JOSUA 1 - WƖA TENIŊ

La TƖƖNA bʋl wɩaa pɩ Josua

¹ La TƖƖNA tɩntɩnna Mosis sʋʋŋ harɩŋ lɛ, La TƖƖNA fa bʋl wɩaa a pɩ Nuŋ nanʋala Josua, nɩɩ-la fa sɩ pɛ Mosis lɛ ba tɩtɩŋ.

² Ʋ sɩ, “Mɩ tɩntɩnna Mosis sʋba nɛ, ŋɩɩ wɩaa, ŋ dɩ Iziral tɩŋŋaa kala kɛŋ ma tɩtɩa hɛ dɔŋɔ a chol Jɔdaŋ fuo-la a mʋ tintee-la mɩ sɩ jaŋ joŋo pɩma.

³ Lee na-kala ma sɩ jaŋ joŋ ma naaŋ nʋɔsɛ, mɩ jaŋ joŋo pɩma arɩ mɩ sɩ bʋl ŋɩɩ a pɩ Mosis.

⁴ Ma tinteeŋ bʋa jaŋ chɩŋ tintee-hɩlɩɩ-la wɩɩpɔsʋŋ nadiiŋ a mʋ yi lee-la ba sɩɩ yɩrɛ Lɛbanɔŋ peele-la wɩɩpɔsʋŋ nagʋa, a chɩŋ fuo-bal-la ba sɩɩ yɩrɛ Yufireti sɩ hɛ wɩɩpɔsʋŋ dɩɩrɩŋ a kaa mʋ Hiti tɩŋŋaa tinteeŋ kala ŋɩɩ a mʋ yi mʋgʋ-bal-la ba sɩɩ yɩrɛ Mediterenia sɩ hɛ wɩɩjʋʋlʋŋ dɩɩrɩŋ.

⁵ Josua, ŋ mɩɩsɩŋ kala lɛ, nʋʋkala bɩ jaŋ wuo yuo diiŋ. Mɩ jaŋ hɛ ŋ teeŋ arɩ mɩ fa sɩ hɛ Mosis teeŋ ŋɩɩ. Mɩ bɩ jaŋ kɔ dɩ mɩ vɩaŋ ta koo a lɩɩ ŋ harɩŋ.

⁶ Nyɩrɛ ŋ bɔyɛ a kɛŋ tʋɔ-doluŋ, bɛɛ wɩaa ŋ nɛ jaŋ laa nɩaa deemba sɩpaaŋ dɩ ma mʋ laa tintee-la tɩɩ, tintee-la mɩ fa sɩ hɛ niiŋ a pɩ ba naabalɩmaba arɩ mɩ jaŋ joŋo pɩba.

⁷ Nyɩrɛ bɔyɛ a leŋ dɩ ŋ tʋɔŋ faasa dol. Fɩɛlɛ ŋ sɩaa a to wombii-la kala mɩ tɩntɩnna Mosis sɩ dagɩŋ. Pɔ dɩ ŋ sɩ́ begilu wombii-la lɛ a mʋ nadiiŋ koo nagʋa, dɩ wɩɩkala ŋ sɩɩ ŋaa vɛŋ woruŋ pɩŋ lee na-kala ŋ sɩ jaŋ mʋ.

⁸ Kɩkarɩmɛ teŋ-la Mosis sɩ ŋmʋnsɛ mɩ wombiee hɛ bʋa na-kala, aŋ kɛmba chʋchɔgɩsɛ ŋ tʋɔŋ lɛ tɩtaŋɩŋ arɩ wɩɩhɛyɛ, aŋ fɩɛlɛ ŋ sɩaa a to wɩalɩŋ kala ba sɩ ŋmʋnsa hɛ ʋ lɛ. Dɩ ŋ nɛ ŋaa ŋɩɩ, ŋ wɩɩkala jaŋ chaasa vɛŋ woruŋ.

⁹ Mɩ bʋla pɩŋ arɩ ŋ nyɩrɛ bɔyɛ a kɛŋ tʋɔ-doluŋ. Sɩ́ leŋe dɩ fawʋllʋŋ kɛnɩŋ dɩ ŋ nandaasɩŋ yʋɔrɛ, mɩ-na ŋ TƖƖNA Wɩa jaŋ hɛ ŋ teeŋ lee na-kala ŋ sɩɩ mʋ.”

¹⁰ Ŋɩɩ nɛ Josua hɛ Iziral tɩŋŋaa tɩntɩnnɩ-hɩasɩŋ a bʋl,

¹¹ “Má jʋʋ ma dɩhɔnʋŋ a gɔllɔ bʋla pɩ nɩaa kala dɩ ba ŋaa ba kʋdiilee a kɛŋ ba tɩtɩa hɛ dɔŋɔ. A chɩŋ jɩnɩŋ a kaa mʋ tapʋlaa batori pɛgɛ, ma jaŋ chol Jɔdaŋ fuoŋ a mʋ laa tintee-la ma TƖƖNA Wɩa sɩ joŋo pɩpɩma dɩ ʋ ŋaa ma kʋŋ.”

¹² Ŋɩɩ nɛ Josua bʋla pɩ Rubiŋ doho nɩaa, Gad doho nɩaa arɩ Manasɛ doho nɩaa kpaa magɛ dɔŋɔ-la ma,

¹³ “Má liisi wɩɩ-la La TƖƖNA tɩntɩnna Mosis sɩ bʋla pɩma arɩ ma TƖƖNA Wɩa joŋ Jɔdaŋ wɩɩpɔsʋŋ dɩɩrɩŋ tinteeŋ deeŋ a pɩma nɛ, dɩ ma hɔŋ a na wiese.

¹⁴ Ma haalaa, ma biiriŋ arɩ ma pʋsʋŋ jaŋ hɛ daha, tintee-la Mosis sɩ joŋo pɩma lɛ, ama ma laalɩyuoroo kala maga dɩ ba nyɩgɩlɛ nɛ a laa ma naambiiriŋ sɩpaaŋ a chol Jɔdaŋ fuo-la. Ʋ maga dɩ ma pɛ ma naambiiriŋ Iziral tɩŋŋaa lɛ

¹⁵ a kaa mʋ bʋa-la lɛ La TƖƖNA sɩ jaŋ pɩba dɩhɔnʋŋ arɩ ʋ sɩ pɩma dɩhɔnʋŋ ŋɩɩ, see ba ma sɩ na tintee-la ma TƖƖNA Wɩa sɩ jaŋ joŋo pɩba dɩ ʋ ŋaa ba kʋŋ. Ŋɩɩ harɩŋ, ma jaŋ wuo mɩɩra kʋ hɔŋ ma tinteeŋ deeŋ sɩ hɛ Jɔdaŋ wɩɩpɔsʋŋ dɩɩrɩŋ, kʋ-la La TƖƖNA tɩntɩnna Mosis sɩ joŋo pɩma.”

¹⁶ Ŋɩɩ nɛ ba bʋla pɩ Josua, “La jaŋ ŋaa wɩɩ-la kala ŋ sɩ sɩ la ŋaa, lee na-kala ŋ sɩ sɩ la mʋ, la jaŋ mʋ.

¹⁷ La sɩ to Mosis niiŋ ŋɩɩ, ŋɩɩ tɩtɩa nɛ la jaŋ to ŋ ma niiŋ, a leŋ dɩ La TƖƖNA Wɩa hɛ ŋ teeŋ arɩ ʋ fa sɩ hɛ Mosis teeŋ ŋɩɩ.

¹⁸ Nɩɩ-la kala sɩ bɩŋ sɛyɛ aŋ ŋaa wɩɩ a chei wɩalɩŋ ŋ sɩ daga, la jaŋ kpʋ tɩɩna. Ŋ-na nyɩrɛ ŋ bɔyɛ a kɛŋ tʋɔ-doluŋ.”