JONA 4 - WƖA TENIŊJona na baanɩŋ Wɩa nyuŋ 1 Ŋɩɩ nɛ Jona tʋɔŋ faasa chei ʋ na baanɩŋ. 2 Ʋ sʋl La TƖƖNA, “Ou, mɩ TƖƖNA, ŋ-la dee mɩ bʋl mɩ fa ha sɩ hɛ mɩ jaŋ lɛɛ? Ŋ-la wɩaa nɛ tɩɩ mɩ fa fá lɩma lɩma a mʋmʋ Taasɩs ŋɩɩ. Mɩ jɩma ŋ ŋaa Wɩa sɩ kɛŋ zile a fɩfá nɩaa nenige nɛ. Ŋ baanɩŋ bɩ lɩma lɩma ka sii. Ŋ cho nɩaa ma woruŋ aŋ ŋaa Wɩa sɩ bɩ cho ʋ joŋ wʋbɔŋ kala ŋaa nʋʋ lɛ. 3 Ou, mɩ TƖƖNA, lɛɛlɛ laa mɩ mɩɩsɩŋ, dɩ mɩ nɛ yaara sʋʋ, ʋ nɛ kpɩa mɩ sɩ weye.” 4 Ŋɩɩ nɛ La TƖƖNA pɩɛsʋ, “Ŋ kɛŋ wombiiŋ ŋ sɩ jaŋ na baanɩŋ?” 5 Ŋɩɩ nɛ Jona lɩɩ tabal-la lɛ, a mʋ hɔŋ wɩɩpɔsʋŋ dɩɩrɩŋ. Ʋ mʋ hɛ palɩŋ nɛ nɩmɛ a hɔŋ fɩɛlɩŋ lɛ dɩ ʋ na wɩɩ-la sɩ jaŋ ŋaa tabal-la nɩaa lɛ. 6 Ŋɩɩ nɛ Wɩa leŋ tɩa nyʋ a pɩ Jona fɩɛlɩŋ, dɩ ʋ hɔŋ a sɩ́ hɛɛŋ na. Jona tʋɔŋ tɔrɛ tɩa-la nyuŋ. 7 Ama sɩɩpʋʋraa Wɩa leŋ nanchʋɔlʋŋ dii tɩa-la ʋ sʋʋ. 8 Wɩa sɩ pɔsɔ, Wɩa leŋ pel-lɩmɩŋ arɩ wɩɩ-lɩmɩŋ kpʋ Jona nyuŋ, ʋʋ chɛ ʋ yiegi a cho dɩ ʋ sʋba. Ŋɩɩ nɛ ʋ bʋl, “Mɩ yaara sʋʋ, ʋ nɛ kpɩa mɩ sɩ weye.” 9 Ŋɩɩ nɛ Wɩa pɩɛsɛ Jona, “Ŋ kɛŋ wombiiŋ dɩ ŋ na baanɩŋ tɩa-la wɩaa?” Jona bʋl, “Oo, baanɩŋ paala kɛmmɛ a magɛ mɩ sʋʋ nɛ.” 10 Ŋɩɩ nɛ La TƖƖNA bʋla pʋ, “Tɩa-la ŋ sɩ bɩ chɔnsɔ, a bɩ bene ʋ waa, ʋ wɩaa nɛ fɩɛsɛ ŋ sɩɩŋ. Ʋ nyʋ chɛ-bala nɛ a sʋʋ chɛ-bala ma. 11 Ama Nɩnɩvɛ kɛŋ nɩaa bʋɩ-zɔlɔ arɩ mara nɛ sɩ bɩ ba nadiiŋ arɩ ba nagʋa jɩŋ, a kɛŋ pʋŋ-daŋ ma. Ʋ maga dɩ mɩ lɩɩsɛ mɩ jɩa ta tabalɩŋ deeŋ lɛ nɛɛ?” |
©Ghana Institute of Linguistics Literacy and Bible Translation 1984, 2014
Wycliffe Bible Translators, Inc.