JOB 7 - WƖA TENIŊ

¹ Dɩ nuhuobiine nɛ hɛ dʋnɩa deeŋ lɛ, ʋ kɛŋ tɩntɩŋ-duoruŋ nɛ dɩ ʋ tɩŋ, ʋ mɩɩsɩŋ lɛ ʋ jaŋ lɔl a nagɛ pa-chɩŋ-diire sɩ yie lɔl ŋɩɩ.

² Ʋ nagɛ yomo sɩ yie cho dɩ wɩa jʋʋ lɩma nɛ, koo pa-chɩŋ-diire sɩ gbɛrɛ a chichel dɩ ʋ laa ʋ time.

³ Chɛnsɩŋ sɩɩ bal ŋɩɩ bɩ bʋbʋɔ kɛnɛ mɩ teeŋ, tɩtaŋ na-kala mɩ nɩna hɛɛŋ.

⁴ Dɩ mɩ nɛ pɩna tɩtaŋɩŋ, taŋ yie dieni nɛ woruŋ aŋ-na pʋl, mɩ yie pɩna bilimi ŋɩɩ nɛ, a chɩchɛ dɩ taŋ pʋl lɩma.

⁵ Mɩ yaraa kala nɛ tɔ arɩ nanchʋɔlaa arɩ chalɩŋ sɩ hɩla. Mɩ yaraa kala verigi a lɩlɩɩ nʋɔlʋŋ.

⁶ Mɩ tapʋlaa ka dɛrɛ nɛ lɩma lɩma, a nagɛ gɛrɩpɛ-yuoro kpʋlʋŋ-kpoguluŋ sɩɩ fá lɩma lɩma ŋɩɩ, ba dɛrɛ nɛ, ka mɩ bɩ yɩɛla kɛnɛ.

⁷ Mɩ Wɩa, liise yi arɩ mɩ mɩɩsɩŋ kala ŋaa pel nɛ, mɩ bɩra bɩ jaŋ kɛŋ tʋɔtɔrʋŋ.

⁸ Ŋ namɛ nɛ lɛɛlɛ, ama ŋ bɩra bɩ jaŋ namɛ, ŋ jaŋ bee chɩchɛmɛ, ama mɩ jaŋ tuo.

⁹ Dɩ duoŋ-bɩlɩmbaanɩŋ nɛ lɛlɛ, ʋ lɛlɛ nɛ, ŋɩɩ nɛ saa, dɩ nʋʋ ma nɛ mʋ lɛlɩŋ, ʋ bɩra bɩ mɩɩrɛ.

¹⁰ Ʋ bɩra bɩ jaŋ mɩɩra kɔ ʋ dɩa. Lee-la ʋ sɩ hɛ, nɩaa yie yʋ ʋ wɩaa nɛ.

¹¹ Ŋɩɩ wɩaa, mɩ bɩ jaŋ tɔrɛ mɩ niiŋ, mɩ jaŋ bʋl tʋɔ-chee-la sɩ faasa kɛmmɛ wɩaa. Mɩ jaŋ bʋl baaŋ-la sɩ vɔgɛmɛ kɩŋkɛŋ wɩaa.

¹² Mɩ ŋaa mʋgʋ-balɩŋ nɛ koo mɩ ŋaa peribanyeŋŋu sɩ hɛ mʋgʋ-balɩŋ tʋɔŋ nɛ, ŋ leŋ ba pʋpɔmɛ?

¹³ Mɩ yie bɩɩnɛ dɩ mɩ nɛ pɩna, mɩ yaraa jaŋ pɛ dɔŋɔ mʋa, mɩ jaŋ yʋ mɩ hɛɛ-la wɩaa mʋa,

¹⁴ ama ŋ yie joŋ duosoo sɩ kɛŋ fawʋllʋŋ a hɛ mɩ lɛ nɛ. Mɩ nɩna wɩaa sɩ kɛŋ fawʋllʋŋ a nagɛ duosoo tʋɔŋ.

¹⁵ Ŋɩɩ paala leŋ mɩ cho dɩ ba chagɛmɛ kpʋ, ʋ nɛ fa kpɩa mɩ sɩ hɛ mɩ mɩɩsɩŋ deeŋ lɛ.

¹⁶ Mɩ mɩɩsɩŋ fɩɩ mɩ tɩtɩa nɛ. Mɩ bɩ jaŋ hɛ nɩmɛ a kaa mʋ wuu. Lemmi sɔm, mɩ mɩɩsɩŋ bɩ bʋbʋɔ kɛnɛ.

¹⁷ Bɛɛ kʋŋ nɛ nuhuobiine ŋaa ŋ chɩl ʋ wɩaa, bɛɛ kʋŋ nɛ ʋ ŋaa ŋ faasa bɩbɩɩnɛ ʋ wɩaa?

¹⁸ Ŋ yie benu chʋchʋɔŋ, aŋ mɩmagɩsʋ bʋa na-kala.

¹⁹ Bɛɛ nɛ tɩɩ ŋ bɩ jaŋ lɩɩsɛ ŋ sɩaa mɩ lɛ, a lemmi dɩ mɩ wiesi mʋa?

²⁰ Dɩ ŋ nɛ sɩ mɩ ŋaa wʋbɔŋ, wʋbɛɛ nɛ mɩ ŋaa ŋ lɛ, ŋ-na Wɩa sɩɩ beŋ nuhuobiinee? Bɛɛ nɛ tɩɩ ŋ joŋ sɩɩŋ pɛ mɩ lɛ a mɩmagɩsɛmɛ? Mɩ mɩɩra nagɛ chʋga nɛ a pɩŋ koo?

²¹ Ŋ bɩ jaŋ wuo nyalɩmɛ a mʋ tɩgɛ wɩɩ-la mɩ sɩ cheye lɛ, aŋ joŋ mɩ wʋbɔŋ-la chɛmɛɛ? Ʋ bɩ jaŋ dieni, mɩ jaŋ pɩŋ sʋʋŋ bʋa tʋɔŋ. Ŋ jaŋ bee chɛmɛ, ama ŋ bɩ jaŋ namɛ.”