JOB 2 - WƖA TENIŊ

Sɩtaanɩ bɩra magɩsɛ Job lɩa lɛ

¹ Tapʋlɩɩ dɔŋ bɩra, Wɩa tɩndaaraa kɛŋ ba tɩtɩa mʋ La TƖƖNA sɩpaaŋ, Sɩtaanɩ ma to ba harɩŋ mʋ.

² Ŋɩɩ nɛ La TƖƖNA pɩɛsɛ Sɩtaanɩ, “Nɩɩ nɛ ŋ lɩɩ kɔ daha?” Sɩtaanɩ bʋla pɩ La TƖƖNA, “Mɩ gɔllɔɔ baarɛ dʋnɩa lɛ nɛ.”

³ Ŋɩɩ nɛ La TƖƖNA pɩɛsʋ, “Ŋ na mɩ tɩntɩnna Job nɛɛ? Nʋʋkala tuo dʋnɩa lɛ a nagʋ. Ʋ wɩaa tʋʋla nɛ woruŋ, ʋ bɩ wʋcheeli kala kɛnɛ. Ʋʋ fá mɩ-na Wɩa nɛ woruŋ a bɩ chɛ dɩ ʋ sɩɩŋ na wʋbɔŋ. Ŋ sɩ sʋlmɛ dɩ mɩ pɩŋ wombiiŋ dɩ ŋ cheyu arɩ ʋ sɩ bɩ wɩɩ cheye ma kala, ʋ ha chɩŋ ʋ wʋtɩtɩɩ naaŋ lɛ nɛ.”

⁴ Sɩtaanɩ bɩra bʋl, “Nuhuobiine jaŋ wuo joŋ ʋ kʋŋkala pa, aŋ ka dɩ ʋ kɛŋ mɩɩsɩŋ.

⁵ Ama dɩ ŋ nɛ chei ʋ yaraa, ʋ jaŋ bʋl wʋbɔŋŋɔɔ a tɩgɛ ŋ lɛ ʋ bɩ jaŋ kaa faa.”

⁶ Ŋɩɩ nɛ La TƖƖNA bʋla pɩ Sɩtaanɩ, “Ʋ zɔmɔ, mɩ joŋu hɛ ŋ nɩsɩŋ lɛ, ama sɩ́ ʋ mɩɩsɩŋ lɩɩsʋ.”

⁷ Sɩtaanɩ sii La TƖƖNA sɩpaaŋ, a mʋ joŋ naawɩɩlaa sɩɩ wɩɩ woruŋ a hɛ Job lɛ, a chɩŋ ʋ naachɛyɛɛ a kaa jɩl ʋ nyuŋ.

⁸ Ŋɩɩ nɛ Job joŋ kanchele a hɔŋ tʋɔrʋŋ tʋɔŋ aŋ kaa pɩpaasɛ ʋ yaraa.

⁹ Ʋ haala pɩɛsʋ, “Ŋ ha chɩŋ ŋ wʋtɩtɩɩ naaŋ lɛ nɛɛ? Bʋl wʋbɔŋŋɔɔ a tɩgɛ Wɩa lɛ aŋ sʋʋ.”

¹⁰ Job bʋl, “Ŋ bʋl wɩaa arɩ ŋ ŋaa hayaarɩ nɛ. Ŋ bɩɩna wʋzɔŋŋɔɔ dʋndʋŋa nɛ maga dɩ la lɩlaa Wɩa teeŋ, aŋ sɩ́ wʋbɔŋŋɔɔ-na laa koo?” Job hɛɛŋ deeŋ ma kala lɛ, ʋ bɩ wʋbɔŋ kala bʋla.

Job nandɔnsʋŋ batori

¹¹ Job fa kɛŋ nandɔnsʋŋ batori nɛ, dɔŋɔ yɩrɩŋ nɛ, Ɛlɩfas a lɩɩ taŋ-la ba sɩɩ yɩrɛ Tɛmaŋ, dɔŋɔ ma yɩrɩŋ nɛ Balɩdad a lɩɩ taŋ-la ba sɩɩ yɩrɛ Sʋa, dɔŋɔ ma yɩrɩŋ nɛ Zɔfa a lɩɩ taŋ-la ba sɩɩ yɩrɛ Naama. Ba nɩa dɩ wɩaa jʋʋ Job, ba ŋaa nii-bala a sii fá ʋ bunso kɔ dɩ ba nyagɛ ʋ bɔyɛ.

¹² Ba sɩ kʋ chɩŋ dɩ-bolii aŋ naʋ, ba bɩ wuo jɩmʋ. Ŋɩɩ nɛ ba faasa ŋmuŋmoo niiŋ, a kɛŋ ba gɛnnɩŋ kɩɛsɛ aŋ ŋaa hagɩla hɛ ba nyusuŋ lɛ.

¹³ Ŋɩɩ nɛ ba kʋ hɔŋ tinteeŋ, ba dɩ Job kala, wɩɩhɛyɛ arɩ tɩtaŋɩŋ tapʋlaa balɩpɛ. Ba kʋŋkala bɩ wɩɩ bʋla ʋ teeŋ, bɛɛ wɩaa ba fa na hɛɛ-la ʋ sɩ chaasaa na nɛ.