Luuk 21 - WƖA TENIŊ

Yo-haala joŋ kɩaa pɩ Wɩa

¹ Bʋa kʋbala Yesu hɛ Wɩa dɩɩ-bal-la lɛ a na nɩalɩŋ sɩ kɛŋ kɩaa sɩ joŋ ba moribiee bil a pɩpɩ Wɩa.

² Ŋɩɩ nɛ ʋ bɩra na yo-haal ma sɩ joŋ amiisimba balɩa a ma hɛ.

³ Ŋɩɩ nɛ ʋ bʋla pɩ nɩalɩŋ, “Wʋtɩtɩɩ nɛ mɩ bʋlaa pɩma, yo-haala deeŋ moribii-bie-la ʋ sɩ joŋo hɛ, ʋ nɛ kɩɩ nɩalɩŋ moribie-la kala.

⁴ Nɩalɩŋ kala sɩ joŋ moribiee a pɩ Wɩa, ba lɩɩsa aŋ ka nɛ. Aŋ ka ʋ-na joŋ ʋ summu moribiiŋ kala a hɛ, kʋ-la kala ʋ sɩ kɛnɛ nɛ ŋɩɩ.”

Yesu bʋl ŋɩɩ Wɩa dɩɩ-bal-la sɩ jaŋ tel

⁵ Ŋɩɩ nɛ Yesu harɩ-tooroo dɔnsʋŋ bʋl wɩaa a tɩgɛ Wɩa dɩɩ-bal-la lɛ arɩ ʋ zɔmɔ, tie-bie-la ba sɩ kaa saaʋ ma zɔŋ, a bɩra bʋl ŋɩɩ nɩaa sɩ joŋ kʋzɔŋŋɔɔ a pɩ Wɩa ba kaa wasɛ dɩa-la, ba kala nɛ ŋaa dɩa-la zɔŋ ŋɩɩ. Ŋɩɩ nɛ Yesu bʋl,

⁶ “Bʋa kʋbala jaŋ yi, ba jaŋ ŋmoo kɩaa deemba kala ma sɩɩ na a lo. Ba bɩ jaŋ leŋ dɩ tie-bii-bala ma daŋ ʋ dɔŋɔ lɛ.”

Yesu bʋl ŋɩɩ ba sɩ jaŋ dɔgɩsɛ nɩalɩŋ sɩɩ tou

⁷ Ŋɩɩ nɛ ba pɩɛsɛ Yesu, “La kʋhɩaŋ, bʋa bɛɛ lɛ nɛ wɩaa deemba jaŋ ŋaa? Wʋbɛɛba nɛ la jaŋ na, ka dɩ wɩaa deemba-na ŋaa?”

⁸ Ŋɩɩ nɛ Yesu bʋla pɩba, “Má kɛŋ ma tɩtɩa woruŋ dɩ nʋʋkala sɩ́ ma nyɩsʋ,” a bɩra bʋl, “Nɩaa jaŋ yʋgɛ a kɔ a joŋ mɩ yɩrɩŋ hɛ arɩ ba nɛ ŋaa Kirisito, a bʋl dɩ bʋa-la dʋnɩa sɩ jaŋ dɛrɛ kpaga nɛ. Ama má sɩ́ ba harɩŋ to.

⁹ Ma jaŋ nɩɩ arɩ laalɩŋ arɩ yuosuŋ hɛ daha a hɛ dɩ-boloo ma. Dɩ ma nɛ kʋ nɩɩ ŋɩɩ, má sɩ́ leŋe dɩ ma bɔɩsɩŋ joŋ. Wɩaa deemba kala jaŋ ŋaa bal, ama ʋ ŋɩɩ saa bɩ naga arɩ dʋnɩa dɩdɛrɩŋ yie nɛ.”

¹⁰ Ŋɩɩ nɛ Yesu bɩra bʋl, “Tinteeŋ dɔŋɔ nɩaa jaŋ sii a mʋ yuo tinteeŋ dɔŋɔ nɩaa. Taŋ kuoro arɩ ʋ nɩaa jaŋ sii gire mʋ yuo kuoro dɔŋɔ arɩ ʋ nɩaa.

¹¹ Tinteeŋ jaŋ zigili woruŋ, losuŋ ma jaŋ jʋʋ, nyanyalaa jaŋ jʋʋ nɩaa leree yʋgɛ, wʋbal-lɔrʋnʋŋ arɩ wʋmagɩlaa kala jaŋ ŋaa wɩa-nyuŋ.

¹² Ka dɩ wɩaa deemba kala-na ŋaa, ba jaŋ kɛsɛma a to naasɩŋ dɔgɩsɛma. Ba jaŋ jomma hɛ nɩaa nɩsɩŋ lɛ dɩ ba dii ma sarɩya Wɩɩchʋɔlɛ dɩɩsɩŋ lɛ a kɛmma tɔ dɩa. Ba jaŋ kɛmma kaa mʋ kuoroo arɩ nɩbalaa sɩpaaŋ a tɩŋ mɩ wɩaa.

¹³ Bʋa deeŋ lɛ nɛ ma jaŋ wuo na wombiiŋ a bʋl Wɩa wʋzɔmɔ-la.

¹⁴ Má kɛŋ ma tɩtɩa hɛ dɔŋɔ lɛ a sɩ́ leŋe dɩ ʋ walɩmɛma ŋɩɩ ma sɩ jaŋ bʋl wɩaa a laa ma tɩtɩa,

¹⁵ bɛɛ wɩaa mɩ jaŋ joŋ wʋjɩmɩŋ a hɛ ma nyuŋ lɛ dɩ ma bʋl wɩalɩŋ ma dʋndɔŋŋɔɔ sɩ bɩ jaŋ wuo kaalɛrɛ arɩ wʋtɩtɩɩ dee.

¹⁶ Ma nyɩmmaba arɩ ma naambiiriŋ arɩ ma doho nɩaa arɩ ma nandɔnsʋŋ paala jaŋ jomma hɛ ma dʋndɔŋŋɔɔ nɩsɩŋ lɛ. Ba jaŋ kpʋ ma dɔnsʋŋ.

¹⁷ Nʋʋkala jaŋ bɛrɛma a tɩŋ mɩ wɩaa.

¹⁸ Ama ma kʋŋ nyu-pʋŋ ma bɩ jaŋ lɛl.

¹⁹ Dɩ ma nɛ nyalɩma, ma jaŋ laa ma mɩɩsɩŋ.”

Yesu bʋla arɩ ba jaŋ ŋmoo Jerusalɛm lo

²⁰ Ŋɩɩ nɛ Yesu bɩra bʋl, “Dɩ ma nɛ na dɩ laalɩyuoroo golli Jerusalɛm, ma jaŋ jɩŋ arɩ taŋ-la jaŋ tel lɛɛlɛ.

²¹ Ŋɩɩ-na má leŋ dɩ nɩalɩŋ sɩ hɛ Judiya lɛ fá mʋ jɩl peelee nyuŋ. Nɩalɩŋ ma sɩ hɛ tabal-la tʋɔŋ, ʋ maga dɩ ba lɩɩ taŋ-la tʋɔŋ. Nɩalɩŋ ma sɩ hɛ ba bagɩsɩŋ lɛ, má sɩ́ mɩɩra jʋʋ tabal-la tʋɔŋ.

²² Tapʋlɩɩ-la Wɩa jaŋ dɔgɩsɛ Iziral nɩaa, a leŋ dɩ wɩalɩŋ kala ba sɩ bʋla Wɩa teniŋ tʋɔŋ sɛnɛ kʋ ŋaa.

²³ Haala-la sɩ kɛŋ luoroo arɩ haala-la sɩ kɛŋ bii-mulluŋ baa wasɛ yɩlɩŋ, tapʋlɩa-la lɛ ba jaŋ na hɛɛŋ. Hɛɛŋ jaŋ jʋʋ tinteeŋ deeŋ woruŋ. Wɩa jaŋ na baanɩŋ tinteeŋ deeŋ nɩaa nyuŋ a dɔgɩsɛba.

²⁴ Ba jaŋ kpʋ dɔnsʋŋ arɩ tokobiee, aŋ kɛsɛ dɔnsʋŋ dɩ ba ma ŋaa yosuŋ tinteyee-dɔnsʋŋ lɛ, ka nɩalɩŋ sɩ bɩ Juu tɩŋŋaa ŋaa fɩrɩgɛ Jerusalɛm taŋ-la kala, see bʋa-la Wɩa sɩ daga yie.”

Yesu bʋla pɩ nɩaa dɩ ʋ jaŋ mɩɩra kɔ

²⁵ Ŋɩɩ nɛ Yesu bɩra bʋl, “Nɩaa jaŋ na wʋmagɩlaa wɩɩpɔsʋŋ arɩ chɛnɛ arɩ chɛnwʋlaa lɛ. Dʋnɩa kala lɛ, nɩaa bɩ jaŋ jɩŋ wɩɩ-la kala lɛ ba sɩ hɛ. Dɩ mʋgʋ-balaa nɩɩ huuru, fawʋllʋŋ jaŋ kɛmba.

²⁶ Fawʋllʋŋ jaŋ kɛŋ nɩaa dɩ ba yeŋŋi a tɩŋ ba sɩɩ yɩɛlɛ wɩɩ-la sɩ jaŋ ŋaa dʋnɩa kala lɛ. Ba jaŋ kiri wɩa-nyuŋ kɩalɩŋ kala sɩ kɛŋ doluŋ dɩ ba lɩɩ ba leree.

²⁷ Ŋɩɩ lɛ nɛ ma jaŋ na mɩ-na Nuhuobiine Bie dɩ mɩ to duoŋ-bɩlɩmbaanɩŋ tʋɔŋ kʋʋ tuu. Mɩ jaŋ kɛŋ doluŋ a chaanɛ kɩŋkɛŋ.

²⁸ Dɩ wɩaa deemba nɛ suomo a ŋɩŋaa, má sii chɩŋ a kɛŋ ma dɩgɩlaa wuoli, bɛɛ wɩaa bʋa-la lɛ Wɩa sɩ jaŋ laama ta yie nɛ.”

Yesu bʋl tutogo wɩaa

²⁹ Ŋɩɩ nɛ Yesu magɛ namaga pɩba a bʋl, “Má bee na tutogo arɩ tɩɩsɩŋ dɔnsʋŋ.

³⁰ Dɩ ma nɛ na tɩɩsɩŋ dɩ ba suomo tʋtɔsɛ, ma jɩma yibiiniŋ kpagɛ jʋʋnʋŋ nɛ.

³¹ Ŋɩɩ tɩtɩa nɛ, dɩ ma nɛ na wɩaa deemba kala mɩ sɩɩ dagɛma dɩ baa ŋaa, ma jɩŋ arɩ Wɩa kuorii-la kpaga nɛ.

³² Wʋtɩtɩɩ nɛ mɩ bʋlaa pɩma, ma lɛɛlɛ nɩaa deemba sɩ hɛ ma mɩɩsɩŋ lɛ, ma bɩ jaŋ sʋʋ, ka wɩaa deemba ŋaa bal.

³³ Wɩa-nyuŋ arɩ tinteeŋ kala jaŋ dɛrɛ, ama wɩalɩŋ mɩ sɩ bʋla bɩ jaŋ lɛl.

³⁴ Má kɛŋ ma tɩtɩa, a sɩ́ wʋtɔɔnʋŋ ŋɩŋaa, a sɩ́ sɩnɩŋ nyʋa bubugi. Má sɩ́ leŋe dɩ dʋnɩa kɩaa wɩaa walɩmɛma. Dɩ wɩaa deemba nɩɩ walɩmɛma, tapʋlɩɩ-la mɩ-na Nuhuobiine Bie sɩ jaŋ kɔ, mɩ jaŋ guu kʋ dɩ-ma lɛ a nagɛ ba sɩ hɛ bɛrɛ́, kɩaa vɛnɛ mʋ jʋʋ aŋ bɩ jɩŋ ŋɩɩ.

³⁵ Tapʋlɩɩ-la jaŋ kɛŋ dʋnɩa nʋʋkala lee-kala lɛ.

³⁶ Má pɔ a chʋchʋɔlɛ Wɩa bʋa na-kala lɛ. Dɩ ma nɛ ŋaa ŋɩɩ, ma jaŋ kɛŋ doluŋ a lɩɩ wɩalɩŋ kala sɩ jaŋ ŋaa lɛ arɩ yarɩfɩɛlaa a wuo chɩŋ mɩ-na Nuhuobiine Bie sɩpaaŋ.”

³⁷ Yesu fa yie hɛ Wɩa dɩɩ-bal-la lɛ wɩɩhɛyɛ arɩ chʋchʋɔŋ kala nɛ a dɩdagɛ nɩaa. Dɩ dɩdaanɩŋ nɛ yie-na kala, ʋ yie mʋ Olif peel-la nyuŋ nɛ a pɩŋ.

³⁸ Chʋchʋɔ-fɩɛla-na kala saa nɩaa yie mʋ Wɩa dɩɩ-bal-la dɩ ba jegile nɩɩ wɩalɩŋ ʋ sɩɩ bʋl.