Luuk 14 - WƖA TENIŊ

Yesu vaarɛ baala sɩɩ wɩɩlʋ

¹ Chɛ-wiesii-la chɛɛ kʋbala, Yesu mʋ dɩ ʋ dii kʋdiilee Farisii tɩŋŋaa kʋhɩaŋ kʋbala dɩa lɛ. Ŋɩɩ nɛ nɩaa faasa bibenu woruŋ.

² Dɩ baal kʋbala nɛ hɛ nɩmɛ a kɔ Yesu teeŋ. Ʋ yaraa kala fa ŋmɛrɛ nɛ.

³ Ŋɩɩ nɛ Yesu pɩɛsɛ Wɩa teniŋ kerichiba arɩ Farisii tɩŋŋaa a bʋl, “Ʋ kɛŋ wombiiŋ nɛɛ dɩ la vaarɛ nyanyal tɩŋŋaa chɛ-wiesii-la chɛɛŋ koo?”

⁴ Ba bɩ wɩɩkala bʋla. Ŋɩɩ nɛ Yesu kɛŋ baal-la a vaarʋ aŋ taʋ ʋ mʋ dɩa,

⁵ aŋ bɩra pɩɛsɛba, “Dɩ ŋ bie koo ŋ nɛŋ nɛ tel viliŋ lɛ chɛ-wiesii-la chɛɛŋ, ma tʋɔŋ kʋbɛɛ nɛ bɩ jaŋ lɛrɛ lɩɩsʋ?”

⁶ Ba bɩ wɩɩkala wuo bʋla pʋ.

Yesu bʋla pɩ nɩaa dɩ ba kɛŋ ba tɩtɩa muuri, a kɛŋ zile, a hʋhʋɔrɛ nɩaa

⁷ Yesu sɩ beŋ nɩalɩŋ ba sɩ yɩra baa jʋʋ dɩa ŋɩɩ, ʋ na dɩ ba jʋʋ chɩchɛ ba hɔŋ nɩbalaa dɩ-hɔnɔɔ. Ŋɩɩ nɛ ʋ magɛ namaga a pɩba a bʋl,

⁸ “Dɩ nʋʋ nɛ yɩrɩŋ dɩ ŋ kɔ ʋ hajaarɩ gbiele a dii kʋdiilee, sɩ́ mʋ bagɩsa joŋ nɩbalaa dɩhɔnʋŋ a hɔŋ. Dɩa tɩɩna jaŋ wuo yɩrɛ nʋʋ ma sɩ kɩɩŋ bɩra dɩ ʋ hɔŋ nɩmɛ.

⁹ Nɩɩ-la sɩ yɩrɛma jaŋ wuo kʋ bʋla pɩŋ, ‘Sʋrɩsa mʋ, ka dɩ ŋ dɔŋɔ tɩɩna hɔŋ ŋ dɩhɔnʋŋ.’ Ŋɩɩ nɛ ŋ jaŋ sii a mʋ hɔŋ nɩbiisiŋ dɩhɔnʋŋ. Hɩɩsɩŋ jaŋ kɛnɩŋ woruŋ.

¹⁰ Ŋɩɩ nɛ saa, dɩ ba nɛ yɩrɩŋ dɩ ŋ kʋ dii kʋdiilee, dɩ ŋ nɛ mʋa, hɔŋ nɩbiisiŋ dɩhɔnʋŋ. Dɩ nɩɩ-la sɩ yɩrɩŋ nɛ kʋ naŋ, ʋ jaŋ bʋla pɩŋ a bʋl, ‘Mɩ nandɔŋ, sii hɔŋ dɩ-hɔŋ-zɔmʋŋ.’ Ʋ nɛ ŋaa ŋɩɩ, ʋ jaŋ ziliŋ nɩalɩŋ kala sɩ hɛ nɩmɛ tʋɔŋ.

¹¹ Nɩɩ-la kala sɩɩ bigisi ʋ tɩtɩa lɛ, Wɩa jaŋ kɛnʋ muuri. Ka nɩɩ-la ma sɩ kɛŋ ʋ tɩtɩa muuri, Wɩa jaŋ ŋaa dɩ ʋ yʋgɛ.”

¹² Ŋɩɩ nɛ Yesu bʋla pɩ nɩɩ-la sɩ yɩrʋ dɩ ʋ kʋ dii kʋdiilee, “Dɩ ŋ nɛ ŋaa kʋdiilee, sɩ́ ŋ nandɔnsʋŋ koo ŋ naambiiriŋ yɩrʋ, sɩ́ ŋ dɩa nɩaa koo ŋ dɔnsʋŋ tɩŋŋaa sɩ kɛŋ kɩaa ma yɩrʋ. Ba ma jaŋ wuo yɩrɩŋ maachie dɩ ŋ kʋ dii kʋdiilee ba teeŋ a tiŋ ŋ chɩmɩŋ.

¹³ Dɩ ŋ nɩɩ yɩrɛ nɩaa dɩ ba kʋ gbieli gbiele a dii kʋdiilee, yɩrɛ summoo arɩ nɩalɩŋ naasɩŋ koo nɩsaa sɩ sʋba arɩ nyʋlɩmaa kala.

¹⁴ Dɩ ŋ nɛ ŋaa ŋɩɩ, Wɩa ma jaŋ pɛŋ lɛ, bɛɛ wɩaa ba-na bɩ jaŋ wuo tiŋ ŋ chɩmɩŋ. Wɩa jaŋ tiŋ ŋ chɩmɩŋ tapʋlɩɩ-la tʋɔpʋl tɩŋŋaa sɩ jaŋ sii sʋʋŋ lɛ.”

Yesu magɛ namaga a tɩgɛ baal-la sɩ ŋaa ba gbieli gbiele lɛ

¹⁵ Yesu sɩ bʋl wɩɩŋ deeŋ, ŋɩɩ nɛ nɩalɩŋ sɩ hɔnɔɔ dii kɩalɩŋ dɔŋɔ bʋla pɩ Yesu a bʋl, “Nɩalɩŋ sɩ jaŋ dii kɩaa Wɩa kuorii-la tʋɔŋ, ba tʋɔŋ jaŋ tɔrɛ.”

¹⁶ Ŋɩɩ nɛ Yesu magɛ namaga a bʋl, “Baal kʋbala nɛ fa hɛ nɩmɛ. Ʋ ŋaa ba gbieli gbieli-bal. Ŋɩɩ nɛ ʋ yɩrɛ nɩaa yʋgɛ dɩ ba kɔ dɩ ba gbieli.

¹⁷ Gbiele-la sɩ ŋaa siri, ʋ tɩŋ ʋ tɩntɩnna dɩ ʋ mʋ bʋla pɩ nɩalɩŋ ʋ sɩ yɩra arɩ ba ŋaa siri nɛ dɩ ba gbieli gbiele-la.

¹⁸ Ʋ sɩ mʋ yɩrɛba, ba kala vɩa. Nɩ-bumbuŋ sɩ dɩ ʋ yɔɔ baga nɛ a chɩchɛ dɩ ʋ mʋ na, ŋɩɩ wɩaa ʋ bɩ jaŋ wuo kɔ.

¹⁹ Dɔŋɔ ma sɩ dɩ ʋ ma yɔɔ nɛ-belliŋ fii nɛ a ma kaa lɩɩ dɩ ʋ kaa mʋ pɛrɛ na. Ŋɩɩ wɩaa ʋ ma bɩ jaŋ wuo kɔ.

²⁰ Dɔŋɔ tɩɩna ma sɩ dɩ lɛɛlɛ nɛ ʋ jaa haala. A tɩŋ ŋɩɩ wɩaa ʋ ma bɩ jaŋ wuo kɔ.

²¹ Ŋɩɩ nɛ tɩntɩnnʋ-la mɩɩra mʋ bʋla pɩ ʋ kʋhɩaŋ-la. Ʋ sɩ nɩɩ ŋɩɩ, ʋ baanɩŋ sii kɩŋkɛŋ. Ŋɩɩ nɛ ʋ bɩra bʋla pʋ, ‘Lɩɩ mʋ wombiiŋ niiŋ lɩma arɩ jaŋ tʋɔŋ wombii-biisiŋ a yɩrɛ summoo arɩ gbɛrɩgɛɛ arɩ nyʋlɩmaa, arɩ nɩalɩŋ naasɩŋ arɩ nɩsaa sɩ sʋba.’

²² Lɩma lɩma dɩ baal-la ʋ sɩ tɩma lɩa a yɩrɛ nɩalɩŋ ba kʋ jʋʋ, ka ʋ jʋʋ bʋla pɩ ʋ kʋhɩaŋ-la arɩ nɩalɩŋ kɔ nɛ, ama ba ha bɩ yʋgɛ.

²³ Ŋɩɩ nɛ baal-la bɩra bʋla pɩ ʋ tɩntɩnnʋ-la, ‘Bɩra lɩɩ bagɩsɩŋ wombiee arɩ wombii-biisiŋ kala a yɩrɛ nɩaa dɩ ba kʋ jʋʋ, dɩ mɩ dɩa su.’

²⁴ Mɩ jaŋ bʋla pɩma arɩ nɩalɩŋ mɩ sɩ yɩra, ba kʋŋkala bɩ jaŋ dii kʋdiilee deemba.”

Wɩɩ-la ŋ sɩ jaŋ ŋaa aŋ-na kʋ ŋaa Yesu harɩ-tooro

²⁵ Yesu fa sɩɩ mʋ wombiiŋ ŋɩɩ, nɩ-daŋ to ʋ harɩŋ. Ŋɩɩ nɛ ʋ daasɛ harɩŋ a bʋla pɩba,

²⁶ “Dɩ nʋʋkala nɛ kɔ mɩ teeŋ, ʋ bɩ jaŋ wuo ŋaa mɩ harɩ-tooru, see ʋ bɛrɛ ʋ nyɩmma arɩ ʋ naaŋ arɩ ʋ haala arɩ ʋ biiriŋ arɩ ʋ naambiiriŋ arɩ ʋ tɩtɩa wʋŋaalaa kala.

²⁷ Nɩɩ-la kala sɩ bɩ ʋ tɩtɩa daagɛsɛ baasɛ aŋ to mɩ harɩŋ, ʋ bɩ maga dɩ ʋ ŋaa mɩ harɩ-tooru.

²⁸ Dɩ ma kʋŋ nɩɩ chɛ dɩ ŋ saa dii-leŋii, ŋ jaŋ laa sɩpaaŋ hɔŋ a bɩɩnɛ a na dɩ moribiee maga nɛ dɩ ŋ kaa saa dɩa-la dɛrɛ.

²⁹ Dɩ ŋ nɛ bɩ ŋɩɩ ŋaa aŋ suomo bil dɩa-la gentine aŋ bɩra bɩ moribiee kɛnɛ dɩ ŋ saa dɩa-la dɛrɛ, nɩaa jaŋ na wɩɩ-la ŋ sɩ ŋaa. Ba jaŋ mʋmɔmʋŋ.

³⁰ Ba jaŋ bʋl, ‘Baala deeŋ suomo dɩ ʋ saa dɩa nɛ aŋ bɩ wuo saa dɛrɛ.’ ”

³¹ Ŋɩɩ nɛ Yesu bɩra magɛ namaga dɔŋɔ a bʋl, “Kuoro nɛ sie a kɛŋ nɩaa bʋɩ fii a kaa mʋ dɩ ʋ yuo ʋ kuoru dɔŋɔ. Ka kuoru-la ma kɛŋ nɩaa bʋɩ mara nɛ. Ʋ jaŋ laa sɩpaaŋ hɔŋ a bɩɩna na dɩ ʋ nɛ jaŋ wuo yuo dii kuoru-la aŋ-na mʋ yuou.

³² Dɩ ʋ nɛ bɩ jaŋ wuo dii kuoru-la, ʋ jaŋ tɩŋ tɩndaaraa dɩ ba mʋ cheŋ kuoru-la dɔŋɔ dɩ ba hɛ dɩ-bolii, a leŋ dɩ ba sʋlʋ dɩ ba sɩŋ.”

³³ Ŋɩɩ nɛ Yesu bɩra bʋla pɩba, “Ŋɩɩ tɩtɩa nɛ ma kʋŋkala bɩ jaŋ wuo ŋaa mɩ harɩ-tooro, see ŋ vɩa kʋŋkala ŋ sɩ kɛnɛ ta.

Yesu bʋl wɩaa a tɩgɛ yɩsɩŋ lɛ

³⁴ Yɩsɩŋ sɩma, ama dɩ ʋ nɛ sɛbɩsɛ, ŋ bɩra bɩ jaŋ wuo ŋaa dɩ ʋ sɩŋ.

³⁵ Ŋ bɩra bɩ jaŋ wuo joŋo hɛ baga lɛ dɩ ʋ leŋ dɩ kɩaa wasɛ. Ʋ bɩra bɩ nyʋʋrʋŋ kala kɛnɛ. Ba yie joŋo yuo ta nɛ. Ma dɩgɩlaa tɩŋŋaa, má wuoli ma dɩgɩlaa a nɩɩ wɩaa deemba.”