JOB 21 - WƖA TENIŊ

Wɩalɩŋ Job ma bɩra sɩ bʋla

¹ Ŋɩɩ nɛ Job bɩra bʋl:

² “Má jegili woruŋ a nɩɩ wɩalɩŋ mɩ sɩɩ chɛ mɩ bʋl, wɩɩ-la ma sɩ jaŋ ŋaa dɩ mɩ tʋɔŋ pɩŋ dɩ-bala nɛ ŋɩɩ.

³ Má nyalɩmɛ ka dɩ mɩ bʋl wɩaa. Dɩ mɩ nɛ bʋla dɛrɛ, ma jaŋ wuo bɩra sisieri mɩ lɛ.

⁴ Nuhuobiine teeŋ dee mɩɩ ŋmɛŋ, ŋɩɩ nɛ tɩɩ mɩ bɩ kenyiri die ŋɩɩ.

⁵ Ma bemmi aŋ tuo bibeŋ, aŋ ŋaa ma niiŋ chɩm.

⁶ Dɩ mɩ nɛ bɩɩnɛ wɩɩŋ deeŋ, fawʋllʋŋ yie jʋʋmɛ nɛ, mɩ yaraa chichel.

⁷ Bɛɛ nɛ tɩɩ nɩbɔŋŋɔɔ hɛ nɩmɛ a kɛŋ mɩɩsɩŋ, a hɩɛsɛ ma, ka ba doluŋ pʋŋa pɩpɛ?

⁸ Ba yie na ba biiriŋ dɩ ba kɛŋ dɩchɩnɩŋ, ba nihee ma waa puuba.

⁹ Ba dɩɩsɩŋ kɛŋ fɩɛlɩŋ, fawʋllʋŋ tuo. Wɩa bɩ baa dɔgɩsɛ.

¹⁰ Ba nɛ-belliŋ bɩ jɩla tɩta pɛɩ, ba nɛ-nɩɩnɩŋ lʋlʋl, a bɩ chei tɩta.

¹¹ Ba yie leŋ ba biiriŋ lɩɩ a nagɛ pie-laalɩŋ, ba bii-biisiŋ gʋa bɩbal.

¹² Ba yie du chɩnchɩgɩsɩŋ arɩ chenniŋ, ba ma yɩɩ yɩɩlaa hɛ, ba ŋmʋʋ ŋmʋlaa ma, ba jʋjʋɔsɛ.

¹³ Ba yie pɩŋ dʋa tʋɔŋ nɛ ba mɩɩsɩŋ lɛ, a tuu bʋa fɛlɛlɛ.

¹⁴ Ba ha yie bʋla pɩ Wɩa, ‘Leŋ la sɔm.’ La bɩ chɛ dɩ la jɩŋ ŋ wombiee,

¹⁵ aŋ pɩɛsɛ, ‘Kʋbɛɛ nɛ Wɩa, doluŋ kala Tɩɩna a maga dɩ la tou? Dɩ la nɩɩ chʋɔlʋ, wʋbɛɛ nɛ la jaŋ na ʋ teeŋ?’

¹⁶ Ama ba dʋa bɩ ba tɩtɩa doluŋ lɛ lɩa, ŋɩɩ wɩaa, mɩ sɩpaa kala tuo nɩbɔŋŋɔɔ wɩaa lɛ.

¹⁷ Ama naansɩɩŋ bʋŋmɛɛ nɛ ma ha na, dɩ Wɩa fuuni nɩbɔŋŋɔɔ chaanɩŋ dɩsɛ? Naansɩɩŋ bʋŋmɛɛ nɛ ʋ leŋ wʋlɔrʋnʋŋ jʋjʋʋba, wɩalɩŋ Wɩa sɩ yie na baanɩŋ a kpaa pɩ nɩbɔŋŋɔɔ?

¹⁸ Naansɩɩŋ bʋŋmɛɛ nɛ ma na, dɩ Wɩa yie leŋ ba nagɛ mɔ-puruŋ, peliŋ sɩ paa, a nagɛ mɩɩ-jɔrʋŋ duoŋ-peliŋ paa viiri?

¹⁹ Nɩaa yie bʋl, ‘Wɩa yie joŋ wɩalɩŋ ʋ sɩ jaŋ joŋo dɔgɩsɛ nʋʋ a bile gbɛrɛ ʋ biiriŋ nɛ.’ Ama mɩ Wɩa, leŋ dɩ ba tɩtɩa na hɛɛ-la sɩ maga dɩ ba na.

²⁰ Leŋ dɩ ba tɩtɩa na ŋɩɩ ŋ sɩ jaŋ cheiba, leŋ dɩ ba na ŋ-na doluŋ kala Tɩɩna baanɩŋ,

²¹ bɛɛ wɩaa dɩ tapʋlɩa-la ŋ sɩ kpaa pɩba nɛ dɛrɛ, ba sɩpaa jaŋ tuo ba dɩa nɩalɩŋ ba sɩ leŋe ta harɩŋ lɛ.

²² Ama nʋʋkala tuo sɩ jaŋ wuo dagɛ Wɩa wʋjɩmɩŋ, ʋ nɛ paala didii nɩbalaa ma sarɩya.

²³ Nɩa dɔŋɔ yie sʋʋ dɩ ʋ ha dolie, ka wɩɩkala bɩ ʋ walɩmɛ,

²⁴ a dii kɩaa nɛrɛ woruŋ, nʋgʋŋ su ʋ haŋgbelee kala.

²⁵ Nɩa dɔŋɔ ma yie na hɛɛŋ ŋɩɩ nɛ a mʋ sʋʋ, ʋ jaŋ paala mʋ sʋsʋʋ dɩ ʋ bɩ wʋzɔŋ kala sɩma nɩa.

²⁶ Ama hagɩla nɛ jaŋ tɔ ba kala dɩ nanchʋɔlaa diiba.

²⁷ Mɩ jɩŋ wɩalɩŋ kala ma sɩɩ bɩɩnʋ nɛ woruŋ, ma bɩɩnɛ ŋɩɩ ma sɩ jaŋ to a ŋaa wɩɩ cheimi nɛ.

²⁸ Ma pɩɛsa, ‘Nɩɩ nɛ nɩbal-la dɩa hɛ, lee-la nɩbɔmɔ-la sɩɩ jʋʋ?’

²⁹ Ma ha bɩ wombii-vɛnnɛɛ wɩɩ pɩɛsaa? Ma bɩ wɩalɩŋ ba sɩ bʋla pɩma kaa tɩtɩŋ?

³⁰ Wɛŋ-vɛnnɛɛ sɩ ‘Wɩa yie leŋ nɩbɔmʋŋ nɛ tapʋlɩɩ-la ʋ sɩ kɛŋ wʋlɔrʋnʋŋ kʋkɔ. Ʋ yie lɩɩsʋ ta nɛ tapʋlɩɩ-la ʋ sɩ jaŋ na baanɩŋ.

³¹ Nʋʋ tuo sɩ jaŋ pɩɛsʋ wɩɩ a mʋ tɩgɛ wɩalɩŋ ʋ sɩ ŋaa lɛɛ? Kʋbɛɛ nɛ jaŋ joŋ wʋbɔmɔ-la ʋ sɩ ŋaa chɩmɩŋ tiŋ ʋ lɛ?

³² Ba yie joŋu kaa mʋ hugi nɛ, a leŋ nɩaa pɔ ʋ vaamɩŋ.

³³ Nɩ-daŋ nɛ yie to ʋ harɩŋ a mʋ ʋ dɩ-huguŋ nɩalɩŋ bɩ nii kɛnɛ. Tinteeŋ sɩma pʋ, ʋ pɩŋ sɔm.’

³⁴ Ɛɛ nɛ saa ma jaŋ bʋl wʋtɔɔnʋŋ a chɩchɛ dɩ ma nyagɛ mɩ bɔyɛ? Ma wʋbʋlaa kala ŋaa wʋnyɩɛrɩŋ nɛ.”