋ dɔnsʋŋ fa sɩɩ to Wɩa, ba yʋga a cho dɩ ba na wɩalɩŋ ma sɩɩ na aŋ bɩ wuo na, a fa cho dɩ ba nɩɩ wɩalɩŋ ma sɩɩ nɩɩ, aŋ bɩ wuo nɩɩ.

Yesu dagɛ kʋduuro namaga-la bʋbʋɔŋ

¹⁸ Má jegili a nɩɩ kʋduuro namaga-la bʋbʋɔŋ.

¹⁹ Nɩalɩŋ sɩ yie nɩɩ Wɩa niiŋ wɩalɩŋ a mʋ tɩgɛ Wɩa kuorii-la lɛ aŋ bɩ ba bʋbʋɔŋ jɩŋ, ba nagɛ kʋdoho-la sɩ tel wombiiŋ lɛ nɛ. Sɩtaanɩ yie guu kɔ a kɛŋ wɩalɩŋ a liiri ba tʋɔŋ lɛ.

²⁰ Kɩalɩŋ ma sɩ tel kpagɩnyɩlɩŋ nyuŋ ma nɛ ŋaa nɩalɩŋ sɩ yie guu laa Wɩa niiŋ wɩalɩŋ dii arɩ tʋɔtɔrʋŋ.

²¹ Ama ba bɩ bɔyɛ kɛnɛ a nagɛ naapolo-la sɩ bɩ tinteeŋ jʋa ŋɩɩ, ba bɩ diene. Dɩ hɛɛŋ nɛ jʋʋba, koo dɩ ba to naasɩŋ dʋdɔgɩsɛba a tɩŋ wɩɩ-la wɩaa, ba tʋɔŋ guu lɩɩ wɩɩ-la lɛ, ba joŋo ta.

²² Kɩalɩŋ sɩ tel sɔsʋŋ tʋɔŋ ma nɛ ŋaa nɩalɩŋ sɩ yie nɩɩ Wɩa niiŋ wɩalɩŋ, ama dʋnɩa wɩaa arɩ dʋnɩa kɩaa wɩaa wʋwalɩmɛba, ba cho dɩ ba jige aa chɛ kʋŋkala. A tɩŋ wɩaa deemba, ba bɩ sɛɩ dɩ ba to wɩalɩŋ. Wɩalɩŋ bɩ doho kɛnɛ ba teeŋ.

²³ Kɩalɩŋ sɩ tel tintee-zɔmʋŋ lɛ ma nɛ ŋaa nɩalɩŋ sɩ yie nɩɩ Wɩa niiŋ wɩalɩŋ a jɩŋ ba bʋbʋɔŋ. Wɩalɩŋ kɛŋ doho kɩŋkɛŋ kɩŋkɛŋ ba teeŋ, dɔnsʋŋ nɛŋ zɔlɔ zɔlɔ, dɔnsʋŋ mahɩŋ batori batori, dɔnsʋŋ ma mara arɩ fii fii.”

Yesu magɛ namaga a tɩgɛ baga sɩ kɛŋ yaŋ lɛ

²⁴ Ŋɩɩ nɛ Yesu bɩra magɛ namaga dɔŋɔ a pɩba, “Wɩa kuorii-la nagɛ baala sɩ sie nɛ a duu miiriŋ ʋ baga lɛ.

²⁵ Tɩtaŋ kʋbala nɩaa kala sɩ pɩŋ doŋ, ʋ dʋndɔmɔ kɛŋ yaŋ kaa mʋ duu hɛ baga-la lɛ aŋ viiri.

²⁶ Miiri-la sɩ suomo nyʋ a nɩnɛŋ, yaŋ-la ma nyʋ.

²⁷ Ŋɩɩ nɛ baal-la tɩntɩnnaa mʋ a na baga-la a mɩɩra kʋ bʋla pɩ baal-la, ‘La kʋhɩaŋ, ŋ duu kʋzɔŋŋɔɔ nɛ ŋ baga-la lɛ, ka nɩɩ nɛ yaŋ ma lɩɩ?’

²⁸ Ŋɩɩ nɛ ba kʋhɩaŋ-la bʋla pɩba, ‘Ʋ naga mɩ dʋndɔŋ nɛ ŋaa ŋɩɩ.’ Ŋɩɩ nɛ ʋ tɩntɩnna-la pɩɛsʋ, ‘Ŋŋ chɛ dɩ la mʋ a churi yaŋ-la ta nɛɛ?’

²⁹ Ŋɩɩ nɛ baal-la bʋl, ‘Aɩ, má leŋ dɩ miiri-la bɩɩ. Dɩ ma nɛ mʋa dɩ ma churi yaŋ-la lɛɛlɛ, ma jaŋ pɛ churi miiri-la dɔnsʋŋ ma ta.

³⁰ Dɩ miiri-la nɛ bɩa, mɩ jaŋ leŋ dɩ nɩalɩŋ sɩ jaŋ mʋ kʋŋ miiri-la laa sɩpaaŋ churi yaŋ-la a vɔɔ nyɩgɛ, aŋ-na kʋŋ miiri-la kaa kʋ hɛ mɩ vire lɛ.’ ”

Yesu magɛ namaga a mʋ tɩgɛ kʋdoho kʋbala baa yɩrɛ masɩtad lɛ

³¹ Ŋɩɩ nɛ Yesu bɩra magɛ namaga dɔŋɔ a bʋl, “Wɩa kuorii-la nagɛ baal kʋbala sɩ joŋ kʋdoho kʋbala baa yɩrɛ masɩtad a duu ʋ baga lɛ nɛ.

³² Kʋdoho-la nɛ muuro kɩɩ kʋdoho kala sɩ hɛ nɩmɛ. Ama dɩ ʋ nɛ nyʋa, ʋ yie waa a bɩrɩmɛ tɩa nɛ a yʋga kɩɩ baga kʋduuloo kala. Ŋɩɩ nɛ diibiisiŋ yie sagɛ ʋ lɛ a sʋa ba dɛllɩŋ ʋ naakelee lɛ.”

Yesu magɛ namaga a mʋ tɩgɛ sɩbʋrʋŋ lɛ

³³ Yesu bɩra magɛ namaga dɔŋɔ a pɩba a bʋl, “Wɩa kuorii-la nagɛ sɩbʋrʋŋ nɛ haala joŋo hɛ munuŋ sɩ yʋga lɛ, a kaa kuosi, ʋ sii pʋɔra laa muŋ-la kala.”

Yesu dagɛ nɩaa namagaba

³⁴ Dɩ Yesu nɛ fa bʋl wɩɩkala pɩpɩ nɩ-daŋ-la, namaga nɛ ʋ yie magɛ. Ʋ bɩ jaŋ bʋl wɩɩ dɩ ʋ bɩ namaga maga.

³⁵ Ʋ ŋaa ŋɩɩ dɩ wɩalɩŋ Wɩa wʋlaabʋlla sɩ bʋla kʋ ŋaa wʋtɩtɩɩ nɛ. Ʋ fa sɩ, “Dɩ mɩ nɛ bʋl wɩaa pɩpɩ nɩaa, mɩ jaŋ magɛ namagaba, mɩ jaŋ bʋl wɩaa sɩ faa a chɩŋ dʋnɩa dɩ-suomuŋ a pɩba.”

Yesu dagɛ namaga-la ʋ sɩ maga a tɩgɛ yaŋ lɛ bʋbʋɔŋ

³⁶ Ŋɩɩ nɛ Yesu leŋ nɩ-daŋ-la, aŋ sii jʋʋ dɩa. Ʋ harɩ-tooroo kɔ ʋ teeŋ a bʋl, “Dagɛla namaga-la ŋ sɩ maga a tɩgɛ baga yaŋ lɛ bʋbʋɔŋ.”

³⁷ Ŋɩɩ nɛ Yesu bʋl, “Nɩɩ-la sɩ duu miiri-la nɛ ŋaa mɩ-na Nuhuobiine Bie.

³⁸ Baga-la ma nɛ ŋaa dʋnɩa. Miiri-la ma nɛ ŋaa nɩalɩŋ sɩ jaŋ jʋʋ Wɩa kuorii-la tʋɔŋ. Yaŋ-la ma sɩ nyʋ baga-la lɛ nɛ ŋaa Sɩtaanɩ nɩaa.

³⁹ Dʋndɔŋ-la sɩ duu yaŋ-la nɛ ŋaa Sɩtaanɩ. Miiri-la ma kʋmʋŋ nɛ ŋaa dʋnɩa dɩdɛrɩŋ. Nɩalɩŋ ma sɩ kʋŋ miiri-la nɛ ŋaa Wɩa tɩndaaraa.

⁴⁰ Ŋɩɩ ba sɩ hiesi yaŋ-la a nyɩgɛ, ŋɩɩ tɩtɩa nɛ jaŋ ŋaa dʋnɩa dɩdɛrɩŋ.

⁴¹ Mɩ-na Nuhuobiine Bie jaŋ tɩŋ mɩ tɩndaaraa dɩ ba jʋʋ Wɩa kuorii-la tʋɔŋ a tʋɔsɛ nɩalɩŋ sɩ ŋaa wʋbɔŋ ŋaaraa, arɩ nɩalɩŋ kala sɩ ŋaa wʋbɔŋŋɔɔ

⁴² a joŋo yuo hɛ Wɩa nyiniŋ tʋɔŋ. Lee-la nɛ ba jaŋ yel aŋ pɛ dɩdɩŋ ba nyɩlaa.

⁴³ Tʋɔpʋl tɩŋŋaa-na jaŋ tʋtʋl a nagɛ wɩɩpɔsʋŋ sɩɩ tʋl ŋɩɩ ba Nyɩmma Wɩa kuorii-la tʋɔŋ. Dɩgɩlaa tɩŋŋaa, má wuoli ma dɩgɩlaa a nɩɩ wɩaa deemba.”

Baal-la sɩ pɛrɛ baga a mɔl kɩaa

⁴⁴ Yesu bɩra bʋl, “Wɩa kuorii-la nagɛ ŋ-la nɛ: Baal kʋbala nɛ mʋ pɩpɛrɛ baga a na dɩ sɛlɩmɛ hɛ baga-la lɛ. Ʋ sɩ na sɛlɩmɛ-la, ʋ gbaa tɔ, ʋ tʋɔŋ kala faasa tɔrɛ kɩŋkɛŋ. Ŋɩɩ nɛ ʋ mʋ yallɛ ʋ kɩaa kala a kɛŋ moribie-la a kaa mʋ yɔɔ baga-la.”

Yesu bɩra magɛ namaga a mʋ tɩgɛ bʋ-sɩɩŋ lɛ

⁴⁵ Yesu bɩra sɩ dɩ Wɩa kuorii-la nagɛ bayala sɩ mʋa dɩ ʋ yɔɔ bʋ-sɩaa nɛ.

⁴⁶ Ʋ sɩ na dɔŋɔ dɩ ʋ faasa zɔŋ kɩŋkɛŋ, ʋ mɩɩra mʋ joŋ ʋ kɩaa kala ʋ sɩ kɛnɛ a yallɛ a yɔɔ bʋ-sɩɩ-la.

Yesu magɛ namaga a tɩgɛ jóŋ lɛ

⁴⁷ Yesu bɩra sɩ dɩ Wɩa kuorii-la nagɛ jóŋ nɛ, ba sɩ joŋo yuo hɛ mʋgʋ-balɩŋ tʋɔŋ. Ʋ kɛsɛ chenfil-dosunuŋ.

⁴⁸ Dɩ chenfilee nɛ suo, chenfil-kpʋʋra-la yie kaa lɛrɛ lɩɩ mʋgʋ-balɩŋ niiŋ nɛ a tʋɔsɛ chenfile-la. Ba yie tʋɔsɛ kʋzɔŋŋɔɔ hɛ ba kɩaa lɛ aŋ joŋ kɩalɩŋ sɩ bɩ zɔŋ a yuo ta.

⁴⁹ Ŋ-la nɛ saa ʋ jaŋ nagɛ dʋnɩa dɩdɛrɩŋ. Wɩa tɩndaaraa jaŋ lɩɩ a tʋɔsɛ nɩbɔŋŋɔɔ nɩzɔŋŋɔɔ tʋɔŋ

⁵⁰ a jomba yuo hɛ Wɩa nyiniŋ lɛ. Nɩmɛ nɛ ba jaŋ yel aŋ dɩdɩŋ ba nyɩlaa.

Yesu magɛ namaga a tɩgɛ baal-la sɩ kɛŋ kɩaa ʋ vire lɛ

⁵¹ Ŋɩɩ nɛ Yesu pɩɛsɛ ʋ harɩ-tooroo a bʋl, “Ma jɩŋ wɩaa deemba kala bʋbʋɔŋ nɛɛ?” Ba sɩ, “Oo.”

⁵² Ŋɩɩ nɛ Yesu bʋla pɩba, “Wɩɩŋ deeŋ daga arɩ nɩɩ-la kala sɩ gʋnnɛ Wɩa teniŋ woruŋ a kʋ ŋaa mɩ harɩ-tooru a ŋaa siri dɩ ʋ jʋʋ Wɩa kuorii-la tʋɔŋ, ʋ tɩɩna nagɛ dɩa tɩɩna sɩ yie chaarɛ mɩɩ-bɩnaa arɩ mɩɩ-falaa nɛ ʋ vire lɛ.”

Ba vɩa Yesu Nazarɛt lɛ

⁵³ Yesu sɩ magɛ namaga deemba dɛrɛ, ʋ sii Kapɛnam lɛ

⁵⁴ a mɩɩra mʋ Nazarɛt. Ŋɩɩ nɛ ʋ mʋ dagɛ nɩaa Wɩɩchʋɔlɛ dɩa lɛ. Nɩalɩŋ kala sɩ nɩɩ wɩalɩŋ ʋ sɩ bʋla, ba hirigi. Ŋɩɩ nɛ ba pɩpɩɛsɛ dɔŋɔ, “Nɩɩ nɛ baala deeŋ na wʋjɩmɩŋ deeŋ arɩ wʋduoruŋ deemba kala ŋaanɩŋ?

⁵⁵ Josɛf, kapɩnta-la bie dee ŋɩɩ? Mɛɛrɩ dee bɩ ʋ naaŋ ŋaa? Jeems arɩ Josɛf arɩ Saamɔŋ arɩ Judas, ʋ naambiiriŋ dee ŋɩɩ?

⁵⁶ La dɩ ʋ dɩhaalaa kala dee daha? Nɩɩ lɛ nɛ saa ʋ na wɩaa deemba kala?”

⁵⁷ Ŋɩɩ nɛ ba na baanɩŋ ʋ nyuŋ. Yesu bʋla pɩba, “Dɩ Wɩa wʋlaabʋllʋ nɛ mʋ lee-kala, ba yie zizilu nɛ, ama ʋ jaŋ nɩaa-na sɩɩŋ bɩ ʋ ka su.”

⁵⁸ A tɩŋ ba sɩ bɩ laa dii wɩaa, ʋ bɩ wʋduoruŋ wuo ŋaa yʋgɛ lee-la.