Luuk 20 - WƖA TENIŊ

Farisii tɩŋŋaa pɩɛsɛ Yesu ʋ doluŋ wɩaa

¹ Tapʋlɩɩ kʋbala Yesu dɩdagɛ nɩaa Wɩa dɩɩ-bal-la lɛ a bʋbʋl Wɩa wʋzɔmɔ-la wɩaa. Ŋɩɩ nɛ Wɩɩsʋllɩ sɩpaalaaraa kʋhɩasɩŋ arɩ Wɩa teniŋ kerichiba arɩ Juu tɩŋŋaa kʋhɩasɩŋ sii kɔ ʋ teeŋ,

² a pɩɛsʋ, “Dol bɛɛ nɛ ŋ kɛŋ a ŋɩŋaa wɩaa deemba? Kʋbɛɛ nɛ pɩŋ doluŋ ŋ ŋɩŋaa ŋɩɩ?”

³ Ŋɩɩ nɛ Yesu bʋla pɩba, “Mɩ ma jaŋ pɩɛsɛma wɩɩ, dɩ ma dagɛmɛ ʋ bʋbʋɔŋ.

⁴ Jɔɔŋ, nɩɩ-la fa sɩɩ fo nɩaa Wɩɩchʋɔlɛ lɩɩŋ, ʋ doluŋ lɩɩ Wɩa teeŋ nɛ koo nuhuobiine teeŋ nɛɛ?”

⁵ Ŋɩɩ nɛ ba suomo kɛŋ wɩɩ-la chʋchɔgɩsɛ ba tɩtɩa lɛ a bʋl, “Wʋbɛɛ nɛ laa chɛ dɩ la bʋl? Dɩ la nɛ bʋla pʋ dɩ Wɩa teeŋ nɛ ʋ lɩɩ, ʋ jaŋ pɩɛsɛla, ‘Bɛɛ nɛ saa tɩɩ ma bɩ ʋ wɩaa laa dii?’

⁶ Dɩ la nɛ bɩra sɩ nuhuobiine teeŋ nɛ, nɩ-daŋ-la kala sɩ hilimi daha jaŋ yagɛla arɩ tabɩaa, bɛɛ wɩaa ba sɛyɛ arɩ Jɔɔŋ fa ŋaa Wɩa wʋlaabʋllʋ nɛ.”

⁷ Ŋɩɩ nɛ ba bʋla pʋ, “La bɩ jɩŋ ʋ dol-la sɩ lɩɩ lee-la.”

⁸ Yesu ma bʋla pɩba, “Tɔɔ, mɩ ma bɩ jaŋ dagɛma dol-la mɩ sɩ kɛnɛ a ŋɩŋaa wɩaa deemba bʋbʋɔŋ.”

Yesu magɛ namaga a tɩgɛ tɩntɩnnaa sɩ hɛ baga lɛ

⁹ Ŋɩɩ nɛ Yesu magɛ namaga deeŋ a pɩ nɩalɩŋ, “Baal kʋbala nɛ fa hɛ nɩmɛ a bil baga a chɔnsɛ girep tɩɩsɩŋ. Ŋɩɩ nɛ ʋ paa nɩaa hɛ baga-la lɛ dɩ ba bibeŋ, aŋ sii mʋ tintee dɔŋ a dieni nɩmɛ.

¹⁰ Girep nɛnɛ-la tɔrʋŋ sɩ yie, ʋ tɩŋ ʋ tɩntɩnnaa dɔŋɔ dɩ ʋ mʋ nɩalɩŋ sɩɩ beŋ baga teeŋ a laa tɩɩnɛnɛ-la dɔnsʋŋ kaa kɔ. Ʋ mʋ ba kɛnʋ a ŋmobu aŋ kiru, ʋ mɩɩra kɛŋ na-hɩllɩŋ a kaa mʋ baga tɩɩna teeŋ.

¹¹ Ŋɩɩ nɛ ʋ bɩra tɩŋ ʋ tɩntɩnna-la dɔŋɔ ma. Ʋ ma bɩra mʋ. Nɩalɩŋ ŋmoo ʋ ma aŋ hɩɩsʋ aŋ kiru ta, ʋ mɩɩrɛ arɩ nahɩllɩŋ.

¹² Ŋɩɩ nɛ ʋ bɩra tɩŋ nɩ-tori. Nɩalɩŋ pɩrɛ ʋ ma aŋ kiru ta.

¹³ Ŋɩɩ nɛ baga-la tɩɩna bʋl, ‘Wʋbɛɛ nɛ mɩ jaŋ ŋaa? Mɩ jaŋ tɩŋ mɩ bii-chooluŋ. Ŋ bɩ pɔ, ba jaŋ zilu.’ Ŋɩɩ nɛ ʋ tɩŋ bile ʋ mʋ.

¹⁴ Nɩalɩŋ sɩɩ beŋ baga sɩ naʋ dɩ ʋʋ kɔ, ŋɩɩ nɛ ba bʋla pɩ dɔŋɔ, ‘Baga-la tɩɩna nanʋala nɛ ŋɩɩ. Dɩ baga-la tɩɩna nɛ sʋba, ʋ nanʋala deeŋ nɛ jaŋ dii ʋ dʋa. Má leŋ dɩ la kpʋʋ, ka dɩ baga-la ŋaa la kʋŋ.’

¹⁵ Ba kɛnʋ kaa lɩɩ baga-la tʋɔŋ a kpʋʋ.” Ŋɩɩ nɛ Yesu pɩɛsɛ nɩalɩŋ, “Wʋbɛɛ nɛ ma bɩɩnɛ baga-la tɩɩna jaŋ ŋaaba?

¹⁶ Ʋ jaŋ kɔ a kpʋ nɩalɩŋ sɩɩ beŋ baga-la kala aŋ joŋ baga-la a pɩ nɩtanɩa.” Nɩalɩŋ sɩ nɩɩ wɩalɩŋ Yesu sɩ bʋla, ba sɩ, “Wɩɩŋ deeŋ bɩ jaŋ kɔ dɩ ʋ ŋaa.”

¹⁷ Ŋɩɩ nɛ Yesu bemba aŋ pɩɛsɛba, “Wɩɩŋ deeŋ ba sɩ ŋmʋnsa Wɩa teniŋ tʋɔŋ bʋbʋɔŋ nɛ bɛɛ? ‘Tie-bii-la dɩɩ-saaraa sɩ vɩa ta, ʋ nɛ jaŋ kʋ ŋaa tie-bii-duoŋ ba sɩ joŋo bil dɩa gentine.’

¹⁸ Nɩɩ-la kala sɩ tel tie-bii-la nyuŋ, ʋ tɩɩna jaŋ yɛrɛ muno muno. Dɩ tie-bii-la ma nɛ tel nʋʋkala nyuŋ, ʋ jaŋ chʋgʋsɛ tɩɩna.”

Yesu bʋl lampoo timiŋ wɩaa

¹⁹ Ŋɩɩ nɛ Wɩa teniŋ kerichiba arɩ Wɩɩsʋllɩ sɩpaalaaraa kʋhɩasɩŋ wʋwalɩmɛ dɩ ba kɛŋ Yesu naabʋɔsʋ-la lɛ, bɛɛ wɩaa ba jɩma arɩ ʋ magɛ namaga-la a tɩgɛ ba lɛ nɛ. Ama baa fá nɩalɩŋ sɩ hɛ nɩmɛ nɛ.

²⁰ Ŋɩɩ nɛ ba bee chɩchɛ wombii-la ba sɩ jaŋ to a kɛnʋ. Ba joŋ moribiee kpal nɩaa ka dɩ ba fugi arɩ ba ŋaa nɩtɩtɩɩba nɛ, a magɩsɛ Yesu a pɩɛsʋ wɩaa dɩ ba na ʋ jaŋ bʋl wɩɩ chei, dɩ ba wuo to ŋɩɩ lɛ a kɛnʋ a kaa mʋ hɛ ba kuoru-balɩŋ nɩsɩŋ lɛ, dɩ ʋ ŋaaʋ ŋɩɩ kala ʋ sɩ cho.

²¹ Ŋɩɩ nɛ nɩalɩŋ ba sɩ hɛ mʋ Yesu teeŋ, a pɩɛsʋ, “La kʋhɩaŋ, la jɩma wɩalɩŋ kala ŋ sɩɩ bʋl aŋ dɩdagɛ ma, ba ŋaa wʋtɩtɩɩba nɛ. La jɩma arɩ ŋ joŋ nɩaa kala ba ŋaa kʋbala nɛ, ŋŋ dagɛ Wɩa wombii-tɩtɩɩ nɛ.

²² Ʋ ŋaa wombii nɛ dɩ la tiŋ lampoo a pɩ Rom tinteeŋ kuoru-balɩŋ ba sɩɩ yɩrɛ Siiza koo ʋ bɩ wombii ŋaa?”

²³ Ama Yesu jɩŋ wɩɩ-la kala ba sɩ magɩsʋ a chɩchɛ nɛ. Ŋɩɩ nɛ ʋ bʋla pɩba,

²⁴ “Má kɛŋ moribii-biiŋ kaa kɔ mɩ bee na. Kʋbɛɛ nyuŋ nɛ hɛ ʋ lɛ? Kʋbɛɛ yɩrɩŋ ma nɛ ba tuuro hɛ moribie-la lɛ?” Ŋɩɩ nɛ ba sɩ, “Siiza yɩrɩŋ nɛ.”

²⁵ Ŋɩɩ nɛ Yesu bʋl, “Tɔɔ, má joŋ Rom tinteeŋ kuori-bal-la kɩaa a pʋ, aŋ joŋ Wɩa ma kɩaa pʋ.”

²⁶ Ʋ sɩ bʋl ŋɩɩ, ba bɩ wɩɩkala na ba sɩ jaŋ wuo to ŋɩɩ lɛ kɛnʋ nɩalɩŋ sɩ hɛ nɩmɛ sɩpaaŋ. Wɩalɩŋ ʋ sɩ bʋla ŋaaba wʋkpuŋkpere, ba niiŋ kala maa.

Yesu bʋl wɩaa a tɩgɛ nɩalɩŋ sɩ sii sʋʋŋ lɛ

²⁷ Ŋɩɩ nɛ Saduusi tɩŋŋaa dɔnsʋŋ ma kɔ Yesu teeŋ. Nɩaa deemba laa dii arɩ nɩalɩŋ sɩ sʋba bɩra bɩ jaŋ sii sʋʋŋ lɛ. Ŋɩɩ nɛ ba pɩɛsʋ,

²⁸ “La kʋhɩaŋ, Mosis dagɛla Wɩa teniŋ tʋɔŋ arɩ baal nɛ jaa haala, dɩ haal-la arɩ baal-la nɛ bɩ bii lʋla, aŋ ka dɩ baal-la sʋʋ, dɩ ʋ ŋaana jaa yo-haal-la a lʋl biiriŋ pɩ ʋ malɩma sɩ sʋba, dɩ biiri-la chɩŋ ʋ nyuŋ lɛ.

²⁹ Naambiiriŋ balɩpɛ nɛ fa hɛ nɩmɛ bʋa kʋbala lɛ. Ba kʋhɩaŋ jaa haala. Ʋ dɩ haal-la bɩ bii lʋla, aŋ ka ʋ sʋʋ.

³⁰ Lɩamɩŋ tɩɩna joŋ haal-la jaa. Ʋ dɩ ʋ ma bɩ bii lʋla, aŋ ka ʋ ma sʋʋ.

³¹ Torimuŋ tɩɩna ma joŋ haal-la jaa. Ʋ ma ŋɩɩ tɩtɩa nɛ. Ŋɩɩ nɛ naambiiri-la balɩpɛ kala jaa haal-la. Ba kala sʋʋ aŋ bɩ bii lʋla.

³² Ʋ ŋɩɩ harɩŋ haal-la ma sʋʋ.

³³ Tapʋlɩɩ-la nɩaa sɩ jaŋ sii sʋʋŋ lɛ, baalaa deemba balɩpɛ tʋɔŋ kʋbɛɛ nɛ jaŋ tɩɩ haal-la? Ba kala balɩpɛ nɛ jaaʋ.”

³⁴ Ŋɩɩ nɛ Yesu bʋla pɩba, “Baala-la arɩ haala-la sɩ hɛ ba mɩɩsɩŋ lɛ lɛɛlɛ, ba nɩɩ jaa dɔŋɔ.

³⁵ Ama bʋa-la lɛ baala-la arɩ haala-la sɩ jaŋ sii sʋʋŋ lɛ a kɛŋ mɩɩsɩ-la sɩ bɩ dɛrɛ, ba bɩra bɩ jaŋ jaa dɔŋɔ.

³⁶ Ba jaŋ nagɛ Wɩa tɩndaaraa a bɩra bɩ jaŋ sʋʋ. Wɩa sɩ chɩsɛba sʋʋŋ lɛ ŋɩɩ, ba jaŋ ŋaa Wɩa biiriŋ.

³⁷ Mosis fa paala chaasa dagɛ arɩ ba jaŋ chɩsɛ nɩalɩŋ sɩ sʋba sʋʋŋ lɛ dɩ ba wei. Ʋ fa bʋl Wɩa teniŋ sɛmɛ dɔŋɔ arɩ La Tɩɩna Wɩa nɛ ŋaa Abɩraham Wɩa arɩ Aɩzɩk Wɩa arɩ Jekɔb ma Wɩa. Lee-la ʋ fa sɩ bʋl wɩaa a tɩgɛ tɩɩ-bie-la sɩɩ dii nyiniŋ lɛ nɛ, ʋ fa bʋl ŋɩɩ.

³⁸ Ʋ ŋaa nɩweyee Wɩa nɛ. Ʋ bɩ nɩsʋʋnʋŋ Wɩa ŋaa, ʋ-na teeŋ nʋʋkala weye nɛ.”

³⁹ Ŋɩɩ nɛ Wɩa teniŋ kerichiba dɔnsʋŋ bʋla pʋ, “La kʋhɩaŋ, ŋ bʋl woruŋ nɛ.”

⁴⁰ Ba bɩra bɩ wɩɩkala kɛnɛ dɩ ba pɩɛsɛ.

Ba pɩɛsɛ Kirisito wɩaa

⁴¹ Ŋɩɩ nɛ Yesu pɩɛsɛba, “Ɛɛ nɛ ba jaŋ wuo bʋl arɩ Kirisito, Nɩɩ-la Wɩa sɩ lɩɩsa, jaŋ ŋaa Devit nihi-lɩɛrɛ dʋndʋŋa?

⁴² Devit tɩtɩa bʋla Wɩa teniŋ sɛmɛ dɔŋɔ ba sɩɩ yɩrɛ Wɩa yɩɩlaa lɛ, ‘Mɩ Tɩɩna Wɩa bʋla pɩ mɩ Tɩɩna, hɔŋ mɩ nadiiŋ, nɩduoŋ dɩhɔnʋŋ,

⁴³ see dɩ mɩ yuo dii ŋ dʋndɔŋŋɔɔ kala dɛrɛ.’

⁴⁴ Devit tɩtɩa yɩrɛ nɩa deeŋ ʋ Tɩɩna. Ɛɛ nɛ saa ʋ jaŋ wuo ŋaa Devit nihi-lɩɛrɛ dʋndʋŋa?”

Yesu bʋl Wɩa teniŋ kerichiba wɩaa

⁴⁵ Ŋɩɩ nɛ Yesu bʋla pɩ ʋ harɩ-tooroo nɩalɩŋ kala sɩpaaŋ,

⁴⁶ “Má kɛŋ ma tɩtɩa woruŋ Wɩa teniŋ kerichiba lɛ. Ba yie gʋgɔllɛ yɔbɔ lɛ arɩ ba gɛrɩ-duduosuŋ, a cho dɩ nɩaa zizilba a chʋchʋɔlɛba. Ba yie chɩchɛ dɩ-hɔŋ zɔŋŋɔɔ Wɩɩchʋɔlɛ dɩɩsɩŋ lɛ. Dɩ ba nɛ yɩrɛba dɩ ba kʋ dii kɩaa, ba cho dɩ ba hɔŋ nɩbalaa dɩ-hɔnɔɔ.

⁴⁷ Ba yie kɛŋ yo-haalaa kɩaa kaa laa didii aŋ fugo chʋɔlɛ Wɩa didieni. Bʋa-la lɛ Wɩa sɩ jaŋ dii ba sarɩya, ba nɛ jaŋ na hɛɛŋ a kɩɩ ba dɔnsʋŋ tɩŋŋaa kala.”