JOB 4 - WƖA TENIŊ

Wɩalɩŋ Ɛlɩfas sɩ bʋla pɩ Job

¹ Ŋɩɩ nɛ Ɛlɩfas, Tɛmaŋ tɩɩna-la pɩɛsɛ:

² “Dɩ mɩ nɛ bʋl wɩɩ ŋ teeŋ, ŋ jaŋ wuo nyalɩmɛɛ? Mɩ bɩ jaŋ wuo tɔrɛ mɩ niiŋ, see dɩ mɩ bʋl wɩɩ.

³ Bɩɩna mʋ yi ŋɩɩ ŋ sɩ dagɛ nɩ-daŋ, arɩ ŋɩɩ ŋ sɩ bʋl wɩaa a polli nɩalɩŋ sɩ bɩ doluŋ kɛnɛ nandaasɩŋ.

⁴ Ŋ wʋbʋlaa fa chagɛ nɩalɩŋ sɩ gɛrɛ a chɩchɛ dɩ ba tel a kɩɩ nɛ, a laasɛ nɩalɩŋ ma sɩ lɔlɔ wɩaa lɛ ba chɩŋ.

⁵ Ama lɛɛlɛ wʋwalɩmaa jʋʋŋ nɛ, ŋ nandaasɩŋ yʋɔrɛ, wɩalɩŋ ŋmobuŋ nɛ, ŋ niiŋ kala maa.

⁶ Ŋŋ fá Wɩa nɛ, ʋ maga dɩ ŋ tʋɔbɩɩnaa hɛ ʋ lɛ, ŋ mɩɩsɩŋ ma lɛ, ŋ bɩ wʋcheeli kala kɛnɛ, ŋɩɩ wɩaa ʋ maga dɩ ŋ kɛŋ yɩɛlaa.

⁷ Bɩɩna na, kʋbɛɛ nɛ bɩ wʋcheeli kala kɛnɛ, aŋ ha sʋʋ? Kʋbɛɛ nɛ ha ŋaa tʋɔpʋl tɩɩna, ka ba kpʋʋ?

⁸ Mɩ-na sɩ jɩma, nɩalɩŋ sɩɩ ŋaa wʋbɔŋŋɔɔ, a hɩhɛ wɩaa, ba nɛ wʋbɔmɔ-la yie dii.

⁹ Dɩ Wɩa nɛ wiese hɛ ba lɛ, ba jaŋ sʋʋ, dɩ ʋ nɛ na baanɩŋ, ʋ jaŋ kpʋba.

¹⁰ Naachigee jaŋ wuo huosi aŋ chama pɛ, ama Wɩa bori ba nyɩlaa nɛ.

¹¹ Dɩ naachigiŋ nɛ chɛ ʋ kʋdiilee ka dɩ ʋ dii, ʋ yie sʋʋ nɛ, ka ʋ biiriŋ fá pɩsɛ.

¹² Nʋʋ nɛ lʋara bʋl wɩɩ pɩmɛ, mɩ nɩɩ wɩɩ-la ʋ sɩ munso bʋl.

¹³ Wɩɩ-la fa nagɛ nʋʋ sɩɩ duosu nɛ, bʋa-la lɛ nɩaa sɩ faasa pɩŋ doŋ.

¹⁴ Fawʋllʋŋ kɛmmɛ, mɩ chichel ŋɩɩ leŋ mɩ yaraa kala vɛŋ.

¹⁵ Nɩdɩma kʋbala ŋmoo peliŋ hɛ mɩ sɩaa lɛ a bal, mɩ nyu-pʋnaa sii chɩŋ.

¹⁶ Nɩdɩma-la mʋ chɩŋ, ama mɩ bɩ ŋɩɩ ʋ sɩ naga wuo dagɛ. Kʋŋ chɩŋ mɩ sɩpaaŋ, ka mɩ nɩɩ yikori-bie dɩ ʋ pɩɛsa:

¹⁷ ‘Nuhuobiine jaŋ wuo kɛŋ tʋɔpʋla a kɩɩ Wɩa? Nʋʋ jaŋ wuo pʋllɛ a kɩɩ Wɩa sɩ ŋaaʋ?

¹⁸ Dɩ Wɩa nɛ bɩ ʋ tɩntɩnnaa laa dii, aŋ joŋ cheeriŋ pɩpɩ ʋ tɩndaaraa,

¹⁹ ɛɛ nɛ saa ʋ jaŋ nagɛ a pɩ nuhuobiine ʋ sɩ kɛŋ chʋrʋŋ mɛ? Nuhuobiinee kala ŋaa hagɩla nɛ, ba jaŋ wuo yɛrɛ mɔlɩɩ arɩ ba sɩ yie chagɛ pʋgʋmʋŋ yɛrɛ ŋɩɩ.

²⁰ Ba jaŋ wuo hɛ nɩmɛ chʋchʋɔŋ, sɩaa jaŋ mʋ dɩdɩsɛ dɩ ba sʋba nʋʋkala bɩ ŋɩɩ lɛ jɩŋ, a lɛl a kaa mʋ wuu.

²¹ Kɩalɩŋ kala ʋ sɩ kɛnɛ nɛ ba laa, ka ʋ sʋʋ ŋɩɩ, aŋ ha bɩ wʋjɩmɩŋ kɛnɛ.’