JOWƐL 2 - WƖA TENIŊ

Hɔbɩ-laalɩŋ

¹ Má ŋmʋʋ banyile Zaayɔŋ lɛ. Má ŋmoo doworo mɩ peel-la sɩ bɩ disiniŋ kɛnɛ nyuŋ. Nɩalɩŋ kala sɩ hɛ tintee-la lɛ, má chichel, bɛɛ wɩaa La TƖƖNA tapʋlɩɩ-la ka kɔ nɛ. Ʋ kpaga nɛ.

² Ʋ jaŋ ŋaa biriŋ lim tapʋlɩɩ, duoŋ-bɩlɩmbaanaa jaŋ tɔ dɩ leriŋ biri. A nagɛ wɩɩpɔsʋŋ sɩ yie guu tɔɔ lɩɩ ŋɩɩ peelee nyuŋ, ŋɩɩ nɛ laalɩyuoroo sɩ yʋga a kɛŋ doluŋ woruŋ jaŋ kɔ. Ba doho ha bɩ kɔ aŋ ka, maachie ma ba bɩra bɩ jaŋ kɔ.

³ Nyiniŋ jaŋ didii ba sɩpaaŋ, dɩ nyiŋgeliŋ ma sisii ba harɩŋ. Ba sɩpaaŋ tintee-la jaŋ nagɛ Ɛdɩŋ ŋmaŋkaa-la, ka ba harɩŋ dɩɩrɩŋ nagɛ tintee-hɩlɩŋ kʋŋ sɩ tuo. Kʋŋkala bɩ ba nɩsɩŋ lɛ ka fori.

⁴ Ba nagɛ janɩŋ nɛ, baa fa a nagɛ laalɩŋ janɩŋ nɛ.

⁵ Ba dɔmɔ nagɛ laalɩŋ janɩŋ torukoba dɔmɔ nɛ. Ba fɩla kikieli peelee nyu-gbaŋa, baa pɔsʋ a nagɛ sekelee sɩ hɛ nyiniŋ tʋɔŋ nɛ. Ba nagɛ laalɩyuori duoruŋ sɩ kɛŋ ba tɩtɩa hɛ dɔŋɔ dɩ ba yuo laalɩŋ nɛ.

⁶ Dɩ tinteyee nɩaa nɛ naba, ba tʋɔŋ kala yie vʋgʋmɛ nɛ, ba sɩaa biri.

⁷ Ba yie sii tʋɔrɛ a nagɛ bayuoroo nɛ, a fɩlaa kieli jeyee lɛ a nagɛ laalɩyuoroo. Ba kala yie kɩɛlɛ nɛ a vɩvɛŋ, ba bɩ gɛbɛ.

⁸ Ba bɩ dɔŋɔba ka gɛrɛ, ba kʋŋkala yie vɩvɛŋ nɛ tegi tegi. Ba yie yuo jʋʋ laalɩyuoroo tʋɔŋ, ka wɩɩkala bɩ ba wuo kɛrɛ.

⁹ Ba yie fá mʋ tabal-la lɛ, a jɩl ʋ jeeŋ a jʋʋ ʋ tʋɔŋ. Ba yie to tokoroba a jʋʋ dɩɩsɩŋ a nagɛ gaaraa.

¹⁰ Dɩ ba nɩɩ kɔ, tinteeŋ yie zigili nɛ, wɩa-nyuŋ ma dʋdɔŋ, wɩɩpɔsʋŋ arɩ chɛnɛ ma yie biri, chɛnwʋlaa ma bɩra bɩ chaanɛ.

¹¹ La TƖƖNA kpɩa ʋ laalɩyuoroo lɛ nɛ. Ʋ laalɩyuoroo bɩ nii kɛnɛ. Nɩalɩŋ sɩɩ to ʋ niiŋ ŋaa nɩduoru nɛ. La TƖƖNA tapʋlɩɩ-la ŋaa tapʋl-bal nɛ a kɛŋ fawʋllʋŋ woruŋ. Kʋbɛɛ nɛ jaŋ wuo nyalɩmɛ tapʋlɩɩ-la?

Má bɩrɩma lɩɩ ma wʋbɔŋŋɔɔ lɛ

¹² La TƖƖNA sɩ, “Lɛɛlɛ, má mɩɩra kɔ mɩ teeŋ arɩ ma tʋɔŋ kala, a vɔɔ niiŋ aŋ pɛ faasa yiyel.”

¹³ Má leŋ dɩ ma tʋɔŋ nɛ chei aŋ sɩ́ ma gɛnnɩŋ nɛ kɩɛsʋ. Má mɩɩra kɔ ma TƖƖNA Wɩa teeŋ, ʋ nɛ kɛŋ zile, a fɩfá nɩaa nenige. Ʋ baanɩŋ bɩ lɩma lɩma ka sii, aŋ cho nɩaa ma woruŋ. Ʋ yie kɛŋ ʋ tɩtɩa hɛ dɔŋɔ dɩ ʋ joŋ wɩaa chɛla nɛ bʋa na-kala a bɩ chɛ ʋ dɔgɩsɛla.

¹⁴ Kʋbɛɛ nɛ jɩma? Ʋ jaŋ wuo joŋ ʋ baanɩŋ ta aŋ fá ma nisusuŋ a joŋ kʋ-daŋ pɛ ma lɛ, dɩ ma kaa ŋaa mɩaa Wɩɩsʋlʋŋ arɩ kʋnyʋalaa Wɩɩsʋlʋŋ, a pɩ ma TƖƖNA Wɩa.

¹⁵ Má ŋmʋʋ banyile Zaayɔŋ lɛ, má leŋ dɩ ba vɔɔ nii-la sɩ zɔmɔ Wɩa teeŋ, má hilimi Wɩa yɩrɩŋ lɛ.

¹⁶ Má yɩrɛ nɩalɩŋ hɛ dɔŋɔ, a pɩɩsɛ ba disiniŋ ta. Má kɛŋ nɩhɩasɩ-la kʋ hɛ dɔŋɔ, má kɛŋ hambiisiŋ ma kʋ hɛ dɔŋɔ, nɩalɩŋ sɩɩ wasɛ yɩlɩŋ. Má leŋ dɩ ha-falɩŋ bala lɩɩ ʋ dɩa lɛ, dɩ ha-falɩŋ ma lɩɩ ʋ dɩɩ-pɩnɩŋ lɛ.

¹⁷ Má leŋ dɩ Wɩɩsʋllɩ sɩpaalaaraa, nɩalɩŋ sɩɩ tɩŋ La TƖƖNA sɩpaaŋ chɩŋ Wɩa dɩɩ-bal-la zawʋra arɩ Wɩɩsʋlʋŋ koru-la pɛgɛ a yiyel. Má leŋ dɩ ba bʋl, “La TƖƖNA, laa sʋlʋŋ, joŋo chɛ ŋ nɩaa. Sɩ́ leŋe dɩ nɩalɩŋ ŋ sɩ lɩɩsa ŋaa mɔmɩa, dɩ tinteyee nɩaa sisieri ba lɛ. Sɩ́ leŋe dɩ tinteyee nɩaa pɩɛsɛ arɩ nɩɩ nɛ ba Wɩa hɛ.”

Wɩɩ-la La TƖƖNA sɩ bʋla

¹⁸ Ŋɩɩ nɛ La TƖƖNA yaraa jaŋ bieri ʋ tinteeŋ wɩaa, dɩ ʋ fá ʋ nɩaa nisusuŋ.

¹⁹ La TƖƖNA jaŋ mɩɩra bʋla pɩba: “Mɩ jaŋ pɩma mɩaa, girep nɛnɛɛ sɩ-falɩŋ arɩ nʋʋŋ, dɩ ba yʋgɛ woruŋ dɩ ma dii vɔgɛ. Mɩ maachie bɩra bɩ jaŋ leŋ dɩ ma ŋaa mɔmɩa a pɩ tinteyee nɩaa.

²⁰ Mɩ jaŋ kiri wɩɩpɔsʋŋ nagʋa laalɩyuoroo dɩ ba mʋ dɩ-bolii a sɩ́ ma kpagʋ, a yigiba hɛ tintee-hɩlɩŋ sɩ bɩ kʋŋkala kɛnɛ lɛ. Ba nɩalɩŋ sɩ hɛ sɩpaaŋ jaŋ mʋ jʋʋ mʋgʋ-bal-la ba sɩɩ yɩrɛ Mʋgʋ-sʋʋŋ, ka nɩalɩŋ ma sɩ hɛ harɩŋ mʋ jʋʋ Mediterenia mʋgʋ-bal-la. Ba sʋɔra jaŋ laa leriŋ kala. Wʋtɩtɩɩ, La TƖƖNA ŋaa wʋbalaa nɛ a pɩla.”

²¹ Tinteeŋ, sɩ́ leŋe dɩ ŋ bɔyɛ joŋ. Leŋ dɩ ŋ tʋɔŋ tɔrɛ dɩ ŋ jʋjʋɔsɛ. Wʋtɩtɩɩ, La TƖƖNA chaasa ŋaa wʋbalaa nɛ.

²² Bagɩlaa, má sɩ́ leŋe dɩ fawʋllʋŋ kɛmma, tintee-hɩlɩŋ bɩra suomo nyʋnyʋ yaŋ nɛ. Tɩɩsɩŋ ka nɛŋ nɛ, tutogusuŋ arɩ girep tɩɩsɩŋ bɩra faasa nɩnɛŋ nɛ.

²³ Zaayɔŋ nɩaa, má leŋ dɩ ma tʋɔŋ tɔrɛ, má jʋjʋɔsɛ ma TƖƖNA Wɩa lɛ, bɛɛ wɩaa ʋ pɩma duoŋ-puso ŋɩɩ sɩ maga nɛ. Ʋ chaasa pɩma duonuŋ nɛ, duoŋ-puso arɩ yibiiŋ duonuŋ kala, arɩ ʋ fa sɩ vɛnɛ pɩpɩma ŋɩɩ.

²⁴ Tahɩŋ jaŋ bɩra su arɩ mɩaa. Pupo-balaa jaŋ bɩra su arɩ girep nɛnɛɛ sɩ-falɩŋ arɩ nʋʋŋ.

²⁵ Mɩ jaŋ bɩra pɩma kɩalɩŋ kala hɔbɔ sɩ die, kɩalɩŋ hɔbɩ-balɩŋ arɩ hɔbɩ-biisiŋ sɩ die, a pɛ hɔbɩ-la dɔnsʋŋ lɛ arɩ hɔbɩ-laal-la, mɩ laalɩyuori duoru-la mɩ fa sɩ joŋo hɛ ma lɛ.

²⁶ Ma jaŋ kɛŋ kʋdiilee yʋgɛ, a dii vɔgɛ, dɩ ŋɩɩ leŋ dɩ ma dɛnnɛ ma TƖƖNA Wɩa, Nɩɩ-la sɩ ŋaa wʋmagɩlaa pɩma. Hɩɩsɩŋ maachie bɩra bɩ jaŋ kɛŋ mɩ nɩaa.

²⁷ Ŋɩɩ nɛ ma jaŋ jɩŋ arɩ mɩ nɛ ma TƖƖNA Wɩa, a hɛ Iziral tinteeŋ, nʋʋ dɔŋ kala tuo a pɛ mɩ lɛ. Hɩɩsɩŋ maachie bɩra bɩ jaŋ kɛŋ mɩ nɩaa.

La TƖƖNA tapʋlʋŋ

²⁸ Ŋɩɩ harɩŋ, mɩ jaŋ joŋ mɩ Dɩma hɛ nʋʋkala lɛ. Ma hambolibiisiŋ arɩ ma hantolibiisiŋ jaŋ bʋbʋl wɩaa mɩ doluŋ lɛ, ma nɩhɩasɩŋ ma jaŋ duduosi duosoo, ma bapʋɔsaa ma jaŋ nɩna wɩaa a nagɛ duosoo tʋɔŋ.

²⁹ Mɩ jaŋ joŋ mɩ Dɩma hɛ mɩ tɩntɩnnaa lɛ, baalaa arɩ haalaa kala, bʋa-la lɛ.

³⁰ Mɩ jaŋ ŋaa wʋmagɩlaa wɩa-nyuŋ arɩ tinteeŋ lɛ. Chalɩŋ jaŋ jaasɛ, dɩ nyiniŋ didii, dɩ nyʋɔsʋŋ tɔ a nagɛ duoŋ-bɩlɩmbaanaa.

³¹ Wɩɩpɔsʋŋ jaŋ biri, dɩ chɛnɛ fɩɛsɛ a nagɛ chalɩŋ, ka dɩ mɩ-na ma TƖƖNA tapʋl-bal-la sɩ faasa kɛŋ fawʋllʋŋ-na kɔ.

³² Nɩɩ-la kala sɩ jaŋ yɩrɛ mɩ-na ma TƖƖNA yɩrɩŋ, mɩ jaŋ laaʋ ta, bɛɛ wɩaa, Zaayɔŋ peel-la arɩ Jerusalɛm lɛ laatanɩŋ jaŋ hɛ nɩmɛ, arɩ mɩ-na ma TƖƖNA sɩ bʋl ŋɩɩ. Ba nɛ ŋaa nɩkaana-la mɩ-na ma TƖƖNA sɩ lɩɩsa.