JOB 8 - WƖA TENIŊ

Wɩalɩŋ Balɩdad ma sɩ bʋla

¹ Ŋɩɩ nɛ Balɩdad Sʋa tɩɩna-la pɩɛsɛ:

² “Ɛɛ nɛ ŋ chɛ ŋ bʋl wɩaa deemba a diene magɛ? Wɩalɩŋ kala ŋ sɩɩ bʋl ŋaa peliŋ nɛ.

³ Wɩa bɩ wʋtɩtɩɩ kaa bɩbɩrɩmɛ. Wɩa, doluŋ kala Tɩɩna bɩ wʋtɩtɩɩ harɩŋ ka lɩɩ.

⁴ Ŋ biiriŋ sɩ ŋaa wʋbɔmʋŋ ʋ lɛ, ʋ joŋ ba wʋbɔŋ-la chɩmɩŋ a tiŋ ba lɛ nɛ.

⁵ Ama dɩ ŋ nɛ bee chɛ Wɩa, a sʋl Wɩa doluŋ kala Tɩɩna,

⁶ dɩ ŋ nɛ ŋaa nɩpʋla dɩ ŋ wɩaa tʋʋlɛ, Wɩa jaŋ kʋ pɛ ŋ lɛ a leŋ dɩ ŋ bɩra kɛŋ kɩalɩŋ kala ŋ fa sɩ kɛnɛ.

⁷ Ŋ dɩ-suomuŋ jaŋ nagɛ ʋ muuro, ama ŋ maachie dʋa jaŋ yʋgɛ woruŋ.

⁸ Pɩɛsɛ faafaa nɩaa a na wɩalɩŋ ba naabalɩmaba sɩ gʋnna.

⁹ Dɩa deeŋ tɛgɛɛ nɛ ba lʋlla, la-na bɩ wɩɩkala jɩŋ. Tapʋlɩa-la la sɩ jaŋ hɛ dʋnɩa lɛ bɩ kɩa ŋaa, ba nagɛ daaliimiŋ sɩɩ lɛl nɛ.

¹⁰ Leŋ dɩ la naabalɩmaba-la dagɩŋ, ba jaŋ joŋ wɩalɩŋ ba sɩ jɩma a dagɩŋ.

¹¹ Saŋgɛɛŋ bɩ jaŋ wuo waa yi lee-la lɩɩŋ sɩ bɩ yʋgɛ, ŋ bɩ jaŋ wuo na fuolo-ŋmʋl lee-la lɩɩŋ sɩ tuo.

¹² Dɩ ba nɛ ha bɩ waa magɛ dɩ ba ku ma, dɩ lɩɩŋ nɛ hʋa, ba nɛ yie laa sɩpaaŋ hɩl yaŋ kala lɛ.

¹³ Ŋɩɩ nɛ ʋ jaŋ nagɛ a pɩ nɩalɩŋ kala sɩ yʋ Wɩa lɛ, ba yɩɛlaa jaŋ dɛrɛ.

¹⁴ Kɩalɩŋ lɛ ba sɩ joŋ ba yɩɛlaa hɛ bɩ doluŋ kɛnɛ mʋa ma, ba nagɛ badɛrɛ ŋmɛsɩŋ nɛ.

¹⁵ Ba yie yelli badɛrɛ ŋmɛsɩ-la, ba kɛrɛ. Ba laara kɛŋ ŋmɛsɩ-la, ama ba bɩ ba lɛ wuo pɛ ba chɩchɩŋ.

¹⁶ Ba nagɛ tɩa sɩ vɔgɛ lɩɩŋ nɛ, ka wɩa ma pɔsɔ hɩhɛ ʋ lɛ, ʋ naakelee jɛrɛ laa tinteeŋ kala.

¹⁷ Ʋ naapoloo tuu vɔɔ kɛŋ tabɩaa sɩ gulumo pɩŋ, aa chɛ leriŋ ba lɛ.

¹⁸ Ama dɩ ba nɛ kɛnʋ churi, nʋʋkala bɩ jaŋ jɩŋ arɩ ʋ fa chɩŋ nɩmɛ.

¹⁹ Wʋtɩtɩɩ, ʋ jaŋ sʋʋ, ka dɩ tɩɩsɩŋ dɔnsʋŋ laa ʋ leriŋ.

²⁰ Wʋtɩtɩɩ, Wɩa bɩ jaŋ vɩa nʋʋ sɩ bɩ wʋcheeli kala kɛnɛ ta, koo a pɛ nɩbɔŋŋɔɔ lɛ dɩ ba kɛŋ doluŋ.

²¹ Wɩa jaŋ leŋ dɩ mɔmʋŋ bɩra su ŋ niiŋ, dɩ ŋ jʋɔsa ŋɩŋaa goŋ.

²² Ʋ jaŋ leŋ dɩ hɩɩsɩŋ dii ŋ dʋndɔŋŋɔɔ, dɩ nɩbɔŋŋɔɔ dɩɩsɩŋ ma lɛl.”