JOB 12 - WƖA TENIŊ

Job bʋl wɩaa pɩ Zɔfa

¹ Ŋɩɩ nɛ Job bʋl:

² “Wʋtɩtɩɩ, ma bɩɩna arɩ ma dʋndʋŋa nɛ kɛŋ wʋjɩmɩŋ, dɩ ma nɛ sʋba, wʋjɩmɩŋ jaŋ lɛl.

³ Ama mɩ dɩ ma kala wʋjɩmɩŋ magɛ dɔŋɔ nɛ. Mɩ bɩ muuro ma teeŋ wɩɩkala lɛ. Kʋbɛɛ nɛ bɩ wɩaa deemba kala ma sɩ bʋla jɩŋ?

⁴ Mɩ mɩɩra ŋaa mɔmɩɩ nɛ mɩ nandɔnsʋŋ teeŋ, mɩ-na nɩɩ-la sɩ chʋɔlɛ Wɩa ʋ laa mɩ sʋla. Mɩ ŋaa tʋɔpʋl tɩɩna nɛ a bɩ wɩɩkala ma ŋaa chei.

⁵ Nɩalɩŋ wɩaa sɩ bɩ walɩmɛ ka sieri mɩ lɛ nɛ, a yiyigi nʋʋ sɩ sɩɛra a chɩchɛ dɩ ʋ tel.

⁶ Ama gaaraa hɔnɔ nɛ, wɩɩkala bɩ baa walɩmɛ, nɩalɩŋ sɩ ŋaa Wɩa baanɩŋ sii ma kala hɔnɔ ta jɩa nɛ, a bibigisi ba doluŋ lɛ.

⁷ Ŋ-na pɩɛsɛ pʋsʋŋ dɩ ba dagɩŋ koo diibiisiŋ sɩɩ fil, ba jaŋ bʋla pɩŋ.

⁸ Pɩɛsɛ tinteeŋ kɩaa, ba jaŋ dagɩŋ, leŋ dɩ chenfile-la sɩ hɛ mʋgʋ-balɩŋ lɛ bʋla pɩŋ.

⁹ Kɩaa deemba kʋbɛɛ nɛ bɩ jɩŋ arɩ La TƖƖNA nɛ ŋaaba?

¹⁰ Kʋŋ na-kala sɩ kɛŋ mɩɩsɩŋ hɛ ʋ nɩsɩŋ lɛ nɛ, nuhuobiiŋ kala mɩɩsɩŋ lɩɩ ʋ teeŋ nɛ.

¹¹ Ŋ sɩ yie kɛŋ ŋ nandelimiŋ lenne jɩŋ kɩaa sɩma ŋɩɩ, ŋɩɩ tɩtɩa nɛ ŋ dɩgɩlaa ma yie cho dɩ baa nɩɩ wɩaa.

¹² Wʋjɩmɩŋ ŋaa nɩhɩasɩŋ kʋŋ nɛ, nɩalɩŋ sɩ diene dʋnɩa lɛ nɛ yie jɩŋ wɩaa bʋbʋɔŋ.

¹³ Wɩa nɛ ŋaa wʋjɩmɩŋ arɩ doluŋ kala Tɩɩna, ʋ nɩɩ chagɩlɛ nɩaa a jɩŋ wɩaa bʋbʋɔŋ ma.

¹⁴ Kʋ-la ʋ sɩ yige lo, nʋʋkala bɩra bɩ jaŋ wuo saaʋ, nɩɩ-la ʋ sɩ kaa tɔ dɩa ma, nʋʋkala bɩ jaŋ wuo lɩɩsʋ ta.

¹⁵ Dɩ ʋ nɛ sɩ duonuŋ sɩ́ nɩɩ, leriŋ yie hɩl nɛ, dɩ ʋ nɛ bɩra sɩ duonuŋ nɩɩ, ʋ yie nɩɩ nɛ a chei leriŋ kala.

¹⁶ Ʋ nɛ kɛŋ doluŋ a yuo didii ʋ dʋndɔŋŋɔɔ bʋa na-kala, ʋ nɛ kɛŋ nɩɩ-la ba sɩ nyɩsa arɩ nɩnyɩsɛra kala doluŋ.

¹⁷ Ʋ nɛ yie kɛŋ sɩpaalaaraa wʋjɩmɩŋ kaa laa, aŋ leŋ ba ŋaa wɩaa a nagɛ nɩyaaraa.

¹⁸ Ʋ nɛ yie kɛŋ nɩaa kuoruŋ laa aŋ leŋ ba ŋaa dansarɩkaba.

¹⁹ Ʋ nɛ yie kɛŋ Wɩɩsʋllɩ sɩpaalaaraa arɩ nɩalɩŋ sɩ kɛŋ doluŋ a kaa muuri.

²⁰ Ʋ nɛ yie leŋ nɩalɩŋ lɛ nɩaa sɩ joŋ ba yɩɛlaa hɛ niiree maa, aŋ leŋ nɩhɩasɩŋ bɩra bɩ wɩalɩŋ sɩ ŋaa wʋtɩtɩɩ arɩ wɩalɩŋ sɩ bɩ wʋtɩtɩɩ ŋaa bʋa jɩŋ.

²¹ Ʋ nɛ yie leŋ hɩɩsɩŋ dii kuoroo, aŋ kɛŋ nɩduoruŋ ma laalɩyuori kɩaa kaa laa.

²² Ʋ nɛ yie kɛŋ kʋŋkala sɩ faa kaa kʋ lɩɩ pʋlʋmʋŋ, aŋ leŋ lere-la sɩ chaasa biri pʋllɛ.

²³ Ʋ nɛ yie leŋ tinteyee kɛŋ doluŋ aŋ bɩra cheiba, a bɩra leŋ tinteyee jallɛ, ka ʋ kɛmba pɩsɛ.

²⁴ Ʋ nɛ yie leŋ ba sɩpaalaaraa yaarɛ a leŋ ba yeŋŋi a lɛl,

²⁵ a leŋ ba lɩlaarɛ birimiŋ lɛ a bɩ pʋlʋmʋŋ kɛnɛ, a gɩgɛrɛ a nagɛ nɩaa sɩ bugo.