JOWƐL 1 - WƖA TENIŊ

¹ La TƖƖNA bʋl wɩaa pɩ Pɛtʋɛl nanʋala Jowɛl.

Hɔbɔ kʋ tɔ leriŋ

² Nɩhɩasɩŋ, má nɩɩ wɩɩŋ deeŋ, ma nɩalɩŋ kala sɩ hɛ tinteeŋ lɛ, má jegile nɩɩ. Wʋdoho deeŋ ha ŋaa ma mɩɩsɩŋ bʋa lɛ koo ma naabalɩmaba mɩɩsɩŋ bʋa lɛɛ?

³ Má bʋlʋ pɩ ma biiriŋ, dɩ ma biiriŋ ma bʋlʋ a pɩ ba biiriŋ, dɩ ba ma bʋlʋ pɩ biiri-la ba ha sɩ jaŋ lʋl.

⁴ Kɩalɩŋ hɔbɩ-laalɩŋ sɩ die aŋ ka, hɔbɩ-balaa kʋ diiba. Kɩalɩŋ hɔbɩ-bala-la ma sɩ die aŋ ka, hɔbɩ-biisiŋ ma kʋ diiba. Kɩalɩŋ hɔbɩ-biisi-la ma sɩ die aŋ ka, hɔbɔ dɔnsʋŋ ma kʋ diiba.

⁵ Má sii doŋ lɛ sɩ-nyʋara, a yel. Má ŋmoo niiŋ, ma nɩalɩŋ kala sɩɩ nyʋa girep nɛnɛɛ sɩnɩŋ. Má ŋmoo niiŋ a tɩŋ girep nɛnɛɛ sɩ-falɩɩ-la wɩaa, bɛɛ wɩaa ba kɛnʋ vaara laa nɛ ma niiŋ lɛ.

⁶ Tintee nɩaa nɛ kɔ dɩ ba yuo mɩ tinteeŋ, ba kɛŋ doluŋ nɛ woruŋ, ba bɩ nii kɛnɛ. Ba nyɩlaa nagɛ naachigiŋ nyɩlaa nɛ, a duomo nagɛ naachigi-haala kɩaa.

⁷ Ba chei mɩ girep tɩɩsɩŋ nɛ a gbegisi mɩ tutogusuŋ. Ba fɩsɛ ba harɩŋ puruŋ nɛ a joŋo yuo ta, ka ba naakelee kala pʋlla chɩŋ.

⁸ Má yel a nagɛ hatolo sɩ laalɛ tʋɔ-chei gɛnnɩŋ a yiyel baala sɩ sʋgʋ dɩ ʋ jaa lɛ.

⁹ Ba giri mɩaa Wɩɩsʋlʋŋ arɩ kʋnyʋalaa Wɩɩsʋlʋŋ ta nɛ La TƖƖNA dɩɩ-balɩŋ lɛ. Ŋɩɩ leŋ Wɩɩsʋllɩ sɩpaalaaraa yiyel, nɩalɩŋ sɩɩ tɩŋ La TƖƖNA sɩpaaŋ.

¹⁰ Bagɩsɩŋ kala cheye nɛ, tinteeŋ kala hɩl. Mɩaa kala nɛ cheye, girep nɛnɛɛ sɩ-falɩŋ ma dɛrɛ, nʋʋŋ ma lɛl.

¹¹ Paaraa, má leŋ dɩ ma tʋɔŋ chei, má ŋmoo niiŋ, ma girep tɩɩ-paaraa. Má leŋ dɩ ma tʋɔŋ chei mɩaa arɩ nyonso wɩaa, bɛɛ wɩaa ba chei bagɩsɩŋ kɩalɩŋ ma sɩ jaŋ kʋŋ nɛ.

¹² Girep tɩɩsɩŋ kala hɩla nɛ, tutogusuŋ ma kala yuori, a pɛ kampoiŋ, abɛ tɩɩsɩŋ arɩ apʋl tɩɩsɩŋ lɛ. Baga tɩɩsɩŋ kala hɩla nɛ. Wʋtɩtɩɩ, nuhuobiinee tʋɔtɔrʋŋ kala lɛlɛ nɛ.

Wɩa sɩ Iziral tɩŋŋaa bɩrɩma lɩɩ ba wʋbɔŋŋɔɔ lɛ

¹³ Wɩɩsʋllɩ sɩpaalaaraa, má laalɛ tʋɔ-chei gɛnnɩŋ a yel, má ŋmoo niiŋ, ma nɩalɩŋ sɩɩ tɩŋ Wɩɩsʋlʋŋ koru-la lɛ. Má kɔ, a laalɛ tʋɔ-chei gɛnnɩŋ tɩtaŋɩŋ kala, ma nɩalɩŋ sɩɩ tɩŋ La TƖƖNA sɩpaaŋ, bɛɛ wɩaa, mɩaa Wɩɩsʋlʋŋ arɩ kʋnyʋalaa Wɩɩsʋlʋŋ kɩaa bɩra tuo Wɩa dɩɩ-balɩŋ lɛ.

¹⁴ Má leŋ dɩ nɩaa vɔɔ nii-la sɩɩ tɔrɛ Wɩa tʋɔŋ, má hilimi Wɩa yɩrɩŋ lɛ. Má yɩrɛ nɩhɩasɩŋ arɩ nɩalɩŋ kala sɩ hɛ tintee-la lɛ dɩ ba kɔ ma TƖƖNA Wɩa dɩa, a yele pɩ La TƖƖNA.

¹⁵ Tapʋlɩɩ-la kpaga nɛ. La TƖƖNA tapʋlʋŋ kpaga nɛ, doluŋ kala Tɩɩna jaŋ chei leriŋ tapʋlɩɩ-la.

¹⁶ Laa beŋ nɛ ka ba chichei la kʋpɛrɛɛ. Tʋɔtɔrʋŋ bɩra tuo, nɩaa bɩra bɩ jʋɔsɛ Wɩa dɩɩ-balɩŋ lɛ.

¹⁷ Kʋduuloo ka sʋʋ nɛ tinteeŋ sɩ hɩla. Mɩaa tuo dɩ ba tʋɔlɛ, ŋɩɩ leŋ virisiŋ wuoli, nɔŋ-virisiŋ wuoli a kala chei.

¹⁸ Losuŋ kɛŋ nɛsɩŋ nɛ ba yiyel, piesee ma nɩna hɛɛŋ, bɛɛ wɩaa yaŋ tuo dɩ ba dii.

¹⁹ La TƖƖNA, ŋ nɛ mɩɩ yɩrɛ, bɛɛ wɩaa nyiniŋ dii pʋsʋŋ dɩ-diilee kala nɛ, nyiŋgeliŋ lieri tɩɩsɩŋ kala.

²⁰ Bagɩlaa ma paala yele pɩpɩŋ nɛ, a chɩchɛ lɩɩŋ, bɛɛ wɩaa fuonuŋ kala hʋa nɛ, nyiniŋ dii yaŋ kala.