JONA 3 - WƖA TENIŊ

Jona mʋ Nɩnɩvɛ

¹ Ŋɩɩ nɛ La TƖƖNA bʋl wɩaa pɩ Jona lɩamɩŋ lɛ,

² “Mʋ tabal-la ba sɩɩ yɩrɛ Nɩnɩvɛ a bʋl wɩalɩŋ mɩ sɩ bʋla pɩŋ.”

³ Ŋɩɩ nɛ Jona sɛɩ La TƖƖNA niiŋ a mʋ Nɩnɩvɛ. Nɩnɩvɛ fa jalɩa nɛ woruŋ. Tapʋlaa batori nɛ ŋ jaŋ joŋo lɩɩ sɛmpɛɛŋ dɔŋɔ a mʋ dɩdɛrɩŋ.

⁴ Ŋɩɩ nɛ Jona jʋʋ taŋ-la. Chɛ-bumbuŋ-la ʋ sɩ jʋa, ʋ heele bʋl, “Ʋ ka tapʋlaa mahɩŋ balɩa aŋ ka dɩ Wɩa chei Nɩnɩvɛ kala.”

⁵ Ba sɩ nɩɩ ŋɩɩ, Nɩnɩvɛ nɩaa laa Wɩa wɩaa dii. Ŋɩɩ nɛ ba sɩ dɩ nʋʋkala vɔɔ niiŋ, nɩhɩasɩŋ arɩ hambiisiŋ kala a laalɛ tʋɔ-chei gɛnnɩŋ.

⁶ Duoso-la sɩ yi Nɩnɩvɛ kuoro, ʋ sii ʋ kuoru kpasa nyuŋ, a wuri ʋ kuoru gɛnnɩŋ aŋ ma laalɛ tʋɔ-chei gɛnnɩŋ, a hɔŋ bumbugo lɛ.

⁷ Ŋɩɩ nɛ kuoro ŋaa ba heele pɩ Nɩnɩvɛ nɩaa a bʋl, “Kuoro arɩ ʋ nɩhɩasɩŋ sɩ nuhuobiiŋ koo pʋna kala bɩ maga dɩ ʋ dii kɩaa koo a nyʋa lɩɩŋ.

⁸ Ama má leŋ dɩ nʋʋkala laalɛ tʋɔ-chei gɛnnɩŋ, aŋ paa dɔnsʋŋ vɔɔ pʋsʋŋ a chaasa sʋl Wɩa woruŋ a leŋ yuosuŋ arɩ wʋbɔŋŋɔɔ ŋaanɩŋ.

⁹ Kapo, Wɩa baaŋ-la sɩ faasa sii la nyuŋ jaŋ fɩɛlɛ, dɩ ʋ joŋ la wʋbɔŋŋɔɔ chɛla dɩ la sɩ́ sʋʋ.”

¹⁰ Wɩa sɩ na dɩ ba ŋaa ŋɩɩ, a leŋ ba wʋbɔŋŋɔɔ ŋaanɩŋ, ʋ fá ba nenige, ʋ bɩ ba kpʋa arɩ ʋ fa sɩ bɩɩnɛ ŋɩɩ.