Maak 8 - WƖA TENIŊ

Yesu pɩ nɩaa bʋɩ banɛsɛ kʋdiilee

¹ Tapʋlɩɩ kʋbala lɛ nɩ-daŋ bɩra kʋ hilimi, a bɩ kʋdiilee kɛnɛ dɩ ba dii. Ŋɩɩ nɛ Yesu yɩrɛ ʋ harɩ-tooroo a bʋla pɩba,

² “Mɩ beŋ nɩaa deemba nenige kɛmmɛ nɛ. Ba hɛ mɩ teeŋ tapʋlaa batori nɛ ŋ-la, ba bɩ kʋdiilee na dɩ ba dii.

³ Dɩ ba nɛ bɩ kʋŋ die, ka dɩ mɩ bʋl dɩ ba viiri, ba jaŋ mʋ yiegi wombiiŋ lɛ, bɛɛ wɩaa ba dɔnsʋŋ lɩɩ dɩ-bolii nɛ.”

⁴ Ŋɩɩ nɛ ʋ harɩ-tooroo pɩɛsʋ, “Ɛɛ nɛ ŋ jaŋ ŋaa a na kʋdiilee dɩ nɩaa deemba kala dii gɩrɩŋ deeŋ tʋɔŋ?”

⁵ Yesu pɩɛsɛba, “Boroboroba baŋmɛɛ nɛ hɛ nɩmɛ?” Ba sɩ, “Kɩaa balɩpɛ nɛ.”

⁶ Ŋɩɩ nɛ ʋ ŋaa nɩalɩŋ tuu hɔŋ tinteeŋ. Ka ʋ joŋ boroboroba-la balɩpɛ a lɔllɛ Wɩa, aŋ kaa chɔgɛ chɔgɛ, a pɩ ʋ harɩ-tooroo dɩ ba laa kpaa nɩalɩŋ. Ba laa kpaaba.

⁷ Dɩ ba kɛŋ chenfil-biisiŋ ma mʋa. Ʋ joŋ ba ma a lɔllɛ Wɩa aŋ ŋaa ʋ harɩ-tooroo laa kpaa nɩalɩŋ.

⁸ Nʋʋkala dii a vɔgɛ. Ka ʋ harɩ-tooroo paa kʋkaaŋ-biisiŋ a su sinsiŋ balɩpɛ.

⁹ Nɩalɩŋ fa sɩ dii kɩalɩŋ, ba yi bʋɩ banɛsɛ.

¹⁰ Ŋɩɩ nɛ ʋ taba aŋ kɛŋ ʋ harɩ-tooroo ba mʋ jʋʋ lɩɩŋ daboro a mʋ Dalimanuuta tinteeŋ.

Farisii tɩŋŋaa ka chɛ dɩ Yesu ŋaa wʋmagɩlɩŋ

¹¹ Ŋɩɩ nɛ Farisii tɩŋŋaa dɔnsʋŋ sii kɔ aa chɛ dɩ ba magɩsɛ Yesu a kʋ kɛŋ wɩaa lɩlɛrɛ a bʋl, “Ŋ sɩ kɛŋ doluŋ, ŋaa wʋmagɩl dɩ la na a jɩŋ arɩ ŋ dol-la lɩɩ Wɩa teeŋ nɛ.”

¹² Yesu tʋɔŋ chei, ʋ faasa wiesi aŋ pɩɛsɛba, “Ma lɛɛlɛ nɩaa deemba, bɛɛ nɛ tɩɩ ma yie chɩchɛ dɩ mɩ dagɛ mɩ doluŋ? Wʋtɩtɩɩ, mɩ bʋlaa pɩma, mɩ bɩ jaŋ ŋaa wʋmagɩl kala dɩ ma lɛɛlɛ nɩaa deemba na.”

¹³ Ŋɩɩ nɛ ʋ lemba aŋ mɩɩra jʋʋ lɩɩŋ daboro a duoro chol mʋga cholo.

Yesu bʋl wɩaa tɩgɛ Farisii tɩŋŋaa arɩ Hɛrɔd lɛ

¹⁴ Yesu arɩ ʋ harɩ-tooroo sɩ duoro chol mʋga cholo ŋɩɩ, ʋ harɩ-tooroo liisi arɩ ba yʋ ba kʋdiilee ta nɛ, aŋ joŋ boroboro kʋbala dʋndʋŋ a hɛ ba lɩɩŋ daboro tʋɔŋ.

¹⁵ Ŋɩɩ nɛ Yesu bʋl arɩ sɩɩfɩɛsɩŋ, “Má pɔ ma tɩtɩa lɛ arɩ Farisii tɩŋŋaa arɩ Hɛrɔd lɛ. Ba nagɛ sɩbʋrʋŋ nɛ, dɩ ŋ joŋo hɛ kʋŋkala lɛ, ʋ yie sii pʋɔrʋ nɛ.”

¹⁶ Ʋ sɩ bʋl ŋɩɩ, ba bʋla pɩpɩ dɔŋɔ, “La sɩ bɩ boroboro kɛnɛ, ŋɩɩ nɛ tɩɩ ʋ bʋl ŋɩɩ.”

¹⁷ Yesu jɩŋ wɩɩ-la ba sɩɩ bʋl a pɩɛsɛba, “Bɛɛ nɛ tɩɩ ma bʋbʋl, ‘La bɩ boroboro kɛnɛ?’ Ma sɩaa ha bɩ naa, koo ma bɩ wɩalɩŋ bʋbʋɔŋ jɩŋ? Ɛɛ nɛ ma tʋɔŋ dol ŋɩɩ?

¹⁸ Ma kɛŋ sɩaa nɛ, ba bɩ naa? Ma kɛŋ dɩgɩlaa nɛ, ba bɩ nɩɩ? Ma bɩ wɩalɩŋ liisee?

¹⁹ Mɩ joŋ boroboroba banɔŋ nɛ a chɔgɔ kpaa baalaa bʋɩ banɔŋ. Ma sɩ paa kʋkaanaa, sinsiŋ baŋmɛɛ nɛ?” Ba sɩ, “Sinsiŋ fii arɩ balɩa.”

²⁰ Ʋ bɩra pɩɛsɛba, “Mɩ sɩ joŋ boroboroba balɩpɛ a chɔgɔ kpaa nɩaa bʋɩ banɛsɛ, ma sɩ paa kʋkaanaa, sinsiŋ baŋmɛɛ nɛ?” Ba sɩ, “Sinsiŋ balɩpɛ.”

²¹ Ŋɩɩ nɛ ʋ pɩɛsɛba, “Ma saa ha bɩ wɩaa deemba bʋbʋɔŋ jɩŋ?”

Yesu vaarɛ nyʋlɩma Bɛtɩsaada lɛ

²² Yesu arɩ ʋ harɩ-tooroo bɩra kʋ yi taŋ kʋbala baa yɩrɛ Bɛtɩsaada. Ŋɩɩ nɛ nɩaa dɔnsʋŋ sii a kɛŋ nyʋlʋŋ kʋbala kɔ a sʋl Yesu dɩ ʋ joŋ ʋ nɩsɩŋ a digu.

²³ Ʋ kɛŋ nyʋlʋŋ-la nɩsɩŋ lɛ a kaa lɩɩ taŋ-la tʋɔŋ a tʋ nantʋɔrʋŋ hɛ ʋ sɩaa lɛ a joŋ ʋ nɩsaa daŋ ʋ lɛ aŋ pɩɛsʋ, “Ŋ na leriŋ nɛɛ?”

²⁴ Ʋ beŋ leriŋ aŋ bʋl, “Mɩɩ na nɩaa nɛ, ama ba nagɛ tɩɩsɩŋ nɛ aa gɔllɛ.”

²⁵ Ŋɩɩ nɛ Yesu bɩra joŋ ʋ nɩsaa daŋ ʋ sɩaa lɛ. Baal-la faasa chaarɛ sɩaa woruŋ, ʋ sɩaa bɩra nɩna ʋ na kʋŋkala woruŋ.

²⁶ Ŋɩɩ nɛ Yesu bʋla pʋ, “Mʋ dɩa, bɩra sɩ́ taŋ tʋɔŋ jʋʋ.”

Pɩɩta sɩ dɩ Yesu nɛ ŋaa Kirisito

²⁷ Yesu arɩ ʋ harɩ-tooroo bɩra sii lee-la a mʋmʋ tabiisi-la sɩ hɛ Sɩzarɩya Fɩlɩpa tinteeŋ. Ba sɩɩ mʋ ŋɩɩ, Yesu pɩɛsɛ ʋ harɩ-tooroo, “Kʋbɛɛ nɛ nɩaa sɩ dɩ mɩ ŋaa?”

²⁸ Ba bʋl, “Dɔnsʋŋ sɩ dɩ ŋ nɛ ŋaa Jɔɔŋ, Wɩa lɩɩ-fooru-la. Dɔnsʋŋ ma sɩ dɩ ŋ nɛ ŋaa Wɩa wʋlaabʋlla Ɩlaaja. Dɔnsʋŋ ma sɩ dɩ ŋ nɛ ŋaa Wɩa wʋlaabʋlla-la fa sɩ hɛ nɩmɛ dɔŋɔ.”

²⁹ Ŋɩɩ nɛ Yesu bɩra pɩɛsɛ ʋ harɩ-tooroo ma a bʋl, “Ka ma ma, ma sɩ mɩ ŋaa kʋbɛɛ nɛ?” Pɩɩta sɩ, “Ŋ nɛ ŋaa Kirisito, nɩɩ-la Wɩa sɩ lɩɩsa.”

³⁰ Pɩɩta sɩ bʋl ŋɩɩ, Yesu bʋla pɩba arɩ sɩɩfɩɛsɩŋ dɩ ba pɔ dɩ ba sɩ́ wɩɩ-la bʋla pɩ nʋʋkala.

Yesu bʋl ʋ sʋʋŋ wɩaa

³¹ Ŋɩɩ nɛ Yesu suomo dɩdagɛ ʋ harɩ-tooro-la, “Mɩ-na, Nuhuobiine Bie jaŋ na hɛɛŋ woruŋ. Nɩhɩasɩŋ arɩ Wɩɩsʋllɩ sɩpaalaaraa kʋhɩasɩŋ arɩ Wɩa teniŋ kerichiba, ba kala jaŋ vɩamɛ aŋ ŋaa dɩ ba kpʋmɛ. Dɩ ba nɛ kpʋmɛ, mɩ jaŋ ŋaa tapʋlaa batori aŋ bɩra sii sʋʋŋ lɛ.”

³² Ʋ chaasa bʋl wɩɩŋ deeŋ nɛ pɩba. Ŋɩɩ nɛ Pɩɩta kɛnʋ kaa sʋʋsa lɩɩ, a kpɩa ʋ lɛ, arɩ ʋ sɩ́ ŋɩɩ bʋl.

³³ Ŋɩɩ nɛ Yesu bɩrɩma beŋ ʋ harɩ-tooroo aŋ kpɩa Pɩɩta lɛ a bʋl, “Sɩtaanɩ, mʋ nɩmɛ. Wɩalɩŋ ŋ sɩɩ bʋl, nuhuobiine wombiiŋ nɛ, Wɩa wombiiŋ dee.”

³⁴ Ŋɩɩ nɛ ʋ yɩrɛ ʋ harɩ-tooroo arɩ nɩalɩŋ kala ba kɔ, ʋ bʋla pɩba, “Dɩ nʋʋkala nɩɩ chɛ dɩ ʋ tomi, see dɩ ʋ vɩa ʋ tɩtɩa wombiiŋ aŋ joŋ ʋ daagɛsɛ baasɛ a tomi.

³⁵ Nɩɩ-la kala sɩɩ chɛ dɩ ʋ laa ʋ mɩɩsɩŋ, ʋ jaŋ vɩa ʋ mɩɩsɩŋ ta. Ama nɩɩ-la sɩ vɩa ʋ mɩɩsɩŋ ta a tɩŋ mɩ wɩaa arɩ Wɩa wʋzɔmɔ-la wɩaa, ʋ jaŋ sɛnɛ laa ʋ mɩɩsɩŋ.

³⁶ Dɩ ŋ nɛ tɩɩ dʋnɩa kala aŋ bɩ mɩɩsɩŋ kɛnɛ, bɛɛ kʋŋ nyʋʋrɩɩ nɛ ŋ na?

³⁷ Dʋnɩa deeŋ lɛ, bɛɛ kʋŋ nɛ saa ŋ jaŋ wuo joŋo lenni ŋ mɩɩsɩŋ?

³⁸ Dɩ nʋʋ nɛ leŋe dɩ hɩɩsɩŋ kɛnʋ a tɩŋ mɩ wɩaa arɩ mɩ wʋbʋlaa wɩaa, ma lɛɛlɛ nɩaa deemba sɩ bɩ Wɩa ka fá a ŋɩŋaa wʋbɔŋŋɔɔ tʋɔŋ, mɩ-na Nuhuobiine Bie ma jaŋ leŋ dɩ hɩɩsɩŋ kɛnʋ dɩ mɩ nɛ kɔ arɩ mɩ nyɩmma tʋla a pɛ ʋ tɩndaaraa sɩ bɩ disiniŋ kɛnɛ lɛ.”