Luuk 1 - WƖA TENIŊ

¹ Mɩ-na Luuk nɛ ŋmʋnsɛ teniŋ deeŋ a pɩpɩ ŋ-na mɩ nandɔŋɔ Tɩafɩlos. Nɩaa yʋga a hɛ doluŋ a ŋmʋnsɛ wɩalɩŋ kala sɩ ŋaa la sɩɩŋ lɛ.

² Ba ŋmʋnsɛ wɩalɩŋ kala nɩaa sɩ bʋla pɩla nɛ. Ba nɛ na wɩaa deemba kala a suomi bumbuŋ kala, a ma bʋl Wɩa niiŋ wɩaa a pɩpɩ nɩaa.

³ Mɩ kʋhɩaŋ, mɩ pɩa na wɩaa deemba kala nɛ woruŋ, a lɩɩ ba dɩ-suomuŋ. Mɩ na dɩ ʋ ŋaa wʋzɔŋ nɛ dɩ mɩ ŋmʋnsɛ wɩalɩŋ kala sɩ vɛŋ ŋɩɩ a pɩŋ.

⁴ Mɩ ŋmʋnsaa pɩŋ dɩ ŋ wuo jɩŋ arɩ wɩalɩŋ kala ba sɩ dagɩŋ ŋaa wʋtɩtɩɩba nɛ.

Ba bʋl Jɔɔŋ Wɩa lɩɩ-fooro lʋlʋŋ wɩaa

⁵ Bʋa-la lɛ Hɛrɔd fa sɩ ŋaa Judiya tinteeŋ kuoro, dɩ baal kʋbala baa yɩrɛ Zɛkarɩya fa hɛ nɩmɛ a ŋaa Wɩɩsʋllɩ sɩpaalaaraa dɔŋɔ. Ba fa kɛŋ Wɩɩsʋllɩ sɩpaalaaraa kaa kpaa kpaa nɛ, Zɛkarɩya fa pɛ baal kʋbala ba sɩɩ yɩrɛ Abija nɩaa tʋɔŋ. Zɛkarɩya haala yɩrɩŋ nɛ Ɛlɩzabɛt. Ʋ ma fa ŋaa Arɔŋ doho nʋʋ nɛ.

⁶ Zɛkarɩya arɩ ʋ haala kala fa ŋaa tʋɔpʋl tɩmma nɛ. Ba faa to Wɩa niiriŋ arɩ ʋ wʋdagaa nɛ woruŋ a bɩ wʋcheeli kala kɛnɛ.

⁷ Ba fa bɩ bii kala lʋla, bɛɛ wɩaa Ɛlɩzabɛt fa ŋaa hapɩrɩ nɛ, ka ʋ dɩ ʋ bala Zɛkarɩya kala hɩɛsɛ.

⁸ Ŋɩɩ nɛ Zɛkarɩya arɩ ʋ tɩntɩnnɩ dɔsʋŋ tapʋlʋŋ yi dɩ ba tɩŋ tɩntɩŋŋaa, Wɩɩsʋllɩ sɩpaalaaraa sɩ vɛnɛɛ tɩŋ.

⁹ Ba tɩntɩŋŋaa lɛ, ba yie tɔnsɛ nɛ a lɩɩsɛ nɩɩ-la sɩ jaŋ jʋʋ Wɩa dɩɩ-bal-la a nyɩgɛ kʋsʋɔrʋsʋŋ. Ba tɔnsɛ a lɩɩsɛ Zɛkarɩya, ʋ jʋʋ Wɩa dɩɩ-bal-la.

¹⁰ Ʋ sɩ jʋʋ ŋɩɩ, bʋa-la yi dɩ ʋ nyɩgɛ kʋsʋɔrʋsʋŋ, ka nɩ-daŋ-la kala hɛ Wɩa dɩɩ-bal-la kaala lɛ a chʋchʋɔlɛ Wɩa.

¹¹ Zɛkarɩya sɩ nyɩgɛ nyiniŋ ŋɩɩ, dɩ Wɩa tɩndaara kɔ ʋ teeŋ a chɩŋ koru-la sɛmɛ nadiiŋ.

¹² Zɛkarɩya naʋ, fawʋllʋŋ kɛnʋ ʋ chichel.

¹³ Ŋɩɩ nɛ Wɩa tɩndaarʋ-la bʋla pʋ, “Zɛkarɩya, sɩ́ leŋe dɩ fawʋllʋŋ kɛnɩŋ. Wɩalɩŋ ŋ sɩ sʋl Wɩa chɩchɛ, ʋ joŋo pɩŋ nɛ. Ŋ haala Ɛlɩzabɛt jaŋ lʋl baal. Ŋ jaŋ hɛ ʋ yɩrɩŋ Jɔɔŋ.

¹⁴ Ʋ jaŋ leŋ dɩ ŋ tʋɔŋ faasa tɔrɛ. Nɩ-daŋ ma tʋɔŋ jaŋ tɔrɛ ʋ lʋlʋŋ wɩaa.

¹⁵ Ʋ jaŋ ŋaa nɩbal La Tɩɩna teeŋ. Ʋ bɩ jaŋ nyʋnyʋa sɩ-duo kala. Ba jaŋ lʋlʋ, dɩ Wɩa Dɩŋ-zɔmʋŋ hɛ ʋ lɛ woruŋ.

¹⁶ Ʋ jaŋ ŋaa dɩ Iziral tɩŋŋaa yʋgɛ a bɩrɩma to ba Tɩɩna Wɩa.

¹⁷ Ʋ jaŋ ŋaa Wɩa tɩntɩnnʋ a kɛŋ doluŋ arɩ Ɩlaaja fa sɩ kɛŋ doluŋ ŋɩɩ. (Ɩlaaja fa ŋaa Wɩa wʋlaabʋllʋ nɛ.) Ʋ jaŋ ŋaa dɩ biiriŋ arɩ ba nyɩmmaba kala mɩɩra sɩŋ. Ʋ jaŋ ŋaa dɩ nɩalɩŋ sɩ bɩ Wɩa niiŋ wɩaa ka to, dɩ ba bɩrɩmɛ a to tʋɔpʋl tɩŋŋaa wombiiŋ a leŋ dɩ nɩaa ŋaa siri a gbɛrɛ ba Tɩɩna.”

¹⁸ Ŋɩɩ nɛ Zɛkarɩya pɩɛsɛ Wɩa tɩndaarʋ-la, “Ɛɛ nɛ mɩ jaŋ ŋaa a jɩŋ dɩ wɩalɩŋ ŋ sɩ bʋla ŋaa wʋtɩtɩɩ nɛ? Mɩ ŋaa banɩhɩaŋ nɛ, mɩ haala ma hɩɛsɛ.”

¹⁹ Ŋɩɩ nɛ Wɩa tɩndaarʋ-la bʋla pʋ, “Mɩ yɩrɩŋ nɛ Gebiral a hɔŋ Wɩa sɛmɛ. Ʋ nɛ tɩmmɛ dɩ mɩ kʋ bʋl wʋzɔmʋŋ deeŋ a pɩŋ.

²⁰ Wɩalɩŋ mɩ sɩ bʋla pɩŋ jaŋ ŋaa, aŋ ka ŋ bɩ laa dii. Ŋɩɩ wɩaa ŋ bɩra bɩ wɩaa jaŋ wuo bʋl, see tapʋlɩɩ-la sɩ yie dɩ wɩaa deemba mɩ sɩ bʋla pɩŋ ŋaa.”

²¹ Bʋa-la lɛ dɩ nɩalɩŋ ka gbɛrɛ Zɛkarɩya kaala-la tʋɔŋ, ʋ kperiba wɩɩ-la sɩ tɩɩ ʋ didieni ŋɩɩ Wɩa dɩɩ-bal-la tʋɔŋ.

²² Ŋɩɩ nɛ Wɩa tɩndaarʋ-la viiri, aŋ ka Zɛkarɩya kʋ lɩɩ kaala nɩalɩŋ teeŋ. Ʋ bɩ wɩaa wuo bʋla pɩba. Ŋɩɩ nɛ ʋ kɛŋ ʋ nɩsaa a bʋl wɩaa ba teeŋ. Ʋ sɩ bɩ wɩaa wuo bʋbʋl ŋɩɩ, ba jɩŋ arɩ ʋ na wɩaa a nagɛ duosoo tʋɔŋ nɛ Wɩa dɩɩ-bal-la tʋɔŋ.

²³ Ŋɩɩ nɛ Zɛkarɩya tɩntɩŋŋaa tapʋlaa dɛrɛ Wɩa dɩɩ-bal-la lɛ. Ʋ mɩɩra mʋ ʋ dɩa.

²⁴ Ʋ bɩ diene, ka ʋ haala Ɛlɩzabɛt kɛŋ luoruŋ. Ʋ sɩ kɛŋ luoruŋ ŋɩɩ, ʋ bɩ dɩa lɛ lɩa chɛnsɩŋ banɔŋ.

²⁵ Ʋ bʋl, “Wɩa diene nɛ aŋ lɛɛlɛ pɛ mɩ lɛ ŋ-la. Ʋ tɔ mɩ hɩɩsɩŋ nɛ dʋnɩa lɛ.”

Ba bʋl Yesu lʋlʋŋ wɩaa

²⁶ Ɛlɩzabɛt sɩ kɛŋ luoruŋ ʋ chɛnsɩŋ balɩdʋ lɛ, Wɩa bɩra tɩŋ ʋ tɩndaara Gebiral dɩ ʋ mʋ Galilii tinteeŋ taŋ kʋbala baa yɩrɛ Nazarɛt.

²⁷ Ʋ tɩmʋ dɩ ʋ kɛŋ tɩndaarɩŋ mʋ pɩ hatolo kʋbala ha sɩ bɩ baal jɩŋ baa yɩrɛ Mɛɛrɩ. Ʋ faa chɛ dɩ ʋ jaa baal kʋbala nɛ baa yɩrɛ Josɛf. Josɛf fa ŋaa kuoro Devit doho nʋʋ nɛ.

²⁸ Ŋɩɩ nɛ Wɩa tɩndaarʋ-la kɔ ʋ teeŋ a chʋɔlʋ aŋ bʋla pʋ, “Wɩa cho ŋ wɩaa nɛ a pɛ ŋ lɛ woruŋ.”

²⁹ Mɛɛrɩ sɩ nɩɩ wɩalɩŋ Wɩa tɩndaarʋ-la sɩ bʋla pʋ, fawʋllʋŋ kɛnʋ. Ʋ kɛŋ wɩalɩŋ ʋ sɩ bʋla bʋbʋɔŋ bɩbɩɩnɛ.

³⁰ Ŋɩɩ nɛ Wɩa tɩndaarʋ-la bʋla pʋ, “Mɛɛrɩ, Wɩa cho ŋ wɩaa, sɩ́ leŋe dɩ fawʋllʋŋ kɛnɩŋ.

³¹ Ŋ jaŋ kɛŋ luoruŋ a lʋl hambolibie, a hɛ ʋ yɩrɩŋ Yesu.

³² Ʋ jaŋ ŋaa nɩbal. Ba jaŋ kɛnʋ yɩrɛ Wɩɩ-balɩŋ Bie. Wɩa jaŋ ŋaa dɩ ʋ dii kuoruŋ arɩ ʋ naabalɩma Devit fa sɩ dii kuoruŋ ŋɩɩ.

³³ Ʋ jaŋ dii kuoruŋ Jekɔb doho nɩaa tʋɔŋ a kaa mʋ wuu. Ʋ kuoruŋ bɩ jaŋ dɛrɛ da.”

³⁴ Ŋɩɩ nɛ Mɛɛrɩ bʋla pɩ Wɩa tɩndaarʋ-la, “Mɩ ha bɩ baal jɩŋ. Ɛɛ nɛ saa wɩɩŋ deeŋ jaŋ wuo ŋaa?”

³⁵ Ŋɩɩ nɛ Wɩa tɩndaarʋ-la bʋla pʋ, “Wɩa Dɩŋ-zɔmʋŋ jaŋ kʋ hɛ ŋ lɛ. Ŋ jaŋ kɛŋ luoruŋ Wɩa doluŋ lɛ. Ŋɩɩ wɩaa bile jaŋ ŋaa tʋɔpʋl Tɩɩna. Ba kɛnʋ yɩyɩrɛ Wɩa Bie.

³⁶ Na ŋ naambie Ɛlɩzabɛt sɩ hɩɛsa ŋɩɩ. Ba sɩ ʋ bɩ bii wuo lʋl, aŋ ka ʋ kɛŋ luoruŋ ʋ chɛnsɩŋ balɩdʋ nɛ ŋ-la.

³⁷ Wɩɩkala bɩ Wɩa wuo kperi.”

³⁸ Ŋɩɩ nɛ Mɛɛrɩ bʋla pʋ, “Mɩ ŋaa Wɩa tɩntɩnnʋ nɛ. Leŋ dɩ wɩalɩŋ ŋ sɩ bʋla pɩmɛ ŋaa.” Ŋɩɩ nɛ Wɩa tɩndaarʋ-la taʋ aŋ viiri.

Mɛɛrɩ mʋ chʋɔlɛ Ɛlɩzabɛt

³⁹ Ŋɩɩ nɛ Mɛɛrɩ sii lɩma lɩma a mʋ dɩ ʋ chʋɔlɛ Ɛlɩzabɛt ʋ jaŋ lɛ. Ʋ fa hɛ Judiya tinteeŋ lɛ nɛ, lee-la peelee sɩ yʋga.

⁴⁰ Ʋ sɩ yi nɩmɛ, ʋ mʋ jʋʋ Zɛkarɩya dɩa a mʋ chʋɔlɛ ʋ haala Ɛlɩzabɛt.

⁴¹ Ʋ laa Mɛɛrɩ chʋɔlaa. Ʋ sɩ laa ŋɩɩ, bile sɩ hɛ ʋ luoruŋ lɛ sii bɩrɩmɛ. Ŋɩɩ nɛ Wɩa Dɩŋ-zɔmʋŋ kʋ hɛ Ɛlɩzabɛt lɛ woruŋ.

⁴² Ʋ faasa bʋla pɩ Mɛɛrɩ, “Wɩa pɛ ŋ lɛ nɛ a kɩɩ haalaa kala. Wɩa jaŋ pɛ bile ŋ sɩ jaŋ lʋl lɛ.

⁴³ Mɩ ma nɛ kʋbɛɛ, Wɩa Bie naaŋ kɔ dɩ ʋ chʋɔlɛmɛ?

⁴⁴ Mɩ sɩ laa ŋ chʋɔlaa ŋɩɩ, bile sɩ hɛ mɩ luoruŋ lɛ tʋɔŋ ma tɔrɛ, ʋ sii fɩfɩl.

⁴⁵ Ŋ ma laa dii arɩ wɩalɩŋ Wɩa sɩ bʋla pɩŋ jaŋ ŋaa wʋtɩtɩɩba. Ŋɩɩ wɩaa ŋ tʋɔŋ jaŋ tɔrɛ.”

Mɛɛrɩ dɛnnɛ Wɩa

⁴⁶ Ŋɩɩ nɛ Mɛɛrɩ bʋl, “Mɩ tʋɔŋ tɔrɔ nɛ, mɩ dɩdɛnnɛ Wɩa.

⁴⁷ Wɩa nɛ ŋaa mɩ Laataara, ŋɩɩ nɛ tɩɩ mɩ jʋjʋɔsɛ.

⁴⁸ Mɩ ŋaa ʋ tɩntɩnnɩ-bii nɛ, ʋ liisi mɩ wɩaa. A lɩɩ lɛɛlɛ a kaa mʋ, nʋʋkala jaŋ kɛmmɛ yɩyɩrɛ tʋɔtɔrɛ tɩɩna.

⁴⁹ Wɩa ŋaa Wɩɩ-bal nɛ a ŋaa wʋkpuŋkperisiŋ mɩ lɛ. Ʋ nɛ tʋɔpʋl Tɩɩna.

⁵⁰ Ʋʋ fá nɩalɩŋ kala sɩɩ fáʋ nenige nɛ, doho-na kala lɛ.

⁵¹ Ʋ kɛŋ ʋ naduo-la kaa tɩɛnɛ a ŋmoo babiibalaa a ŋaa ba wɩaa kala pugi.

⁵² Ʋ kiri nɩbalaa ba kuoru kpasɩnɩŋ nyuŋ nɛ aŋ leŋ nɩalɩŋ sɩ kɛŋ ba tɩtɩa muuri hɔŋ.

⁵³ Ʋ joŋ kʋzɔŋŋɔɔ a pɩ summoo nɛ aŋ kiri nɩalɩŋ sɩ kɛŋ kɩaa ba kɛŋ nahɩllɩŋ mɩɩrɛ.

⁵⁴ Ʋ fa bil niiŋ nɛ a pɩ la naabalɩmaba dɩ ʋ jaŋ pɛ ʋ tɩntɩnnaa Iziral tɩŋŋaa lɛ. Wɩɩ-la ʋ fa sɩ bʋla kʋ ŋaa wʋtɩtɩɩ. Ʋ pɛ ba lɛ.

⁵⁵ Ʋ fa fá Abɩraham nenige nɛ. Ʋ saa jaŋ fá ʋ doho nɩaa kala ma nenige a kaa mʋ wuu.”

⁵⁶ Mɛɛrɩ sɩ bʋl wɩalɩŋ dɛrɛ, ʋ hɔŋ Ɛlɩzabɛt teeŋ a yi chɛnsɩŋ batori nɛ, aŋ-na mɩɩra mʋ dɩa.

Ba lʋl Jɔɔŋ, Wɩa lɩɩ-fooru-la

⁵⁷ Ŋɩɩ nɛ Ɛlɩzabɛt lʋlʋŋ yi. Ʋ lʋl hambolibie.

⁵⁸ Ʋ sɩ lʋl ŋɩɩ, ʋ pɛ-jʋʋraa arɩ ʋ naambiiriŋ nɩɩ ŋɩɩ Wɩa sɩ fá ʋ nenige. Ba tʋɔŋ kala tɔrɛ, ba jʋjʋɔsɛ.

⁵⁹ Bile sɩ yi tapʋlaa chori a magɛ dɩ ba keri ʋ peniŋ aŋ hɛ ʋ yɩrɩŋ, ba faa chɛ dɩ ba joŋ ʋ nyɩmma Zɛkarɩya yɩrɩŋ nɛ hɛ pʋ.

⁶⁰ Ŋɩɩ nɛ ʋ naaŋ vɩa aŋ bʋl dɩ ba hɛ Jɔɔŋ pʋ.

⁶¹ Nɩhɩasɩ-la bʋla pʋ arɩ ba bɩ naambii kala kɛnɛ ʋ yɩrɩŋ dii Jɔɔŋ.

⁶² Ŋɩɩ nɛ ba kɛŋ nɩsaa bʋl wɩaa ʋ nyɩmma teeŋ a pɩɛsʋ dɩ yɩrɩ bɛɛ nɛ ʋʋ chɛ dɩ ʋ hɛ pʋ.

⁶³ Zɛkarɩya ŋaa ba kɛŋ daa-bori-bie kaa kɔ dɩ ʋ ŋmʋnsɛ bile yɩrɩŋ a pɩba. Ba joŋo pʋ. Ʋ ŋmʋnsɛ daa-boro-la lɛ dɩ bile yɩrɩŋ nɛ Jɔɔŋ. Ba sɩ karɩma na bile yɩrɩŋ, ʋ ŋaaba wʋkpuŋkpere.

⁶⁴ Zɛkarɩya sɩ ŋaa ŋɩɩ dɛrɛ, ʋ niiŋ suri ʋ bɩra suomi a bʋbʋl wɩaa a dɩdɛnnɛ Wɩa.

⁶⁵ Nɩalɩŋ fa sɩ hɛ nɩmɛ a na wɩɩ-la sɩ ŋaa, fawʋllʋŋ kɛmba. Ba kɛŋ wɩɩ-la lɩɩ a bʋla gaarɛ Judiya tinteeŋ sɛmɛ-na kala, lee-la peelee sɩ yʋga.

⁶⁶ Nɩalɩŋ kala sɩ nɩɩ ŋɩɩ, ba kɛŋ wɩɩ-la bɩbɩɩnɛ ba tʋɔŋ lɛ aa bʋl, “Bie deeŋ saa jaŋ ŋaa kʋbɛɛ nɛ?” Ba na arɩ Wɩa doluŋ hɛ ʋ lɛ nɛ.

Zɛkarɩya bʋl wɩaa Wɩa Dɩŋ-zɔmʋŋ doluŋ lɛ

⁶⁷ Ŋɩɩ nɛ Wɩa Dɩŋ-zɔmʋŋ kʋ hɛ Zɛkarɩya lɛ ʋ bʋl wɩaa Wɩa doluŋ lɛ, ʋ sɩ,

⁶⁸ “Má leŋ dɩ la dɛnnɛ La Tɩɩna Iziral tɩŋŋaa Wɩa. Ʋ kɔ dɩ ʋ pɛ ʋ nɩaa lɛ nɛ a laaba ta.

⁶⁹ Ʋ lɩɩsɛ nɩduo nɛ pɩla dɩ ʋ kʋ laala ta. Ʋ lɩɩ Devit doho nɩaa tʋɔŋ nɛ.

⁷⁰ Faafaa kala nɛ Wɩa to ʋ wʋlaabʋllaa lɛ, a bʋla pɩla

⁷¹ arɩ ʋ jaŋ laala ta la dʋndɔŋŋɔɔ arɩ nɩalɩŋ kala sɩ bɛrɛla nɩsɩŋ lɛ.

⁷² Ʋ bʋla arɩ ʋ jaŋ fá la doho nɩaa nenige, a liise yi nii-zɔŋ-la ʋ sɩ bile ʋ dɩ la naabalɩmaba pɛgɛ.

^73-74 Ʋ fa bʋla pɩ la naabalɩma Abɩraham a ŋmɩɛsɛ arɩ ʋ jaŋ laala ta la dʋndɔŋŋɔɔ nɩsɩŋ lɛ a pɩla wombiiŋ dɩ la kɛŋ nyuduoŋ a tɩma pʋ.

⁷⁵ Ŋɩɩ lɛ nɛ la jaŋ to a ŋaa nɩa sɩ bɩ disiniŋ kɛnɛ, a kɛŋ tʋɔpʋla ʋ teeŋ la mɩɩsɩŋ kala lɛ.”

⁷⁶ Zɛkarɩya sɩ bʋl wɩaa deemba dɛrɛ, ʋ bʋl wɩaa a tɩgɛ ʋ bie ma lɛ, “Ŋ-na mɩ bii, ŋ jaŋ ŋaa Wɩɩ-balɩŋ wʋlaabʋllʋ. Ŋ jaŋ laa La Tɩɩna-la sɩ jaŋ kɔ sɩpaaŋ a wasɛ wombiiŋ bil ʋ lɛ.

⁷⁷ Ŋ jaŋ bʋla pɩ nɩalɩŋ sɩ ŋaa siri dɩ ba tou, dɩ Wɩa jaŋ joŋ ba wʋbɔŋŋɔɔ chɛba aŋ laaba ta.

⁷⁸ Wɩa kɛŋ zile aŋ fɩfá nɩaa nenige. Ʋ jaŋ laala ta a leŋ dɩ la hɔŋ pʋlʋmʋŋ tʋɔŋ.

⁷⁹ Pʋlʋŋ-la jaŋ lɩɩ Wɩa-jaŋ a pɔsɛ hɛ nɩalɩŋ kala sɩ hɔŋ birimiŋ tʋɔŋ a faa chɛ dɩ ba sʋʋ. Ʋ jaŋ dagɛla wombii-la sɩ kɛŋ yarɩfɩɛlaa dɩ la to.”

⁸⁰ Ŋɩɩ nɛ bile sii waa a hɛ yaraa a kɛŋ doluŋ arɩ wʋjɩmɩŋ. Ʋ mʋ hɛ tintee-hɩlɩŋ tʋɔŋ a mʋ yi tapʋlɩɩ-la ʋ sɩ kɛŋ ʋ tɩtɩa kaa kʋ lɩɩ dagɛ Iziral tɩŋŋaa.