Matiu 1 - WƖA TENIŊ

Yesu doho nɩaa

¹ Yesu doho nɩaa nɛ ŋ-la. Ʋ naabalɩmaba nɛ fa ŋaa Abɩraham arɩ Devit.

² Abɩraham nɛ fa lʋl Aɩzɩk. Aɩzɩk ma sii lʋl Jekɔb. Jekɔb ma sii lʋl Juda arɩ ʋ naambiiriŋ.

³ Juda ma sii lʋl Pɛrɛs arɩ Zɛra. (Ba naaŋ yɩrɩŋ nɛ fa Tama.) Pɛrɛs ma bɩra sii lʋl Hɛzɩrɔŋ. Hɛzɩrɔŋ ma sii lʋl Ram.

⁴ Ram ma sii lʋl Amɩnadab. Amɩnadab ma sii lʋl Nasɔŋ. Nasɔŋ ma sii lʋl Salɩmɔŋ.

⁵ Salɩmɔŋ ma sii lʋl Bʋas. (Bʋas naaŋ yɩrɩŋ nɛ fa Rahab.) Bʋas ma sii lʋl Ɔbɛd. (Ɔbɛd ma naaŋ yɩrɩŋ nɛ fa Ruf.) Ɔbɛd ma sii lʋl Jesi.

⁶ Jesi ma bɩra sii lʋl kuoro Devit. Devit ma fa lʋl Solomoŋ. (Solomoŋ ma naaŋ fa ŋaa Yuria haala nɛ. Yuria sʋʋ aŋ ka Devit joŋo jaa.)

⁷ Solomoŋ ma sii lʋl Rehobuam, Rehobuam ma sii lʋl Abija, Abija ma sii lʋl Asa.

⁸ Asa ma sii lʋl Jehosafat, Jehosafat ma sii lʋl Jehoram, Jehoram ma sii lʋl Uzia.

⁹ Uzia ma sii lʋl Jotam, Jotam ma sii lʋl Ehas, Ehas ma sii lʋl Hezikaaya.

¹⁰ Hezikaaya ma sii lʋl Manasɛ, Manasɛ ma sii lʋl Amɔŋ, Amɔŋ ma sii lʋl Josaaya.

¹¹ Josaaya ma sii lʋl Jekonaaya arɩ ʋ naambiiriŋ. Bʋa-la lɛ nɛ ba kɛŋ Iziral tɩŋŋaa mʋ Babɩlɔŋ.

¹² Ba fa sɩ kɛŋ Iziral tɩŋŋaa kaa mʋ Babɩlɔŋ ŋɩɩ, ʋ ŋɩɩ harɩŋ lɛ nɛ Jekonaya lʋl Sɩalɩtɩɛl, Sɩalɩtɩɛl ma sii lʋl Zerubabɛl.

¹³ Zerubabɛl ma sii lʋl Abɩʋ, Abɩʋ ma sii lʋl Ɛlɩakɩm, Ɛlɩakɩm ma sii lʋl Azɔ.

¹⁴ Azɔ ma sii lʋl Zadɔk, Zadɔk ma sii lʋl Akɩm, Akɩm ma sii lʋl Ɛlɩʋt.

¹⁵ Ɛlɩʋt ma sii lʋl Elieza, Elieza ma sii lʋl Mataŋ, Mataŋ ma bɩra sii lʋl Jekɔb.

¹⁶ Jekɔb ma sii lʋl Josɛf, Josɛf nɛ saa jaa Mɛɛrɩ. Mɛɛrɩ nɛ lʋl Yesu, Nɩɩ-la ba sɩɩ yɩrɛ Kirisito.

¹⁷ A suomi Abɩraham sɩ hɛ ʋ mɩɩsɩŋ lɛ a kaa kʋkɔ Devit sɩ hɛ ʋ mɩɩsɩŋ lɛ, ʋ dɩ ʋ nihi-lɩɛrɛba kala fa ŋaa fii arɩ banɛsɛ nɛ. Devit sɩ hɛ ʋ mɩɩsɩŋ lɛ a kaa kʋkɔ bʋa-la lɛ ba fa sɩ kɛsɛ Iziral tɩŋŋaa kaa mʋ Babɩlɔŋ, Devit nihi-lɩɛrɛba kala ma fa ŋaa fii arɩ banɛsɛ nɛ, a bɩra chɩŋ bʋa-la lɛ ba sɩ kɛsɛ Iziral tɩŋŋaa kaa mʋ Babɩlɔŋ a kaa kʋkɔ bʋa-la lɛ ba sɩ lʋl Kirisito, nɩalɩŋ ba sɩ kɛsɛ kaa mʋ Babɩlɔŋ nihi-lɩɛrɛba ma fa ŋaa fii arɩ banɛsɛ nɛ.

Yesu lʋlʋŋ bʋa lɛ

¹⁸ Ŋ-la nɛ ba ŋaa a lʋl Yesu Kirisito. Josɛf nɛ fa sʋgɛ ʋ naaŋ Mɛɛrɩ dɩ ʋ jaa. Ka dɩ ba-na jaa dɔŋɔ, Mɛɛrɩ na dɩ ʋ kɛŋ luoruŋ. Wɩa Dɩŋ-zɔmʋŋ nɛ hɛ pʋ.

¹⁹ Josɛf fa ŋaa nɩpʋla nɛ. Ʋ fa bɩ chɛ dɩ ʋ hɩɩsɛ Mɛɛrɩ nɩaa tʋɔŋ. Ŋɩɩ nɛ ʋ kɛŋ ʋ tʋɔŋ lɛ dɩ ʋ vɩaʋ.

²⁰ Ʋ fa sɩɩ bɩɩnɛ ŋɩɩ, Wɩa tɩndaara kɔ ʋ teeŋ arɩ duosoo tʋɔŋ a bʋla pʋ, “Josɛf, Devit doho nʋʋ, sɩ́ leŋe dɩ fawʋllʋŋ kɛnɩŋ ŋ sɩɩ chɛ dɩ ŋ jaa Mɛɛrɩ, bɛɛ wɩaa luoru-la ʋ sɩ kɛnɛ ŋaa Wɩa Dɩŋ-zɔmʋŋ nɛ hɛ pʋ.

²¹ Ʋ jaŋ lʋl baal, ŋ jaŋ hɛ ʋ yɩrɩŋ Yesu, bɛɛ wɩaa ʋ nɛ jaŋ laa ʋ nɩaa wʋbɔŋŋɔɔ ta.”

²² Wɩɩŋ deeŋ kala ŋaa dɩ wɩalɩŋ La Tɩɩna Wɩa fa sɩ bʋla kʋ ŋaa wʋtɩtɩɩ nɛ, ʋ fa to ʋ wʋlaabʋllaa lɛ nɛ a bʋl ŋɩɩ.

²³ Wɩalɩŋ ʋ fa sɩ bʋla nɛ ŋ-la: “Hatolo kʋbala ha sɩ bɩ baal jɩŋ jaŋ kɛŋ luoruŋ a lʋl hambolibie. Ba jaŋ hɛ ʋ yɩrɩŋ Ɩmanʋɛl.” (Ʋ yɩrɩ-la bʋbʋɔŋ nɛ Wɩa hɛ la teeŋ.)

²⁴ Josɛf sɩ sii doŋ lɛ, ʋ ŋaa ŋɩɩ Wɩa tɩndaarʋ-la sɩ bʋla pʋ a jaa Mɛɛrɩ.

²⁵ Ʋ sɩ jaaʋ ŋɩɩ, ʋ dɩ ʋ bɩ dɔŋɔ jɩŋ, ka ʋ lʋl ʋ hatol-bie. Ŋɩɩ nɛ Josɛf hɛ ʋ yɩrɩŋ Yesu.