JOB 5 - WƖA TENIŊ

¹ Job, ŋ jaŋ wuo yɩrɛ dɩ nʋʋ pɛ ŋ lɛ, ama nʋʋkala bɩ jaŋ jegili ŋ teeŋ. Wɩa tɩndaarɩ bɛɛ teeŋ nɛ ŋ jaŋ mʋ dɩ ʋ pɛ ŋ lɛ?

² Tʋɔ-gʋŋ yie kpʋ nɩyaara nɛ, yarɩ-bieriŋ ma kpʋ nɩalɩŋ sɩ bɩ wɩaa jɩŋ woruŋ.

³ Mɩ na nɩyaaraa wɩaa sɩ naga ba chɩna woruŋ, ama ŋmɩaŋ guu dii ba dɩɩsɩŋ nɛ.

⁴ Ba biiriŋ paala bɩ wiese ka na mʋa ma, nʋʋkala bɩ chɩna gbɩgbɛrɛba ba wʋjʋʋlaa lɛ.

⁵ Nɩalɩŋ losuŋ sɩ kɛnɛ jaŋ laa nɩyaara-la kʋpɛrɛɛ dii, ba jaŋ paala paa kɩalɩŋ sɩ hɛ sɔsʋŋ tʋɔŋ ma. Sɩɩŋ tɩŋŋaa jaŋ dii ba dʋa.

⁶ Bɔnsʋŋ bɩ kʋŋ sɩɩ nyʋ tinteeŋ ŋaa, wʋwalɩmaa ma bɩ tinteeŋ lɛ ka nyʋ.

⁷ Ama ba lʋl nuhuobiine a hɛ wʋwalɩmaa lɛ nɛ, a nagɛ nyiŋ-pʋgʋmaa sɩ yie sii a jɩjɩl wɩa-nyuŋ ŋɩɩ.

⁸ Ama dɩ mɩ-na nɛ fa kaŋ, mɩ fa jaŋ mʋ Wɩa teeŋ a joŋ mɩ wɩɩŋ bil ʋ sɩpaaŋ.

⁹ Ʋ yie ŋaa wʋmagɩlaa, la sɩ bɩ ba bʋbʋɔŋ wuo jɩŋ nɛ, a ŋaa wʋkpuŋkperisiŋ sɩ bɩ nii kɛnɛ.

¹⁰ Ʋ nɛ leŋe duonuŋ nɩnɩɩ tinteeŋ lɛ, a nɩɩ hɩhɛ kɩaa lɛ.

¹¹ Nɩalɩŋ sɩ kɛŋ ba tɩtɩa muuri, ʋ yie kɛmba je nɛ, a leŋ nɩalɩŋ ma sɩɩ yel kɛŋ tʋɔtɔrʋŋ.

¹² Ʋ yie leŋ wɩalɩŋ badɛ-tɩŋŋaa sɩ bɩɩna dɩ ba ŋaa birigi nɛ, ba lɔlʋŋ ŋaa pɛɩ.

¹³ Ʋ yie kɛŋ nɩalɩŋ sɩ bɩɩna ba jɩŋ wɩaa ba wʋŋaalaa lɛ, a leŋ wɩalɩŋ kala ba sɩ bɩɩna ŋaa pɛɩ.

¹⁴ Taŋ yie pʋl ŋɩɩ nɛ ka birimiŋ tɔba, ba lɩlaarɛ wɩɩhɛyɛ a nagɛ tɩtaŋɩŋ.

¹⁵ Ama Wɩa yie laa summoo ta nɛ sʋʋŋ lɛ, a laa nɩalɩŋ sɩ bɩ ba tɩtɩa lɛ wuo pɛ ta dɩ nɩduoruŋ sɩ́ ba dɔgʋsʋ.

¹⁶ Ŋɩɩ wɩaa, summoo kɛŋ yɩɛlaa nɛ, ka Wɩa leŋ nɩbɔŋŋɔɔ niiŋ tɔ.

¹⁷ Nɩɩ-la kala Wɩa sɩ kaa tʋraa kɩɩ jaŋ kɛŋ tʋɔtɔrʋŋ, ŋɩɩ wɩaa, sɩ́ Wɩa doluŋ kala Tɩɩna dagɩŋ vɩa.

¹⁸ Ʋ yie wuo pɩrɩŋ, aŋ bɩra vɔɔ tɔ naawɩɩl-la. Ʋ jaŋ wuo leŋ dɩ ŋ na hɛɛŋ, aŋ bɩra vaarɩŋ.

¹⁹ Wʋlɔrʋnʋŋ jaŋ wuo vɛnɛɛ jʋʋŋ bʋa na-kala, ama Wɩa jaŋ lɩɩsɩŋ ba kala lɛ.

²⁰ Dɩ losuŋ nɛ jʋa, ʋ jaŋ laaŋ ta dɩ ŋ sɩ́ sʋʋ. Dɩ laalɩŋ ma nɛ sie, ʋ jaŋ laaŋ ta dɩ ba sɩ́ŋ kpʋ.

²¹ Ʋ jaŋ laaŋ ta nɩalɩŋ sɩ bʋl wɩaa chicheyiŋ nɩsɩŋ lɛ, ŋ bɩ jaŋ fá fawʋllʋŋ dɩ wɩalɩŋ sɩɩ chei nɩaa nɛ kɔ.

²² Ŋ jaŋ mʋmɔŋ dɩ wɩalɩŋ sɩɩ chei leriŋ arɩ losuŋ nɛ jʋa, ŋ bɩ jaŋ fɩfá baga kɩaa.

²³ Ŋ baga bɩ jaŋ kɛŋ tabɩaa, baga kɩaa bɩ jaŋ walɩmɩŋ.

²⁴ Ŋ jaŋ hɔŋ ŋ dɩa lɛ a bɩ wɩɩkala ka fá, ŋ jaŋ dɩɩsɛ ŋ dʋa kala, dɩ kʋŋ bɩ fuolo.

²⁵ Ŋ biiriŋ jaŋ yʋgɛ, dɩ ŋ doho nɩaa paala nagɛ dʋnɩa yaŋ.

²⁶ Ŋ jaŋ waa a hɩɛsɛ woruŋ aŋ-na sʋʋ, a nagɛ kɩaa sɩ bɩa ba bʋa lɛ ba kʋŋ.

²⁷ La beŋ wɩɩŋ deeŋ nɛ woruŋ, a na dɩ ʋ ŋaa wʋtɩtɩɩ. Ŋɩɩ wɩaa, jegile nɩɩʋ woruŋ aŋ kɛnʋ kaa tɩŋ.”