JOB 41 - WƖA TENIŊ

¹ Ŋ jaŋ wuo kɛŋ gbɩaŋ a kɛŋ peribanyeŋŋu, koo a kɛŋ ŋmɛnɩŋ vɔɔ ʋ nandelimiŋ a bil?

² Ŋ jaŋ wuo joŋ ŋmɛnɩŋ luro hɛ ʋ mɩɩsɩŋ, koo ŋ joŋ gbɩaŋ tɔɔ gɩrɩgɛ ʋ tapaŋaa lɛɛ?

³ Ʋ jaŋ sʋlʋŋ dɩ ŋ leŋ dɩ ʋ mʋ, koo a sʋlʋŋ dɩ ŋ fá ʋ nenige?

⁴ Ʋ jaŋ sɛɩ dɩ ŋ dɩ ʋ pɛ niiŋ, dɩ ʋ ŋaa ŋ yomo ʋ mɩɩsɩŋ kala lɛɛ?

⁵ Ŋ jaŋ wuo vɔbʋ a nagɛ diibie, a joŋu pɩ ŋ hantolibiisiŋ dɩ ba kaa gbigbielii?

⁶ Bayalaa jaŋ chɩchɛ dɩ ba yɔbʋʋ? Ba jaŋ kɛnʋ kpaa pɛ ba bayal kɩaa lɛ a yallɛɛ?

⁷ Ŋ jaŋ wuo kɛŋ timiŋ tɔɔ ʋ teniŋ lurii? Koo a kɛŋ to-hɛmɩŋ tɔɔ ʋ nyuŋ lurii?

⁸ Dɩ ŋ nɛ digu, ŋ jaŋ na ŋɩɩ ʋ sɩ jaŋ kɛnɩŋ vɩgɩlɛ, ŋ maachie kala bɩra bɩ jaŋ yʋ aŋ ŋaa ŋɩɩ.

⁹ Dɩ ŋ nɩɩ nɛrɩgɛ dɩ ŋ kɛnʋ, ŋ nyɩsɛ ŋ tɩtɩa nɛ, dɩ ŋ sɩɩŋ nɛ paala naʋ, ŋ nandaasɩŋ yie yʋɔrɛ nɛ.

¹⁰ Nɩtɛrɛ kala tuo sɩ jaŋ wuo kosu dɩ ʋ sii ŋaa wɩaa. Kʋbɛɛ nɛ saa jaŋ wuo sii chɩŋ mɩ lɛ?

¹¹ Kʋbɛɛ nɛ kɛŋ kʋŋ mɩ teeŋ, a magɛ dɩ mɩ timuu? Kʋŋkala sɩ hɛ tinteeŋ lɛ ŋaa mɩ kʋŋ nɛ.

¹² Mɩ jaŋ dagɛ ŋɩɩ lɩɩŋ tʋɔŋ kʋbɔŋ-la naasɩŋ sɩ naga, ŋɩɩ ʋ sɩ kɛŋ doluŋ, arɩ ŋɩɩ ʋ yaraa sɩ mɛ woruŋ.

¹³ Kʋbɛɛ nɛ jaŋ wuo puri ʋ teniŋ? Koo a joŋ koŋ hɛ ʋ niiŋ lɛ?

¹⁴ Kʋbɛɛ nɛ jaŋ wuo kɛŋ ʋ niiŋ suri, ʋ nyɩlaa sɩ kɛŋ fawʋllʋŋ ŋɩɩ?

¹⁵ Ʋ yaraa puruŋ kpalɩba nɛ, a chaasa jʋʋ dɔŋɔ woruŋ.

¹⁶ Ba faasa kpagɛ dɔŋɔ nɛ woruŋ, peliŋ bɩ ba pɛgɛ wuo too jʋʋ.

¹⁷ Ba faasa mɛrɛ dɔŋɔ lɛ nɛ, a nyʋa kɛŋ dɔŋɔ, ŋ bɩ ba wuo kaa lɛrɛ.

¹⁸ Dɩ ʋ nɛ ŋmoo mɩɩsɩŋ, nyiniŋ yie lɩgɩsɛ nɛ. Ʋ sɩaa yie nagɛ taŋ sɩ pʋlaa kɔ pʋlʋmʋŋ nɛ.

¹⁹ Nyiŋ-geliŋ yie lɩlɩɩ ʋ niiŋ lɛ nɛ, nyiŋ-kɛntɛrɩsɩŋ ma to dɔŋɔ a lɩlɩɩ.

²⁰ Nyʋɔsʋŋ yie lɩlɩɩ ʋ mɩɩ-boyee lɛ nɛ, a nagɛ ba sɩ joŋ kɩaa arɩ pupoiŋ a chɔ nyiniŋ lɛ.

²¹ Ʋ wiese peliŋ yie leŋ hɔlɔɔ chol nyiniŋ, nyiŋgeliŋ lɩlɩɩ ʋ niiŋ lɛ.

²² Ʋ baŋŋaa chaasa kɛŋ doluŋ nɛ woruŋ, dɩ nʋʋkala nɛ chemu, fawʋllʋŋ yie kɛnʋ nɛ.

²³ Ʋ yaraa sɩ kuriso kuriso ŋɩɩ chaasa jʋʋ dɔŋɔ lɛ nɛ, a ŋaa kpɩm a bɩ jigisi.

²⁴ Ʋ bɔyɛ dolie a nagɛ bʋŋ nɛ. Ʋ dolie a nagɛ nɔmʋŋ.

²⁵ Dɩ ʋ nɛ sie, fawʋllʋŋ yie kɛŋ nɩduoruŋ nɛ, ba mɩɩra fá.

²⁶ Tokobii kala bɩ ʋ lɛ ka dii, Timiŋ koo to-hɛmɩŋ ma bɩ ʋ lɛ ka dii.

²⁷ Hɔɔŋ nagɛ sekeliŋ nɛ ʋ teeŋ, kɔlɩɩŋ ma nagɛ daa-pʋɔŋ ʋ teeŋ.

²⁸ To-hɛŋŋɛɛ bɩ jaŋ wuo leŋ dɩ ʋ fá, kpalɩŋ tabɩaa bɩ ʋ wʋŋaalɩɩ kala kɛnɛ.

²⁹ Toŋguluŋ paala nagɛ sekeliŋ nɛ ʋ teeŋ. Dɩ nɩaa nɛ yuou arɩ timiŋ, ʋ yie paala mʋmɔmba nɛ.

³⁰ Ʋ luoruŋ teniŋ paala kɛŋ niiŋ a nagɛ kenchele nɛ, dɩ ʋ nɩɩ vɛŋ vʋchɔɔŋ tʋɔŋ, ʋ yie kpɛrɛ tinteeŋ ŋɩɩ nɛ a mʋ.

³¹ Ʋ yie kɛŋ lɩɩŋ vuugi a nagɛ ba sɩ chɔ lɩɩŋ ʋ kpɩkpɛrɛ, a leŋ mʋgʋ-balɩŋ vuvuugi a nagɛ nʋʋŋ ba sɩ joŋo hɛ pupoiŋ tʋɔŋ a chɔ nyiniŋ lɛ.

³² Dɩ ʋ nɩɩ vɛŋ mʋgʋ-balɩŋ tʋɔŋ, ʋ libe yie pɩŋ nɛ a tʋtʋl, ka lɩɩ-la kala tɔ arɩ fʋnfʋgɩ-pʋla.

³³ Kʋŋkala tuo dʋnɩa lɛ a magʋ. Ʋ bɩ kʋŋkala ka fá.

³⁴ Ʋ yie bee gʋʋnɛ baga kɩalɩŋ kala sɩ bɩɩna ba ŋaa wajɩaba nɛ. Ʋ nɛ ŋaa baga kɩaa kala kuoro.”