JOB 3 - WƖA TENIŊ

Wɩalɩŋ Job sɩ suomo bʋl

¹ Ŋɩɩ harɩŋ, Job suri ʋ niiŋ a ŋmɩɛsa hɛ tapʋlɩɩ-la ba sɩ lʋlʋ lɛ.

² Ʋ sɩ,

³ “A leŋ dɩ tapʋlɩɩ-la ba sɩ lʋlmɛ lɛl, a leŋ dɩ tɩtaŋ-la ma ba sɩ lʋlmɛ mɩ ŋaa hambolibie lɛl.

⁴ A leŋ dɩ birimiŋ tɔ tapʋlɩɩ-la kala, dɩ Wɩa sɩ hɛ ʋ jaŋ lɛ sɩ́ tapʋlɩɩ-la wɩaa liisu, dɩ pʋlʋŋ kala sɩ́ ʋ lɛ chaanʋ.

⁵ A leŋ, dɩ birimiŋ lim tɔ tapʋlɩɩ-la kala. A leŋ dɩ duoŋ-bɩlɩmbaanɩŋ tɔʋ, dɩ birimiŋ tɔ ʋ pʋlʋmʋŋ.

⁶ A leŋ dɩ birimiŋ lim tɔ tɩtaŋ-la kala, dɩ ba bɩra sɩ́ ʋ dɩɩsa pɛ chɛnsɩŋ koo jɩna tʋɔŋ tapʋlaa lɛ.

⁷ A leŋ dɩ tɩtaŋ-la birigi, dɩ tʋɔtɔrʋ kala tuo ʋ lɛ.

⁸ A leŋ dɩ nɩalɩŋ sɩ ŋmɩɛsa hɩhɛ tapʋlaa lɛ, ŋmɩɛsa hɛ tapʋlɩɩ-la lɛ, nɩalɩŋ sɩ yie kosi peribanyeŋŋu ʋ sii ŋɩŋaa wɩaa.

⁹ A leŋ dɩ ʋ chʋchʋɔŋ na-nyʋɔlʋŋ biri a leŋ dɩ ʋ gbɛrɛ pʋlʋmʋŋ lɔl, a sɩ́ sɩɩpʋʋraa pʋlʋmʋŋ na,

¹⁰ a tɩŋ tɩtaŋ-la sɩ bɩ mɩ naaŋ lʋla tɔ ka ʋ lʋlmɛ a hɛ wʋwalɩmaa arɩ hɛɛŋ lɛ.

¹¹ Bɛɛ nɛ tɩɩ mɩ bɩ sʋba ba sɩɩ lʋlmɛ? A bɩ sʋba mɩ sɩɩ lɩɩ luoruŋ lɛ?

¹² Bɛɛ nɛ tɩɩ mɩ naaŋ jommi hɛ ʋ naasɩŋ lɛ, a leŋ mɩ wasɛ ʋ yɩlɩŋ?

¹³ Dɩ mɩ nɛ fa sʋba bʋa-la lɛ, magɛ ŋ-la mɩ fa pɩnaa wiesi,

¹⁴ mɩ dɩ dʋnɩa kuoroo arɩ nɩalɩŋ sɩ bʋl wɩaa chɩchagɩlɛ nɩaa, nɩalɩŋ sɩ saa leree a pɩ ba tɩtɩa, ka lere-la jɩnɩmba pɩŋ jikpeeniŋ ŋ-la,

¹⁵ arɩ kuorusu-la fa sɩ kɛŋ sɛlɩmɛ, a chʋŋ hɔpʋla su ba dɩɩsɩŋ.

¹⁶ Koo mɩ fa paala sʋʋ a nagɛ bii-sʋʋŋ ba sɩ lʋla, koo a nagɛ bii-mulo ba sɩ lʋla ʋ sʋʋ chalɩŋ lɛ a bɩ pʋlʋmʋŋ na.

¹⁷ Sʋʋŋ bʋa tʋɔŋ, nɩbɔŋŋɔɔ yie leŋ wʋbɔŋŋɔɔ ŋaanɩŋ nɛ, nɩalɩŋ ma sɩ lɔlɔ yie na wiese nɛ.

¹⁸ Nɩalɩŋ ma sɩ ŋaa dansarɩkaba yie fori nɛ, ba bɩra bɩ goŋ-la nɩalɩŋ sɩɩ dɔgɩsɛba a kpɩkpɩa ba nyuŋ ka nɩɩ.

¹⁹ Nɩbalaa arɩ nɩbiisiŋ kala nɛ hɛ nɩmɛ, yosuŋ ma fori ba tɩŋŋaa nɩsɩŋ lɛ.

²⁰ Bɛɛ nɛ tɩɩ nɩalɩŋ sɩɩ na hɛɛŋ wei, a kɛŋ tʋɔ-cheeŋ kɩŋkɛŋ aŋ hɛ ba mɩɩsɩŋ lɛ?

²¹ Ba yie chɩchɛ sʋʋŋ, ka ʋ bɩ baa kɛŋ. Ba yie chɩchɛ sʋʋŋ a nagɛ nɩa sɩ faasa fɩɛsɛ sɩɩŋ a chɩchɛ dʋa.

²² Dɩ ba nɛ tuu bʋa, ba tʋɔŋ yie tɔrɛ nɛ ba jʋjʋɔsɛ.

²³ Bɛɛ nɛ tɩɩ Wɩa jaŋ joŋ mɩɩsɩŋ a pɩ nɩɩ-la wombiiŋ sɩ faa? Nɩɩ-la sɩ bɩ maachie kɛnɛ.

²⁴ Hʋʋna vɔgɛmɛ nɛ a nagɛ kʋdiilee, aŋ pɩpɛllɛ a nagɛ lɩɩŋ.

²⁵ Wɩɩ-la mɩ sɩɩ fá jʋʋmɛ nɛ, wɩɩ-la lɛ mɩ bɔyɛ sɩɩ joŋ ŋaa mɩ lɛ nɛ.

²⁶ Mɩ tʋɔŋ bɩ dɩ-bala pɩna, mɩ dɩgɩlaa ma bɩ fuuri, mɩ bɩ wiese kɛnɛ, see wʋwalɩmaa dʋndʋŋa.”