JOB 9 - WƖA TENIŊ

Job sɩ bʋl wɩalɩŋ a mʋ tɩgɛ Balɩdad wʋbʋlaa lɛ

¹ Job sɩ:

² “Mɩ jɩma wɩalɩŋ ŋ sɩ bʋla ŋaa wʋtɩtɩɩba nɛ. Ama ɛɛ nɛ nuhuobiine jaŋ wuo kɛŋ tʋɔpʋla Wɩa teeŋ?

³ Ɛɛ nɛ nʋʋ jaŋ wuo kɛŋ wɩɩ kaa lɛrɛ ʋ teeŋ? Dɩ ʋ nɛ pɩɛsɛ wɩaa bʋɩ, ŋ bɩ jaŋ wuo laa wʋbala ma a bʋl.

⁴ Wɩa wʋjɩmɩŋ yʋga, ʋ doluŋ ma pʋrɩgɛ leriŋ kala. Kʋbɛɛ nɛ ha wuo magɩsɛ Wɩa dɩ wɩɩ bɩ ʋ lɛ ŋaa?

⁵ Ʋ yie churi peelee a dɩ ba lɛ, dɩ ʋ baanɩŋ nɛ sii ba nyuŋ, ʋ kɛmba wuro chu.

⁶ Ʋ yie kɛŋ tinteeŋ zigili a tuu kɛŋ ʋ gentine pɛ.

⁷ Dɩ ʋ nɛ sɩ wɩɩpɔsʋŋ sɩ́ pɔsʋ, ʋ bɩ pɔsɛ, dɩ ʋ nɛ tɔ chɛnwʋlaa ma, ba bɩ chaanɛ.

⁸ Ʋ dʋndʋŋa nɛ ŋaa wɩa-nyuŋ a leŋ ʋ jɛrɛ, aŋ vɩvɛŋ mʋgʋ-balɩŋ lɩɩ-peliŋ nyuŋ.

⁹ Wɩa nɛ ŋaa chɛnwʋla-la sɩ chige chɩŋ wɩa-nyuŋ wɩɩpɔsʋŋ nagʋa dɩɩrɩŋ arɩ chɛnwʋla-la sɩ chige chɩŋ wɩa-nyuŋ wɩɩpɔsʋŋ nadiiŋ dɩɩrɩŋ.

¹⁰ Ʋ yie ŋaa wʋmagɩlaa nʋʋ sɩ bɩ ba bʋbʋɔŋ wuo jɩŋ, a ŋɩŋaa wʋkpuŋkperisiŋ sɩ bɩ nii kɛnɛ.

¹¹ Dɩ ʋ nɛ kʋ kielimi bal, mɩ bɩ jaŋ wuo naʋ. Dɩ ʋ nɛ mʋa, mɩ bɩ jaŋ wuo jɩmʋ.

¹² Dɩ ʋ nɛ kɛŋ kʋŋ laa, kʋbɛɛ nɛ jaŋ wuo bʋl ʋ sɩ́ ŋɩɩ ŋaa? Kʋbɛɛ nɛ jaŋ wuo pɩɛsʋ arɩ wʋbɛɛ nɛ ʋ ŋɩŋaa ŋɩɩ?

¹³ Dɩ Wɩa baanɩŋ nɛ sie, wɩɩkala bɩ ʋ wuo kɛrɛ. Ʋ yie chei ʋ dʋndɔmɔ-la kala sɩ pɛ mʋgʋ-balɩŋ tʋɔŋ kʋbɔŋ-la lɛ, ba yuyuou nɛ.

¹⁴ Ɛɛ nɛ saa mɩ jaŋ wuo kɛŋ wɩaa lɩlɛrɛ Wɩa teeŋ? Wʋbɛɛba nɛ mɩ jaŋ wuo kaalɛrɛ ʋ teeŋ?

¹⁵ Arɩ mɩ sɩ bɩ wɩɩ cheye ma kala, mɩ paala bɩ jɩŋ wɩɩ-la mɩ sɩ jaŋ bʋla pʋ. Wɩɩ-la mɩ sɩ jaŋ wuo ŋaa nɛ: Dɩ mɩ sʋl Wɩa sɩ jaŋ diimi sarɩya dɩ ʋ fá mɩ nenige.

¹⁶ Dɩ mɩ nɛ paala yɩrʋ dɩ la mʋ sarɩya dɩ-diiliŋ, dɩ ʋ sɛɩ ma, mɩ bɩ laa dii arɩ ʋ jaŋ jegile nɩɩ mɩ teeŋ.

¹⁷ Ʋ jaŋ leŋ dɩ duoŋ-pel-duoŋ cheimi, a leŋ dɩ mɩ naawɩɩlaa wasa pʋŋa pɛ, ka mɩ bɩ wɩɩ ma cheye.

¹⁸ Ʋ bɩ jaŋ leŋ dɩ mɩ na wiese mʋa ma, ama ʋ jaŋ leŋ dɩ mɩ hɛɛŋ faasa yʋgɛ.

¹⁹ Dɩ doluŋ nɛ, ʋ nɛ kɛŋ doluŋ. Dɩ wʋtɩtɩɩ ma nɛ, kʋbɛɛ nɛ jaŋ wuo kɛnʋ mʋ sarɩya dɩ-diiliŋ?

²⁰ Dɩ mɩ nɛ paala bɩ wɩɩ jɩŋ ma, mɩ niiŋ wʋbʋlaa jaŋ cheimi. Dɩ mɩ nɛ paala bɩ wʋcheeli kala kɛnɛ ma, ʋ ha jaŋ joŋ cheeriŋ pɩmɛ.

²¹ Arɩ mɩ sɩ bɩ wʋcheeli kala kɛnɛ ma, mɩ bɩ mɩ tɩtɩa wɩaa chɩla, mɩ mɩɩsɩŋ paala bɩ bʋbʋa kala kɛnɛ a pɩmɛ.

²² Dabaŋ kala tuo, ŋɩɩ nɛ mɩ bʋl, ‘Wɩa yie chei nɩalɩŋ sɩ bɩ wʋcheeli kala kɛnɛ arɩ nɩbɔŋŋɔɔ hɛ dɔŋɔ nɛ.’

²³ Dɩ nyanyal bɔŋŋɔɔ nɛ guu kpʋ nɩaa, Wɩa yie mʋmɔŋ nɩalɩŋ sɩ bɩ wɩɩ cheye nɛ.

²⁴ Dɩ ba nɛ joŋ tinteeŋ hɛ nɩbɔŋŋɔɔ nɩsɩŋ lɛ, Wɩa yie leŋ sarɩya diiree nyʋlɩmɛ nɛ, a bɩ wʋtɩtɩɩ ka na. Dɩ Wɩa dee bɩ ŋɩɩ ŋaa, kʋbɛɛ nɛ ŋaa?

²⁵ Mɩ tapʋlaa ka bal nɛ lɩma lɩma, a kɩɩ nɩa sɩɩ fá, baa bal nɛ, ba paala bɩ tʋɔtɔrʋŋ mʋa ma kɛnɛ mɩ teeŋ.

²⁶ Baa bal nɛ lɩma lɩma, a nagɛ lɩɩŋ daboro sɩɩ fá lɩɩŋ tʋɔŋ, a nagɛ kachuuŋ sɩɩ tuu dɩ ʋ joŋ kʋa.

²⁷ Dɩ mɩ nɛ sɩ, mɩ jaŋ leŋ wɩaa deemba ŋmɛnɩŋ ma, a sɩ́ mɩ sɩaa kaa nyal aŋ mʋmɔŋ ma,

²⁸ mɩ bɔyɛ ha yie jujoŋ nɛ mɩ hɛɛ-la lɛ, bɛɛ wɩaa mɩ jɩma ŋ-na Wɩa bɩ jaŋ lemmi ta arɩ mɩ bɩ wɩɩ cheye.

²⁹ Mɩ sɩ folo jɩŋ arɩ mɩ laa cheeriŋ nɛ, bɛɛ nɛ tɩɩ mɩ jaŋ bɩra lɔlɔ tɩta pɛɩ?

³⁰ Dɩ mɩ nɛ paala fo chɛnfɛnnɩŋ ma, a kɛŋ sɛhɩyɛ sɔŋ mɩ nɩsaa,

³¹ ŋ jaŋ yigimi hɛ buotuoŋ sɩ kɛŋ vʋchɔɔŋ lɛ, dɩ mɩ kala birisi, dɩ mɩ gɛnnɩŋ ma paala bɛrɛmɛ.

³² Wɩa bɩ nuhuobiiŋ ŋaa, mɩ sɩ jaŋ wuo laa wɩaa bʋl ʋ teeŋ, dɩ mɩ dɩ ʋ wuo bʋl wɩaa sarɩya dɩ-diiliŋ.

³³ Dɩ nʋʋ nɛ fa jaŋ wuo jʋʋ mɩ dɩ Wɩa pɛgɛ, a laa mɩ dɩ Wɩa wɩɩŋ jɩma bʋla pɩla,

³⁴ nʋʋ sɩ jaŋ lɩɩsɛ hɛɛ-la Wɩa sɩ joŋo hɛ mɩ lɛ, dɩ mɩ bɩra sɩ́ fawʋllʋŋ fá a mʋ tɩgɛ ʋ sɩ jaŋ dɔgɩsɛmɛ lɛ.

³⁵ Ŋɩɩ nɛ mɩ jaŋ bʋl wɩaa aŋ bɩ ʋ ka fá, ama lɛɛlɛ wɩaa sɩ nagɛ ŋɩɩ, mɩ bɩ wɩɩ wuo bʋl.