JOB 11 - WƖA TENIŊ

Zɔfa sɩ suomo bʋl wɩaa pɩ Job

¹ Ŋɩɩ nɛ Zɔfa sɩ ŋaa Naama tɩɩna ma bʋla pɩ Job:

² “Ŋ bɩɩna nʋʋkala bɩ jaŋ wuo bʋl wɩɩ wʋdaŋ-la lɛɛ? Wʋbʋl kɩŋkɛŋ-la bɩ jaŋ wuo leŋ dɩ ŋ laa kʋsɩŋŋaa.

³ Ŋ bɩɩna ŋ wʋbʋlʋŋ kɩŋkɛŋ jaŋ wuo leŋ dɩ nɩaa tɔrɛ ba niiŋ? Dɩ ŋ nɛ mɔŋ Wɩa lɛ, ŋ bɩɩna nʋʋ tuo sɩ jaŋ wuo kɛnɩŋ tʋra kɩɩ?

⁴ Ŋ yie bʋla pɩ Wɩa, ‘Wɩalɩŋ kala mɩ sɩ laa dii tʋʋla nɛ, mɩ tʋɔŋ pʋla nɛ ŋ sɩpaaŋ.’

⁵ Dɩ Wɩa nɛ fa jaŋ suri ʋ niiŋ a bʋl wɩɩ hɛ ŋ lɛ, mɩ tʋɔŋ jaŋ tɔrɛ,

⁶ a leŋ dɩ ŋ jɩŋ wʋjɩmɩŋ sɩ faa ʋ lɛ, nuhuobiine sɩ bɩ jaŋ wuo jɩŋ. Jɩŋ arɩ Wɩa paala bɩŋ dɔgɩsɔ a magɛ ŋɩɩ ʋ fa sɩ maga dɩ ʋ dɔgʋsʋŋ.

⁷ Ŋ jaŋ wuo jɩŋ Wɩa wʋkpuŋkperisiŋ sɩ magɛ ŋɩɩ bʋbʋɔŋ? Ŋ jaŋ wuo jɩŋ Wɩɩjarɩbakɔ doluŋ maŋŋaa?

⁸ Ʋ leŋie kɩɩ wɩa-nyuŋ, wʋbɛɛ nɛ ŋ jaŋ wuo ŋaa yi nɩmɛ? Ʋ luŋie kɩɩ sʋʋŋ bʋa ma. Ŋ jaŋ wuo jɩŋ ʋ luŋuŋ maŋŋaa?

⁹ Ʋ duomo kɩɩ dʋnɩa, a jalɩa kɩɩ mʋgʋ-balɩŋ ma.

¹⁰ Dɩ Wɩa nɛ kɛnɩŋ kɔ dɩ ʋ dii ŋ sarɩya, kʋbɛɛ nɛ jaŋ wuo bʋl dɩ ʋ sɩ́ dii?

¹¹ Ʋ jɩŋ wʋnyɩɛraa nɛ. Dɩ ʋ nɛ na wʋbɔmʋŋ, ʋ bɩ jaŋ leŋu ta pɛɩ.

¹² Nɩyaarɩŋ bɩ jaŋ wuo kɔ dɩ ʋ kɛŋ wʋjɩmɩŋ a nagɛ kaku-werigiŋ sɩ bɩ jaŋ wuo lʋl nuhuobiine.

¹³ Ama dɩ ŋ nɛ joŋ ŋ tʋɔŋ kala pɩ Wɩa, a kɛŋ ŋ nɩsaa je a chʋɔlʋ,

¹⁴ aŋ joŋ ŋ wʋbɔŋŋɔɔ kala ta, a sɩ́ leŋe dɩ wʋbɔŋ kala kpagɩŋ,

¹⁵ ŋɩɩ nɛ jaŋ leŋ dɩ ŋ kɛŋ ŋ nyuŋ je dɩ hɩɩsɩŋ sɩ́ŋ kɛŋ. Ŋ jaŋ chɩŋ kpaŋkpaŋ a bɩ wɩɩkala ka fá.

¹⁶ Ŋ jaŋ yʋ ŋ wʋwalɩmaa kala, ba jaŋ nagɛ lɩɩŋ sɩ pɛllɛ viiri, ŋ bɩra bɩ ba wɩaa liisi.

¹⁷ Ŋ mɩɩsɩŋ jaŋ bɩra chaanɛ a kɩɩ wɩɩhɛyɛ, dɩ ŋ birimiŋ ma nagɛ chʋchʋɔŋ.

¹⁸ Ŋ jaŋ hɔŋ sɔm, ŋ bɩ wɩɩkala ka fá, bɛɛ wɩaa ŋ kɛŋ yɩɛlaa nɛ. Ŋ jaŋ beŋ ŋ sɛsɩŋ lɛ aŋ na arɩ ŋ kɛŋ wiese nɛ.

¹⁹ Ŋ jaŋ pɩŋ doŋ a ta jɩa, nʋʋkala bɩ jaŋ leŋ dɩ ŋ bɔyɛ joŋ. Nɩ-daŋ jaŋ cho dɩ ŋ pɛ ba ma lɛ.

²⁰ Ama nɩbɔŋŋɔɔ jaŋ haa niiŋ a bɩ jɩŋ wɩɩ-la sɩɩ ŋaa ba lɛ. Ba jaŋ jɩŋ arɩ wombii-kala tuo ba sɩ jaŋ to a fori, ba yɩɛlaa kala nɛ sʋʋŋ.”