Matiu 11 - WƖA TENIŊ

Jɔɔŋ Wɩa lɩɩ-fooru-la tɩŋ nɩaa ba kɔ Yesu teeŋ

¹ Yesu sɩ bʋl wɩaa deemba a pɩ ʋ harɩ-tooroo fii arɩ balɩa-la dɛrɛ, ʋ lɩɩ lee-la a mʋ dɩ ʋ dagɛ nɩaa aŋ pɛ bʋl Wɩa wɩaa tasɩ-la sɩ kpagɛ lee-la.

² Jɔɔŋ Wɩa lɩɩ-fooru-la fa sɩ hɛ sarɩka lɛ a nɩɩ wɩalɩŋ Kirisito fa sɩɩ ŋaa, ʋ tɩŋ ʋ harɩ-tooroo dɔnsʋŋ Yesu teeŋ

³ dɩ ba mʋ pɩɛsɛ Yesu, “Bʋla pɩla, ŋ nɛ nɩɩ-la Jɔɔŋ fa sɩ sɩ ʋ jaŋ kɔ, koo la ha gbɩgbɛrɛ nʋʋ dɔŋ?” Ŋɩɩ nɛ ba mʋ pɩɛsʋ.

⁴ Yesu bʋla pɩba, “Má mɩɩra mʋ Jɔɔŋ teeŋ a bʋla pʋ wɩalɩŋ kala ma sɩ na a nɩɩ ma:

⁵ Nyʋlɩmaa sɩaa ka suri nɛ, gbɛrɩgɛɛ vɩvɛŋ, gbegisiŋ ma duduori. Taŋŋaa nɩnɩɩ wɩaa, nɩalɩŋ sɩ sʋba sisii sʋʋŋ lɛ. Summoo ma wuo nɩnɩɩ Wɩa wʋzɔŋŋɔɔ.

⁶ Nɩalɩŋ sɩ bɩ kaa lɛrɛ arɩ mɩ nɛ ŋaa nɩɩ-la Wɩa sɩ tɩma, ba tʋɔŋ jaŋ tɔrɛ.”

⁷ Ŋɩɩ nɛ Jɔɔŋ harɩ-tooro-la viviiri. Yesu suomo bʋl Jɔɔŋ wɩaa a pɩpɩ nɩ-daŋ-la. Ʋ pɩɛsɛba, “Ma sɩ mʋ Jɔɔŋ teeŋ tintee-hɩlɩɩ-la lɛ, bɛɛ nɛ ma fa gbɛrɛ dɩ ma na? Ma mʋa dɩ ma na yaŋ peliŋ sɩ kaa viviisi nɛɛ? Aɩ.

⁸ Bɛɛ nɛ saa ma lɩɩ dɩ ma na? Ma lɩa dɩ ma na nʋʋ sɩ laalɛ gɛrɩ-zɔŋŋɔɔ nɛɛ? Aɩ. Bee na nɩalɩŋ sɩ yie laalɛ gɛnnɩŋ deemba, ba yie jʋʋ kuori dɩɩsɩŋ nɛ aa nɩɩ sɩma.

⁹ Má saa dagɛmɛ kʋ-la ma sɩ mʋa dɩ ma na. Ma mʋa dɩ ma na Wɩa wʋlaabʋlla nɛɛ? Oo, mɩ jaŋ bʋla pɩma arɩ ma na nʋʋ sɩ kɩɩ Wɩa wʋlaabʋlla nɛ.

¹⁰ Ʋ-na Jɔɔŋ wɩaa nɛ ba ŋmʋnsa bil Wɩa teniŋ tʋɔŋ arɩ Wɩa sɩ: ‘Mɩ jaŋ tɩŋ mɩ tɩndaara dɩ ʋ laa ŋ sɩpaaŋ a mʋ a wasɛ wombiiŋ bil ŋ lɛ.’ ”

¹¹ Ŋɩɩ nɛ Yesu bɩra bʋl, “Wʋtɩtɩɩ, mɩ bʋlaa pɩma, Jɔɔŋ, Wɩa lɩɩ-fooru-la nɛ kɩɩ nʋʋkala ba sɩ lʋla. Ama nɩɩ-la sɩ ŋaa nɩ-bie Wɩa kuorii-la tʋɔŋ, ʋ nɛ yʋga kɩɩ Jɔɔŋ.

¹² A chɩŋ bʋa-la lɛ Jɔɔŋ sɩ suomo bʋbʋl Wɩa wɩaa a kaa kʋkɔ tapʋlʋŋ deeŋ, nɩaa kɛŋ Wɩa kuorii-la wɩaa yuyuo dɔŋɔ nɛ, ŋɩɩ nɛ nɩduoruŋ wʋwalɩmɛ dɩ ba kaa lorigo laa.

¹³ Ka dɩ Jɔɔŋ-na kɔ, Wɩa wʋlaabʋllaa fa bʋl Wɩa kuorii-la wɩaa nɛ. Wɩalɩŋ Wɩa sɩ leŋe ba ŋmʋnsa bil dɩ nɩaa tuto ma dagɛ ŋɩɩ nɛ.

¹⁴ Dɩ ma nɛ jaŋ sɛɩ wɩalɩŋ ba sɩ bʋla, Jɔɔŋ nɛ ŋaa Ɩlaaja, nɩɩ-la wɩaa ba fa sɩ bʋla arɩ ʋ jaŋ kɔ.

¹⁵ Dɩgɩlaa tɩŋŋaa, má wuoli ma dɩgɩlaa a nɩɩ.”

¹⁶ Ŋɩɩ nɛ Yesu bɩra bʋl, “Bɛɛ nɛ mɩ jaŋ kɛŋ jɩnɩŋ nɩaa kaa magɩsɛ? Ba nagɛ hambiisiŋ sɩɩ gbieli yɔbɔ tʋɔŋ nɛ. Dɔnsʋŋ yie kpɩa yɩrɛ dɔnsʋŋ a bʋla pɩba,

¹⁷ ‘La yɩɩ yɩɩlaa nɛ pɩma, aŋ ka ma bɩ gʋa, la ta jembiiŋ pɩma, aŋ ka ma bɩ yele.’

¹⁸ Bʋa-la lɛ Jɔɔŋ sɩ kɔ ma teeŋ, ʋʋ vɔɔ niiŋ nɛ a bɩ sɩnɩŋ ka nyʋa. Ŋɩɩ nɛ ba sɩ dɩ jɩŋ-bɔŋ nɛ kɛnʋ.

¹⁹ Aŋ ka mɩ-na Nuhuobiine Bie kɔ ma teeŋ a didii kɩaa aŋ pɛ nyʋnyʋa sɩnɩŋ ma. Ŋɩɩ nɛ ba bʋl, ‘Baala deeŋ ŋaa luobii tɩɩna nɛ a ŋaa sɩ-nyʋarʋ ma aŋ pɛ kɛŋ lampoo laaraa arɩ wʋbɔŋ ŋaaraa kala kaa dii nandɔnsʋŋ.’ Nɩalɩŋ sɩ sɛɩ wʋjɩmɩɩ-la sɩ lɩɩ Wɩa teeŋ, ba wʋŋaalaa nɛ yie dagɛ arɩ wɩalɩŋ sɛnɛ ŋaa wʋtɩtɩɩba nɛ.”

Tasɩ-la sɩ bɩ Yesu wɩaa laa dii

²⁰ Tasɩ-la lɛ Yesu sɩ ŋaa wʋmagɩlaa yʋgɛ, ba nɩaa bɩ ʋ wɩaa laa dii, ŋɩɩ wɩaa ba bɩ bɩrɩma lɩɩ ba wʋbɔŋŋɔɔ lɛ. Ŋɩɩ nɛ ʋ kpɩaba lɛ a bʋl,

²¹ “Ma Kɔrazɩŋ tɩŋŋaa, ma jaŋ na hɛɛŋ. Bɛtɩsaada tɩŋŋaa, ma ma jaŋ na hɛɛŋ. Wʋmagɩla-la mɩ sɩ ŋaa ma teeŋ, dɩ mɩ nɛ fa ŋaaba Taaya arɩ Sɩdɔŋ nɩaa teeŋ, wɩa magɛ ŋ-la ba fa hɔnɔ tɛllɛ naasɩŋ a ŋaa tʋɔrʋŋ bʋgɛ ba tɩtɩa, a dɩdagɛ arɩ ba bɩrɩma lɩɩ ba wʋbɔŋŋɔɔ lɛ nɛ.

²² Mɩ bʋlaa pɩma, sarɩya chɛ-diiliŋ, Wɩa jaŋ dɔgɩsɛ Kɔrazɩŋ arɩ Bɛtɩsaada tɩŋŋaa a kɩɩ Taaya arɩ Sɩdɔŋ tɩŋŋaa.

²³ Ma-na Kapɛnam tɩŋŋaa, ma nɛ paala chɩchɛ dɩ ma kɛŋ ma tɩtɩa a kaa jɩl Wɩa-jaŋ. Wɩa jaŋ jomma yuo ta dɩ ma tuu jʋʋ ʋ nyiniŋ. Wʋmagɩlaa deemba kala mɩ sɩ ŋaa ma teeŋ, dɩ mɩ nɛ fa ŋaaba Sodom lɛ, ba fa ha jaŋ hɛ nɩmɛ a kaa kʋkɔ jɩnɩŋ.

²⁴ Mɩ bʋlaa pɩma, sarɩya chɛ-diiliŋ Wɩa jaŋ fá Sodom nɩaa nenige a kɩɩ Kapɛnam nɩaa.”

Yesu bʋla pɩ nɩaa dɩ ba kɔ ʋ teeŋ a na wiese

²⁵ Bʋa-la tɩtɩa lɛ Yesu guu yɩrɛ, “Mɩ Nyɩmma, ŋ nɛ ŋaa wɩa-nyuŋ arɩ tinteeŋ kala Tɩɩna. Mɩɩ lɔllʋŋ arɩ ŋ sɩ kɛŋ wɩalɩŋ ŋ sɩ joŋo faa a dagɛ nɩalɩŋ sɩ bɩ wɩaa jɩŋ, aŋ bɩ joŋo dagɛ nɩalɩŋ sɩ kɛŋ wʋjɩmɩŋ.

²⁶ Mɩ Nyɩmma, mɩɩ lɔllʋŋ. Ŋ tɩtɩa tʋɔtɔrʋŋ lɛ nɛ ŋ ŋaa ŋɩɩ.”

²⁷ Ŋɩɩ nɛ ʋ bɩra bʋl, “Mɩ Nyɩmma joŋ kʋŋkala doluŋ nɛ pɩmɛ. Mɩ Nyɩmma dʋndʋŋa nɛ jɩŋ ŋɩɩ mɩ sɩ naga. Mɩ ma dʋndʋŋa nɛ jɩŋ ŋɩɩ mɩ Nyɩmma sɩ naga. Nʋʋkala bɩra bɩ ʋ jɩŋ, see nɩalɩŋ mɩ sɩ cho dɩ mɩ daga pa.”

²⁸ Ŋɩɩ nɛ Yesu bɩra bʋla pɩ nɩaa, “Má kɔ mɩ teeŋ, ma nɩalɩŋ kala sɩ lɔlɔ, aŋ ka wɩaa nyagɛma bil, mɩ jaŋ pɩma wiese.

²⁹ Má laa mɩ chʋga a chʋŋ aŋ gʋnnɛ mɩ teeŋ, bɛɛ wɩaa mɩ kɛŋ mɩ tɩtɩa muuri nɛ, mɩ sɩaa ma fɩɛlɛ. Dɩ ma nɛ ŋaa ŋɩɩ, ma jaŋ na wiese.

³⁰ Chʋga-la mɩ sɩ jaŋ joŋo chʋmma jaŋ ŋaa chʋgʋ-mɔlɩɩ, ʋ bɩ yuŋ.”