JOB 6 - WƖA TENIŊ

Wɩɩ-la Job sɩ bʋla a mʋ tɩgɛ Ɛlɩfas wʋbʋlaa lɛ

¹ Job ma sɩ,

² “Dɩ wʋwalɩmaa deemba arɩ mɩ hɛɛŋ deeŋ nɛ fa ŋaa kɩaa dɩ ba joŋo daŋ sanɩa lɛ,

³ ʋ fa jaŋ yuŋŋie kɩɩ mʋgʋ-balɩŋ hagɩlɩ-bumbugulo kala. Ŋɩɩ wɩaa sɩ́ leŋe dɩ wɩalɩŋ mɩ yaraa sɩ hoso mɩ bʋbʋl kperiŋ.

⁴ Wɩa doluŋ kala Tɩɩna joŋ ʋ to-hɛŋŋɛɛ yagɛmɛ nɛ, ba huoŋ laara kɛŋ mɩ yaraa kala. Wɩa yuomi, fawʋllʋŋ chaasa kɛmmɛ nɛ.

⁵ Kaku-werigiŋ nɛ na yaŋ a didii, ʋ bɩra bɩ yel, dɩ nɛ-fere ma nɛ na ʋ kʋdiilee, ʋ bɩra bɩ yel.

⁶ Ama kʋbɛɛ nɛ jaŋ wuo dii kʋsɛbɩsɩŋ, dɩ ʋ bɩ yɩsɩŋ hɛ? Bɛɛ kʋŋ sɩma nɛ hɛ ji-halɩŋ tʋɔŋ kʋpʋla-la lɛ?

⁷ Mɩ bɩ kʋdosunuŋ deemba ka dii, ba leŋe mɩ wʋwɩɩlɛ nɛ.

⁸ Mɩ tʋɔŋ fa jaŋ tɔrɛ dɩ mɩ nɛ na wɩɩ-la mɩ sɩɩ chɛ, dɩ Wɩa nɛ fa leŋe dɩ mɩ na wɩɩ-la mɩ sɩɩ yɩɛlʋ,

⁹ dɩ Wɩa nɛ fa jaŋ sɛɩ a lɩɩsɛ mɩ mɩɩsɩŋ, dɩ ʋ nɛ fa jaŋ sɛɩ a kpʋmɛ.

¹⁰ Dɩ ʋ nɛ fa ŋaa ŋɩɩ, mɩ tʋɔŋ jaŋ pɩŋ dɩ-bala, arɩ mɩ hɛɛŋ sɩ faasa yʋgɛ ma kala. Mɩ jɩma mɩ bɩ wɩalɩŋ Wɩa sɩ bɩ disiniŋ kɛnɛ sɩ bʋla vɩa.

¹¹ Doluŋ baŋmɛɛ nɛ mɩ kɛŋ, a magɛ dɩ mɩ ha kɛŋ yɩɛlaa? Mɩ bɩ yɩɛlaa kala kɛnɛ sɩ maga dɩ mɩ wuo nyalɩmɛ.

¹² Mɩ dolie nagɛ tabɩɩŋ nɛɛ? Mɩ yaraa nammɩa ŋaa kɔlɩɩ nɛɛ?

¹³ Mɩ bɩ dol kala kɛnɛ dɩ mɩ pɛ mɩ tɩtɩa lɛ, lɛɛlɛ wʋzɔŋ kala sɩ fá kagɛ mɩ lɛ ŋ-la.

¹⁴ Dɩ nʋʋ tʋɔŋ nɛ cheye, ʋ maga dɩ ʋ nandɔnsʋŋ nɛ chɩna gbɛrʋ, dɩ tɩɩna nɛ paala bɩra bɩ Wɩa doluŋ kala Tɩɩna ka fá ma.

¹⁵ Ama mɩ naambiiriŋ, ma paala ŋaa nɩa mɩ sɩ bɩ jaŋ wuo yelli nɛ. Ma nagɛ fuonuŋ sɩɩ pɛllʋ nɛ yibiiniŋ, dɩ duonuŋ nɛ kɛrɛ, ba hʋ.

¹⁶ Duoŋ-puso yie leŋ fuonu-la su, yibiiniŋ ba gbu lɩlɩɩ.

¹⁷ Ama dɩ taŋ nɛ lɩa, ba kala kɛrɛ, ka fuo-bʋa-la kala hɩla pɩŋ.

¹⁸ Bʋntaŋŋɩ-laalɩŋ yie mʋ nɩmɛ a chɛ lɩɩŋ ka, aŋ gɔllɔ baarɛ tintee-hɩlɩŋ lɛ a sʋʋ.

¹⁹ Taŋ-la ba sɩɩ yɩrɛ Tɛma bʋntaŋŋɩ-laalɩŋ ka chɛ lɩɩŋ nɛ, taŋ-la ba sɩɩ yɩrɛ Sɛba bayalaa kɛŋ yɩɛlaa arɩ ba jaŋ na lɩɩŋ,

²⁰ ama ba tʋɔŋ cheye nɛ, bɛɛ wɩaa ba yɩɛlaa kala ŋaa pɛɩ nɛ, ba sɩ mʋ fuo-la leriŋ, ba bɩ wɩɩ-la ba sɩɩ chɛ na.

²¹ Lɛɛlɛ, ma wʋŋaalaa daga arɩ ma bɩ mɩ lɛ wuo pɛ. Ma na wʋlɔrʋnʋ-la sɩ jʋʋmɛ, fawʋllʋŋ kɛmma nɛ.

²² Mɩ ha maachie bʋla arɩ ma tiŋ mɩ chɩŋ, koo dɩ ma joŋ ma dʋa a kpal nʋʋ pɩmɛɛ?

²³ Koo dɩ ma laamɛ ta mɩ dʋndɔŋŋɔɔ nɩsɩŋ lɛ, koo ma time laamɛ tʋɔhɛɛ tɩŋŋaa nɩsɩŋ lɛɛ?

²⁴ Dagɛmɛ wɩɩ-la mɩ sɩ ŋaa chei, dagɛmɛ, mɩ jaŋ tɔrɛ mɩ niiŋ.

²⁵ Wʋtɩtɩɩ wɩɩ nɛ woruŋ. Ama ma wʋkaalɛrɛ-la bʋbʋɔŋ nɛ bɛɛ?

²⁶ Ma bɩɩna goŋ pɛɩ nɛ mɩɩ ŋaa? Ŋɩɩ-na ma kɛmmɛ tʋrɛ?

²⁷ Ma jaŋ paala wuo tɔnsɛ, a joŋ biisime pa dɩ ʋ ŋaa ma yomo, a yallɛ ma nandɔŋ-chooluŋ a kɛŋ kɩaa.

²⁸ Lɛɛlɛ, má beŋ mɩ sɩaa lɛ woruŋ, mɩ bɩ jaŋ kɔ dɩ mɩ nyɩɛ wɩaa a pɩma.

²⁹ Ma paala ŋaa kieli nɛ, má leŋ ma tʋɔ-togi wʋbʋla-la. Mɩ ha chɩŋ mɩ wʋtɩtɩɩ naaŋ lɛ nɛ, mɩ bɩ bɩrɩma.

³⁰ Koo wʋbɔŋ nɛ mɩ bʋl? Ma bɩɩna mɩ bɩ wʋzɔmʋŋ arɩ wʋbɔmʋŋ bʋa jɩŋ?