JOB 16 - WƖA TENIŊ

Wɩalɩŋ Job sɩ bʋla a mʋ tɩgɛ Ɛlɩfas wʋbʋlaa lɛ

¹ Ŋɩɩ nɛ Job ma bʋl:

² “Mɩ nɩɩ wʋdosunuŋ deemba yʋgɛ nɛ aŋ ka, ma kala kaa jʋjʋʋ mɩ lɛ ŋɩɩ, ma bɩ nʋʋ bɔyɛ wuo nyagɛ.

³ Ɛɛ nɛ maa chɛ dɩ ma bʋl ma wʋpɛɩba-la a diene magɛ? Bɛɛ nɩɩ walɩmɛma, ma bʋbʋl wɩaa deeŋ deeŋ?

⁴ Mɩ ma fa jaŋ wuo bʋl wɩaa a nagɛma, dɩ ma nɛ fa hɛ wɩɩŋ deeŋ tʋɔŋ mɩ sɩ hɛ. Mɩ fa jaŋ wuo chaasa bʋl wʋsɩŋŋaa ma lɛ, a jɩma chugisi nyuŋ ma teeŋ.

⁵ Mɩ-na fa jaŋ bʋl wɩaa nyaasɛ ma nyuŋ, dɩ mɩ niiŋ wʋbʋlaa nyagɛ ma bɔyɛ, dɩ ma yaraa pɛ dɔŋɔ lɛ.

⁶ Ama dɩ mɩ nɛ bʋl wɩaa ma, mɩ hɛɛ-la mɩ sɩɩ na bɩ fɩɛlɛ. Dɩ mɩ nɛ tɔrɛ mɩ niiŋ ma, hɛɛ-la bɩ dɛrɛ.

⁷ Wɩa, wʋtɩtɩɩ, ŋ kɔsɛ mɩ kala nɛ. Ŋ kpʋ mɩ dɩa nɩaa kala nɛ.

⁸ Ŋ leŋe mɩ kala kɔŋ nɛ, aŋ ka haŋgbelee dʋndʋŋa. Nɩaa joŋ ŋɩɩ ʋ ŋaa magɩl arɩ mɩ ŋaa wʋcheeru nɛ.

⁹ Wɩa bɛrɛmɛ nɛ, a na baanɩŋ mɩ nyuŋ a kɛmmɛ pʋɔsɛ, aŋ dɩdɩŋ nyɩlaa mɩ nyuŋ, mɩ dʋndɔmɔ chaarɛ sɩaa pɛ mɩ lɛ nɛ a gɩgɩɛnɛmɛ.

¹⁰ Nɩaa bʋl wɩaa a sisieri mɩ lɛ nɛ. Ba yie fallɛ mɩ chaŋkpaŋɩŋ lɛ, aŋ mʋmɔmmɛ. Ba pɛ dɔŋɔ lɛ nɛ a sii chɩŋ mɩ lɛ.

¹¹ Wɩa jommi hɛ nɩbɔŋŋɔɔ nɩsɩŋ lɛ nɛ. Ʋ jommi yuo hɛ tʋɔhɛɩ tɩŋŋaa nɩsɩŋ lɛ nɛ.

¹² Wɩaa fa zɔmɔ pɩmɛ nɛ, ama lɛɛlɛ ʋ ŋmoomi yɛrɛ nɛ. Ʋ kɛŋ mɩ baŋŋaa lɛ nɛ a chagɛmɛ bʋrɩgɛ. Mɩ lɛ nɛ ʋ lɩɩsɛ sɩɩŋ pɛ.

¹³ Ʋ to-yuoroo gollimi hɛ nɛ. Ʋ bɩ mɩ nenige fá, aŋ tɔɔ mɩ chʋchɔ-biee bʋrɩgɛ, a yagɛ mɩ lɩɩmɩŋ ma yɛrɛ ta tinteeŋ.

¹⁴ Ʋ tʋɔrɛ mɩ nyuŋ nɛ bʋlɩa bʋlɩa. Ʋ yie guu kɔ mɩ lɛ a nagɛ laalɩyuori-wajɩa.

¹⁵ Mɩ tʋɔŋ cheye nɛ mɩ laalɛ gɛrɩ-kɔsʋmɔɔ, mɩ doluŋ dɛrɛ nɛ mɩ hɔŋ kʋŋkɔlʋŋ lɛ.

¹⁶ Mɩ yele nɛ mɩ sɩaa kala fɩɛsɛ, a ŋmɛrɛ tɔ a bɩra bɩ na woruŋ.

¹⁷ Arɩ ŋɩɩ kala mɩ bɩ yuosu hɛ, mɩ Wɩɩ-chʋɔlʋŋ kala nɛ pʋlla.

¹⁸ Tinteeŋ, sɩ́ wʋbɔŋ-la ba sɩ ŋaa mɩ lɛ gbaa tɔ, sɩ́ gbaa tɔ dɩ mɩ nii-ŋmobo-la mɩ sɩ ŋmoboo chɛ wʋtɩtɩɩ.

¹⁹ Lɛɛlɛ, mɩ nɩɩ-la sɩ pɛ na mɩ wɩɩŋ hɛ Wɩa-jaŋ lɛ nɛ, nɩɩ-la sɩ jaŋ bʋla laamɛ hɛ wɩa-nyuŋ nɛ.

²⁰ Mɩ nandɔnsʋŋ ka sieri mɩ lɛ nɛ, mɩ sɩaa sɩɩ pɛllɛ sɩlɩɩrɩŋ, ka mɩɩ sʋl Wɩa.

²¹ Mɩ fa jaŋ cho dɩ nʋʋ laa nuhuobiine nyuŋ a sʋl Wɩa, a nagɛ nʋʋ sɩɩ sʋl dɩ ʋ laa ʋ nandɔŋɔ.

²² Jɩsɩŋ baŋmɛnɛ nɛ ka, ka dɩ mɩ mʋ lɛlɩŋ, lee-la nʋʋ sɩ jaŋ mʋ a bɩra bɩ mɩɩrɛ.