MALAKAƖ 2 - WƖA TENIŊ

Wɩalɩŋ ba sɩ bʋla kpʋrɩsɛ Wɩɩsʋllɩ sɩpaalaaraa dɩgɩlaa

¹ “Mɩ-na, ma TƖƖNA doluŋ kala Tɩɩna kɛŋ wɩɩ nɛ dɩ mɩ bʋla pɩ ma Wɩɩsʋllɩ sɩpaalaaraa.

² Dɩ ma nɛ bɩ jegile nɩɩ, a bɩ ma tʋɔŋ kɛnɛ dɩ ma zilmi, mɩ jaŋ joŋ ŋmɩaŋ hɛ ma lɛ a kɛŋ wʋzɔmɔ-la mɩ fa sɩ ŋaa pɩma kaa bɩrɩmɛ ŋmɩaŋ, dɩ ʋ dii ma kala. Wʋtɩtɩɩ, mɩ paala daŋa ŋmɩɛsa hɛ ma lɛ nɛ, bɛɛ wɩaa ma bɩ ma tʋɔŋ kɛnɛ dɩ ma zilmi.

³ Mɩ jaŋ dɔgɩsɛ ma doho nɩaa aŋ kɛŋ ma Wɩɩsʋlʋŋ pʋsʋŋ bɩnɩŋ taarɛ ma sɩaa, aŋ yigima ta.

⁴ Mɩ-na ma TƖƖNA doluŋ kala Tɩɩna nɛ bʋl wɩaa deemba pɩpɩma, dɩ nii-la sɩ hɛ mɩ dɩ ma naabalɩma Levi pɛgɛ ha wuo chɩŋ.

⁵ Nii-la mɩ sɩ hɛ mɩ dɩ Levi doho nɩaa pɛgɛ, mɩ bʋla pɩba arɩ ba jaŋ kɛŋ mɩɩsɩŋ arɩ fɩɛlɩŋ nɛ, a sɛnɛ ŋaa ŋɩɩ pɩba. Ba ma sɛɩ a to wɩalɩŋ a zizilmi.

⁶ Ba to wʋtɩtɩɩ nɛ a bɩ wɩaa nyɩɛ, a dagɛ nɩ-daŋ ba bɩrɩma lɩɩ ba wʋbɔŋŋɔɔ lɛ. Ba to mɩ nɛ a ŋaa wɩaa ba bʋa lɛ.

⁷ Ma Wɩɩsʋllɩ sɩpaalaaraa nɛ maga dɩ ma dagɛ nɩaa dɩ ba jɩŋ mɩ wɩaa. Nɩaa maga dɩ ba kɔ ma teeŋ nɛ a gʋnnɛ wɩalɩŋ mɩ sɩɩ chɛ dɩ ba jɩŋ, bɛɛ wɩaa ma nɛ ŋaa mɩ-na ma TƖƖNA doluŋ kala Tɩɩna tɩndaaraa.

⁸ Ama lɛɛlɛ, ma vɩa wɩalɩŋ ta nɛ, ma wʋdagaa mɩɩra leŋ nɩ-daŋ nɛ ŋaa wʋbɔŋ wɩaa. Ma chei nii-la sɩ hɛ mɩ dɩ ma naabalɩma Levi pɛgɛ nɛ. Mɩ-na ma TƖƖNA doluŋ kala Tɩɩna nɛ bʋla.

⁹ Ŋɩɩ nɛ tɩɩ mɩ leŋ nʋʋkala hɩhɛ ma hɩɩsɩŋ a bɩ ma kaa tɩtɩŋ, bɛɛ wɩaa ma vɩa dɩ ma to mɩ wombiee nɛ aŋ dii sarɩya a laa pɩpɛ ma nɩchooloo lɛ.”

Juda nɩaa bɩ La TƖƖNA to arɩ wʋtɩtɩɩ

¹⁰ Ma bɩ jɩŋ arɩ la kala nyɩmma ŋaa kʋbala nɛɛ? Wɩɩ-bala-la nɛ ta la kala. Bɛɛ nɛ saa tɩɩ la gʋgʋrɛ dɔŋɔ a chichei nii-la sɩ hɛ Wɩa arɩ la naabalɩmaba pɛgɛ?

¹¹ Juda nɩaa bɩ wʋtɩtɩɩ joŋo to La TƖƖNA. Ba ŋaa wʋbɔŋŋɔɔ Jerusalɛm arɩ Iziral tinteeŋ lɛ nɛ. Juda tinteeŋ nɩaa ŋaa disiniŋ hɛ Wɩa dɩa-la ʋ sɩ cho lɛ nɛ. Ba baalaa jaa haalaa sɩ lɩɩ tintee-wogusuŋ nɛ a kpʋkpaarɛ vesiŋ.

¹² A leŋ dɩ La TƖƖNA Wɩa lɩɩsɛ nɩalɩŋ sɩ ŋaa wɩɩŋ deeŋ Iziral tinteeŋ lɛ ta, a sɩ́ leŋe dɩ ba pɛ kɛŋ kɩalɩŋ la tinteeŋ nɩaa sɩ yie kaa kʋ ŋaa Wɩɩsʋlʋŋ pɩ La TƖƖNA doluŋ kala Tɩɩna.

¹³ Wɩɩ-la dɔŋɔ ma sɩ ŋaa nɛ ŋ-la: Ma yie yel sɩlɩɩrɩŋ su La TƖƖNA koruŋ nɛ, a chaasa yiyel a ŋmuŋmoo niiŋ a tɩŋ ʋ bɩra sɩ bɩ ma Wɩɩsʋlʋŋ ka laa wɩaa.

¹⁴ Ma yie pɩɛsɛ, “Bɛɛ nɛ tɩɩ ʋ bɩ la Wɩɩsʋlʋŋ ka laa?” Wɩɩ-la sɩ tɩɩ nɛ ŋ-la: La TƖƖNA na arɩ ma kʋŋkala bɩ tɛŋɛ joŋo tuto ŋ bapʋɔsɛ haala lɛ. Ma fa hɛ niiŋ ma TƖƖNA sɩpaaŋ arɩ ma dɩ ba nɛ jaŋ hɛ nɩmɛ, ama lɛɛlɛ ma chei nii-la nɛ.

¹⁵ La TƖƖNA ŋaa haala arɩ ʋ bala ba kala ŋaa kʋbala nɛ ba wɩɩwɩɩ kala lɛ. Bɛɛ nɛ tɩɩ ʋ ŋaa wɩɩŋ deeŋ? Ʋ ŋaa ŋɩɩ dɩ ma wuo lʋl hambiisiŋ sɩ jaŋ tuto Wɩa nɛ. Má kɛŋ ma tɩtɩa woruŋ a pʋpɔ ma sɩ́ nii-la ma kʋŋkala sɩ hɛ pɩ ŋ bapʋɔsɛ haala chei.

¹⁶ La TƖƖNA Iziral tɩŋŋaa Wɩa sɩ, “Mɩ-na ma TƖƖNA doluŋ kala Tɩɩna bɛrɛ haalaa vɩanɩŋ nɛ. Mɩ bɛrɛ nʋʋ na-kala sɩ kɛŋ tʋɔbɔmʋŋ ʋ haala teeŋ a vɩaʋ nɛ. Má kɛŋ ma tɩtɩa woruŋ a pʋpɔ ma sɩ́ nii-la sɩ hɛ ma dɩ ma haalaa pɛgɛ chei.”

Sarɩya tapʋlʋŋ

¹⁷ Ma wʋbʋlaa leŋe La TƖƖNA lɔl nɛ. Ama ma yie pɩɛsɛ, “Ɛɛ nɛ la ŋaa leŋ La TƖƖNA lɔl?” A tɩŋ ma sɩ yie bʋl, “Nɩalɩŋ kala sɩɩ ŋaa wʋbɔŋŋɔɔ ŋaa nɩzɔmɔ nɛ La TƖƖNA teeŋ. Ʋ tʋɔŋ ka tɔrɛ ba nyuŋ nɛ.” Koo ma pɩɛsɛ, “Nɩɩ nɛ Wɩa sɩ kɛŋ wʋtɩtɩɩ hɛ?”