JOSUA 18 - WƖA TENIŊ

Ba kɛŋ tintee-kaaŋ-la kpaa

¹ Iziral tɩŋŋaa fa sɩ yuo laa tintee-la, ba kala kʋ hilimi taŋ-la ba sɩɩ yɩrɛ Sɩlɔ lɛ, a pɛ lɛbɩ-la lɛ La TƖƖNA sɩ yie kɔ Iziral tɩŋŋaa teeŋ nɩmɛ.

² Ama Iziral tɩmma-la doho doho balɩpɛ nɛ fa ha ka a bɩ ba tinteeŋ kpaalɩŋ laa.

³ Ŋɩɩ nɛ Josua pɩɛsɛ Iziral tɩmma-la, “Ɛɛ nɛ ma chɩchɛ dɩ ma diene magɛ aŋ-na sii a laa tintee-la La TƖƖNA, ma naabalɩmaba Wɩa sɩ jaŋ joŋo pɩma dɩ ʋ ŋaa ma kʋŋ?

⁴ Má lɩɩsɛ baalaa batori doho na-kala tʋɔŋ, dɩ mɩ leŋ dɩ ba jʋʋ tintee-la, a bee na ŋɩɩ ʋ sɩ naga, aŋ ŋmʋnsɛ ŋɩɩ ba sɩ jaŋ kaa kpaa pɩ doho kala a mɩɩra kʋ bʋla pɩmɛ.

⁵ Ma jaŋ kɛnʋ a kpaa leree balɩpɛ. Juda doho nɩaa ha jaŋ hɛ wɩɩpɔsʋŋ nadiiŋ dɩɩrɩŋ tintee-la lɛ, dɩ Josɛf doho nɩaa ma ha hɛ wɩɩpɔsʋŋ nagʋa dɩɩrɩŋ tintee-la lɛ.

⁶ Dɩ ma nɛ mʋ a beŋ tintee-la a ŋmʋnsɛ ŋɩɩ ma sɩ jaŋ kɛnʋ a kpaa leree balɩpɛ-la a kʋ bʋla pɩmɛ, mɩ jaŋ tɔnsɔ pɩma La TƖƖNA Wɩa sɩpaaŋ.

⁷ Levi doho nɩaa-na bɩ kpaal kala kɛnɛ ma tʋɔŋ. Ba nɛ sɩ ŋaa Wɩɩsʋllɩ sɩpaalaaraa a tɩma pɩpɩ La TƖƖNA Wɩa ŋɩɩ, ba kpaalɩŋ nɛ ŋɩɩ. Gad arɩ Rubiŋ doho nɩaa arɩ Manasɛ doho nɩaa kpaa magɛ dɔŋɔ-la-na laa ba kpaalɩŋ nɛ Jɔdaŋ fuo-la cholo wɩɩpɔsʋŋ dɩɩrɩŋ, ʋ ŋaa ba kʋŋ. La TƖƖNA tɩntɩnna Mosis nɛ fa joŋo pɩba.”

⁸ Baala-la sɩ lɩa dɩ ba mʋ a beŋ tintee-la a na ŋɩɩ ba sɩ jaŋ kpaa, ŋɩɩ nɛ Josua bʋl ŋ-la a pɩba, “Má mʋ a beŋ tintee-la a ŋmʋnsɛ ŋɩɩ ʋ sɩ naga a kaa mɩɩra kɔ mɩ teeŋ. Mɩ jaŋ tɔnsɛ daha Sɩlɔ lɛ a pɩma La TƖƖNA sɩpaaŋ.”

⁹ Ŋɩɩ nɛ baala-la mʋ a beŋ tintee-la a ŋmʋnsɛ ŋɩɩ ba sɩ jaŋ kɛnʋ kpaa leree balɩpɛ a hɛ teniŋ lɛ a ŋmʋnsɛ tasɩ-la sɩ hɛ nɩmɛ a kaa mɩɩra kɔ Josua teeŋ Sɩlɔ lɛ.

¹⁰ Ŋɩɩ nɛ Josua tɔnsɛ Sɩlɔ lɛ a pɩba La TƖƖNA sɩpaaŋ, a kɛŋ tintee-la a kpaa pɩ Iziral tɩmma-la doho doho.

Kpaal-la Bɛnjamɩŋ sɩ laa

¹¹ Ba fa sɩ tɔnsɔ ŋɩɩ, Bɛnjamɩŋ doho nyɩŋ-nɩa nyɩŋ-nɩa nɛ laa sɩpaaŋ a joŋ ba kpaalɩŋ. Ba tinteeŋ nɛ hɛ Juda doho nɩaa arɩ Josɛf doho nɩaa tinteyee pɛgɛ:

¹² Ba tinteeŋ wɩɩpɔsʋŋ nagʋa dɩɩrɩŋ bʋa nɛ a chɩŋ Jɔdaŋ fuo-la lɛ a joŋ ŋɩɩ mʋ Jeriko wɩɩpɔsʋŋ nagʋa dɩɩrɩŋ tintee-la sɩ chulloo tuu, a tʋʋlɛ ŋɩɩ a mʋ wɩɩjʋʋlʋŋ dɩɩrɩŋ a mʋ tintee-la peelee sɩ yʋga, a kʋ lɩɩ Bɛf Avɛŋ tintee-hɩlɩɩ-la.

¹³ A lɩɩ nɩmɛ a cholo mʋ Lus tinteeŋ lee-la sɩ chulloo tuu a hɛ wɩɩpɔsʋŋ nadiiŋ dɩɩrɩŋ (ʋ nɛ ha Bɛtɛl), a bɩra joŋo tuu Atarɔf Adaa sɩ hɛ peel-la sɩ hɛ taŋ-la ba sɩɩ yɩrɛ Bɛf Horoŋ sɛmɛ-la sɩ hɛ bʋbʋɔŋ wɩɩpɔsʋŋ nadiiŋ dɩɩrɩŋ:

¹⁴ A lɩɩ Bɛf Horoŋ peel-la lɛ a tʋʋlɛ wɩɩpɔsʋŋ nadiiŋ dɩɩrɩŋ. Bʋa-la nɛ bɩra mɩɩra gʋrɛ wɩɩpɔsʋŋ nadiiŋ a to wɩɩjʋʋlʋŋ dɩɩrɩŋ a to ŋɩɩ kʋ lɩɩ Kɩrɩaf Baal (ʋ nɛ ha Kɩrɩaf Jɩarɩm), sɩ ŋaa Juda nɩaa taŋ. Ʋ wɩɩjʋʋlʋŋ dɩɩrɩŋ bʋa nɛ ŋɩɩ.

¹⁵ Ʋ wɩɩpɔsʋŋ nadiiŋ dɩɩrɩŋ bʋa ma nɛ, a chɩŋ Kɩrɩaf Jɩarɩm sɩ hɛ wɩɩjʋʋlʋŋ, a to ŋɩɩ a kʋ lɩɩ Nɛfɩtʋa lɩɩ-bulo-la.

¹⁶ Bʋa-la bɩra joŋ ŋɩɩ nɛ a tuu peel taala-la, a tʋʋlɛ Bɛŋ Hɩnɔm fuonaa-la a to Rafaɩ tɩŋŋaa fuonaaŋ wɩɩpɔsʋŋ nagʋa dɩɩrɩŋ. Ʋ nɛ ha to ŋɩɩ a tuu Hɩnɔm fuonaa-la, a joŋ ŋɩɩ mʋ to Jebus tɩŋŋaa taŋ-la wɩɩpɔsʋŋ nadiiŋ dɩɩrɩŋ tintee-la sɩ chulloo tuu a joŋo tuu taŋ-la ba sɩɩ yɩrɛ Ɛŋ-Rogɛl.

¹⁷ Ʋ nɛ mɩɩra gʋrɛ ŋɩɩ a mʋ wɩɩpɔsʋŋ nagʋa dɩɩrɩŋ a joŋ ŋɩɩ mʋ Ɛŋ-Sɛmɛs, a ha to ŋɩɩ mʋ yi Gɛlɩlɔf a tʋʋlɛ lee-la ba sɩɩ yɩrɛ Adumim wombii-la sɩ hɛ peelee pɛgɛ, a to ŋɩɩ mʋ tuu Rubiŋ nanʋala Bohaŋ tabɩɩŋ.

¹⁸ Ʋ bʋa nɛ ha to ŋɩɩ a mʋ yi Bɛf Araba lee-la sɩ chulloo tuu a hɛ wɩɩpɔsʋŋ nagʋa dɩɩrɩŋ, a joŋ ŋɩɩ mʋ tuu Araba fuonaaŋ.

¹⁹ Ʋ bɩra to ŋɩɩ nɛ a mʋ yi Bɛf Hogila wɩɩpɔsʋŋ nagʋa dɩɩrɩŋ tintee-la sɩ chulloo tuu, a to ŋɩɩ kʋ lɩɩ wɩɩpɔsʋŋ nagʋa tintee-la sɩ golibo jʋʋ Mʋgʋ-sʋʋŋ a hɛ Jɔdaŋ fuo-la niiŋ. Tintee-la wɩɩpɔsʋŋ nadiiŋ dɩɩrɩŋ bʋa nɛ ŋɩɩ.

²⁰ Jɔdaŋ fuo-la nɛ ŋaa tintee-la wɩɩpɔsʋŋ dɩɩrɩŋ bʋa. Lere-la sɩ dagɛ Bɛnjamɩŋ doho nyɩŋ-nɩaa tinteeŋ bʋa nɛ ŋɩɩ, sɛmɛ na-kala a gollo bal.

²¹ Tasɩ-la Bɛnjamɩŋ doho nyɩŋ-nɩa nyɩŋ-nɩa sɩ tɩɩ nɛ ŋ-la: Jeriko, Bɛf Hogila, Ɛmɛk Kɛzɩs,

²² Bɛf Araba, Zɛmarem, Bɛtɛl,

²³ Avɩm, Para, Ɔfɩra,

²⁴ Kɛfa Amoni, Ofini arɩ Geba. Tabalaa ŋaa fii arɩ balɩa nɛ a pɛ ba tabiisiŋ lɛ.

²⁵ Tasɩŋ dɔnsʋŋ ma nɛ ŋ-la: Gibioŋ, Rama, Bɛɛrɔf,

²⁶ Mɩzɩpa, Kɛfɩra, Moza,

²⁷ Rɛkɛm, Ɩrɩpɛɛl, Tarala,

²⁸ Zɛla, Haɩlɛf, arɩ Jebus tɩŋŋaa taŋ-la (ʋ nɛ ha Jerusalɛm), Gɩbɩa arɩ Kɩrɩaf. Tabalaa ŋaa fii arɩ banɛsɛ nɛ arɩ ba tabiisiŋ. Bɛnjamɩŋ doho nɩaa nyɩŋ-nɩa nyɩŋ-nɩa sɩ laa tintee-la ʋ ŋaa ba kʋŋ nɛ ŋɩɩ.