Maak 1 - WƖA TENIŊ

Jɔɔŋ Wɩa lɩɩ-fooru-la bʋl Wɩa wɩaa pɩpɩ nɩaa

¹ Wɩa wʋzɔŋŋɔɔ dɩ-suomuŋ nɛ ŋ-la. Wɩaa deemba ŋaa Wɩa Bie Yesu Kirisito wʋzɔŋŋɔɔ wɩaa nɛ.

² Wɩa wʋlaabʋlla ba sɩɩ yɩrɛ Azaaya fa ŋmʋnsa arɩ Wɩa sɩ, “Mɩ jaŋ tɩŋ mɩ tɩndaara dɩ ʋ laa ŋ sɩpaaŋ mʋ a wasɛ wombiiŋ bil ŋ lɛ.”

³ Ʋ sɩ, “Nʋʋ nɛ chɩŋ tintee-hɩlɩŋ lɛ a heelee bʋl, ‘Má wasɛ wombiiŋ bil La Tɩɩna lɛ. Má pori wombii-la dɩ ʋ tʋʋlɛ woruŋ a pʋ.’ ”

⁴ Ŋɩɩ nɛ baal kʋbala kɔ baa yɩrɛ Jɔɔŋ a fufo nɩaa Wɩɩchʋɔlɛ lɩɩŋ. Ʋ heele bʋl tintee-hɩlɩŋ lɛ, “Má bɩrɩma lɩɩ ma wʋbɔŋŋɔɔ lɛ, ka dɩ mɩ foma Wɩɩchʋɔlɛ lɩɩŋ, dɩ Wɩa joŋ ma wʋbɔŋŋɔɔ chɛma.”

⁵ Ʋ sɩ bʋl ŋɩɩ, Judiya tɩŋŋaa arɩ Jerusalɛm tɩŋŋaa kala lɩɩ a mʋ ʋ teeŋ, a dagɛ ba wʋbɔŋŋɔɔ aŋ tuu Jɔdaŋ fuo-la, ʋ foba Wɩɩchʋɔlɛ lɩɩŋ.

⁶ Bʋntaŋŋa pʋnaa gɛnnɩŋ nɛ Jɔɔŋ fa laalɛ a kɛŋ tembiiŋ vɔɔ ʋ tɩŋa. Ʋ kʋdiilee nɛ fa nyaŋgɩrɩgɛba arɩ tʋʋŋ.

⁷ Ʋ yie bʋl Wɩa wɩaa pɩpɩ nɩaa a bʋl, “Nʋʋ dɔŋ jaŋ to mɩ harɩŋ kɔ. Ʋ nɛ jaŋ faasa kɛŋ doluŋ kɩɩmɛ. Mɩ paala bɩ maga dɩ mɩ kpagʋ a kɛŋ ʋ nɛntɛŋŋɛɛ ŋmɛsɩŋ ma kaa puri.

⁸ Lɩɩŋ dʋndʋŋa nɛ mɩ-na kaa fufoma, ama ʋ-na jaŋ joŋ Wɩa Dɩŋ-zɔmʋŋ hɛ ma lɛ.”

Jɔɔŋ fo Yesu Wɩɩchʋɔlɛ lɩɩŋ

⁹ Bʋa-la lɛ Yesu sii lɩɩ taŋ-la ba sɩɩ yɩrɛ Nazarɛt a hɛ Galilii tinteeŋ lɛ a kɔ Jɔɔŋ teeŋ, ʋ fou Wɩɩchʋɔlɛ lɩɩŋ Jɔdaŋ fuo-la lɛ.

¹⁰ Ʋ sɩ mɩɩra kʋʋ lɩɩ fuo-la tʋɔŋ, ʋ wʋla beŋ dɩ wɩa-nyuŋ guu kpaa balɩa. Ŋɩɩ nɛ Wɩa Dɩŋ-zɔmʋŋ kʋ tuu a nagɛ kokomo a togili ʋ lɛ.

¹¹ Ʋ nɩɩ yikoro dɩ ʋ lɩɩ wɩa-nyuŋ a bʋla pʋ, “Ŋ nɛ mɩ Bii-chooluŋ. Mɩ tʋɔŋ tɔrɛ ŋ nyuŋ.”

Sɩtaanɩ kʋ magɩsɛ Yesu

¹² Ʋ bɩ diene ka Wɩa Dɩŋ-zɔmʋŋ kɛnʋ jʋʋ tintee-hɩlɩŋ.

¹³ Ʋ hɛ nɩmɛ ŋɩɩ halɩɩ tapʋlaa mahɩŋ balɩa, ʋ dɩ baga kɩaa dʋndʋŋa. Sɩtaanɩ yie kɔ a magɩsʋ. Ŋɩɩ nɛ Wɩa tɩndaaraa kʋ pɛ ʋ lɛ.

Yesu yɩrɛ chenfil-kpʋʋraa banɛsɛ

¹⁴ Ba sɩ kɛŋ Jɔɔŋ tɔ dɩa, ʋ ŋɩɩ harɩŋ, Yesu sii a mʋ Galilii tinteeŋ a bʋl Wɩa wʋzɔmɔ-la aa pɩ nɩaa

¹⁵ a bʋl, “Bʋa-la yie nɛ. Wɩa kuorii-la kpaga nɛ. Má bɩrɩma lɩɩ ma wʋbɔŋŋɔɔ lɛ a laa Wɩa wʋzɔmɔ-la dii.”

¹⁶ Yesu fa sɩ joŋ Galilii mʋgʋ-bal-la niiŋ vɩvɛŋ, ʋ na Saamɔŋ arɩ ʋ ŋaana Anduru. Ʋ naba dɩ ba faa yuo jóŋ nɛ, bɛɛ wɩaa ba ŋaa chenfil-kpʋʋraa nɛ.

¹⁷ Ʋ yɩrɛba, “Má kʋ to mɩ harɩŋ, mɩ jaŋ dagɛma ŋɩɩ ma sɩ jaŋ kɩkɛsɛ nɩaa.”

¹⁸ Ba guu sii a leŋ ba jómba ta aŋ to ʋ harɩŋ.

¹⁹ Ʋ joŋ ŋɩɩ baa mʋ, dɩ baalaa balɩa nɛ ŋɩɩ. Baa yɩrɛ Jeems arɩ Jɔɔŋ. Ba fa ŋaa Zebidi biiriŋ nɛ. Ba hɔŋ ba lɩɩŋ daboro lɛ a tʋtɔ ba jómba bʋɔsʋŋ.

²⁰ Ʋ sɩ naba, ʋ yɩrɛba. Ba leŋ ba nyɩmma Zebidi arɩ nɩalɩŋ kala fa sɩ tɩma pɩba ka ba titimba lɩɩŋ daboro-la tʋɔŋ aŋ to ʋ harɩŋ.

Yesu vaarɛ baal kʋbala fa sɩ kɛŋ jɩŋ-bɔmʋŋ

²¹ Ba joŋ ŋɩɩ a mʋmʋ a kʋ yi Kapɛnam. Ŋɩɩ nɛ chɛ-wiesii-la chɛɛŋ, Yesu sii a mʋ jʋʋ Wɩɩchʋɔlɛ dɩa a dɩdagɛ nɩaa.

²² Ʋ sɩɩ dagɛba ŋɩɩ, ʋ ŋaaba wʋkpuŋkpere. Ʋ bɩ baa daga arɩ Wɩa teniŋ kerichiba sɩ yie dɩdagɛba ŋɩɩ. Ʋ bʋl wɩaa arɩ ʋ nɛ kɛŋ wɩɩ-la doluŋ.

²³ Ŋɩɩ nɛ dɩ baal nɛ ŋɩɩ. Jɩŋ-bɔmʋŋ kɛnʋ. Ʋ kʋ jʋʋ aa ŋmoo niiŋ,

²⁴ “Yesu sɩ lɩɩ Nazarɛt, bɛɛ nɛ ŋ chɩchɛ ŋ ŋaa la lɛ? Ŋ kɔ dɩ ŋ kpʋla nɛɛ? Mɩ jɩmɩŋ nɛ, ŋ nɛ ŋaa Wɩa tʋɔpʋl Tɩɩna.”

²⁵ Yesu kpɩa jɩŋ-bɔŋ-la lɛ, “Kɛŋ goŋ aŋ kʋ lɩɩ baal-la lɛ.”

²⁶ Jɩŋ-bɔŋ-la kɛŋ baal-la terigi aŋ faasa chɩɩrɛ kɩŋkɛŋ aŋ lɩɩ ʋ lɛ.

²⁷ Nɩalɩŋ kala mɩɩra hirigi a pɩpɩɛsɛ dɔŋɔ, “Bɛɛ nɛ ŋ-la? Wʋfalɩɩ nɛ ʋʋ dagɛ. Ʋ paala kɛŋ doluŋ a wuo jɩŋ-bɔŋŋɔɔ a bʋl wɩaa pɩba, ba tuto ʋ niiŋ.”

²⁸ Ŋɩɩ lɛ nɛ, ʋ wɩaa guu teeli Galilii tinteeŋ kala.

Yesu vaarɛ nɩaa yʋgɛ

²⁹ Ŋɩɩ nɛ Yesu sii a lɩɩ Wɩɩchʋɔlɛ dɩa-la lɛ, ʋ dɩ Jeems arɩ Jɔɔŋ, a mʋ Saamɔŋ arɩ Anduru dɩa.

³⁰ Ba mʋa dɩ Saamɔŋ hɩɩlɩ-haala pɩna a wʋwɩɩlɛ, ʋ yaraa kala lɩŋ. Yesu sɩ kɔ ŋɩɩ, ba bʋla pʋ.

³¹ Ŋɩɩ nɛ ʋ kʋ jʋʋ a kɛŋ haal-la nɩsɩŋ lɛ a kaa chʋʋlɛ. Ʋ yaraa fa sɩ lɩma ŋɩɩ, ʋ fɩɛlɛ. Ʋ sii ŋaa kʋdiilee pɩba.

³² Ʋ dɩdaanɩŋ sɩ yie, ba kɛŋ nɩalɩŋ kala sɩɩ wɩɩlʋ arɩ jɩŋ-bɔŋŋɔɔ sɩ kɛŋ nɩalɩŋ kala a kaa kɔ Yesu teeŋ.

³³ Kapɛnam nɩaa kala gire kɔ a hilimi Saamɔŋ dɩa boiŋ niiŋ.

³⁴ Yesu vaarɛ nɩaa sɩ kɛŋ nyanyal dosunuŋ a yʋgɛ, a kiri jɩŋ-bɔŋŋɔɔ ma yʋgɛ nɩaa lɛ. Jɩŋ-bɔmɔ-la jɩŋ Yesu nɛ, ŋɩɩ nɛ tɩɩ ʋ bɩ ba wombiiŋ pa dɩ ba bʋl wɩaa.

Yesu bʋl Wɩa wɩaa Galilii tinteeŋ lɛ

³⁵ Chʋchʋɔ-fɩɛla, Yesu sii lɩɩ dɩa-la lɛ a mʋ lee-la nɩaa sɩ tuo a chʋchʋɔlɛ Wɩa.

³⁶ Ka Saamɔŋ arɩ ʋ dɔnsʋ-la ma sii lɩɩ chɩchɛʋ.

³⁷ Ba sɩ naʋ, ba bʋla pʋ, “Nʋʋkala nɩɩ chɛŋ.”

³⁸ Ŋɩɩ nɛ Yesu bʋla pɩba, “Má leŋ dɩ la mʋ tasɩŋ dɔnsʋŋ ma dɩ mɩ bʋl Wɩa wɩaa nɩmɛ. Ŋɩɩ wɩaa nɛ mɩ kɔ.”

³⁹ Ʋ sii a mʋ gɔllɛ Galilii tinteeŋ kala a jʋʋ Wɩɩchʋɔlɛ dɩɩsɩŋ aa bʋl Wɩa wɩaa aŋ pɛ kikiri jɩŋ-bɔŋŋɔɔ ma nɩaa lɛ.

Yesu vaarɛ gbege

⁴⁰ Ŋɩɩ nɛ gbege kʋbala ma kɔ Yesu teeŋ a tuu kpirimi a sʋlʋ, “Dɩ ŋ nɛ cho, ŋaa dɩ mɩ duori.”

⁴¹ Nisusuŋ kɛŋ Yesu. Ʋ lɩɩsɛ ʋ nɩsɩŋ a digu aŋ bʋl, “Mɩ cho nɛ, duori.”

⁴² Ŋɩɩ nɛ yawɩɩl-la guu lɩɩ baal-la lɛ, ka ʋ duori.

⁴³ Ŋɩɩ nɛ Yesu bʋla pʋ arɩ sɩɩfɩɛsɩŋ a bʋl,

⁴⁴ “Viiri aŋ sɩ́ wɩɩ bʋla pɩ nʋʋkala. Ama kɛŋ ŋ tɩtɩa mʋ dagɛ Wɩɩsʋllɩ sɩpaalaara, aŋ joŋ ŋ Wɩɩsʋlʋŋ kɩaa pʋ dɩ ʋ kpʋ a pɩɩsɛ ŋ disiniŋ ta arɩ Mosis fa sɩ dagɛma ŋɩɩ. Dɩ ŋ nɛ ŋaa ŋɩɩ, nɩaa jaŋ na arɩ ŋ bɩra bɩ disiniŋ kɛnɛ.”

⁴⁵ Ama baal-la kɛŋ wɩɩ-la kaa lɩɩ a bʋla gaarɛ leriŋ kala. Ŋɩɩ nɛ Yesu bɩra bɩ wuo chaasa jʋʋ taŋ kala tʋɔŋ, ama ʋ yie mʋ hɔŋ pɔkɔŋ nyuŋ, ka nɩaa lɩɩ lee na-kala a kʋkɔ ʋ teeŋ.