JOSUA 10 - WƖA TENIŊ

Wɩɩpɔsʋŋ chɩŋ dɩ-bala

¹ Ŋɩɩ nɛ Jerusalɛm kuoro Adoni-Zɛdɛk nɩɩ arɩ Josua yuo dii Aɩ a chei ʋ kala, a kpʋ ʋ kuoro arɩ ʋ fa sɩ ŋaa ŋɩɩ Jeriko arɩ ʋ kuoro lɛ. Ʋ bɩra nɩa arɩ Gibioŋ tɩŋŋaa ma sii mʋ ba dɩ Iziral tɩŋŋaa pɛ niiŋ nɛ, Iziral tɩŋŋaa leŋ ba hɔnɔ kpagɛba.

² Ŋɩɩ nɛ fawʋllʋŋ faasa jʋʋ ʋ dɩ ʋ nɩaa woruŋ, bɛɛ wɩaa Gibioŋ fa ŋaa tabal nɛ, a magɛ ta-jalɩa-la dɔnsʋŋ sɩ kɛŋ kuoroo. Ʋ fa yʋga kɩɩ Aɩ, ʋ nɩaa ma kala chaasa ŋaa bayuoro.

³ Ŋɩɩ nɛ Jerusalɛm kuoro Adoni-Zɛdɛk tɩŋ dɩ ba mʋ bʋla pɩ Hɛbʋrɔŋ kuoro Hoham, Jaamʋf kuoro Pɩram, Lakɩs kuoro Jafɩa arɩ Ɛgɩlɔŋ kuoro Debi,

⁴ a bʋl, “Má kʋ pɛ mɩ lɛ dɩ la yuo Gibioŋ tɩŋŋaa, bɛɛ wɩaa ba sii mʋ ba dɩ Josua arɩ Iziral tɩŋŋaa pɛ niiŋ nɛ.”

⁵ Ŋɩɩ nɛ Amɔrɩ tɩŋŋaa kuoroo deemba banɔŋ, Jerusalɛm kuoro, Hɛbʋrɔŋ kuoro, Jamʋf kuoro, Lakɩs kuoro arɩ Ɛgɩlɔŋ kuoro kala kʋ pɛ dɔŋɔ, a kɛŋ ba laalɩyuoroo ba mʋ golli Gibioŋ tɩŋŋaa hɛ a yuyuoba.

⁶ Ŋɩɩ nɛ Gibioŋ tɩmma-la tɩma pɩ Josua ba dɩhɔnʋŋ Gɩlɩgal lɛ a bʋl, “Sɩ́ ŋ tɩntɩnnaa vɩa ta, kɔ la teeŋ lɩma a laala ta. Pɛ la lɛ, bɛɛ wɩaa Amɔrɩ tɩŋŋaa kuorie-la kala sɩ hɛ tintee-la peelee sɩ yʋga lɛ sii kʋ hɛ dɔŋɔ nɛ a yuyuola.”

⁷ Ŋɩɩ nɛ Josua arɩ ʋ laalɩyuoroo kala, a pɛ nɩalɩŋ sɩ faasa jɩŋ laalɩ-yuonuŋ woruŋ, lɩɩ Gɩlɩgal lɛ a mʋmʋ.

⁸ La TƖƖNA bʋla pɩ Josua, “Sɩ́ leŋe dɩ fawʋllʋŋ kɛnɩŋ a tɩŋ nɩalɩŋ wɩaa, mɩ jomba hɛ ŋ nɩsɩŋ lɛ nɛ. Ba kʋŋkala bɩ ŋ sɩpaaŋ wuo chɩŋ.”

⁹ Tɩtaŋ-la kala Josua arɩ ʋ laalɩyuoroo lɩɩ Gɩlɩgal lɛ a vɛŋ ŋɩɩ a mʋ Gibioŋ. Ŋɩɩ nɛ ba mʋ a yuo dɩ Amɔrɩ tɩmma-la lɛ.

¹⁰ La TƖƖNA fa leŋe Amɔrɩ tɩmma-la wɩɩkala vʋgʋmɛ nɛ Iziral tɩŋŋaa laalɩyuoro-la sɩpaaŋ. Ba chaasa yuo diiba Gibioŋ lɛ, a kire to ba harɩŋ a joŋ wombii-la sɩɩ mʋ Bɛf Horoŋ a kpʋba ŋɩɩ a mʋ yi tasɩ-la ba sɩɩ yɩrɛ Azɛka arɩ Makɛda.

¹¹ Amɔrɩ tɩmma-la fa sɩɩ fá dɩ ba laa ba tɩtɩa Iziral tɩŋŋaa laalɩyuoroo nɩsɩŋ lɛ ŋɩɩ, a chɩŋ Bɛf Horoŋ lɛ a mʋmʋ Azɛka, La TƖƖNA leŋ duoŋ-tabɩɩ-balaa lɩɩ wɩa-nyuŋ a kʋ tuu telee yagɛba. Duoŋ-tabɩa-la fa kpʋ ba nɩ-daŋ nɛ a paala kɩɩ nɩalɩŋ Iziral laalɩyuoro-la sɩ kpʋa.

¹² Tapʋlɩɩ-la La TƖƖNA fa sɩ leŋe Iziral tɩŋŋaa yuo dii Amɔrɩ tɩmma-la, Josua fa bʋl ŋ-la nɛ a pɩ La TƖƖNA Iziral tɩŋŋaa sɩpaaŋ, “Ou wɩɩpɔsʋŋ, ha chɩŋ dɩ-bala a chugili Gibioŋ lɛ. Ou chɛnɛ, chugili Aɩjalɔŋ fuonaa-la lɛ.”

¹³ Ŋɩɩ nɛ wɩɩpɔsʋŋ chɩŋ dɩ-bala. Chɛnɛ ma bɩ vɛnɛ a mʋ yi bʋa-la lɛ Iziral tɩŋŋaa sɩ yuo dii ba dʋndɔŋŋɔɔ, arɩ ba sɩ ŋmʋnsɛ ŋɩɩ hɛ Jasa teniŋ tʋɔŋ. Wɩɩpɔsʋŋ jɩl nyu-gbaŋa aŋ chɩŋ nɩmɛ ŋɩɩ a mʋ yi tapʋl-piliŋ.

¹⁴ Tapʋlɩɩ dɔŋ kala ha bɩ ŋɩɩ naga, tapʋlɩɩ La TƖƖNA sɩ jegile nɩɩ nuhuobiine teeŋ. Wʋtɩtɩɩ, La TƖƖNA nɛ yuo laalɩŋ pɩ Iziral tɩŋŋaa.

¹⁵ Ŋɩɩ nɛ Josua arɩ Iziral laalɩyuoro-la kala mɩɩra mʋ ba dɩhɔnʋŋ Gɩlɩgal lɛ.

Iziral tɩŋŋaa kpʋ Amɔrɩ tɩŋŋaa kuoroo banɔŋ

¹⁶ Kuorusu-la banɔŋ fa fá nɛ a mʋ faa bʋ-bʋa tʋɔŋ taŋ-la ba sɩɩ yɩrɛ Makɛda lɛ.

¹⁷ Ba sɩ bʋla pɩ Josua arɩ ba mʋ faa nɩmɛ,

¹⁸ ʋ sɩ, “Má bilimi tabɩɩ-balaa a mʋ tɔ bʋ-bʋa-la niiŋ aŋ leŋ dɩ nɩaa chɩna pɔ.

¹⁹ Ama, ma ha sɩ́ ma dʋndɔmɔ-la leŋ, má kire to ba harɩŋ a yuoba a sɩ́ leŋe dɩ ba wuo yi ba jaŋ. Ma Tɩɩna Wɩa jomba a hɛ ma nɩsɩŋ lɛ nɛ.”

²⁰ Josua arɩ Iziral laalɩyuoroo kpʋ nɩalɩŋ jesiŋ kala nɛ, ba nɩaa mʋa nɛ wuo fá a mʋ jʋʋ ba sɩ saa kɛrɩsɩŋ a golli ba tasɩ-la a laa ba mɩɩsɩŋ.

²¹ Ŋɩɩ nɛ Josua laalɩyuoro-la kala mɩɩra kɔ ʋ teeŋ ba dɩhɔnʋŋ Makɛda lɛ arɩ yarɩfɩɛlaa. Nʋʋkala bɩ nii suro ba teeŋ.

²² Ŋɩɩ nɛ Josua bʋla pɩba, “Má suri bʋ-bʋa-la a chaarɛ kuorusu-la banɔŋ a kaa kɔ mɩ teeŋ.”

²³ Ba suri bʋa-la a kɛŋ Jerusalɛm kuoro, Hɛbʋrɔŋ kuoro, Jaamʋf kuoro, Lakɩs kuoro arɩ Ɛgɩlɔŋ kuoro a kaa kʋ lɩɩ.

²⁴ Ba sɩ kɛŋ kuoroo deemba kɔ Josua teeŋ, ʋ yɩrɛ Iziral tɩŋŋaa baalaa kala aŋ bʋla pɩ ʋ dɩ laalɩyuori-hɩasɩ-la sɩ mʋa, “Má kɔ a joŋ ma naasɩŋ a nʋɔsɛ kuoroo deemba baŋŋaa lɛ.” Ŋɩɩ nɛ ba kala kʋ lɩɩ a paa ba naasɩŋ a nʋɔsɛ ba baŋŋaa lɛ.

²⁵ Josua bɩra bʋla pɩba, “Má sɩ́ fawʋllʋŋ fá, má sɩ́ leŋe dɩ ma nandaasɩŋ yʋɔrɛ. Má nyɩrɛ bɔyɛ a kɛŋ tʋɔ-doluŋ. Wɩɩ-la La TƖƖNA sɩ jaŋ joŋo ŋaa ma dʋndɔmɔ-la kala sɩ jaŋ yuyuo ma lɛ nɛ ŋɩɩ.”

²⁶ Ŋɩɩ nɛ Josua kpʋ kuorie-la a paaba sagɛ tɩɩsɩŋ banɔŋ lɛ, a lemba nɩmɛ a mʋ yi dɩdaanɩŋ.

²⁷ Wɩa sɩ jʋa, Josua ŋaa ba sori ba tɩɩsɩ-la nyuŋ, a paaba yuo hɛ bʋ-bʋa-la lɛ ba fa sɩ jʋʋ faa, aŋ bilimi tabɩɩ-balaa a tɔ bʋa-la niiŋ. Tabɩa-la ha hɛ nɩmɛ arɩ jɩnɩŋ kala.

²⁸ Tapʋlɩɩ-la nɛ Josua bɩra yuo dii taŋ-la ba sɩɩ yɩrɛ Makɛda arɩ ʋ kuoro ma, a kpʋ nʋʋkala sɩ hɛ taŋ-la lɛ a chei ʋ kala, nɩbala ma bɩ ka. Wɩɩ-la Josua fa sɩ joŋo ŋaa Jeriko kuoro lɛ tɩtɩa nɛ ʋ joŋo ŋaa Makɛda kuoro ma lɛ.

Iziral tɩŋŋaa yuo dii wɩɩpɔsʋŋ nadiiŋ tasɩŋ

²⁹ Ŋɩɩ nɛ Josua arɩ Iziral tɩŋŋaa laalɩyuoroo kala sii Makɛda lɛ a mʋ taŋ-la ba sɩɩ yɩrɛ Libina a yuou.

³⁰ La TƖƖNA bɩra joŋ taŋ-la ma arɩ ʋ kuoro a hɛ Iziral laalɩyuoroo nɩsɩŋ lɛ. Ŋɩɩ nɛ ba kpʋ nʋʋkala sɩ hɛ taŋ-la lɛ, nɩbala ma bɩ ka. Wɩɩ-la ʋ sɩ joŋo ŋaa Jeriko kuoro lɛ nɛ, ʋ fa joŋo ŋaa Libina kuoro ma lɛ.

³¹ Ŋɩɩ nɛ Josua arɩ Iziral tɩŋŋaa laalɩyuoroo kala bɩra sii Libina lɛ a mʋ Lakɩs, a gollu chu a yuou.

³² La TƖƖNA bɩra joŋ Lakɩs ma a hɛ Iziral laalɩyuoroo nɩsɩŋ lɛ, Josua fa yuo diiu chɛ-lɩa chɛɛŋ nɛ. Nʋʋkala sɩ hɛ taŋ-la lɛ nɛ Josua kpʋ, a nagɛ ʋ sɩ ŋaa Libina tɩŋŋaa ŋɩɩ.

³³ Gɛza kuoro Horam fa sii mʋ dɩ ʋ pɛ Lakɩs tɩŋŋaa lɛ, Josua kpʋ ʋ dɩ ʋ laalɩyuoroo kala, nɩbala ma bɩ ka.

³⁴ Ŋɩɩ nɛ Josua arɩ Iziral laalɩyuoroo kala sii Lakɩs lɛ a mʋ Ɛgɩlɔŋ. Ba mʋ a gollu chu a yuou.

³⁵ Ba fa yuo diiu tapʋlɩɩ-la tɩtɩa nɛ, a kpʋ nʋʋkala sɩ hɛ Ɛgɩlɔŋ lɛ, a chei ʋ kala arɩ ba sɩ ŋaa Lakɩs ŋɩɩ.

³⁶ Ŋɩɩ nɛ Josua arɩ Iziral tɩŋŋaa laalɩyuoroo kala bɩra sii Ɛgɩlɔŋ lɛ, a mʋ yuo Hɛbʋrɔŋ.

³⁷ Ba fa yuo dii taŋ-la arɩ ʋ kuoro arɩ ʋ tabiisiŋ kala nɛ, a kpʋ nʋʋkala sɩ hɛ ba lɛ, nɩbala ma bɩ ka arɩ ba sɩ ŋaa ŋɩɩ Ɛgɩlɔŋ lɛ. Ba chaasa chei taŋ-la kala nɛ, a kpʋ nʋʋkala sɩ hɛ ʋ lɛ.

³⁸ Ŋɩɩ nɛ Josua arɩ Iziral tɩŋŋaa laalɩyuoroo kala mɩɩrɛ harɩŋ a mʋ Debi a yuou.

³⁹ Ba fa yuo a dii taŋ-la arɩ ʋ kuoro arɩ ʋ tabiisiŋ kala nɛ, a kpʋ nʋʋ na-kala sɩ hɛ nɩmɛ, a chaasa chei ba kala, nɩbala ma bɩ ka. Wɩɩ-la ba fa sɩ joŋo ŋaa Libina arɩ ʋ kuoro arɩ Hɛbʋrɔŋ lɛ tɩtɩa nɛ ba joŋo ŋaa Debi arɩ ʋ kuoro lɛ.

⁴⁰ Josua fa yuo dii tintee-la kala nɛ: Tintee-la peelee sɩ yʋga, Nɛgɛf tinteeŋ kala, dundollu-la kala sɩ hɛ wɩɩjʋʋlʋŋ dɩɩrɩŋ arɩ peelee lere-la sɩ chullo tutuu arɩ ba kuoroo kala. Ʋ fa bɩ ba kʋŋkala leŋe. Kʋŋ na-kala sɩɩ wiesu, ʋ chei ba kala nɛ arɩ La TƖƖNA Iziral tɩŋŋaa Wɩa fa sɩ dagɛ ŋɩɩ.

⁴¹ Josua fa yuo dii Kadɛs Banɩa nɛ, a to ŋɩɩ mʋ Gaza arɩ tasɩ-la kala sɩ hɛ Goseŋ lɛ a mʋ yi Gibioŋ.

⁴² Kuoroo deemba arɩ ba tinteyee kala nɛ Josua yuo dii bʋa bala lɛ, bɛɛ wɩaa La TƖƖNA Iziral tɩŋŋaa Wɩa nɛ yuo pɩba.

⁴³ Ŋɩɩ nɛ Josua arɩ Iziral tɩŋŋaa laalɩyuoroo kala mɩɩra kɔ ba dɩhɔnʋŋ Gɩlɩgal lɛ.